التميز خلال 24 ساعة | |||
العضو الأكثر نشاطاً هذا اليوم | الموضوع النشط هذا اليوم | المشرف المميزلهذا اليوم | |
قريبا |
بقلم : |
قريبا |
آخر 10 مواضيع |
الإهداءات | |
|
|
أدوات الموضوع | انواع عرض الموضوع |
|
#1
|
||||||||
|
||||||||
تُكل السرة !!
تُكل السرة !! .. التُكل ذلك المبني الصغير الشكل والطول .. وعادة به طاقه واحدة لتجديد الهواء ويتوسطه الصاج الاسود المتين والمشلعيب يتدلي من سقفه بوقار , ورائحة الطايوق للمساعده علي انزلاق العجين المر بالقرقيبة التي تُختار بعناية فائقة وايضا قطعه القماش تلك التي تمرر بالمسح علي الصاج ومعطونة بالطايوق .. والبنبر سيد الموقف .. واللدايات التي توضع تحت الصاج لادخال الحطب واشعاله كذلك .. والطبق الذي يتوسد صفحة حائطه كانه ساعة تعلن دقات الوريد .. وائذاناً ببدء صنع الغذاء ..هذا زمان قد كاد ان يندثر .. فقد كان يحتل مكانا مرموقاً في قلوب نساء السودان .. ولكن تبدل الحال .. وانزوي في ذاكرة النسيان !! الا من بعض البيوتات التي مازالت تجد طعماً للحياة فيها .. - وها انا اعيده مرة اخري عبر هذا البوست .. وبقراة اخري للمكان والذاكرة .. والعذر لمن لم يفهم بعض العبارات العامية الموغلة في القدم .. فليرجع الي جدته او لجده ان بهم عليه الامر !! - وتتجسد شخوص ابطاله : .. نسوة تربطهن الجيرة ويتحلقن حول صاج العواسه داخل تكل السرة والذي بات محفل لكل شمارات الحله وما يحويها من اخبار وجديد فيها .. وبه سلوتهن فهلموا معاً نقرا ما يدور بينهم كل لقاء .. عفواً سادتي : اديروا مؤشر اعــــــــــــــينكم هنا .. فالشمارات دوماً ما تكون طازجه !! وهنا تولد اشياء تغير خارطه الحي بكامله !! فالحكي له طعم اخر بحضرتهن فتعالوا .. نضع كل منهما بالمجهر : 1- السرة .. صاحبة المنزل والتكل صانع الكسرة الفاخره .. في اواخر الخمسينات مشلخه مطارق .. طويله البال وذات حكمة .. من قلب الجزيرة .. 2- فاطمة .. جارتها اليمين .. تهوي جمع الاخبار والتحدث فيها وهي ببداية الخمسينات بالعمر .. وتتخذ من العمردثاراً لذلك وتحاول ان تتصف بالحكمة والتروي !! من شمال السودان .. 3- مدينة .. جارتها بالشمال ذات الشفايف المدقوقة بمنتصف الاربعينات .. من غرب السودان .. 4- فوزية .. طويلة القامة .. تدعي الفهم وهو لايمت اليها بصلة !! نديدة السرة !! 5- امنة .. قصيرة القامة طويله اللسان .. عصبية المزاج .. وتحب المشاكل !! من شرق السودان .. 6- عوضية .. بشرتها داكنة قيلاً .. ومهووسه بالزار !! من جبال النوبة .. نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
02-27-2011, 03:31 PM | #2 |
|
(1) - فاطمة : طق طق وهي تدلف الي فناء المنزل وتحمل بيدها طبق الكسرة المزركش الالوان .. وبيدها الاخري جردل العجين المخمر .. وتصيح يا السره هوووي امرقي لي بره الصاج دا بكون حرق .. ليك نص ساعة من ماقلتي ولعتي النار فيه !! - السرة ترد : اعمل شنو عاد يادوب الشفع ديل حشيت ليهم العيش لفطور المدرسة وسرحت للمفعوصه دي عشان اوديها الروضه .. كدي خشي للتكل خمسة دقائق بس اوديها واجيك .. وتخرج مسرعه .. - مدينة : يتعالي صياحها .. هووي يانسوان خلاص نجي ..وتسكت لاشتمامها لرائحة الطايوق الزكية حين تدهن به فاطمة وتجيب باجابة فاترة اييي .. وتبداء فاطمة في العواسه وتجلس بالبنبر وكل حين تتحسس ركبتها لما بها من الم يعتريها كل خريف !! - مدينة تدخل : وهي تهطرق بما تشاء من احاديث مع امنة وكل منهما تحمل فوق راسها الريكة وبيدها العجين .. وهو منظر معتاد بعد خروج الصبية الي المدارس وما دونهم الي الروضه .. سلام يافاطنة .. هكذا ينطقنها دوماً .. وترد وهي تمسح ما جري علي وجهها من عرق .. اهلا .. كيف اصبحتوا ؟ ويردن .. الحمد لله بخير وعافية .. وقبل ان تبرد ارجلهن تاتي السرة وتبشر اساريرها بضحكة شماته ..وتقول .. ماشفتن .. بتول مرة الطيب .. جارية ومالابسه توب تلحق شافعها الفطور ولامن شافتني خجلت رجعت لبست توب !! عليك الله شوفن الوليه الما بتخجل دي !! - امنة : السترة والفضيحة متباريات .. اطلع بدون توب .. دا راجلي يكتلني ويلحقني امات طه ..وتصدر همهمة من الاخريات غير مفهومة ولكن تدل علي عدم الرضا .. - فاطمة : اها انا خلصت .. التخش واحده فيكن في نار لهب دي .. وهي تلملم اطراف الكيس الذي يفرش تحت الكسرة قبل رصها .. - امنه : خلوني النعوس انا .. اصلي اليلة ماشه السوق كان اطلع بدري .. - السرة : عندك شنو يا اختي ماشه السوق في الدرت دا ؟ - امنه : ابداً والله ماعندي شئ ضروري لكن عاوزه لي عده كدا .. اصلي عدمت الكفتيرة .. من ما جات حماتي دي قعدت معانا .. بلاهي تختها في النار لحدي ماتنقد .. وكان نضمت وووب علي من ولدها .. غايتو اصبر لحدي ما تتخارج مننا .. - مدينة : ليه تسكتي ليها .. ما تديها علي راسها ولو لزم الامر تدقيها .. شن طعمها وقت تجي للخسارة بس !!
