التميز خلال 24 ساعة | |||
العضو الأكثر نشاطاً هذا اليوم | الموضوع النشط هذا اليوم | المشرف المميزلهذا اليوم | |
قريبا |
بقلم : |
قريبا |
آخر 10 مواضيع |
الإهداءات | |
|
«۩۞۩-منتدى الحصاحيصا الحر-۩۞۩» ساحه للحوار الحر والمواضيع العامه التى تهم كل ابناء مدينة ومحلية الحصاحيصا بصفة خاصة وكل السودانين بصفة عامة |
|
أدوات الموضوع | انواع عرض الموضوع |
#1
|
||||||
|
||||||
السودانيات "زين وعين** ودين"
ورد في التاريخ او ربما الجغرافيا ان ليلي الاخيلية دخلت علي ملك ذلك الزمان اذ ضربتها فلسة ماكنة, فتونس معها الامير وتذاكر معها احوال المسكين قيس الذي شوكشته و ضيعت حنانو, فقال لها الامير: تعرفي يا ليلى, قيس قدانا بي جمالك لمن كرهنا البلي وتنس الطاولة معاو, لكن بصراحة – واعفي لي يا انتي- ما شايف لي جمالا كده لامن ينضمو بو (علامة استفهام مع كم علامات تعجب ظهرت باللون العسجدي**** فوق راس الامير) قالت ليو: انه كان يراني بعينين ليستا في رأسك. فاحس الامير كانما كبت عليه جردلا ساقطا من الفريزر. فانك لن ترانا بعيوننا: لدي صديق -غير سوداني- معجب ايما اعجاب بالسودان, حكومة وشعبا ومعارضة زاتو, دينا وعادات وربما حتى لون البشرة, ولله في خلقه -كما تعلمون- شؤون. لاحظت منذ تعرفت عليه انه احبني جدا قبل ان ابذل ما يكافئ هذا الحب, بعدها عرفت انه يحب كل ما يمت الي السودان بصلة, ارض الامل علي حسب رؤاه. ما يهمني في هذه الوقتة*** من عمر الزمان هو رأيه في السودانيات, فقد سألته -لشئ في بطني- عما اذا كان ينصح بالزواج من غربية, عربية او سودانية (لاحظ موقعها في ضنب القائمة كما موقع فرقنا البطلة في البطولات كافة) فاجابني مندفعا ان "السودانيات زين وعين** ودين”, وطفق يمدحهن مدحا لولا كبر سنه ومعرفتي بحسن نيته وطويته, لربما تعطلت عندها لغة الكلام واشتغلت لغة ام دلدوم مع زول يتغزل ببنات بلدك قدامك, وانه قد ذكر فيما ذكر : -ان السودانية "من جوه راجل ومن بره مره" وهذا – وعجبا اذ تعجب- في مقام المدح وليس الذم. -وقال ان الزمن لو عاد به لما تزوج الا سودانية -كلام خشم ساهل-. -وقال انه لا توجد غربية تستاهل سودانيا ولو ضربت رأسها باعرض حائط, وليس غير سودانية (دي قنبلها كبيرة صراحة, ولو ما خفت زعلو كان قلت ليهو زززززززننننننن*). تظاهرت طبعا بالتفهم وانا اخفى ضحكاتي الشاهقة وراء نظرة توحي بالاهتمام, فماذا كان عليّ ان اتوقع من شخص معجب بالبشير وحكومته الميامين!؟! بعد حين بدأت اجتر كلامه بطريقة ميكانيكية تشبه ما تفعله المعيز -اي دون استطعام للكلام- ذلك ان تجاربي مع كبار السن تؤكد انهم غالبا علي حق, فقررت ان اتعرف علينا اكثر, وان انظر الينا "بمآق غير ماقينا". بدات بقائمتين, واحدة تحتوى سيئات السودانيات -السودانيين خلوهم هسي, ديل دايرين دفتر مخازن كبير- واخرى تحتوى المزايا. طبعا كما توقعت, بدأت احدى القائمتين -وما بقول ياتي فيهن- بدأت تطول وتطول كليل تهاوى كواكبه, بينما الاخرى لم تزد على نقاط تعد علي اصابع رجلي ديك اصلع, فكرت ان اطرح الموضوع