كريت والقرض

كريت والقرض
قابلنى ود عما لينا فى المواصلات وسلآمات وحق الله وكيفنكم وفلان وعلان وخبر النسوان والصبيان ، إن شاء الله كلكم طيبين ؟ والله فى أمن وامان الله والحالة مستقرة والحوارات الكتيرة إياها ، وختمها بالسوأل الكنت اخشاه وعامل حسابي ما أطرّق ليهو من قريب أو بعيد عن اخونا الفاتح وزوجته وعياله وبدا يتكلم عن طيبتهم وكمية التسامح التى يحملها الفاتح فى دواخله ومدى انعكاس كل الاشياء دى فى استقرار اسرته الصغيرة عدداً ، الكبيرة تواددا وتعاطفا وتماسكا والمثالية أنموذجا حيا لمن يريد أن يقتدى وقال . . وقال . . ! ماخلى شى .
بعد ما عدّد ومجّد وهلل وكبّر و وصّف وعبّر وكرر ودبّل ! قلت ليهو أمسك عليك ما تبقى من المدح والثناء واستمع الى ما تفعله الايام بالمرء وبأخيه وزوجه وبنيه واسرته التى تأويه وقلعته التى تحميه . فقد شاءت الاقدار ولاحت الفرصة لضعاف النفوس والغاوين زلزلة البشر والأُسر والاصطياد فى الماء العكر ، الملوث بالنفايات الكيماوية التى وصلت المياه الجوفية ، واستقرت على كُلى البشر وعقولهم . ومع غسيل الهدوم بقي في غسيل كُلى واموال وعقول .
جاد الزمان بزيارة شؤم للجارة البعيدة لى زوجة الفاتح وأوحت إليها بالظن والاثم والعدوان إذا ماخرج الزوج عن الطوع والتفكير ولو عن بعد بالزواج بإخرى ، خاصة لو كانت شديدة الجمال ، كثيرة المال . وإنو رجال الزمن ده عيونهم طايره وما بترك إلا عند الفتنات المقرشات العندهم عربات واقفة تحت العمارات .
بدت الزوجة بما نفثته جارة السوء فى نفسها من وسواس ! تشك فى كل شى وتحس اى شى وتحسب لكل شي من الحركات والتصرفات . تجسدت المسرحية في النفس الضعيفة وبدت التخيلات والتهيئات واخذت الحجم السيوبر والمناسب للظنون لتجسد الخيالات على مسرح أوهامها واقتنعت بما صورتة لها الافكار المريضة وواجهت أخونا الفاتح بعلمها بزواجه من أخرى ذات مال وجمال ، أما الحسب والنسب فمشكوك فيه .
الفاتح ما أدى الموضوع أهمية كافية وعامل ما سامع حرصاً منه بعدم تطور الحوار وردود الفعل والاخذ والرد ، وأكتفى بالنفى بالبكش والكلام الجميل ، ممتنعا عن الحوار والجرجرة المدمرة حتي لاتؤدي لتجسيد وتصورات ثلاثية الابعاد لا وجود لها .
انتى يا الزوجة ، الفهم الغلط أكد ليها زواج الفاتح لتهربه من الاجابة علي سوألها ، وعلى طول أخدت اولادها وعلي على بيت اهلها ، وجمعت اخوانها وحكت ليهم الموضوع تصاحبه موسيقى تصويرية ذات مؤثرات صوتية من نهنهة و جعير وشهيق وزفير واستنشاق و استنثار وصرير يفتق الآذان ويفجر الُّلوَز ، هذا ، غير حالة الطرش المؤقت ومتلازمة الحزن العميق ، مورث الإكتئاب ، مفرق الاحباب صانع الكوارث ومسجل الاهداف بطريقة السهل الممتنع .
تحزّم وتلزّم كل الحضور وطافت المسيرة بيوت الاهل التي دعمت المسيرة بمشاركين وممثلين لها في الزفة حتى الوصول لى بيت الزوج المتهم ، عامل العملة البايخة ليواجهوه بالجرم المشهود وطالبوه بطلاق اختهم بدون نقاش ولا تبريرات و فوراً بالتلاتة وبلا رجعة مرجوة والحق علينا نحنا . وانت ما غلطان .
كل هذا والفاتح ،،، فاتح خشمو من الدهشة ! فى شنو ياخوانا ؟ إنتو مالكم يا ناس ؟ قالوا ليهو بس كده ، كان ماعجبك . . !
الفاتح المسكين ، دخل فى حالة من الدهشة والذهول والحيرة ، وتدفق الدم الى عينيه وأذنيه بكميات وفيرة غفيرة لمساعدتة فى تصديق مايرى وما يسمع مما يحدث أمامه الآن . فقال ليهم الفاتح يا أخوانا فهموني انتو الكلام ده جبتو من وين ؟
المسكين ما أدوهو فرصة واصروا علي موقفهم . يا زول ولا كلمة ! نحنا بس جايين نطلق أختنا دي . والله من أصلوا انت ما بتشبها بس تقول شنو ! فما كان أمام الفاتح إلا ان نهض من جلسته وتوجه الى غرفته وجاء منها حاملاً بيده مصحفاً , ووضعه امامهم ووضع يده عليه واقسم لهم بكتاب الله انه لم يتزوج باخرى ولم يفكر مطلقا . فتراجع الجميع وبدت عليهم الحيرة والدهشة فى آن واحد ونظروا جميعهم الى الاخت بنظرات متسائلة مستفسرة ! يعني إنت ما اتزوجت علي اختنا دي ؟ فقال ليهم أنا حلفت ليكم وما فكرت أبدا الزواج مرة تانية ابدا . ثم وضع الفاتح يده على المصحف مرة أخرى وهم ينظرون اليه وهم في حيرة ، واقسم لهم انه لن يخذلهم ويخيب املهم إكراما للمسيرة المعتبرة والزفة المثيرة وسوف يرضي رغبتهم ويحقق لهم ظنهم بأن يتزوج بأخرى مهما كلفه الامر .
وفعلا . . . أبر الفاتح بقسمه وتزوج بإمرأة أخري علي أم العيال ، واسكنها معهم ، وما زالت زوجته الاولى ام عياله تعيش معهم فى نفس البيت !

بقلم " المحجوب "

ههههههه

اها قول ليها خمي وصري زي مابقولوا اهلنا

انتي امشي اسمعي كلام الناس انتو يعني المره

بضربوها باخته

والله يا المحجوب
الفاتح ربنا يفتحها عليهو دنيا و اخره
زول كتوم
و عاقل
و ردود فعله ( فعاله)

المشاركة الأصلية كتبت بواسطة ابوعمر

ههههههه

اها قول ليها خمي وصري زي مابقولوا اهلنا

انتي امشي اسمعي كلام الناس انتو يعني المره

بضربوها باخته

والله يا ابوعمر ياحبيب ، الحريم ديل عندهم روسين ظلط بس ،،
وريدتم لي النكد ! عينة ،
والاجواء الهادية ومستقرة ! من ضمن مسببات الحساسية عندهم ،،
المهم لازم لازم يكون في شي .
سعدت بي وجودك ، تسلم يا حبيب .

المشاركة الأصلية كتبت بواسطة ابو امجد

والله يا المحجوب
الفاتح ربنا يفتحها عليهو دنيا و اخره
زول كتوم
و عاقل
و ردود فعله ( فعاله)

والله يا أبو أمجد !!!!
الكلام ده ما بطمن ، الشي ده وراهو كتير ،،
الله يستر ،، ده كلام زول معفوص ساكت .
سعيد بتواصلك .