- فاطمة : وهي تحمل الريكة براسها وتهم بالمغادرة .. عشان عين تكرم الف عين .. التعاين لي راجلها دا .. مادام ساترها .. والتصبر لحدي ما تمشي منها .. - السرة : احمد الله نسيبتي ماتت وريحتنا من زي الفعايل دي !! - عوضية : تدخل وهي تجرجر اطرافها بما تحمل .. وتلتقط اخر انفاس للكلام .. هي والله لو دي انا كان دقيتها بالبرطوش وما تقعد معاي دقيقة في بيتي وكان الراجل فتح خشمو يا انا يا هي .. والببقي يبقي يبقي بعد داك !! - فاطمة تتسأل : انتو نوال اليوم وين يابنات امي ؟ - فتجيبها مدينة : بضحكة طويله .. مشت الدكتور اصلها حارية ليها كشكة في بطنها وشاكة فيه جنا !! السرة : الله يعينها ويديها الجنا بي بركة الله .. وتتوالي الدعوات تباعاً .. - وتعقب امنة : الله يهون ليها والله مسكينة .. كان تلقي فرد وحيد يونسها ساااااااااااااي .. - فاطمة : هوي ياحريم فتكن بي عافية ان شاءالله لي ميعاد الجبنة بعدين سمح .. وتنخفض الجلبة نوعا ما .. وكل الهم في العواسة فقط .. |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
02-27-2011, 03:39 PM | #3 |
|
(2) - امنة تدخل وهي تدندن بمقطع لوردي وتتمايل معه بطرب :- الديوان الديمة مرشوش بالزهور والورد معروش بالحرير الاصلي مفروش ريحتو مايقوما بلا رتوش القمر بوبا عليك تقيل كانما تسترجع صباها بها .. وايامها الخوالي التي تسترجعها كل تجعيده في وجهها بفعل الزمن !! - فاطمة : تقاطعها قائلة الليلة مالك ياخيتي مبسوطة كدا ؟ - امنة: والله مافي شئ بس اصبحت والاغنية دي عالقة لي في راسي !! - فاطمة : والله السعيد يبقي زيك .. لكن شن طعم الغناء بتاع الجنيات دا عليك الله هسي !! ياحليلك يازماااااااااان !! اححححح زمن وولي .. - عوضية : سجم خشم الغناء الهسي دا .. شفع مسكوهم مكرفونات .. واجعوا اضنينا ديل من الصريخ والعويل !! - السرة : الاغنية دي طبعاً غناها بادي في عرسي .. وحافظاها صم طبعاً .. وبخرم ليها زي الجبنة وقت ما القاها !! ووالله غناها غناء اليوم داك .. وخلي الساحه عجاج بس !! - فاطمة : يا السرة ياخيتي انتي القرقيبة دي اتشرمت كلها حقو تغيريها اصلها عمرت معاك خالص زي نسيبة امنة !! - وتعلو الضحكات منهن بعد قولها هذا .. - السرة : ان شاءالله يافاطمة واردفت : انتو سمعتو بي هنضبني بي مسدسك !! - عوضية : دي شنو دي كمان يا اختي ؟ اوعا تكون دي اغنية !! - السرة : أي والله سمعتها في عرس (احمد) بتاع الدكان بغنيها ود مفعوص كدا !! ومسبسب شعروا متل البنيات !! غايتو الله يسترنا ويستر اولادنا من جنس دا !! - عوضية : الجنيات ديل ما شافوا خضر بشير ؟ - السرة : اسمعن دي كدي وقت جبتي سيرة خضر بشير : قالوا في واحده لقت شافعها قاعد تحت التلفزيون طوالي وبعاين فيه وخضر بشير بغني في حلاة زوزو .. خطفت الشافع وقالت ليه كان وقعت فيك شلوفه سااااااكت تكتلك علينا.(^&^). هههههه وتتعالي الضحكات .. - فاطمة : الله يمسخك يا السرة اصلك بتقلعي المحن الراجل مرحوم .. - السرة : الله يرحمو كان فنان اخوي الصغير وكل مايجي بالتلفزيون او الرادي بنصيح ليه عشان يجي يحضره .. - فوزية : تعالوا انتو مش (ود التوم) بقي غناي وبعمل حفلات ؟ - مدينة تدخل .. أي بقي بغني وبمسح في شعرو زي البنوت الجنا دا خرب خلاص !! فاطمة : كدي خشي وسلمي اول ياولية قبل ما تقولي حاجة !! وتدخل احد قاطنات الحي ذاته اليهن بهذا الصباح .. ازيكم يانسوان .. مالكم الليلة بتتكلمن في الوليدات الما نافعين ديل !! كدي سبب السيرة شنو ؟ السرة : مافي سبب الونسة جابت السيرة !! عوضية : لكن ودالتوم مش ابوه طرده من البيت المفعوص دا ؟ انا سمعت من جارتهم الكلام دا !! السرة : هو كان خلاه معاه في البيت ببقي ما جعلي !! عوضية : هو كان غنا كلام سمح مالو !! بس ببشتنوا الغنا علينا وبمسخوه !! وهسي عليكم الله البسمع وردي والا ابو داؤد تاني بسمع غيرهم ! فاطمة :هوي يانسوان بطلوا الشمارات وخلونا نعوس كسرتنا دي ونتخارج نشوف اشغالنا .. عوضية : هووي مدينة الليله سافرت زي ماقالت حلتهم ؟ السرة : تجيبها .. أي من دغش الرحمن هي وراجلها التقول جاهم خبر موت !! عوضية : لكن ما بلدهم بعيده وبصلوها في 3 ساعات عشان كدا !! السرة : وقالت قاعده كم يوم هناك .. فاطمة : طيب وليداتها عملت ليهم شنو ؟ ساقتهم معاها ؟ السرة : لا ودتهم لي خالتهم في حي الجبل !! عوضية : لا خلاص طيب وان شاءالله تشبع ونسة مع اهلها اكان كدا .. فاطمة دوما هي من تخلص من العواسة بعد السرة .. ولملمت اطرافها والريكة في راسها وذهبت الي بيتها .. والسرة ايضاً ذاهبة الي الجزارة والملجة ولفحت توبها وخرجت .. وبعد زمن ليس بطويل .. طفيت نار الصاج وهمدت دخاخينه التي كانت تتعالي في اوج السماء .. |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