للمضاربة العامة -الرجاء قراءة التنبيه ادناه قبل البداية- ولنحاول ان نصل الي رؤية توافقية ترجيحية متزنة, مع طلب لجانب النساء بعدم الخوض في هذا الحوض, اذ انهن موضوع النقاش, وكل قوانين البحث العلمي تحرم علي العينة المشاركة في التجربة بأي شكل كان وتحت أي ظرف, فنرجو منهن ان يتفرجن ساكت ويرجن النجيضة. التماس: ارجو مناقشة الامر بكافة جوانبه, فقط دون شلاليت لو سمحتم, خاصة اولئك الذين ينتعلون كدارات. حاشية: *زززززنننننن: اصلها "زن" كما ورد في المعجم الاكبر من الصغير, اداة تعجب ومبالغة وضمير رفع مستقل, وتكرار الزين والنون للتؤكيد, تفيد ان الشخص المخاطب قد فك درابةً كبيرةً, ومن مرادفاتها "دُل" ونحوها من ادوات كشف الكذب. ** عين: ما عرفت معناها لي هسي. ***وقتة: مؤنث "وقت" غير السالم. ****العسجدي: اذا كان في لون بالاسم ده. |
07-28-2009, 04:44 PM | #2 | |
|
اقتباس:
لك التحيه اخى فوتون وانت تعكس لنا وجهة نظر هذا (الرجال)،وحقيقه زى ما بقول المثل الصينى((شو تشنو شيقا ها تاشا)) ترجمة المثل:الما بعرفك بجهلك!! وطالما انو الموضوع موضوع دراسه وبحث علمى فانا بقترح انو تكون فى فرضيات للبحث وبعد داك الناس تدرس الفرضيات دى و تصل لى نتيجه..وكده ح نكون منصفين.. عموما انا معاك لحدى موضوع الزواج من السودانيات اما السياسه دى اختانا منها يا اخوى شان مستقبلنا وكده!! عموما انا ابداء ببعض الايجابيات وكده واتمنى مداخلة الشباب: اليك ابيات شاعرنا ود الرضى وهى فيها ابلغ وصف قالت وداع لي قلوبنا صاح .. اتبكمو الناس الفصاح الجن صحا وجنو النصاح.. الجاهلة مي جاهلة نصاح جات من تقوم ترعى الضنى.. الربرباي يا حسبنا تــنت الكتيف في الانبنا.. الجاهلة يحفظا ربنا قلت ليه رف قال لي بعيد لوكان قريب يوم الوعيد قلت ليه درني اكون سعيد .. قال لي ولا في كل عيد قالت جارتها مجاوراها تجي شايلة وتجي مزاوراها تلحظ احتياجنا براها .. نشكر سعيها بي وراها ربنا بالجمال كافاها لامن قال قواما كفاها المسرورة مي تافاهة .. يا حلاة الكلام في فاها مي العزاية دايماً سادا.. ومي الغبشة المغبرة حادة مي اللهفانة بي ورا المادة.. دي اللي شبابا ديمة موادة ومن صابحتها وماسيتا .. طاعمة وناعمة لو مسيتا ما قاستني ما قاسيتا .. وتشكر فضلي كل ما كسيتا وليه ما اشكرا مطاوعاني .. حافظة لي متعتي وحافظاني حاوية من الانوثة معاني .. مهما ابقى مر بالعاني ان كان يوم حبيب واصلي .. الكرم العريض يوصلي منها قط خلاف ما حصلي .. بس ازعاجها لي قوم صلي تحياتى فوتون لا زال الرجل ينتقل من صينيه الى اخرى ويقول انه عبقرى،ويصيح نادوا لى فوتون،وعندما نسأله يقول انك الوحيد الذى يعلم انه عبقرى وليس مجنونا!! شكرا فوتون ولى عوده... |
|
جاييك يا آخر المواني من ظلمة البحر الممدده في الفراغ ... جاييك من غربة الجزر المسورة بالهواجس والضياع جاييك معاي ملح التجارب ذي محارب مجروح و خايض في الغبار لكني ثابت في المدى واقف أنا ودايس على الإبر المسممة بالكلام علمني غدر الناس أشوف واتحدى نار كل المصائب ..والظلام..
