التميز خلال 24 ساعة | |||
العضو الأكثر نشاطاً هذا اليوم | الموضوع النشط هذا اليوم | المشرف المميزلهذا اليوم | |
قريبا |
بقلم : |
قريبا |
آخر 10 مواضيع |
الإهداءات | |
|
«۩۞۩-منتدى الادب والثقافة-۩۞۩» يهتم بالأدب و المواضيع الثقافية و الفنية |
|
أدوات الموضوع | انواع عرض الموضوع |
01-26-2009, 06:49 PM | #33 |
عضو موقوف
|
انت وانا من حقنا نفرح نطير زى الفراش لمكان بعيد ما فيهو زول قبلنا انت وانا من حقنا نلملم عذاب الزكريات كان الزكرى تانى تلمنا عارفنو ظلم الهوى كم غبن قلوبنا وحزنا يومنا الفرحنا مع الخيال وقلنا الفرح من حقنا بشرنا بى فال الفراق زى ماحرم عشاق كتيير من قبلنا انت وانا نبقى عشاق للابد نشيل الغرام فى دمنا لاانت تنسيه ولا انا انت وانا عاشقين رهاف ساكنين ضفاف شط الامانى وحبنا انت وانا من حقنانسكن فى الكواكب وفى قصر لغيرنا ابدا مااتبنى نسامر النجوم يزورنا القمر الحسى لو جافة الظروف ما بغبنا ورجعنا تانى تانى تانى لقينا الصبر الاصلو مزروع عندنا انت ياروحى وامانى الزول الجميل الاصلو مخلوق مننا وشنو الفضل مابقيت انا وباقى الحكايه المحزنه انسان بريد عينيك كتييير عشق حكايتك وادمنا لم رجع خطوي ولقاك بقى يكره الغربه المريره ويلعنا ياربنا ياربنا ياربنا العشنا من ظلم الهوى مايعيشو زولا بعدنا انت وانا نبقى عشاق للابد نشيل الغرام فى دمنا لا انت تنسهيو ولا انا ولا وانا |
|
01-26-2009, 06:53 PM | #34 |
عضو موقوف
|
غيب وتعال تلقانا نحنا يانا نحنا بنفس الايادى الراجفه المشتاقه لى ساعة سلامك ماغيرتنا الظروف ولا هزتنا محنه كم بعنا فى الغرام واشترينا وغير هواك ماربحنا وياحبابنا وياشبابنا وياربابنا وياسمحنا تلقانا بنفس القلوب الطيبه الديمه تطرب من كلامك تلقانا بى نفس المشاعر الطيبه الديمه تطرب من كلامك تلقانا بى نفس القلوب الياما حزنت لم فقدت ابتسامك والله بعدك ياغالى لا غنينا ولا انشرحنا وتعالينا تعالينا تعالينا تعال يا انبل عواطف طافت الدار الحزينه تعال لى نفوسنا انت يامنبع عذاب وانت يامصدر انينه تعالينا يانيل البواكى الكانت بتطرب يازين يوم تجينا بالخطى الواعده وتزينه لانسيناك واسترحنا لا لقيناك وفرحنا انت غيب وتعــــــــــــــــــــــــال |
|
01-26-2009, 06:59 PM | #35 |
عضو موقوف
|
ماخلاص قلبى اصبح من عذابك فى الاسى وهجير شديد وجعاتو ماشافن مساء يوم القى ابتسامتك ابتسامك والصباح ويوم القى فى عمقى الجراح والعطف منك ياسماح يتلاشى راح عاد اقبل وين واحكى الوجعه ياتو خديد اشيل الدمعه وياتو حنين يجيب الراح اشيل كلماتك واسافر اذكر بسيماتك واساهر خلى طيفك يبقى هاجر يخلينى فى مسحة حزن مابتنطرح مازى وجيهك كل يوم يصبح سمح يموت جرح وجيبى جرح وقليبى لامات لافرح اقبل وين واحكى الوجعه ياتو خديد اشيل الدمعه وياتو حنين يجيب الراح هسع خايف من فراقك لم يحصل ببقى كيف زى ورد فى عز نداهو خوفو بكره يزورو الصيف من عرفتك كنت حاسس الزمن لى مابسيبك كنت حاسس رغم ريدى انى زى الماحبيبك والحنان البينا ولف لانصيبى ولا نصيبك والزمان عارف مصيرنا حقو لى ماكان يجيبك والفرح فى دربى عارفو اصلو مابطول كتير زى غمام فى سمايا عد وسابنى فى عز الهجير كم فراش على وردة طلت اصلو ما قايلة بيطير فات ورا شايل هنانا خوفى من نفس المصير وحقو ياعينى توالفى الصبر قبال فراقه وانتى عارفة الجاي بكره وبرضو تغرقى فى اشتياقة كم عيون فى الريده غرقت والزمن من ريدها ساقها ما كتير القلبو حبه ياما كم فى هواها لاقا يازمن علمنى انسى المحال نسيان عيونها حتى لو ايامى طالت ما اظنى اعيش بدونها ما اظن ايامى تانى تانى زى حنانها تكون حنونه انت خونى زمانى كلو اوعك يوم تخونها يازمن علمنى انسى المحال نسيان عيونها |
