سخانة الغربة

الغربة ؟
أااااااااااااااااااااااااااااااااااااااااااااااااا ااااااااااااااااااااااااااه من الغربة
قد تكون الغربة شئ عظيم أو قد تكون شئ سيء
شئ عظيم كأنو الشاب وقت يغترب بغترب عشان يكون نفسه ويجعل لحياه هدف
طبعا الايام النحن فيها أي شاب عاوز يكون ليهو بيت وعربية وزوجة صالحة ويكون مرتاح النفس والبال
فيكافح في الحياه الصعبة ويحاول بكل ما اوتى من قوة لانجاح هدفه الهو راسموه
وبرضوا قد تكون الغربة سيئة من جهة أنو الشاب وقت يغترب أكيد بغترب لوحده لا عندوا أب ولا أم ولا أخ أو أخت أو زوجة تراعيه وتشوف شنو الناقصوا
كمثال
أنا أسه شاب إنتهيت من الجامعة وخرجت برا بلدي وأغتربت
مع أنو كان ممكن أعيش ممعزز مكرم في بلدي
لكن ما بحقي بحق أهلي
وأنا ده ما الدايرو وأعتقد نفس الشئ مع كل شاب سوداني
عشان كده داير أكون نفسي بنفسي
كتر خيرهم أهلي ربوني وقروني وعملوا لي أشياء أي إنسان على وجه الأرض بتنمها وفي ناس ما عاشوا العيش الأنا عشتها
لكن الحمد لله عندي قوة عزم
أقدر من خلالها أعمل الكنت بحلم بيه
لكن برضوا أنا في الغربة لوحدي ما معاي أي زول يحن على أو يفقدني
طبعا في البفقدني
بس ما زي يكون واحد أهلك
وده رسالة إلي كل شاب سوداني
بقول ليهو إنت إذا كنت مستقر في بلدك
ما تحاول تتغترب
لأنو الغربة ممكن تغيرك من الأحسن إلي السئ

تحياتى اخ الوطنى
الغربة كانت الخيار المر للكثيرين واخشى ان اقول انتم السابقون ونحن اللاحقون
امنياتى بان ينصلح الحال وتتحسن الاحوال ويعود الجميع لحضن الوطن ,,,,
ارجو زيارة الرابط التالى:
http://www.alhasahisa.net/vb/showthread.php?t=6529
ولك الشكر والتقدير ,,,,

صدقته يالوطنى الغربه مره بس... بس قدرنا المكتوب علينا
فعلا قدر, كل واحد كانت ليه ظروف جعلتة يغترب وقرار الرجعه
صعب, والسنين بتمر من بين ايدينا وكل يوم بتقسى الظروف
علينا وبتتغير للاسواء ونحن تنطبق علينا المقولة البتقول
لالقينا بلح الشام ولا طلنا عنب اليمن , بس مشيناها خطى
كتبت علينا .

الغربة بي كل المقاييس هي اسوأ خيار ممكن الجأ ليو الشخص
لانها بتخصم منك اكتر من ما بتديك وعشان تقدر تلم ليك قرشين بتخسر وراهم كتيييييييييير بس البلد بتجبر الناس تتطلع وببقي مافي خيار والناس في النهاية بتضحي بي كل الاشياء الجميلة عشان شوية قروش تقدر تستر بيها حالا .والمثل بقول ما جبرك علي المر الا الامر منو .وربنا يرد غربة كل الطيور المهاجرة واستر غربتم . ودمتم

الغربه بكل معانيها لذا الانسان بس بتكون عندك اهداف وطموح

علشان كده مرات بتكون صعبه هي ضربت حظ يا اصطدها اواصطدك


فصبر جميل وانشاءالله ربنا يرد غربتكم

ربنا يوفقكم وتحققو كل طموحكم واهدافكم

وينولكم الفي مراضكم

هل عدد الواصلين في مطارات ومواني بلدي اكبر من عدد المغادرين......؟؟؟؟؟؟؟
ام هل عدد المغادرين من مواني ومطارات بلادي اكبر من عدد الواصلين.......؟؟؟؟؟؟؟
ام هل العددين متساويين......؟
بكل اسف وطننا يرفسنا رفسا مستحب ونحن نركض اليه بكل ما عندنا من قوة....اللهم اصلح الحال

سلام عاشقة الحصاحيصا
احب ان اهديك هذة القصيده عن هموم ومشاكل اقربة اللعينة وارجو ان تنال اعجابك انتي والاخوه اعضاء المنتدي.
ياغربة يابكاية .. ياغشاشة يامستهبلة .. تغرينا بى درهم قروش .. ووراه قنطار بهدلة .. جيناك لى سنتين وبس.. او قول تلاته نكملها.. نلقى المراد ونودعك.. نرجع حياتنا نبدلها.. نبنى البيوت فى العاصمة.. وبى كوم اثاث بنجملها..وكرونا حاره نحصرها..اصلة التنقل مشكلة.. ونكمل الدين بى مهل.. والسمحة جاهزة نحصلها..غير القروش اللى الاهل..عبر الشهور بنرسلها ..والباقى يدخل فى البنوك... ونشوف دباره نشغلها.. ناس فكرت تجنى العلم ..تبدأ الدراسة تواصلها..احلام كثيرة وشيقة..وآمال كبيرة نأملها ..لكن حسابتنا الغلط..فى كل حال بنرحلها..مرت سنين من العمر..بنعزعها وبنفضلها..والحسبة وصلت طاشرات..يمكن نعيش ونبدلها.. وتعال نحاسبك ياوهم..من غير رقم او امثلة ..كان للقروش نجرى ونحوش...لكن تقول بننشلها ...ماراضية تقعد فى الجيوب ...تقول حرامى بنشلها..لكن بترقد فى الضهور..بى ديون تقيله مطولة..ممحوقة مابتقضى الغرض..واقل حاجة تكلمها..كملانه بطحاء وحق وزن..ومجاملات مستفحلة..وضرائب ابعاج ندفعها.. والزامى حمدى نحولها..واحلامنا صبت فى سراب..نمشى ونجر مانحصلها ..ياريت يكون هم القروش ..ياغربة فيك دى المعضلة ..لكن تعال شوف الهموم..الما افتكرنا نقابلها..ذلة ومهانه واحتقار..خلوا النفوس متململة..سجنا كبير فيه الكفيل..سجان قيوده مكبلة..اشغالة شاقة ومؤلمة ..ودائما تكون مستعجلة..ماعاد يكفيها النهار..تحتاج ليالى مليلة..امراض كتيرة بدت معاك ..قبل الالم تستثقلها..ناس الضغط والسكرى..وفوق القلب وجع كلى..مصران وقرحة واكتئاب.. ونفوسنا ما متحمله