•
الحصاحيصا تحتل الفضائيات السودانيه
• مبدعون ومشاهير من ابناء مدينتى الحصاحيصا • ذكرياتى واجمل الايام فى مدينة الحصاحيصا |
07-29-2009, 10:09 AM | #3 |
|
اهو قاعدين وبنتفرج على حسب تعليماتك
لكن وين نقاشكم حول الموضوع ؟؟؟؟ وين النتيجه الوصلتوا ليها ؟؟ ولا بس كان الموضوع مجرد تريقه علينا وبس ؟؟ |
لسه ما عملت توقيع
|
07-29-2009, 11:17 AM | #4 |
|
الله...
وانا اقرا الموضوع ..شعرت بشى من السعادة اتدرون لماذا؟؟؟ رجل اجنبى...يعرف قيمة المراة السودانية والسودانيين نعم لا اشكر انفسنا...ولكن حقيقة ...السىء فينا امراة او رجل ...احسن من غيرنا كثير تخريمة: للرجل السودانى شعورك شنو ورجل اجنبى يعرف قيمتنا ...ويمدح فينا؟؟؟ التحية لك اخى الفاضل فوتون ولى عودة فللحديث بقية احترامى |
|
07-29-2009, 02:11 PM | #5 |
|
فوتون
رائع جداً الموضوع وروعته في سلاسة السرد ولغته الجميلة . والله المراة السودانية مظلومة ظلم الحسن والحسين ومصدر هذا الظلم جلبته بعضاً منهمن لأنفسهن بمجاراتهن للثقافات الخارجية بنوع من الاستهتار واللامبالاة . فنجد فعلاً ان المراة السودانية كما قال هذا الرجل تدمج الجنسين الناعم والخشن في تركيبتها فهي في الشدة تساوي عشرة رجال مجتمعين ،،،،، وحالياً من ينجب بنتاً عليه ان يفرح ومن ينجب ولداً عليه ان يستعوض الله فيه . فالبنت داخل البيت هي من يهتم بسكانه فتجدها تمثل الام لحظة فقدانها فتشمل جميع من كان اصغر او اكبر منها بعطفها وحنانها وتهتم بالامور المنزلية ونحن نتذمر وتتزعج عندما تطلب منا ان نغير شيئاً في البيت . وتكون اباً ايضاً لحظة فقدانه فتخرج للعمل حتي تلبي متطلبات البيت ولوازمه وتجدها امامك عند كل كبيرة وصغيرة . وحتي في حالة وجود الاب والاخ وبقية الاسرة تكون هي علي هذا الحال وإذا حدث لك شئ لا قدر من مرض وماشابهه تجدها تتألم لِألمك رغماً عن قسوتك معها وتكون في حالة ذهاب واياب بين مرقدك وما هو مفروض عليها من اعمال في البيت .. فتخيل هذه طباع البنت داخل البيت هل تتغير هذه الطباع عندما تتزوج اكيد لا الا إذا كان من تزوجت به هو انسان لا يقدرها ولا يحترمها ،،،، فان احترمتها وعاملتها علي انها انسانة تملك من المشاعر والاحاسيس ما تملك انت وأكثر وقدرت فيها انوثيتها بحكم الطبيعة التكوينية ووضعت فيها الثقة ستجدها امراة بداخلها رجل حق وحقيقة وستجدها مكملة لحياتك بالشئ الذي يعجبك وتتمناه . وهذا الكلام لا ينطبق اكيد علي جميع البنات ولكن هنالك فيئة قليلة منهم انجرفت خلف التقليد الاعمي لبنات الغرب والخليج في الثقافات والعادات والطباع ونوعية المعيشة واضحت تمثل الجانب السئ للسودانيات . نسأل الله أن يهدينا لما فيه الخير تحيااااااااااااااااااااااااااااتي |
|
07-31-2009, 12:52 PM | #6 |
|
ان تجاربي مع كبار السن تؤكد انهم غالبا علي حق, فقررت ان اتعرف علينا اكثر, وان انظر الينا "بمآق غير ماقينا".