|
01-26-2009, 07:05 PM | #36 |
عضو موقوف
|
عــــشـــان أهـــــلــــك كلمات / عزمى احمد خليل عـشان أهلك بخليكِ وأشيل في جرحي ماضيكِ أحـاول وبـرضى ما قادر عشان أنسى وأنسيكِ كـتير الـدمعه فـي عـينيك تشوفيني وتخبيها تـخافي عـلى أشيل همك وعيونك تحكى بالفيها وقـدر مـا يقولوا ليك عني عشان ريدتنا تنسيها تـداري الآهـه بـالبسمه وريـدتك لي تزيديها ودائـمـا ده الـمبيكِ وعـشان أهـلكِ بـخليكِ غـريبه نـعيش زي الأغراب وما نتهنى بالريده وكـلما نـشتل الأفـراح تـجي الأقدار تمد إيده تـشيل أمـل العمر كلو وتبكى عيوني يوم عيده وصحى القالوهو في الريده بتعرف بس ظلم سيده وأنـا الـشقيان أرضـيكِ عـشان أهلك بخليكِ سنيني العشتها في ريدك حرام لا خنت لا خنتي أغـيب منك سنين وسنين وألاقيك انت بي إنتِ وقدر ما يلوموني معاك عشاني اللوم كتير شلتي وكـلما يـقيفوا في دربي أشيلك دمعه في صمتي وبـس مـجبور أقـول ليكِ عشان أهلك بخليكِ |
|
01-26-2009, 07:08 PM | #37 |
عضو موقوف
|
حــــــــــــان الــــــزفـــــاف حــان الـزفـاف وأنــا حـالـي كـيـفن بوصفو يـا ريـت هـواك لـي مـا انـقسم ولا قلبي ريدك نذفو قــالـوا الـبـعـيش الـدنـيـا يــامـا تـشـوفـو تـشقيهو بـي فـرقة عـزيز وبـالحسره ريـقو تنشفو وإن شـاء الله مـا يـحصل فـراق لـقلوب بـعد ءاتولفو بـس قـولي لـي أنـساك كـيف وأنـا قلبي ريدك محنو أبـحر سـنين فـي كـون هـواك والـليله فـاقد مأمنو وأنـا مـن زمـان عـارف الـبيكون وقـليبى كنت بيقنو والـليله يـوم حـان الـزفاف أنـا حـالي مـين ما حننو ولـو ده الـحصاد مـن كل ريد ناس قيس صحيح اتجننو جـوني الـصحاب وأنـا قالوا لي شافوها في توب الزفاف شـافوا الـدموع واتحسروا والشوق غمام في عيونها طاف ومـــش عـــاد حـــرام ســاكـن الـضـفاف يــنــشـره فــــي عــمــرو الــجـفـاف طول عمري بزرع في الورود وحصادي شوك آخر المطاف |
|
01-26-2009, 07:14 PM | #38 |
عضو موقوف
|
أحتاج دوزنة ً الشاعر محمد مدني أحتاج دوزنة ً تفك حبالكم عني وتربطني بكم كيف التقيتم… خلفَ نافذتي تجمهرتِ البنادقُ ناصبتني الشعرَ والخوفَ المسيجَ بالخمور قرّبت بين النساء وباعدت بين النساء وبيننا - نادوا الوصيفات الشهود وكل خدام البلاط - هذا النكوص يخيفني…. سأدس باطنَ راحتي في صدرها وأظل أعلن أنه _ قد قٌد من دبر _ فكيف ترونني ….؟! أحتاج دوزنة ً وترًا جديدًا لا يضيف إلى النشيد سوى النشاز لغة ً تفتش عن أراض ٍ خصبةٍ شمسًا تغير طعمَ فاكهةِ الشتاء وقتـًا أجاوزه لوقت قادم لا وقتَ فيه لباعةِ التصفيق واسم العائلة هذا زمانك يا عمائم فلتقودي (( الغافلة)) نحن السكوتُ نموتُ إذ تختارنا ضمنَ المفاضلةِ البيوتُ يفرُّ لونُ دمائنا عنا فتنسحب القصائدُ أو تبادلنا الحيادْ صمتـًا تحاورُنا الطريقُ وتنزوي طرقُ البلادْ لا لأعدائك و المعتزلة للذين يحاصرون الحربَ من تمييعها حتى تباشير الفطام عن الصدامْ لا لكل اليشبهونَكِ من بيوتٍ وبناتٍ وبلادْ لا لابتعاد الحزب عن حرب تقود الى السلامْ لا لاقتراب الحرف من حل يحبل إلى رماد للشهداء والفقراء جمهرةِ النساء العاهرات لطفلنا آلاتي وكوم ِ اللاجئينْ للداعين في الصلوات آن نْشتمّ عطرَ كِ أي نعم هتفنا ما سمعتم، ثم هاترنا انصرفتم هددنا بأن …. ما استثرتم هدرنا :- ها يهتّـف دمعُـنا ودم يعاندُ أن يَجـِفَّ ولا يُـَردْ سيمل أطفالي الصغارُ البحـَر يا بحرًا يجاوز في سكونه كلَّ حدْ يا بحرُ … قـُم حرّ ك … تحرك أو فعد نحو ابتدائك فالنهاياتُ البعيدة ُ لا تُحدْ ألفظ جحيمـَـك أو فغادِر سا حليك إلى الأبدْ جيئي بخاتم مـُرسَـليك فقامتي ضد اتجاه الريح …. لا تستغربي صمتي …..