بسم الله الرحمن الرحيم
تحياتي الوطني والماريين
الغربة
والله موضوعك يقلب المواجع
وذي ما بقول المثل ما جبرك علي المر إلا الأمر منو
وأبيات عجبتنى للإمام الشافعي بنتقوي بيها
وفيها يقول
تغرب عن الأوطان في طلب العلا *** وسافر ففي الأسفار خمس فوائد
تفريج هم واكتساب معيشة *** وعلم وآداب وصحــــــــبة ماجد
فإن قيل في الأسفار ذل وغربة *** وقطع فيافٍ وارتكاب الـــــشدائد
فمـــوت الفتى خير له من حياته *** بدار هوان بين واش وحاســـــد
وآخر كلامي اقولو ليكم بي نكته عن الغربة
قال ليك كان في جعلي مغترب بي السنين
ولما رجع البلد الناس ملمومين معاهو وبيسألوهو عن الغربة والوضع وكدهـ
قام الجعلي قال ليهم والله الغربة شدة ما حاااااااااااااااااارهـ
يلاقيك شايقي تسلم عليهو بي الأحضان ،،،

وبي المناسبة أنا أبوي جعلي وأمي شايقية
وربنا يرد غربتنا جميعاً

التحية الي الاخ الوطني الموضوع مهم جدا لان الغربه كما لها اجابيات له سلبيات واتمني من الاعضاء مناقشة هذا الموضوع من جميع النواحي ولكم هذه الاغنيه

عافية منك
__________

عافيـة منـك وراضيـة عنـك سـو رضـايـا

مـا بيخيـب الرضـى والدتـو يــا جنـايـا

أنت من يا دوب صغير مـن زمـان دائمـا معايـا

أنت ديمة أمامـي سايـر مـا بخليـك بـي قفايـا

ما بتغيب من عيني لحظة ولا حصل سبتـك ورايـا

لامن الله يشيل أمانتو أنا ببقـى خصـاك بالرعايـا

يرعـاك البيرعـى وليـا بيـل يبـرد حشـايـا

أصلك انت هديـة منـو بيـك اجـزل عطايـا

انت واحد مالو تانـي رحمـة فـي آخـر صبايـا

أنت لما خلاص كبرت داير تسيبني أعيـش برايـا

داير تفارقنـي تهاجـر والحـزن يصبـح جزايـا

كيف تهون لك تحزن أمك عشان تحقق ليك غايـة

كان مهاجر عشان علاجي بلقى في شوفتك دوايـا

لو كان عشان تسقينا مالك نحن بي حنـك روايـا

لو عشان كرعينا راحل نحـن بـي بعـدك حفايـا

لو كان مهاجر عشان تعرس خير أبوك مالي التكايـا

خيرو وافر أبوك يحمدو مراحـو مليـان بالسعايـا

وبالقروش الجيب مجكن و لسه برضو الجايـه جايـا

أصلي منـك مـا بقصـر بحفـر أديـك المعايـا

إن كان دا كلو كمان شوية بتلقى في دهبي الكفايـة

أصلي من سويتها نادرها تبقـى لـي أيـام قسايـا

داخرها لزمن البعاكـس لسعادتـك يـا حشايـا

انت من شبيت صغير راسي مـا بتحتـاج وصايـا

ما حصل خيبت ظنـي ومـا فشـل بيـن غنايـا

لا تسيـب أمـك تهاجـر يمـه محتاجـة الحمايـة

لا تسيبني وراك ترحل انت ياهـو ضلـي ضرايـا

انت فوق الحوبة مقنع أنـت للمكشـوف قطايـا

دايـرك تبقـى جنبـي فـي فـرحـي وبـلايـا

إن كان كحيـت اتبنـك وأقسـم لـك قطايـا

داير أقضي عميري جنبك أصلـو قـارب للنهايـة

خايفه كان تسافر ترجع تلقى فاضي البيـت بلايـا

حينها ما تنفع قروشك وما تجيب لـك أم سوايـا

ماني عارفه سبب رحيل يا وليدي شنـو الحكايـا

إلا تبقى براك شايف فـي فـراق الوالـدة غايـة

ما بعاتبك ما بلومك ولو رحلت بلقى في قساك عزايا

على حجر دايماً قليبك وقلبي كلو عليـك جنايـا

عافـي منـك راضـي عنـك ســو رضـايـا



عبدالرحيم أرقي

تحياتي لكم[hr]#ff0000[/hr]