بدات بقائمتين, واحدة تحتوى سيئات السودانيات -السودانيين خلوهم هسي, ديل دايرين دفتر مخازن كبير- واخرى تحتوى المزايا. طبعا كما توقعت, بدأت احدى القائمتين -وما بقول ياتي فيهن- بدأت تطول وتطول كليل تهاوى كواكبه, بينما الاخرى لم تزد على نقاط تعد علي اصابع رجلي ديك اصلع, اولاّ الاخ فوتون حمدالله على سلامتك وبركه الشفناك طيب طبعاّ انا ما عارف السر فى اختيار ارجل ديك اصلع لعملية العد (قصدك شنو فى الحته دى ؟؟؟) . وبالعوده الى محور نقاشنا ومن خلال معايشتنا لواقع السودانيات كخالات وامهات وبعلات (حتة اخوات تجاوزناها لاننا عزابه) . السودانيات بيحملن نفس عاداتنا وتقاليدنا . كريمات وساترات حال . نضيفات وعفيفات . بيرتن لشريك الحياة (يرتن تعنى . يخافن من ان يثقلن عليه بالطلبات) . صلايات قوامات . حنينات . حافظات لازواجهن . قنوعات . هذا من جانب ومن جانب اخر نجدهن شماراتيات نقناقات بيغرقن فى شبرمويه ( مجرد طفل واحد وتنسى راجلها . لازينه و لا حنه ) اغلب وقتهن مجاملات . ديك طلقوها وفلانه عرسوها ووووووووو. جنهن ختات وصناديق وعده . وتطول القائمه . عزيزى فوتون حتى تواصل العد فى القائمه التانيه انصحك بالاستعانه باصابع ارجل ام اربعه واربعين (شرط ان تكون ذات خنفس) |
التعديل الأخير تم بواسطة ابو امجد ; 07-31-2009 الساعة 04:24 PM
|
08-01-2009, 10:43 AM | #7 |
|
ود الهساهيسا
سلامات وتحيات, ليك ولي زولنا الما لاقيلو زولا يفهمو, الله ليهو. اما عن الفرضيات فهي في ثنايا الحديث و"كَفَّتَه" وارجو ان يكون النقاش حولها ثر ثرارة شديدة. اشكرك بشدة وكبك علي القصيدة المسبوكة (وان لم ترفق معها شرح للمفردات الصعبة التي جهجهتنا), ومع احترامي لي ود الرضي وليك, لكن جنس الكلام ده هو المكبر روسينن (جمع راس وعند البعض رويس, مثل قولهم "شوف عليك الله الشافع اب رويس ده!؟") لكن بي كل صراحة: دي كيفتني شديد. |
|
08-01-2009, 10:46 AM | #8 |
|
انتي بس لوكي الصبر رجاءا, جاياك "علوما" تقيلة اكان الله هون.
في الحقيقة بي رؤيتي الانا خاتيها للموضوع وتوقعاتي, تكون سلامة كبيرة اكان وقف علي التريقة, ربك يستر بس. اشكرك علي حسن التزامك بالتوجيهات -الا قليلا- والان رفعنا القيد, دحين خوضي سااي كان خايضة, بي عافيتك. |
|
08-01-2009, 11:01 AM | #9 |
|
روعة
آسف لاخبارك انني اشعر ان شعورك لن يدوم طويلا. وهذا هو مربط خروف الضحية. "الما ضاق العرديب بفتكرو عسل لونو غريب" كما يقول مثل مأخوذ من مذكرات فولترون وغراندايزر. ولك مثلها, واضعاف كثيرة. |
|
08-01-2009, 11:12 AM | #10 | ||
|
عارف
اشكرك جداَ* يازول! متاكد!؟ اقتباس:
اقتباس:
ولك تحيات طويلة مثلها ويزيد. حاشية لا بد منها: *جداَ بفتحة واحدة: اي كثيراً, ففي عصر السرعة فتحة واحدة تكفي, ومافي داعي لتضييع الوقت والحبر في الفتحة التانية |
||
|
08-01-2009, 11:33 AM | #11 | |
|
ابو امجد
الله يسلمك, وتشوف بيت الله الحرام, حاج ومعمر, شاب ومعمر. اقتباس:
واما الصلع, فدلالة علي انو ديك ما ساهل وود ناس. انتهت حصة العلوم, ولنعد للموضوع. ارى انك تفوقت علي صاحبي في كيل الثناء بالكيلة.. . . ثم مضى مادحا الي ان قال الانصاف يضطرني غير راغب للاقرار بان هذه مشكلة عالمية (تماما كالاحتباس الحراري), ويقول الحكيم اللازوردي -رعاه الله- ان معظم محادثات التلفونات في امريكا عبارة عن غلاط بين الامريكيات لساعات طويلة في من ستصرف الصرفة الاولي في الصندوق, اوالحديث عن دكاكين العدة ومعروضاتها النظيفة المنظفة للجيوب. يقول كتاب العلوم ان ام اربعة واربعين اعتادت ان تحلق مارينزي, ووجود ذات خنفس يعد من الاماني غير ممكنة التحقق, بل ويذهب البعض الي انها من الاغراق الممقوت في الاحلام. حاشية ما ضرورية شديد, ويمكن الاستغناء عنها: ديكة*: مجموع ديك باللهجة المحلية لمحلية ام طرقا عراض |
|
|
08-01-2009, 02:18 PM | #13 |
|
فوتون
ارى انك قد فتفت (هذه ليست لها علاقه بالام) حجج السابقين تفتيتا وهاأنت تتوعدهم بالقول الفصل وهذا يعنى انك راقد فوق راى (وليس سرير) كما يعنى انك لن تقتنع بكل الحجج والتبريرات والادله والبراهين وإن سيقت او جات براها لذا دعنا ناخدها من قاصرها ونفتوا . ايها الفوتون ياخى يلا فتو وبلاش محركه |
•
بيع سراً,,بيع بخساً,,كان إسمه مصنع الصداقه للنسيج!!!
• سيادة دولة الرشاوى و سقوط دولة القانون( بالمستندات والوثائق) • الوالى ووزير الصحه والدواء الدوار... يجردون المستشفيات من الملابس الداخليه عمداً..!!!
التعديل الأخير تم بواسطة الشايقي ; 08-05-2009 الساعة 02:24 PM
|
08-02-2009, 04:15 PM | #14 | ||
|
اقتباس:
اقتباس:
وهذا لاينفى فعل الحنك عن سائر الاعمار فى البدو والحضر ولتقريب الفهم يحكى ان بائعاً من اعراب بنى قينقاع يدعى ابا رويس مرت به احدي الحسناوات لتشتري شيئاً من عنده ،فسألته:بكم هذا يا حاج. فرد عليها:انا لم احِج بعد ولكني اديت العُمرة فيمكنك مناداتي يا عمري!!!! اها شفته الحنك كيف؟جدعه ليها كده وركب حمارو وشتت،اها هى البقت ساكاو لحدى ما راسو كبر وبدل كان اب رويس بقوا يقولوا لى اب راس...وقع ليك ولا اعيد ليك؟؟ |
||
جاييك يا آخر المواني من ظلمة البحر الممدده في الفراغ ... جاييك من غربة الجزر المسورة بالهواجس والضياع جاييك معاي ملح التجارب ذي محارب مجروح و خايض في الغبار لكني ثابت في المدى واقف أنا ودايس على الإبر المسممة بالكلام علمني غدر الناس أشوف واتحدى نار كل المصائب ..والظلام..
•
الحصاحيصا تحتل الفضائيات السودانيه
• مبدعون ومشاهير من ابناء مدينتى الحصاحيصا • ذكرياتى واجمل الايام فى مدينة الحصاحيصا |
08-05-2009, 01:44 PM | #15 |
|
تحياتى فوتون
والله نحن غايتو ماشين باغنية وردى: بنحب من بلدنا ما برة البلد سودانية تهوى عاشق ود بلد نحن سودانيين اولاد سودانيات واكيد بناتنا بكونوا وارثات (اكيد ما كلهم ) كتير من الصفات الجميلة البتعجبنا فى امهاتنا وحبوباتنا عشان كدة انا بتفق مع زولك داك ,,,, تخريمة: يا فوتون شكلك كدة ما براك حقو تعمل بالمثل البقول: كان ما لقيت البتحبو حب البتلقاهو |
حصاحيصا ياام المدائن والقرى
من روحى بقريها السلام كل مانسيم الليل سرا |
08-15-2009, 10:33 AM | #16 |
|
و الله يا فوتون ياخوي , القصه قصة منظور زي ما إنت قلت .