لا بقافيتي التي تختارُ أن تختارَ أن أاشتط فيك وفي مواجهة السؤال المستمد من السؤال الينتهي بعلامةٍ لاتحمل اللونَ المحدّدَ للصفوف ، أنا أحدد شكل قافيتي لونها ، فيحيلني للموقف آلاتي ، أنا آلاتي هلمي املأي كفيكِ من زبد الوداع أحتاج مفرزةً من الشعراء والجوعى لنعلن سخطـََنا أو ننتهي منا بأغنية تذاع ْ أفٍ لأمي ألف أفٍ للجميع أبي أولي الأمر الذين تآمروا وتدبروا أمرَ العوائل والعيال هذا زمانك يا زلازلُ زوجينا ما نكابد أن ننالْ ***9827; لليوم غدْ ها … أرعدتْ في الأفق مدْ إنا تعبنا من خروج الطفل في حجم الـّلحـَدْ هزي بجزعك إنني اشتاق أن ألقاك في وهج الجسدْ مدي بخنجر ناهديك فتستقيم خريطة ُ الإخصاب يأتي جيلنا كالرمل منفصلا / أحدْ لماذا لا نغني بالغات الأم إنـَّا ما نزلنا من رؤوس انوفنا إلا لنصعد في الغيابْ ولم إلتـفـتـنا للسماء .. لعلها والسـُّر يحضنه الترابْ هذا كساد تجارة العرافِ والعرابِ والأمل / الخرابْ للعشق والعشاق ِ مرثيتي وأُغنيتي لقبرٍ فوق ظهري يبتدرني كلما أزف الستارْ قبضُ ‘ المياه هنا وتشكيلُ الهواء هـ ن ا ك هندسة ُُُ الدمار يا لهفة َ المأموم ِ صلٌى فرضَه قبل الوضوء هذا ظلامُ النار تحرق مشعليها دون ضوء كتبي وأطفالي المضوا – آتون عمداً – في القصائد في العلاقات الجديدة للكلام / الفعل بالتنظير بالتنظيم ، بالتنجيم … يا حزبَ الصدام الفصل هذي نقطة للبدء – خط ُُ للمسير فلا تهادن. لماذا تضخـّم هذا الجبل ..؟ وأي طريقٍ يسدُ ..؟ أللأمس يمتـدُّ أم الليالي التي حبلت بالشموس يُعدّ ..؟ ما همّنا ..؟ اللشمس أم للـ …… بلى همنا أن يُقــدّ ..! رؤياكِ ضد كتابتي وتصوري للون حداً في الجرائد في اللقاإت العديدة بالبنات / الزنجبيل أو الرجال / الثلج يا تنوري الوقاد ( دستك ) ها أنا.. حجرُ الأساس إطارُ فكرتنا وأرضُ المتعبين ستشهد العرسَ الكبير للذي نادى { بأيلول } على الناس ِ …..سلامْ للذي وَحـّدَ ( حَلْحَلَ ) بالعشق وبالموت ِ… سلامْ و(( لقلوج )) سلامْ و(( لعندات )) سلامْ خالفَ الآمر وعضّ على أن (( مضادّة )) لن تنامْ فسلامُُُ ُ وسلام ْ السراب يجاهد الأخبار أن تلبسهُ أو تُـلبسه ُ صورتها ... سرابْ ضاقَ الخرابُ بضيق رقعتها … ضيقَ الترابِ بظلَّ خارطة الخرابْ هذا الحنينُ إليكِ عَطـّل فيّ أ غنيتي أهداني سكوتا لا يُؤرَّخ للعذابْ إنه الصخرُ العـجيبُ َوقـَـْعَـتـَهُ يؤلمك أو وَقـَـعَـك َ تـُصـَابْ. (( بمن تنهض القافية …؟ أ بالسيف أم بالرغيفْ...؟ أياً …. تكتبون وكيفْ تقاتل قافية … (( غافية ))..؟ والحبيـــــــــ …. ومال الحبيبة ...؟ رعــبُُ ُ و حيفْ أنا أكتبو :- بالحبيبة والعائدين وجوعي المخيفْ أدوزن أغنيتي التالية وأرفض أن نكتفي بالرصيف تابعوا ماشئتموا أو طاوعوا من خفتموا فالزاحفــــون إلى الفجيعة انتموا فقط افهموا أن لا وثيقة ً أو وفا قْ ولا حقيقة َ أو وثاقْ يُخفي عن الأطفال عورة َ من دفنتم من رفاق . |
|
01-26-2009, 07:19 PM | #39 |
عضو موقوف
|