02-27-2011, 03:48 PM | #4 |
|
(3) .. وتعود مدينة من سفرتها بعد 3 ايام بحلتهم العامره وتحمل في جعبتها الكثير من الامور لتحكي وتفاخر به نسوة الفريق .. وفي احدي الصباحات تدخل امنة وهي تصيح باعلي صوتها وهن متحلقات داخل التُكل .. ماسمعتوا بي (فلانة) طلقوها امس !! فوزية : انا سمعت بيه امس من سونا . وهي لفظ يطلقنه علي احدي نساء الفريق متخصصة بالاخبار مثل اذاعة سونا وهي اختصار لاذاعة السودان الاخبارية .. وفتكن بي عافية انا انتهيت من عواستي وماشة للنجار دا طلع روحنا بالدلاوب الما خمج ابو 3 ضلف .. وتضحك فرحة لقولها هذا .. فاطمة : سجمي فلانة دي مش طلقوها قبل كدا ؟؟ امنة : أي طلقوها ودي التالتة !! وتاني الا ياخدها راجل تاني حتي تحل لي راجلها دا !! مدينة : سجم خشمي !! دا كلام شنو !! الا تعرس راجل تاني كيف ؟ السرة : ههههههه هوي يانسوان ما تفتوا ساااااااي !! الشرع دا بحوره غريقة !! امنة : سمعت الكلام دا في الرادي .. فاطمة : هو أي كلام تسمعية تلفحيه طوالي قبل ما تتحري من صحتو !! امنة : طيب هم كان ما فاهمين جابوهم كيف في الرادي دا !! فاطمة : تلقي عنده واسطة كبيرة واتعين فيه !! مدينة : دا كلام مالي عرفه فيهو !! عوضية : هوي يانسوان صوتكن جايب الفي اخر الشارع !! مالكن ؟ السرة : امنه جابت ليها شمار طلاق !! عوضية : دي منو دي الطلقوها ؟ امنه : وتعيد نفس الشريط لعوضية !! عوضية : يابت امي دي مفروض يطلقوها من بدري بالتلاتة !! سجمانة وحوامة وشايفه نفسها لسه بنية صغيرة !! وتلبس في متل البناطلين الضيقة ديك !! فاطمة : هوي راجلها رضيان !! ولو ما عاجبو كان نضم معاها .. عوضية : لكن هي ما معروفه بتاعة شيوخ !! مبكمة المسكين دا بكيم السنين !! وما خلت ليها فكي ما مشت ليه !! السرة : الله يجازي محنك ياعوضية .. وانتي ليك من وين الكلام دا ؟ عوضية : بت خالتي كايسه الفقرة عاوزه الجنا .. وصادفت (فلانة) دي كم مرة !! وورتني بي الكلام دا من بدري .. بس ماجات السيرة ساكت عشان اوريكم !! مدينة : والله ياعوضية كان جاك خبر زي دا من بدري ما كان سكتي عليه .. اصلو الفولة ما بتتبل في خشمك !! وتتعالي الضحكات منهن جرا قول مدينة .. عوضية : ماجات المناسبة بس يامدينة ما تبهتيني سااكت يابت امي !! السرة : كدي خلو السيرة دي .. وطيب (فلانة) بعد طلقوها وليها 4 يوم ما مشت اهلها ليه ؟ امنة : قالت بفتشوا ليهم في فتوي تحلل الطلاق دا !! فاطمة : سجمنا .. وتضرب بيدها علي صدرها !! دا كلام شنو دا يانسوان !! السرة : الفتوي دي بقت موضه زي (علانة) ديك بعد طلقوها بالتلاتة مشو مدني طلعوا ليهم فتوي وهديلك قاعدين مع بعض وليهم 3 سنين !! فاطمة : اجي اجي اجي .. والله دا كلام غريب وما بركب الراس !! الطلاق ما معروف ما داير ليه قراية !! عوضية : الزمن دا أي شئ معقول .. وممكن يكون .. ما تستغربي شئ تااني يافاطمة .. فاطمة : الله يرحم ناس زمان .. ماكان في متل الكلام دا .. وربنا يسترنا في عقاب سنينا الباقيات دي .. وما نكوس لينا فتوة متل البعملو فيها الجنيات ديل .. ويضحكن مرة اخري .. عوضية .. تتمسخر : يافاطمة هسي يطلقك بعد دا يمشي وين هو !! الا لي ود الاحد !! فاطمة : هي تفي الكلام دا من خشمك ياولية .. لسه بعافيتو راجلي !! والله قايلاه زي صبيان الزمن دا .. بلعب بالطلاق .. دي 35 سنة زواج .. ما سمعتها من خشمو مرة بالغلط .. ويسكتن احتراما لهذه العشرة الطويلة الامد .. ويتناولن امورهن اليومية العادية بعدها الي الانتهاء من العواسة ودور كل منهن !! |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
02-27-2011, 07:52 PM | #5 |
|
استاذ محمد السلام عليكم و رحمة الله تعالي و بركاته حقيقة و في حدود معرفتي البسيطة توظيف الفولكور بصورة سليمة و صحيحة اهم عوامل نجاح المبدع و ذلك لارتباط الفولكور بوجودان الملتقي فاراك كتبت نص صعب صعب صعب و بالجد وظفت الفولكور ( * التكل * الشخصيات * ا لاسماء و الاوصاف * اللغة الحوارية والصوتية * ) داخل شكل مسرحي سوداني متكامل بصورة رائعة و اسف ان نصبت نفسي ناقد و لكن حقيقة النص اعجبني فهو ابداع و ابداع و ابداع و ابداع مسرحا وحوارا و فكرة و شخوص و عن نفسي طولت جدا لم اقرأ نص يحسسني باني سوداني و اشكرك يامبدع و اتمني لك كل توفيق و نلتقي ان شاء الله لو بعمرنا بقية
|
|
02-28-2011, 03:39 PM | #6 |
|
القاص قدورة
تسلم لمرورك علي كلماتي التي احسبها خربشات بفضاء .. ولا استحق ما ذكرته من قول .. فانت ومــــــــــــــــــــن هم بشاكلتك يملكون ناصية الحرف .. ويطوعونه لما يلون سماءنا بالوان زاهية تسترعي الانتباه .. وهاهي السرة تلفح توبها التيترون الجديد لتسرع نحو جاراتها لتزف اليهم خبر جديد !! وليتك شاركتني ما اكتب هنا .. بما يجود به خاطرك .. ولك ودي واحترامي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