عمك ده بكون كشًف للجماعه ديل من وجهة نظر ما أتكشًف لهن بيها من قبلكم لا إنته و لا راغب علامه ! . تصدق لو قلت ليك أنا كلما أجي السودان بتجيني رطوبه ! , بالذات في الحصاحيصا ! . و ما إكتشفت السبب بتاعها إلا بعد تلاته زيارات لتلاته دكاتره ! و البركه في آخر كليب لنانسي عجرم , حضرتو لما جاتني رطوبه ! . بعد داك القصه وضحت !!! فيا سيدي الآمنت بيك ,,,, نسوانا ديل زين و زين و زين و مافي كلام فيهن تب . يمكن نحنا شهادتنا مجروحه , لكن برضو عندك شهاده أجنبيه و نحنا عندنا كم شهاده عربيه زياده كمان ! . P.s مستنين القول الذي سيحير جهيزه في صنقوعها ! ست العرقي الجنب الداخليه لسه مستنيه التركيبه السحريه لعمل المريسه من زيت الطعميه ! دمت مضيئاً |
|
08-15-2009, 11:02 AM | #17 |
|
الراي الجامع لما حواه, المستبعد لما سواه, فصل الخطاب, وبغية ذوي النهي والالباب قيل ان من شابه اباه فما تعدى ولا ظلم, ولا استوجب من عاقل النقم, هن مرآة لنا تصفو فيها صورتنا فلا كدر, وتجلو حقيقتنا دون حيف او بطر, المستقبح منهن فاصله عندنا, و المستنكر منهن فمبدأه فعلنا, أدبناهن في الصغر بادبنا, وقومناهن بعقلنا, يحببن ما نحب بحبنا اياه, ويكرهن ما نكره اذ قليناه, حافظات لنا فلا يملن حتى نميل, راضيات بعيشهن اذا قنعنا بالقليل. ما احببتموه منهن فاحمدوا الله عليه, وما كرهتموه منهن فمنكم وليس اليه. |
فوتون في حقيقة الأمر شخص بارز الصلعة مفتول الأشناب, مشقق الكدرين من كثرة إنتعال سفنجته في الحر, لم يعتد علي حمل محفظة للجيب إذ ليس لديه ما يضعه فيها.
|
08-15-2009, 11:11 AM | #18 |
|
نأسف للهنيهة التي طالت واستطالت كثيرا, حتى ان جهيزة امنت علي دقنوسها.
ترجمة عربية للرد الفوق: فالموضوع رعاكم الله علي خلاف ما يتبادر الي الاذهان, ومن قرأه قراءة حريفة (القراءة الحريفة هي ان تقرأ بعينك اليمين بينما تغطي الشمال بورقة فلسكاب) يستطيع ان يرى انه مدح في غلاف ذم, فانا قد قويت نقاط صاحبي المادحة بالتقرير واضعفت القادحة منها بالشك والتنكير (حتى من كلام ابو امجد اقتبست فقط النقاط المادحة, والعنوان نفسه مدح من العيار ثقيل الثقيل) فانا اعتقد جازما ان السودانية هي انسب خلق الله للسوداني, ما لانها سوبر استار -حاشا وكلا- ولكن ببساطة لانها بتشبهو, تخيل شخصا يعشق ملاح الويكاب او ام بقبق, وزوجته تموت في الكارتوفل كيزا!! بالتاكيد الامور ستصطدم بعرض الحائط ان عاجلا او آجلا, وفي احسن الاحوال ستصطدم بطوله. وكما تقول ادبيات الخنافس الملونة: "هذا الفول من تلك القدرة" ولم يحدث -في التاريخ المكتوب علي الاقل- ان ارضا زُرعت لالوبا فانبتت كورن فلكس. فالقصة مداعبة ليس الا, ونوع من العرفان وان كان علي الطريقة الحلزونية المرتدة. هذا واسأل الله ان لا يدع في هذا المنتدى عازبا الا زوجه, ولا عازبة الا زوجها, ولا متزوجا الا دبل له, ولا مدبل الا تلت له, اما المتلت فكفاهو كده. |
فوتون في حقيقة الأمر شخص بارز الصلعة مفتول الأشناب, مشقق الكدرين من كثرة إنتعال سفنجته في الحر, لم يعتد علي حمل محفظة للجيب إذ ليس لديه ما يضعه فيها.
|
08-15-2009, 11:17 AM | #19 |
|
اشكرك يا الشايقي علي ثقتك الغالية في قدرات حضرتنا التفتيتية, وارجو ان نكون دائما عند حسن ظنك.
