وينه العيد ؟

وينه العيد ؟؟؟؟؟

يا يمه العيدعليك يتبارك
وموفور الصحة ان شاء الله يابا
(جميلة ) الامنيات تصبح قريبة
وبالخير دوام يمطر سحابا
والعيد الجاي زي ما تريد
والافراح نقدل في ( رحابا)
السنة الجاية في بيتك
والحنة انت تضوق خضابا
الاف الامنيات والتهاني
ونسال الله الاجابه
يا يمة عيدكم يا هو الزمان ؟
اصلو الغربة يا يمه عيده يابا
عيده يمه طعمه ماسخ
عيده يمه مليان بالرتابة
لا بنعرف فيه يمه نضحك
ولا بيمسح من عيونا الكابة
صحي صلاتهم زي صلاتنا
لكن صلاتهم قانونه غابة
والماهو جنسك وما هو لونك
سلامك حتى ما بديه اجابه
كل شي موفور الا الضحكة
كانها ممنوعة بامر الرقابة
يا يمة مشتاق لي عيدكم الزمان ؟
الشوق في عيون الناس يتشابا ؟
ولي ناس بالاحضان بتسالم
كلامه دافي وجميل ترحابه ؟
بالعفو والعافية الناس تتسابق
وخصام قديم تنساه وتتغابا
بالعيدية اطفالنا الحلوة بتفرح
كل الناس فاتحة ابوابا
الفرح يتغشى زقاقات الحلة
ما بنسي غني او حتى غلابة
شجرة البدوي ولمة شفع
لابسه جديد وشايلا العابا
قدح اللمين يتطاير بوخه
ناكل فيه لامن نابا
حلقة ذكر ونوبة تدق
درويش بترجم اشواق وصبابه
يايمة كيفن نلقى الفرح
وفرحنا هنالك بالحلة وتحت ترابه
يا يمه انت عارفه افراحي
موية جدول ساقيه سرابه
يا يمة اعياد من غيركم
من اعمارنا اسقطنا حسابا
يا يمة العيدعليك يتبارك
وموفور الصحة ان شاء الله يابا