02-28-2011, 03:42 PM | #7 |
|
(4) السرة تشعل الصاج ولبدء يوم جديد .. وهاهن يتجمعن حولها ويتجاذبن اطراف الحديث .. - السرة : والله ياعوضية امورك غريبة وتمحن .. جنس شنو دا البتحلمي بيه دا ؟ - فاطمة : كدي اتعشيتي بي شنو انتي امس ؟ - عوضية : اتعشيت كسرة بملاح ام رقيقة كاااااااااارب .. - فوزية : بس ياهو ذاتو الجاب ليك الحلم دا .. اصلها الويكة دي لايوقه وبتعمل اكتر من كدا !! وتعقب كلامها بضحكة مجلجلة !! - السرة : يكون يا الله دا واحد من بتاعين الزار بتاعنك دا يا بت امي جاك في الحلم وعمل ليك حركات في راسك دا !! ما قلنا ليك اختيهم !! عوضية : دستور .. دستور .. لا ما بعملو فيني كدا لاني منفذه ليهم كل طلباتهم !! فاطمة : استغفر الله .. والله الكلام دا بوديك في ستين داهية ياعوضية .. وبغطس حجرك اكتر من الغاطسة فيه دا !! فوزية : هوي دي الويكة المغبشة ديك الجابتها من سوق ام دفسو !! عوضية : يافوزية ديك خلصت زمان وياحليلها الويكة السمحة .. فوزية : سماحتها شنو .. انتي نسيتي يوم اتلصقت في توبي لامن قنعت منو وجدعتو في البيت !! فاطمة : صحي يافوزية : دي ويكة شنو دي البتعمل كدا دي .. الا محرشة من الاسياد بتاعين عوضية هههههههههههه !! ويتضاحكن في سعاده .. يحسدن عليها .. مدينة : انا يابنات امي بخاف من متل الكلام دا .. خلونا من الاسياد ديل احسن !! امنة : تدخل .. عليهن .. وتحكي لها فوزية الحلم .. وتسكت لفترة ليس بقصيرة وتقول : انتو عارفين الحلم دا مرات بتحقق في الواقع !! السرة : مندهشة لقولها هذا !! كيف يا امنة ؟ امنة : الحلم مرات بكون طاقة من الكريم لامر قادم !! عوضية : هوي لو عاوزه تعرفي المستقبل انا ناسي قاعدين !! حلم شنو البوريك المستقبل !! السرة : ياعوضية الله بينا وبين ناسك ديل !! عوضية : هوي ناسي ديل اخير تقفلو سيرتهم عشان ما يلخبطوا عليكم !! فاطمة : خلاص خلينا سيرتهم .. فوزية : غايتو حلم عوضية دي الا نمشي للفكي ادم .. عشان يفسرو لينا .. ويعلو صوت الضحك .. ويتبادلن العواسة الي اخماد نيران الصاج والخروج من التُكل كل منهن لمنزلها .. |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
02-28-2011, 05:16 PM | #8 |
|
الأخ محمد عوض السيد/سلامات/ متعك الله بالصحة والعافية وانت ترسم لنا لوحة أحسب أنها اضحت من الماضى ولكنها محفورة فى الذاكرة وخاصة عندما تكون حاجة السرة هى صاحبة التكل وسيدة الموقف. مشكورالاخ محمد على هذا الابداع الجميل والسرد الأجمل . لك الشكر والتقدير.(.واصل.... متابعين..... قاعدين على البنبر عند مدخل التكل)
|
|
03-01-2011, 12:33 PM | #9 |
|
اخي .. د/ منصور
شرفني مرورك الكريم علي البوست الذي اضفي عليه جمالا .. وفلينعم الله عليك بالصحة والعافية .. التُكل ماضِ مازال متواجد وان قل .. وما اجمله من ماضي عاصـــــــــــــــــــــــرته بكل منحنياته .. ويكفيني انه نال الاستحسان فما زلت احسبها مجرد خربشات .. ولك ودي واحترامي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-01-2011, 12:37 PM | #10 |
|
سامي الصداقة
من منا لم يعايش الريف او يمت اليه بصلة !! وانا ابن جدتي لها الرحمة بقدر ما احببتها .. وشكراً لعاطر حضورك .. مع ودي واحترامي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-01-2011, 12:54 PM | #11 |
|
إنه من أبوبكر البشير
أروي لتروي عقولنا بأجمل السرد للماضي الذي ينير لنا طريق الآتي ( الماعندو قديم ما عندو جديد )
أجمل ما إستنسخته من هذا البحر الذاخر الوحدة الموضوعية وأجمل من ذلك وحدة نساء السودان " الغرب , الشرق , الوسط ’ الشمال " ليتها يستوعبها أهل الحل والعقد وإذا لم يفعلوها سنفعلها نحن ................................... |
|
03-01-2011, 03:01 PM | #12 |
|
صديقي
ابوبكر تسلم لحضورك هنا .. فما اجمل وحده بلادي .. قبل ان يتناهشها الضـــباع !! وظللنا نفعل .. ولكن لا حـــــــــــــــــــــــــــياة لمن يهوي السلطة والفرقة .. وهذا هو حال الحي الذي كنت اقطنه وبه رايت شمس ايامي .. خليط متجانس من القبائل السودانية بكل الوانها .. في لوحة هي مثال حي للتعايش الطبيعي .. وبتعامل الفرد تجـــــــــــــــــــــــــاه الاخرين وليس لامر اخر !! ولا زلت اتواصل مع احبتي منهم الي ان يلتئم شــــــــــملنا من جديد .. ولك ودي واحترامي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
02-28-2011, 09:41 PM | #14 |
|
بهجةٌ لضمت شفاهي وأنا أقرأ ..