الطمباره والغناى للشاعر/ محمد طه القدال لحن الاستاذ/عثمان النو نحن اهل الفرحه جينا لاالمدامع وقفتنا ولاالحكايات الحزينه لما درب الرايحه جابنا جابنا في هادى المدينه ياولدى الدروب شقاقا بحر التيه ليك درب ولا دربين مساك الدروب ضهاب ليك قلب ولا بالين وسواى القلوب كضاب ليك ضهر ولاسرجين ركاب السروج وقاع شق ياولدى بحر التيه بتتدردر وتتودر ولامن يوم علي تايتنا ديك ترسي نعزك بالقبيل داخرنو ليك الشوق بحر ياولدى بحراً تيه قت ليك العليك ادرابو لا تنغش ولا ترضابو لاتنغش في الزمن الزمين والكي يسوهو خلاف عشان الني عليك الدور وتصريف الليالي بدور تشيل ما شلنا من الهم ولا من دمعه ترمي الدمعه فوق دربك روح يابا .. وابق قفاك لاتعاين ولاتعاين علي موطاك ولا تندم علي خطوا تملي مشيتو لى قدام وابقي العاتي زى سنطتنا زى صبرا نلوك فوق مرو زى الزاد لاشيتاً نزل في الجوف ولابرجع ولا بنزاد واركز للبجيبها الريح تقيف انت ويشيلها الريح وابقي العاتي والدرب الوراك مسدود و شيل شيلتك بقيت للنص لاحلما بجيب البر ولا حدود وانبليتا اختا الرمله ما تقع البكان الهش هي الممطوره مابتبالي من الرش النعمه بتعرف عاطيها والجمره بتحرق واطيها بالكيله عطانا و ما لقينا فوق جمر خطانا وما لقينا يوم الوعد... ياحليوه فيك الدنيا ما كانت شروق الا الارض متكشفه متبلمه نعمنو من خير الخريف لافحالها شال منطرحه خضرا وفرحه دوب تتشابي لي عين الشمس من بت حليوه النفس بيضا كذا الحليب والروح مشحتفه في البلود الفيها ريحتك للبعود من فزعة الغربة البساسق فوكا موراجع ولا بالحيل قريب الروح مشحتفه في الحبيب القلب بكر الدنيا ما شافت جديدو ولا الحزن دقالو باب وشفتي كيف يوم الوعد كيفنو مترامي الغمام والقمري زغرد للبلوم النسمه هبت مرتين يا حليوه يوم دقيت بارضك فاس خصيب والتانيه في يوم الوعد والايد تسالم في الايدين والام تقالد فوق جناها تشمو زين وحليوه صاحيه حليوة ضاحيه كذا النسيم والدنيا غيم وحليوة جد جد ياولد قول للبلد قايل غناوي الحزن ليش شايل مساديرك مجامر دمع ليش ليش يا بلد والناس تريد والدنيا كل ما نريد تزيد تملا الايدين تفرح تهش لو صحيح غنينا بالدمعه الحميمه ولو دموع الفرحه ما لاقت غنانا بكره نرجع تاني للكلمه الرحيمه شان هنانا شان منانا شان عيون اطفالنا ما تضوق الهزيمه |
|
01-26-2009, 07:22 PM | #40 |
عضو موقوف
|
كل الخير لانك عندى كل الخير وجيهك فرحة الدنيا ودواخلك زى شعاع النور عرفتك وكنت زى شفتك قبل القاك وزى انك بتنبعي من فرح جواي تمسحي عن رؤاى الضيم وتضحكي للزمان الجاى وتتفجر مسامك ضي مع الصبح الغشانا شوى كأني معاك كائن حي كأنو صفاك كأنو الحل افارقك والعمر عندك زهيراتاً غشاها الطل واحاسيسك بتتكمل غنيواتك بتتبارك مع الايام وتتجمل افارقك والزمان اجمل عشان تشعل ملامحي ضياك كل مانجيمه تتحول وشان تفضل ملامحك فيّ زى ماكنتي في الاول |
|
01-26-2009, 07:27 PM | #41 |
عضو موقوف
|
نقطة ضو
في اللحظة ديك والتو لحظة الميلاد كنتي نقطة ضو فرهدت بيك فرهيد وانتشيت بالريد طرت بيك الجو قالوا ايضا بت قلت مالو ولو مالو مالو مالو مالو مالو بختي بختي انتي بتي امي اختي همي شيلي شيلي شيلي مني ختي تقدري انتي تشيلي حملي واسمع عنك ما يفرحني الاستاذة ديك كتر خيرا يوم تلقانا هي بتحصلنا وتوصلنا تفك الحيرة ما بتتصنت وما بتتعنت ما بتاوق في حق غيرا وشان تفضل ملامح ماضهبت اقول لقيتك انتي فى كل الخواتم والمياتم والنجيمات والعواتم والمغنين المطاليق ما حزنت اقول بكيتك نحن فى حزن المخاليق الفرح جاييك وعد غنوة اولاد التحاريك كنتى فى ليل الخوابى تهاتى بينات الطوابى تحاكى جقليب السعى الوليدات خلو حجرك ريح يفوفى وعين مزرزرة من شقى الفرح المرابى منية الوعد الداعى انت في خوفك تكاتل رفة الطير والحفيف انت فى شوفك تخاتل عينة الجلب الخريف انت فى اللالوبة مصلبة البنيات النسيمات الهفيف انت فى اللالوبة مشنقة الوليدات ناس نجومى محبس النفس الرهيف بطنك كرشت غى البنات نافى دقنك حمست جلدك خرش مافى وكت الوهم وافيت ..