كدى اقرا رؤيتنا السابقة وادينا رأيك. |
فوتون في حقيقة الأمر شخص بارز الصلعة مفتول الأشناب, مشقق الكدرين من كثرة إنتعال سفنجته في الحر, لم يعتد علي حمل محفظة للجيب إذ ليس لديه ما يضعه فيها.
|
08-15-2009, 11:29 AM | #20 | ||
|
اقتباس:
اقتباس:
|
||
فوتون في حقيقة الأمر شخص بارز الصلعة مفتول الأشناب, مشقق الكدرين من كثرة إنتعال سفنجته في الحر, لم يعتد علي حمل محفظة للجيب إذ ليس لديه ما يضعه فيها.
|
08-15-2009, 11:32 AM | #21 |
|
مرحب عارف
بخيت وسعيد عليكم. كان عملنا كده بتابو. |
فوتون في حقيقة الأمر شخص بارز الصلعة مفتول الأشناب, مشقق الكدرين من كثرة إنتعال سفنجته في الحر, لم يعتد علي حمل محفظة للجيب إذ ليس لديه ما يضعه فيها.
|
08-15-2009, 11:42 AM | #22 |
|
مرحب rasty
اما هذا فلا يعتد بقوله سواء كشّف او لم يكشِّف. كما قلنا اعلاه, بخيت وسعيد ان شاء الله. *عذرا rsaty علي تغيير لون الخط, خطك من الخلفية ما بتفرزوا الا بعمل تحليل للطيف المرئي. |
فوتون في حقيقة الأمر شخص بارز الصلعة مفتول الأشناب, مشقق الكدرين من كثرة إنتعال سفنجته في الحر, لم يعتد علي حمل محفظة للجيب إذ ليس لديه ما يضعه فيها.
|
08-16-2009, 09:10 AM | #23 | |
|
اقتباس:
معذره ...فوتون
ولكن ردك به شى غريب... ممكن اسال ؟ اولا: ذكرتفى ردك على بان شعورى لايدوم طويلا؟ ثانيا: هو مربط الضحية؟ اتمنى توضيح ..كلماتك المختصره وبه نوع...من عدم الرضى بالمراة السودانية فى الانتظار |
|
التعديل الأخير تم بواسطة روعه ; 08-16-2009 الساعة 09:12 AM
|
08-17-2009, 05:59 AM | #24 |
|
مرحب روعة
انت قلت: وانا رددت ان شعورك لن يدوم طويلا, عنيت انك ستحبطين من مجرى النقاش وستختفي كل اثار السعادة التي سببها كلامي دون قصد مني. مربط خروف الضحية= مربط الفرس , ضعي هذه مكان هذه وسيستقيم لك المعني. يبدو ان لغتي اربكتك قليلا, والامر كله مزاح وعرفان بالجميل كما وضحت اعلاه. اما عدم الرضا بالمرأة السودانية فهو كالمغنطيسية غير الدائمة, يزول بزوال المؤثر, وربما قبل ذلك. علي كل ارجو ان لا اكون قد اغضبتك بكلامي (اراك اكثرت من اللون الاحمر). |
فوتون في حقيقة الأمر شخص بارز الصلعة مفتول الأشناب, مشقق الكدرين من كثرة إنتعال سفنجته في الحر, لم يعتد علي حمل محفظة للجيب إذ ليس لديه ما يضعه فيها.
|
08-17-2009, 10:54 AM | #25 | ||
|
اقتباس:
لا تعليق فقد قطعت قولي اقتباس:
|
||
|
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
"اللهم أجعله خيراً" الحصاحيصا في ثوبها الجديد | الجــراوي | «۩۞۩-منتدى الحصاحيصا الحر-۩۞۩» | 3 | 02-19-2009 07:10 AM |
رسالة "" إلي "" الله "" والبشر ،، من لدن اّدم ،، | وقت المغارب | «۩۞۩-منتدى الادب والثقافة-۩۞۩» | 3 | 05-20-2008 01:33 PM |
مع اقتراب العام 2007 يتسابق " المنجمون " منقول | lord | «۩۞۩-منتدى الحصاحيصا الحر-۩۞۩» | 0 | 01-11-2007 05:38 PM |