وفي عقلي كانت الرؤيا واضحة الضحكات والحوارات ووجوههم السمحة مع أنك تعلم اكيد ان كثير من الكلمات وقفتُ أمامها لكن لا أدري كيف شعرتُ أني فهمتها وشعرتُ أني أجالس هؤلاء النسوةِ أستمع لأحاديثهن .. :) قاصٌّ راااااائع يا أنت~ بل مذهلٌ بحدٍ لا يوصف .. ضحكت من قلب معهم .. بربك لا تتوقف .. أحب أن أكمل يومياتهم ... " " مسائك كما تشتهي يا ود العزيز لك ،،، " |
شكرا بحجم السماء ~ البرنس ~ -------------- راقدٌ نبضي في نبعٍ فسيح فوق وجههِ نَصبت ثلةُ من زنابِقِ الماءِ خيامهنّ وينتظرُ ضفدعٌ شوقي قبلة الأمير ..!! فهل سيطولُ الإنتظار ..؟!
|
03-01-2011, 12:40 PM | #15 |
|
الغالية رمـــــادُ
برغم اشتعالك !! اللغة العامية لدينا سهلة ان احببتها .. فكلماتنا تحس قبل ان نسمعها .. والاشواق من هنا لي عندك .. مع كامل احترامي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-01-2011, 03:02 PM | #16 |
|
(5) -السرة : ياولية براحة ما يحرقك ونبقي في عربية الشفخانة الزي ابو القدح لامن تجيك تكوني بقيتي فحمة ساكت !!
-فاطمة : مجبورة خادم الفكي علي الصلاة .. اصلي مستعجلة وماشة لمشواري زي ماكلمتك .. -السرة : ربك يهون .. طيب اها نزليه انا رجعت الحجر مكانو !! -فاطمة : الله يخليك يابت امي .. تسلمي .. لكن صاجك ما تقيل .. اظنو من بدري صاج اصلي !! -السرة : اي والله دا جابتو لي امي هدية وانا عروس !! -عوضية : ازيكن يانسوان .. فيردن التحية ومعها ابتسامة .. -وتدخل امنه وهي لا تحمل شئ بيدها .. هوي يانسوان كيفنكن .. اليوم العواسة راحه بس جيت اشجع :(^&^): .. وتضحك عوضية مل فمها من قولها هذا وتقول الله يجازي لسانك دا .. اصلو القصير يا فتنة يا فتنه ههههههه .. -امنه : تقصري ما تطولي ابداً لي راس دولابك ان شاءالله .. -عوضية : مالك علي يابت امي .. انا دفعوا فيني الشئ الفلاني عشان طولي دا !! 50 بقرة .. سمينات وبعجبن !! -امنة ترد عليها : مابشوف ساااااكت لامن وقع فيك الراجل دا !! -السرة : هوي بطلن المناقرة كان تنعدل علينا من الصباح .. -فاطمة : هوي ياعوين فتكن بي عافية انا عندي مشوار .. -فوزية : انا كراعي ساخنة والله شنو يافاطنة !! -فاطمة : لا والله بس عندي مشوار كدا مرتباه لي كم يوم !! -السرة : ودعناك الله يافاطنة .. -فوزية : انتو سمعتوا بي بت (.......) المعرسة عرفي وجاء راجلها امس في عقدها لي ود عمها .. غايتو الله سااااي مرقها من موته كان ما لماها عمها وساقها معاه بعربيتو البندر !! -السرة : اجي .. اجي .. اجي .. اخر الزمن .. زواج عرفي عديل كدا !! -عوضية : يابت امي الزمن دا بقي غريب شوية وما بنستغرب فيه اي شئ بحصل .. -مدينة .. بعد دخولها في منتصف الحديث : دا خبر شنو المن الصباح دا .. العرفي دا شنو بالاول كدي وضحوه لي وقت جبتو سيرتو !! فوزية : دا عرس بالسر وبشهدو فيه نفرين بدون ولي !! - مدينة : بلاي .. لكن كدا دا زواج يابنات امي .. ما زي بتاع المتعة اكان كدا !! - فوزية : اي زيو .. والفقهاء قالوا حرام شرعاً .. - السرة : والله بنيات الزمن دا حيرونا عديل كدا .. هسي الجابرها علي كدا شنو . ما سمحة والف تفر بتمني يعرسها المفعوصه العملت كدا دي .. وكمان يظهر الكلام دا وقت عرس ود عمها .. طيارتها وقامت دي خلاص .. والبركة الما قتلوها اهلها وبقي عمها عاقل !! فوزية : قالو ليك ود عمها طلع سكينو تب وعاوز يضبحها اكان ما عمو مسكو وساق البت طوالي معاه !! عوضية : العرس دا ما ساهل الفتوات ديل مالن بعملن كدا !! هسي جنس دا برضي عاقل .. اريتو كان كتلها وريح .. وتبقي عبرة للباقيات البفكرن زيها !! -السرة : والله متل فعايلن دي ما لاقتنا تب قبل كدا .. وياما نحيا ونشوف !! لكن ابوها دا ما راجل صعب كيفن سكت وما لحقها امات طه .. ولحق شبية الرجال الجا وقال انها مرتو علي سنة الله ورسوله .. -فوزية : قالو ليك الراجل جرا زي الجنيات وقت قاموا عليه اولاد عمها .. وما اظنو يكون لحق طلع بره الحلة وقالوا من حلة (.......) ومتفلسف ساكن في البندر من زمن طويل .. وقال ليهم بي طول حسو انو بحبها وهي بتحبو !! -مدينة : عليكم الله دا راجل دا البقول كدا .. وطيب خلوه مرق كيف ماكان يكفوه فوق الديوان ويريحوا اهله منو !! -السرة : بركة الما كتلوه ولا هبشوها .. لانو المسائل دي ما بتتعالج كدا !! -عوضية : غايتو لو دي بنتي بتكيها براي وبلحقها امات طه .. -امنة : الله يسترنا .. وهاهي ملامح القلق من القادم تظلل وجوههن .. ومن فتيات هذا الزمان .. فلنترحم علي زمان .. كان الاصل فيه الراجل هو المقوم لكل شئ .. والبنت لا تخرج عن طوعه الا ان ارادت الموت !! |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-01-2011, 05:12 PM | #17 |
|
الأستاذ المحامي وصاحب القدر السامي أنت من الذين شجعوني وساعدوني كي أثبت قدمي وأنت أستاذي وأحسبك من الذين لا يُنكر فضلهما ولينا زمانين ما إتلاقينا لا مرينا ولا إتواصلنا وصدقني في شوق كبير ان ألتقي بك وبيني وبينك وعد النوار لأنه شال وظلل بيتنا وأنا دائما أجيك زائر في بوست فوضي الأحزان لكن صدقني بتاوق بس لأنه ما بقدر أشارك ورحم الله رجلاً عرف قدر نفسه لكن بنتعلم من أمثالك والكوكبة النيّرة بهذا المنتدي أنت رجُل متعدد المواهب وصاحب أفاق وأسعة لا غرو أن تأتي بكل جميل أما للصدفة اليوم جمعتنا يرجع الفضل لي تُكل السرة الجمعني بيك اليوم وذكرني بي تُكل الوالدة بت المني قبل وصول المطابخ الألمونيوم والسراميك أما الونسة والشمارات والله رجعتنا لي زمن جميل وجوعتنا عديل بذكري الكسرة وصدقني ذكرتنا أكل الشيط والويكة واللقمة ,أستاذي محمد أنت فيضٌ وأسع و بحرٌ خِضمٌ وأصل ياراقي تسلم |
|
03-02-2011, 09:23 AM | #18 |
|
اخي الطيب ..
حاضر انت بكل التفاصيل .. وبفوضي احزاني .. فشكراً لك اونت تثمل خاطرنا بما لا نستحقه من قول .. ووالدتك ربنا يديها العافية فقد انجبتكم وكفي .. فالتُكل .. لي معه ذكريات جمه .. حيث كنت اجلس بقرب الوالده (ربنا يديها العافية) اثناء عواستها فجر كل يوم .. (واقرض) ما شئت منها وهي سخنة .. وعندما استبد بي حبها كنت اشرب الشاي بالكسرة !! لاقاك جن زي دا !! والشيطة .. هي من نصيبي كل مرة .. واقرمشها وحدي .. ولا شريك بها .. وكثيراً ما يثور ضرب حولها في الاحقية .. انها ذكريات تضرب راسي الف مرة كل يوم .. فمن منا لا يبتسم للماضي الجميل !! ولك ودي واشواقي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-02-2011, 04:27 PM | #19 |
|
أخي محمد عوض السيد صدقني أبكيتني حينما ذكرتني بأنك تذكر قروض الكسرة الرهيفة مع شاي الصباح وعندها بكيت لأني تذكرت عندما أكل باقي العشاء من قُراصة أو عصيدة وعِز البرد أكلها الصبح مع شاي الصباح لله درك وأنت تذكرنا بأشياء باقية فينا ما بقينا وذكراها يجري فينا مجري الدم وأبكيتني بهذه الذكري وأنا أعيشُ في غربة لا النفـس راضية بها , و لا الملتقى من شيعتي كثب فلا رفيق تسـر النفـس طلعته و لا صديق يـرى ما بي فيكتئب سلمت يا صاحب الروائع سلمت |
|
03-04-2011, 10:39 PM | #20 |
|
اخي الطيب ..
رد الله غربتك للوطن سالماً غانماً .. وحتماً سوف نلتقي بالرحاب .. ان مد الله في الاجل .. وللايام الخوالي طعم .. لا يتنسي .. فلك مني الود والاحـــــترام |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-02-2011, 07:23 PM | #21 |
|
الاستاذ العزيز
محمَّد عوض السيد عوافي اراك تتدفق القاً جمَّل تُكُل السُرَّة , وحكى اهتماماتهن وقطعاً جمَّل من صور فريق السُرَّة الفكرة جميلة جداً جداً وهادفة فن الغناء وعوادي الدهر (الجراد) غث الشعر والنزوع للتِّمسِّح والتِّلمِّس الزواج العرفي حكايات الزار والدجل والشعوذة اشد على يدك مهنئاً ومشجعاً ومتتبعاً تحياتي يا حريف |
وبيني وبينك الفكرة وجمال الذكرى والنسيان وحسن الظن
|
03-04-2011, 10:59 PM | #22 |
|
العـــــــــــزيز
محمد شريف رونق ياتي كما تأتي السماء سعـادة .. دفــئاً .. وسرور .. واقدر لك الزخات التي امطرتنا بها بعاطر حـرفك الندي .. فشكراً عميقاً لك .. مع مودتي واشــواقي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-04-2011, 11:11 PM | #23 |
|
(6) - سيد اللبن: نسيبتي السرة ..