وكت العلم جافي صدق الوعد نافيت .. مر الصدق وافى يا ديارى الوين ....نى تور عفينة الشينة ..... نى ما اضينة وزينة.....ني تور عفينة الشينة....ني سنتاً والعيش بالقبضة قلبك شابايل النبضة جوني العشاء ملقوني جهدية ماكلة أكتوفي يا امونة شن بتشوفى يا عيونى شن بتشوفى شدرا تال اليمامة ولا الصقر الحمامة ولا البطن التفوفى يا امونة شن بتشوفى يا عيونى شن بتشوفى جهدية وسيف وراية تبروقة وخيل وشاية اذان بالجوع اذن لى ام خوفك فايت خوفى يا امونة شن بتشوفى يا عيونى شن بتشوفى جهدية الاورطية جهدية الحلبونا شدو جمالم جونا جلبنا ليهم سمسم السمسم ما كفاهم جلبنالهم سعية |
|
01-26-2009, 07:32 PM | #42 |
عضو موقوف
|
حــــــب النــــــاس اتعلمنا من ريدة نحب الدنيا ونريدة ونرحل في عيون الناس نشيل لى كل زول ريدة لما لقينا عينيها لقينا الدنيا وافراحا وللامال فتحنا دروب لى احلامنا كم ساحة غريبة الدنيا جمعتنا وبقولو عليها رواحة وجانا الريد يعلمنا نعيش الدنيا بالاحساس نسامح بي قليب طيب نشيل الريد لكل الناس عرفنا الريدة في الطيبة وحلاوة الريدة في الاخلاص يا ريت كل زول تايه يلاقي الريدة في دربو عشان الناس تحب الناس وذي عينينا يتحبو وما اصلو البزورو الريد حب الناس بزور قلبو |
|
01-26-2009, 07:36 PM | #43 |
عضو موقوف
|
ســــــلمي
اقول الكلمة ما تاهت خلاص في الظلمة واعاتب الليل دا ما ليلاً طويل يا سلمى انت ما شفتي العلي دوام عشان حبك بقاسيهو بصابح في خيالك ديما وارجى اليل اماسيهو واخاطب في سراب الحب ومرات اقسو جافيهو اكفكف في دموع الشوق نكدي الما بخليهو حبا ضاع كما ضاعن سنينا اليوم بنحكيهو تقول كان الحديث بينا نخاف النسمة تفشيهو وانتي ليه يا سلمى يا ظالمة بتكوي قليبي تطويهو تحرك روميو من قبرو وعنتر في بواديهو غريبة الدنيا غريبة الدنيا كم عاشق صبح طربان تبكيهو وكم قلباً منور شوق وتطفيهو وكم وعداً يقرب يبقا تلغيهو غريبة الدنيا غريبة الدنيا حليل شوقي وعيانتك تلاقيهو يدور يرجع وتحلف ما تخليهو وياما عشت في نشوة قبل ما حبي تنسيهو وياما اتدفقت عبرات تزكي حنانا ترويهو وغريبة الدنـــــــــــــــيا |
|
01-26-2009, 07:43 PM | #44 |
عضو موقوف
|
لــ داير تسيبنا ــو لودير تسيبنا جرب وانت سيبنا لو داير تحب حب وانساهو ريدنا يوم ترجع تصافي نسامحك ياحبيبنا ياعايش في دنيا من اوهام خيالك ياتاعب ضميرك ومارتيان لحالك ماتودر شبابك روق وهدي بالك رفقا بي قلوبنا ورفقا بي شبابك لو حنيت لقربي او جافيت مزار ي لو فارقتو دربي هواك في دمي جاري إكبر وابقي قصه ارويها لصغاري نعيش ونموت عليها واقولو غرام مثالي |
|
01-26-2009, 07:46 PM | #45 |
عضو موقوف
|
المصـــــــير
رائعة الفنان الراحل / إبراهيم عوض كلمات ذلك الرائع / سيف الدين الدسوقي ليه بنهرب من مصيرنا ونقضى ايامنا فى عذاب ليه تقول لى انتهينا ونحن فى عز الشباب نحن فى الأيام بقينا قصة ما بتعرف نهاية ابتدت ريده ومحبه واصبحت فى ذاتها غاية كنت تمنحنى السعادة ولى تتفجر عطايا ولما أغرق فى دموعى تبكى من قلبك معايا كنا فى ماضينا قوة قوة تتحدى الصعاب نقطع الليل المخيم ونمشى فى القفر اليباب كنا للناس رمز طيبة وكنا عنوان للشباب وهسى تائهين لينا مدة نجرى من خلف السراب تأنى ما تقول إنتهينا تنهى جيل ينظر الينا بانى أماله وطموحه ومعتمد أبداً علينا نحن قلب الدنيا ديه ونحن عز الدنيا بينا تانى ما تقول إنتهينا نحن يا دوب إبتدينا |
