جديد شاعرنا أزهري محمد علي

أمانة عليك

الشاعر أزهري محمد علي

ياتايه الخطي

أمانة عليك كم في الخط

خطاوي علي الوجع عديتا

في السكة المشيتا غلط

شعائر إقامتها وصليتا

لا نزلت عليك خيرات

لا أخضرت مشاعرك قط

وكم في الخط

رهاف قاموا الولاد الهجعة

لطاف مرقن بنات الوجعة

لعبن (ليا ) جنب الخط

وقعدن يشخبتن في الرجعة

رسمن في الغمام لوحات

ملامح لي وطن طيب

ونكران ذات

وبت في غيمة بتمشط

براحات الغنا الواسعات

وكتبن فى الهوي وشطبن

تلات تسعات

اتمغي البحر في الميعة

واتحين سحاب العينة

في لهات التراب نقط

منقط كان أمام الغفلة

منقط من هنا وهنا ملقط

ناااعم والكلام طاعم

يبين تحت التبن ارقط

ينوم فوق الجرح منحل

يقوم ذي الحبن في محل

دحين يااورطة كيف الحل

وكم في الخط

مفخخة خطبتو الملغومة

تشيلها تصلحا الحيكومة

تصديق كضبتا الموهومة

تزيد في غيها وتنحط

نزيد في غينا وننحط

غيبوبة دوار السلطة

والهوس العلينا هبط

سكرانة المنابر طينة

سكرانة المداين الهايصة

واشباح القري المسكينة

سكران التراب والموية

السهلة ودواهي الغابة

أحزاب الهوي الكضابة

والحيكومة وقفت لط

شتات والسامر انفضى

شتات كان نابا كان نرضي

مرقنا ودمنا اتفرق

ولد شايلنو للايام

مسك شارع المطار شرق

لمحناو ذى خبر عاجل

ذي رفة حمام زاجل

يامنسلي من ضلف الضلام في الليل

تعال بالباب أكان راجل

واركز اوعي تدرق

من القبلي السحابو ربط

من العبادي يوم ينصرا

في وش السماء وينمط

وكم في الخط

أمانة عليك ياوطن الكرام

أسمعنا ليه اشمعنا

نحن مرقنا قدمنا الشعوب الحرة

في درب النضال ورجعنا

نحن نزلنا لي آخر درك وطلعنا

أجمل من ملائكة رحمة

فجينا الضلام ولعنا

قلنا الجاتنا في وليداتنا

جات أن شاء الله تنفعنا

نحن بكينا يوم بيت القزاز جدعنا

لا ادتنا الشوارع عين

لاصابت نفوسنا اللعنة

علمناك عناق اللهفة

والحرف البرود المعني

علمنا الثبات والوقفة

وعلم نصلك المسموم

يعلم فجة الطعنة

وكم في الخط

خلاص تاني المطر شالت

خلاص تاني المطر ختت

بركة وخير وبركة أخير

براك يالاهي سميتا

براك فتحتها الخيران

علي الناس الطلع زيتا

كمل رايا وفلت من ايدا رأس خيتا

علي الهملة وقطعت الرأس

وقع في راسها رأس بيتا

هاياريتها

لو شافوك في النيابات

مشمر في الوحل جيتا

وجيدن يامطر جيتا

وجد ليها البلاد بالجاتا

جلابة الجن والجنادب والجراد

وجلجلة الجلالات والجنود والجنجويد

نبدي ونعيد

كل السماحات روحت

خلتنا لي بأس الحديد

كل المصائب في أمان

هل من مزيد هل من مزيد

هل من بوادر رجعة للماضي البعيد

هل من قصائد اومكائد اومصائد

تاني للدقشو الصعيد

ياعالي المقام طالت عليك الكرسة

والجوك في الضلام

سرقوا المباهج خلسة

تشكي وتستغيث إلا البحس ماحسا

مات جلدو اندبغ ماظن يحس بالقرصة

نتاح الضرس المابتحلو الجرسة

يديك السهر ويقعد يتاورك لسا

داريهو الوجع بين اللسان واللثة

والداير القلع احسن تلخلخو هسا

قبل الطير تقوم يالمابتعرف الخسة

في الطابور تنود تدقس تنوم في الحصة

غايتو علي العموم خلصت خلاص القصة

مات بطل الفلم وطلعت حبيبتو اللصة

وقمنا انصرفنا علي عجل

ساسقنا بين ساسا ويسوس

ونحن امتحنا بلا خجل

وسقطنا في كل الدروس

كم من لصوص حايمة بتلوص

ودونا لي آخر درك

باعونا بي وسخ الفلوس

كم من نفوس خانت نفوس

بيناتا قاسم مشترك

طافت علي نار المجوس

حاولنا نتفادا الشرك

وقعنا في فخ النصوص

قاتلنا في غير معترك

دهستنا غارات البسوس

وكم في الخط

أمانة عليك يابلد السماح سامحيني

مجبور مرقتك من ضراي

في الليل يجهجهك السقط

ريح العوارض تلفحك

من أيدي تمشى سقط لقط

وأمانة عليك كم في الخط.