-السرة :لم تفهم ما يقصده سيد اللبن بالنسيبة وتردف له ياود امي ما تهاود لي اللبن دا عليك الله .. -سيد اللبن: يغرف من التُمنه مزيد منه ويسكبه في انا السرة .. اها كدا كيف !! -السرة : تسلم .. وبكرة انا عاوزه رطل زياده .. باقي لي عاوزه اعمل ملاح روب .. وتدخل مسرعه الي الصاج الذي بدات في اشعاله قبل ان ينادي عليها سيد اللبن .. وهاهي فاطمة تدخل ومعها مدينة وامنه .. -فاطمة : السرة كيفنك ؟ -السرة : الحمد لله بخير وعافية درت .. كيف انتو ؟ -امنة : انتو يانسوان اللبن دا امس ما اتقطع عليكن !! -مدينة : لا والله تمام ومافيه شئ !! -فاطمة : بتكوني خليتي حبة مويه في الحلة النجضتي فيها اللبن يابت امي !! -امنه : والله يمكن بس انا ماحصلت علي قبل كدا !! وعندي حلة اللبن دي براها عشان فيها القنانة !! عوضية وفوزية يدخلن سوية .. سلام .. كيف اصبحتو .. فيردن عليهن التحية .. -عوضية .. كدي يانسوان عاوزه لي خمارة .. اصلو عجيني دا فطير وشكلي حا اعوس اخر زول لحدي ما يخمر !! -فاطمة : هاك عجيني دا اليوم مر شديد لانو ناويه اعمل ملاح خضرة مفروكة للغداء .. -فوزية : هوي يانسوان سمعتوا بي الراعي بتاع الغنم الادوه (فلانة) بت جادين !! فوزية : معقوله يابت امي الناس دي بقت تدي النسوان ديل ساكت !! -السرة : بلاهي .. عشان كدا قبيل سيد اللبن قال لي نسيبتي .. يكون قاصد العروس دي .. لكن صلتو بالعريس شنو !! امنة : هي .. ما ود عمو الراجل دا .. وكلهم ادروبات .. -السرة : سجم خشمنا .. وطيب انا قرابتي بي العروس شنو .. ما تعرس كان معرسة .. تطير عيشتها هي والراعي حقها دا !! والله دا كلام دا .. ويرجي المسخة المعولق اليصبر لي بكرة كان ما وريتو ابتفه كبيرة !! -فاطمة : انت يا السرة ما كان تسالية يمكن ما قاصد دي .. وقالها ليك من سبيل الهزار !! -السرة : يهزوه زي الفرصة ويندفق !! جانا كمان هزار مع سيد اللبن .. وبكرة ابقي في لسان النسوان .. ويقولن السرة تتكشم زي نار القصب مع بتاع اللبن !! لا لا يا بت امي بوريه ليك بكرة العجب !! -مدينة : ما يدوه لو زول كويس .. هي زاتها بايرة وكبيرة .. والتلحق تجيب ليها بطنة بطنتين يوانسوها لمن تكبر !! -فاطمة : الزوله دي ما كبيرة يامدينة للدرجة دي وبعدين ما شينه لامن يدوها لي راعي غنم !! ما معروف اصلو ولا فصلو !! -عوضية : الراجل راجل .. وبياخد اي مرة عاوزها .. لو وافقوا اهلها .. العزيل كمان شنو هو الرجال الزمن دا في !! والا كتار لامن تعزلو فيهم !! - (وهنا تظهر اراء كل منهن وكل حسب بيئته التي تربي فيها ) - -السرة : يدوها ليه والا يقسموها شرموط لي ناس الفريق !! انا مالي بيهم !! -فاطمة : اجي اجي يا السرة مش حلتكم واحده واهلها طوالي بقولو انهم اهلكم !! -السرة : جنس مسخة غايتو .. هووي اي ناس حلتهم واحده .. يبقي اهل !! ما عندنا اي صله بيهم يا فاطنة لا من قريب ولامن بعيد !! -امنه : خلاص طيب وقت ماعندك بيها صلة دمك فاير كدا لي شنو !! -مدينة : ياجماعة الموضوع دا اقفلوه طيب لانو بجيب كلام تاني !! -السرة : اي عليكم الله .. انا الناس ديل ماعندي بيهم اي صلة قرابة !! والنسمعها تقول كدا تاني .. انا كنت بمشي فيها من باب الذوق بس !! -فوزية : خلاص يا السرة .. انسي الموضوع دا .. وشوفي اخر بتاع اللبن قال ليك نسيبتي قاصد بيها شنو !! -السرة : اي ما بخليه لي بكرة لما يجي .. وبوريه العين الحمرة !! انا خلاص كملت جردل عجيني .. والدايره تعوس تجي .. عشان الصاج دا سخن زياده من اللزوم بي كلامكن دا !! وينفض السامر .. بعد ذهاب السرة الي داخل غرفتها المنزوية بعيداً وهي تعد الافطار لزوجها .. كامل !! |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-05-2011, 06:21 AM | #24 |
|
المحامي وصاحب القدر السامي الحبيب الأديب محمد عوض السيد
رسمت خريطة القرية كما هي والمتلقي هو وزمنه لكن أنا محظوظ لأني من جيل التُكل وأحكي لك أخي محمد مرة كنت في إجازة وعندما وصلت للقرية كانت الساعة العاشرة مساءاً وكل الناس تناولوا وجبة العشاء وشعرت إنه في محاورة مع الأخوات والوالدة وإشتد الكلام وأخر شئ كان الرأي للوالدةتعرف السبب شنو باقي العشاء كان بي مُلاح ويكاب والبنات قالوا خالنا جائ من السعودية يمكن ما يأكل الويكاب لكن كان رهان بين الوالدة والبنات إنه الطيب ده لو ولدي البعرفو أنا وكان بقعُد معاي في التُكل وبملح ليه الشيط بيأكل الويكاب وفعلاً بدون أعرف الرهان وبكل حسن نية وبي شهية كاملة أكلت اللقمة بي الويكاب والشئ الساعدني الجو كان برد شديد نعم رجعتني لي زمن التُكل والأجمل إني لم أُخيب ظن أمي العزيزة ( بعد ما أكلت جاءت الوالدة وقالت لي أنا عافية منك السعودية ما غيرتك زي باقي الناس)وسألتها الحاصل شنو قالت باقي بنات الزمن ده غالطني لكن ما خيبت ظني وفعلاً أمي كسبت الرهان ومن هذا البوست الحنين بقول ليها خيرك علي بالجد كتير يا مرضعاني الطيبة بالصبر الجميل يديكي لي طولت العمر وفي الدنيا يوم ما يألمك سلمت المحامي |
|
03-05-2011, 11:52 AM | #25 | |||||||||
|
اتسمر وانا اقرا رسمك
ويح الكلمات وانت تطوعها كما تشاء فانت لا تستمد نصها من تشريع وتترك لنا التاويل نتابع باندهاش |
|||||||||
|
03-06-2011, 09:19 AM | #26 |
|
اخي الطيب