|
01-26-2009, 07:55 PM | #46 |
عضو موقوف
|
كلمات / قاسم الحاج لو اعيش زول ليهو قيمة اسعد الناس بوجودي زي نضارة غصن طيب كل يوم يخضر عودي ابقي دار لكل لاجئ او حنان جوه الملاجئ ابقي للاطفال حكاية حلوة من ضمن الاحاجي بيها يتهنو و ينمو واحرسم طول ليلي ساجي والقي في راحة نفوسهم بسمتي وطول ابتهاجي لو اعيش طول عمري نسمة .. أو مع الايام سحابه اهطل ادي الدنيا بسمة .. أروي وادي واسقي غابة لو اعلم طفل واعــد .. لسه ماعـِـرف الكـتــابة أبقى شجرة ظلالها ورافة .. تحتي نايمين ناس تعابة أشقي والقي وابقي بهجة .. في النفوس لكل مناضل ابقي للمعتل علاجو .. وابقي للفــلاح ســنابــل ابقي للثـُـوّار سلاحم .. اعتي من قذف القنابل وابقي للكادح المـُـلوَّح كلُ حل موفــور وعـــادل |
|
01-26-2009, 07:57 PM | #47 |
عضو موقوف
|
الودعو ارتحلو الودعو ارتحلو شالو الهنا ورحلو ليه يعنى خلونا مارسلو وسألو ان قلنا نطراهم تالمنا ذكراهم ان قلنا ننساهم كيفن بننساهم عارفين طبايعنا فى عيونا شلناهم ماعرفنا درب الشوق من يوم عرفناهم ترجع خطاباتهم مافيها ذكرانا ماحسو بى شوقنا واقدارنا ورانا نحنا ناس طيبه شعورنا انسانه ونضحى بالريده وقلوبنا علشانه ياحليل محبتنا حليله اياما مرت بدون ذكرى ماظلت غمامه ياما سعينالا مشينا قداما فتحنا ليها قلوبنا حفظنا الزاما الودعو ارتحلو شالو الهنا ورحلو ليه يعنى خلونا مارسلو وسألو ان قلنا نطراهم تالمنا ذكراهم ان قلنا ننساهم كيفن بننساهم الودعو ارتحلو شالو الهنا ورحلو ليه يعنى خلونا مارسلو وسألو |
|
01-26-2009, 08:28 PM | #48 |
عضو موقوف
|
في محراب النيل أَنْتَ يَا نِـيلُ يا سَـلِـيلَ الـفَرَادِيـسِ نـَبِــيــلٌ مُـــوَفَّــــــــقٌ فـي مَـــسَـــــــابِـكْ بَيْنَ أَوْفَـاضِـكَ الْـجَـلالُ فمَرْحَى بالْجَـلالِ الـمُفِيـضِ مِن أَنْسَابِكْ حَضَنَتْكَ الأَمْلاكُ في جَنَّة الخُلْدِ ورَفَّـــــــتْ عــلـَى وَضِــــيءِ عُـــــبَــابـِكْ وأَمَدَّتْ عَلَيْكَ أَجْـنِحَـــــــــةً خُـضْـــرًا وأَضْــــفَــــتْ ثِـيَـابَـها فـي رِحَـــــابِـك فَتَحَــــدَّرْتَ فِـي الزَّمَـــانِ وأَفْرَغْـــــــــتًَ عَلَى الـشَّــــرْقِ جَــنَّـةً مِنْ رُضَـــابِـكْ بَـيْـنَ أحْـــضَــــانِــكَ الـعِـــراضِ وفـي كَفَّيْكَ تارِيخُــــهُ وتَحْتَ ثِيـابِكْ مَـخَرَتْكَ القُـرُونُ تَشْمُــرُ عَن سَاقٍ بَـعِــيـدِ الُخطَــى قَـوِيِّ الـسَّــنَـابِـكْ يَـتَـوَثَّـبْـنَ فـي الضِّــــفَــــافِ خِـــفَـــافـاً ثُـمَّ يَرْكُضْــنَ فـي مَمَــرِّ شِـعـابِكْ عَـجَـبٌ أنْتَ صَـاعِـــداً في مَـرَاقِـيـكَ لَـعَـمْــرِي أَوْ هَابِطَاً في انْصِــبَـابِكْ مُـجْـــتَـلَـى قُـــــوَّةٍ ومَــسْــــــــرَحُ أَفْـكَـــــارٍ ومَـجْــلَــى عـَجِـــيـبَــةٍ كُلُّ مَـا بِـكْ كَمْ نَبِيلٍ بِمَجْدِ مَاضِيكَ مَأْخُوذٌ وكَـــمْ وَاقِــــــــــفٍ عَـلَـى أَعْـــــتَــابِـكْ ذَاهِــــــلاً يَكْحَـــــــــــلُ الـعُـــيُـــونَ بِـبَـرَّاقٍ سَـــــنَـيٍّ مِــنْ لُـــؤْلُـــــــــــــؤيِّ تُــرابِـــكْ وصَقِيلٍ في صَفْحَـــةِ الماءِ فَضْفَاضٍ نَـدِيٍّ مُـنَــضَّــــــــــــــــرٍّ مِــنْ إهَـــــــابِـكْ أيُّــهَــا الـنِّــيــلُ فِـي الْـقُــلُــــوبِ سَــــلامُ الخُلْـدِ وَقْـفٌ علَى نَـضِـيرِ شَـبَابِكْ أَنْتَ في مَـسْـلَكِ الـدِّمَــاءِ وفي الأنْفَاسِ تَجْرِي مُدَوِّيًَا في انْسِيابِكْ إنْ نُسِــبْـنـا إلَيْكَ في عِــــــزَّةِ الـوَاثِـقِ رَاضِــينَ وَفْــــــــــــرَةً عـن نِــصَــــــــابِـكْ أوْ رَفَــلْـنـَا فـي عَـــدْوَتَـيْــكَ مُـــدِلِّـيـنَ عَـلَـى أُمَّـــــــــــــةِ بِـمَـــــا فـي كِتـَابِـكْ أَوْ عَـشِـقْـنَـا فِيكَ الـجَــلالَ فلَـمَّــــــــا نَقْـضِ حَــقَّ الذِّيَـادِ عَنْ مِحَـرابِكْ أَوْ نَعِـمْــنَـا بِـكَ الـزَّمَــــانَ فَلَـــمْ نَـبْــلُ بَـلاءَ الـجُـــــدُودِ في صَـــوْنِ غَــابِـكْ |
|
01-26-2009, 09:19 PM | #49 |
عضو موقوف
|
مصطفي عفاف الصادق يالكحلت عيون الدنيا بلون الغنوه يالضفرت ضفاير احساس الكلمه الحلوه يالشتت نجوم الليل في وش النيل عقدا فوق القمره بيقدح فينا الضو يالطقطقت اصابع السحب الشالن جو دفق عسل المطره و نقط ..كبت شو نضمت..غنت ..سكتت ..صنت مرقت ..دخلت ..قامت ..قعدت شن بتسو ؟ تقشقش فوق رقراق الدمع الكاسي العين بهدمة دم كل ما اتعرى يجدد توبو يضاري الريحه الكست الجو تساسك بين تيار الموج الكسر الجدول ودفق شو تسارق فوق نجماتا برقن هجن لجن ..باتن قو تضاير فوق وديانا شبعن ..رضعن ضرع السحب الشالن برا ..جو تصنت غنوة سيره عريسه مهقد ..مكسي ..مجرتك يفوح الصندل ..وعطر المحلب منو مدفق امو تعدل واختو الرقصت وخالو يبشر وعمو بيعرض وسط السهله وخيرو مدفق غنوه بتعزف نغم اتشتت ..رعدا صفق بردا هز اتباطن صوتو اتطانن حر لوح و هوا وظهرا فارسا تب ما اتلوى وزغرد ليك ايقاع المطر اتلبب حضن الارض ونام ود سيد احمد دق المحلب جوه الفكره وخت الذكرى ذكرى الليله وذكرة بكره ابيه و حره مبدأ و عزه سيما وعبره درايا و خبره شموخ بيت عازه الما بتهزه برغم الضيم وليد ضكران هز و رز , تب ما فز اتقطر نز ادفق ضي ود سيد احمد شال الريشه ورسم اللوحه وشتت لونها وتيرب بيهو سما السودان وكانت النبته عصارة الغنوه الفيها ثقافه .. وحب .. وسياسه مزيجها بلدنا وفيها ولدنا اتعطن الريد والبت الحلوه ..الوطن الغالي وسرج بيهو و شد ضهر سودانا القام وكيف بتفوت وكيف بتفوت .. يالولد الغنى وشنا ورنا وخالدا حي ما بتتضارى بشوفك قاعد بين الرمش الفوق عيني يالدفيت اعضاء الكلمه في ليل البرد ..الريح ..الصي يالنديت اغصان الحرف بصيفا حرا و شد الكي وكيف بتفوت يالولد الضوا وشيشو قليب الوتر الغنا وطربا غطى فجاج الحي تمرق بين ورتاب الزرع الفرهد تمرق بين حبات المطر الطقطق نقط يحضن ليلا سود ..هج ..وهود تمرق بين النيل الكتر ادفق و نمرق تمرق بين الوترالصفق غنا و زغرد تمرق بين صفقات الشجر اخضر و ورق قام اتشابى و عانق كتف الليل اتطاول باس القمره و قبل عين الشمس كيف نبكيك يا راجل الليله و بكره و امس كيف نبكيك ونحنا بنسمع صوتك سرا.. وجهرا ..وهمس كيف نبكيك و انت معانا تشيل و تخت ترص و تقص تفج السهله وتحكي الغنوه اللبست صوتك وشالت حسك ..ونفسك ..وروحك وسمحت زي وانت معانا بقيت جوانا و ماك بتفوت حتلت حنينا جوه القلب بصمت عليهو وجود موجود ..برغم الموج وسفر الجسد الما محدود غلبت تفوت كسرت الحاجز الراكز جسرو على المسدود رقعت الهدم الراسي خيوطو على المقدود مسحت ..مسحت البعد الارضي المامحدود نسفت مسافة الزمن الروح و مامعدود سكنت مسامة النغم المن ايقاع النبض بقيت الدم ..و الروح ..و القلب هزمت الموج ..غلبت تفوت تفوت لي وين ؟؟ وانت الزول الباقي وحي انت النور الوج الضي وانت البحر الدفق ري تفوت على وين ؟؟..