تسلم لما اوردته من ذكريات طاعمه كما ملاح الويكاب الذي احبة جداً فبالمنزل نطلق عليه (ملاح الشيطان) .. وقبل يومين طلبت من الحاجه ان تطهوه لنا وشاءت الظروف ان ارجع المنزل متاخر .. فتناولت نصيبي منه بالعشاء بكسرة بدل العصيدة .. وكان ينقصه السمن !! اكلاتنا كثيرة التي كانت تخرج من التُكل ياصديقي .. ولكن الحداثة طالت مناحي عدة .. ولك ودي واحترامي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-06-2011, 09:29 AM | #27 |
|
صديقي اشرف
كيفنك بالاول ؟ وشكراً لانك اتيت .. فاتي نيل بلادي والنســـــــــــيم .. وانت ترسم بالكلمات حلة بهية تزين قامة البوست .. ولك ودي واشواقي |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-07-2011, 04:50 PM | #28 |
|
(7) -السرة .. وهي تدندن بما يطيب لها من غناء سوداني وتردد في اغنية شهيرة لخضر بشير : ياقسيم الريد لي جود بالطيب يا اخ البدر -فاطمة : مزاجك رايق الليلة يابت امي !! -السرة : الدنيا حلوة والما بخليني انبسط شنو يافاطنة .. -مدينة : الله يديمها عليك ويزيدك كمان وكمان .. -فوزية : مالكم ما جيتو عرس ابتهاج بت خديجة ؟ -عوضية : انا مشيت يابت امي .. لكن ما خمج العدو العملوه في العرس دا !! -السرة : كدي احكو الحاصل شنو فيه .. -فاطمة: اي ورونا اصلو خديجة دي ما قاعده في الواطه من يومها !! وجنها فشخرة وكلام فاضي .. -نوال : العندو قرش بعمل البدع .. -فوزية : العرس ما عرس الجنيات لكن .. قالو ليك الحنة دي مدروة ليها سبعة يوم .. وكل يوم بي فنانة براها .. شفتن الخمج دا سمح كيف .. ماعندهم القروش لكن البتخليهم يعملوا كدا .. وقالو ليك جابو حواء الطقطاقة في اخر حنة !! -عوضية : النوريك الافظع من كدا : العروس جابو ليها رقاصة تعلمها الرقيص من قبل 15 يوم وقالو ليك مؤجرين ليها شقه للكلام دا بس براها !! ومعاها صاحباتها .. شفتو جنس البزار دا !! وقالو براها جابوها بي 5مليون جنية .. -نول :عليك الله يابت امي ! قروش قدر دي لكن !! -السرة : سجمنا .. سجمنا .. كان يدونا الخمسة دي ونحن بنعلمها ليهم الرقيص الموخمج !! -فاطمة : اها يافوزية تمي باقي الشمار عليك النبي .. -فوزية : جاياك يافاطنة ,, والطباخ جابوه من البقعه ومعاه الصيوان الكبير .. وكان شفتي الصينية دي فيها 20 صنف من الاكل .. شئ عرفناه وشئ ما عرفناه !! غايتو اكلنا علي غبانا ساكت في العرس دا .. كان اكلونا لحم خنزير ما فينا زول بعرفوا !! -نوال: والله كلام عجيب دا 20 صنف !! بس من شنو الاصناف دي كلها .. كدا خضار السوق كلو ما بجيب الكمية دي !! -مدينة : انا الولية الفشخارة دي ما جاتني في وفاة ولد اختي سمية !! عشان كدا جادعة ليها الطرشا .. لكن الخمج دا هم اسيادو !! -نوال : لزومها شنو الفشخرة الزي دي يابنات امي !! هسي لو عملو عرس عادي زي الناس مالو !! -السرة: لكن راجلها دا مش قبل كدا كانوا متهمينو بي قضية سرقة من المصنع بتاع ناس الاحمدي !! -فاطمة : اي والله لكن الحكاية دي طولت .. -السرة : طولت ومن ديك الزول دا بقي مرتاح .. زي الجاتو جنيه !! -فوزية : انتو ماشفتو خديجة لابسه دهب قدر شنو في يديها .. والله مافضل ليها الا تؤجر ليها زول يشيل معاها من كترتو !! -عوضية : عليك الله يافوزية .. دهب قدر دا معقول !! -فوزية : الولية دي قالو عندها دهب اكتر من كدا !! -عوضية كمان العروس دي قصة براها .. حورية بس .. مش البت الزرقا الزمان ديك !! علمت شنو غايتو ماعارفه .. الا قلعوها جلدها داك ودا كانت داساهو !! -السرة : تضحك بشده .. الله يجازي محنك ياعوضية .. كيف تقلع جلدها كيف يعني !! عوضية : اي والله يا السرة جنس دا بجي كيف لكن !! بين يوم وليله تبقي بيضا الشغلانية فيها انة !! والخواجات ديل بقوا ما بنضمنو بعملو اي شئ !! فاطمة : غايتو متل ديل بخلو الجنيات مايعرسوا تاني .. والبنات يحردن العرس زاتو !! عوضية : والله صدقتي يافاطنة .. والعرس مفروض يكون بسيط واي حاجة بتاعة فشخرة يخلوها لمن يبقوا داخل بيتهم براهم !! السرة : الله يوعدنا بي دهب زي دهب خديجة الماقادرة تمشي بيه دا !! ويرفعن اكفهن جميعاً بلا استثنا ويرددن .. اللهم آمــــــــــــــــــــــــــــــين .. |
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !! |
03-09-2011, 02:47 AM | #29 | |
|
اقتباس:
انا زاتي اللهم آمييييين يا محمد عوض جميل الحاصل هنا ده قدر ما ادخل البوست ده اشاهد النسوه وكمان الوان التياب والصاج كأني اشاهد فيلم سينمائي ........سرد اكتر من ممتع مبدع انت أخ محمد عوض يديك الف عافيه ومعاك مواصلين ... |
|
واعمل لدار رضوان خازنها والجار احمد والرحمن بانيها قصوروها ذهب والمسك طينتها والزعفران حشيش نابت فيها .* .* .* .* .* .* .* .* http://www.quranflash.com/quranflash.html |
03-09-2011, 03:42 PM | #30 | |||||||||
|
|
|||||||||
|
الذين يشاهدون محتوى الموضوع الآن : 1 ( الأعضاء 0 والزوار 1) | |
أدوات الموضوع | |
انواع عرض الموضوع | |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
مســـدار أبو السرة | Dawzana | «۩۞۩-منتدى الادب والثقافة-۩۞۩» | 11 | 05-24-2010 08:51 PM |
السرة بت عوض الكريم | ابو صديق ود صديق صديق | «۩۞۩-منتدى الادب والثقافة-۩۞۩» | 0 | 03-29-2009 04:42 PM |
السرة بت عوض الكريم | امجد | «۩۞۩-منتدى الادب والثقافة-۩۞۩» | 0 | 11-18-2008 06:19 PM |
حكام الحصاحيصا يغردون خارج السرب | العشي | «۩۞۩-المنتدى الرياضى-۩۞۩» | 0 | 07-27-2008 02:29 PM |
يا سلام يا ناس الحصاحيصا بحبكم بشكل | جنترة | «۩۞۩-منتدى الحصاحيصا الحر-۩۞۩» | 19 | 07-18-2007 10:30 AM |