ونحنا زرعنا لسع ني النيل الابيض لاقى و عانق حضن الازرق باس الابيض خد الزنجي اتقلدوا.. اتقادوا اتوحدوا ..فاتوا مات العنصر و داب الفارق من بيناتن صدر العين اتملى بالعبره اتنهد نفس الكلمه الحلوه ..اتأوه آهة طفت القمره و نفخت قلب الجمره وكبت فينا ضلام يا انسان .. يا فنان يالقاومت الذاكره و النسيان دخلت بوين ؟ سكنت الدم الجاري على الشريان لوليت جوانا عصاية الكلمه الشرف ..العزه العايش فينا في كل زمان جرجرت علينا حروف النغم الطربا يهز يفرح كل مكان ختيت الرأي صريح قولا و فعلا و فكرا سجل اكتب يا تاريخ يا استاذ .. يا ممتاز ختيت الدرس مفيد و صحيح درسا ما دايرلو وسايلا للتوضيح ونحنا فهمنا كتبنا درسنا على الكراس انتهت الحصه و ناحن سكلبن الاجراس مرقت صحيح ؟؟؟ مشيت بي وين ؟؟ وكيف خليتنا بدون تصحيح ؟!؟ نصحح وين !!؟ شلنا الهم نصحح وين جينا الكم نصحح وين وكل اقلامنا تقطر دم كمل احمر دفق لونها فحم ونحنا كبرنا وعينا و زدنا فهم عرفنا اهداف الدرس تمام ختينا النقطه ,الهمزه , الشوله ,الاستفهام خلصنا خلاص جمعنا قلمنا حبرنا كتابنا مع الكراس يالوحدت بسفرك كل الناس يامقياس يا ميراث واساس المعنى الحب ..المبدأ ..و الاحساس نعم الارث الباقي و اعظم ساس وكيف بتفوت و افتش ليك انا جاي بي جاي و أهلك و ناسك مرقوا يكوسو عليك معاي وانادي عليك ارتى عليا فوت بي وشك ارجع جاي وفجأه ...و فجأه بتطلع من جواي متل النور الضوا حداي وموج النيل الرايح جاي وهج العين الفكر الراي ومن الشمس بريق ضواي وصدر الام الليك غطاي حديثها يناغم فيك لولاي وصوتها يهدهد فيك هداي هوها..يا هوها واحد ..اتنين ..تلاته ابرة الخياطه فيها م وفيها ص وفيها ط وفيها ف وفيها جميع المصطفى |
|
01-27-2009, 06:34 AM | #50 |
|
العزيز ابو سفيان
تحياتى بقدر اشواقى لو تسمح لى بمشاركتك هذا الالق ... ودعنى اعرج قليلا لاشعار اهلى الشوايقه بلادي اسماعيل حسن
****** بلادي أنا بلاد ناسا في أول شئ مواريثهم كتاب الله ، وخيل مشدود، وسيف مسنون حداه درع، وتقاقيبهم تسرج الليل مع الحيران وشيخا في الخلاوي ورع وكم نخلات تهبهب فوق جروف الساب وبقرة حلوبة تتضرع وليها ضرع ،،، وساقية تصحّي الليل مع الفجراوى.. يبكى الليل ويدلق في جداولو دمع يخدر في بلادي سلام .. خدرة شاربي موية النيل .. تزرد في البوادي زرع بلادي أنا بتشيل الناس وكل الناس وساع بخيرها لينا يسع، وتدفق مياه النيل علي الوديان بياض الفضة في وهج الهجير بتشع،،، بلادي سهول ،،بلادي حقول،، بلادي الجنة للشـافوها ،أو للبرة بيها سمع ،، بلادي أنا بلاد ناساً تكرم الضيف وحتى الطير يجيها جيعان ومن أطراف تقيها شبع ،، بلادي الصفقة والطنبور ،، وبنوتاً تحاكي الخيل ،يشابن زيي جدي الريل، وشبالن مكنن في طريفو ودع ،، بلادي أمان ،،بلادي حنان،، وناسها حنان ،يكفكفوا دمعة المفجوع ، يبدوا الغير علي ذاتهم ، يقسموا اللقمة بيناتهم ، ويدوا الزاد ،حتى إن كان مصيرهم جوع ، يحبوا الدار ، يموتوا عشان حقوق الجار ، ويخوضوا النار عشان فد دمعة ،، وكيف الحال كان شافوها سايلة دموع ؟؟،،،، ديل أهلى.. البقيف في الداره وسط الداره وأتنبر وأقول للدنيا ديل أهلي عرب ممزوجة بي دم الزنوج الحارة.. ديل أهلي ديل قبيلتي ، لما أدور أفصل للبدور فصلي.. أسياد قلبي والإحساس وسافر في بحار شوقم زمان عقلي أقول بعضى.. ألاقيهم تسربوا فى مسارب الروح بقو كلي محل قبلت ألقاهم معايا، معايا زي ضلى لو ما جيت من زي ديل.. كان ،أسفاي.. وآمأساتي.. وآذلي.. تصور كيف يكون الحال لو ما كنت سوداني وأهل الحارة ما أهلي تصور كيف؟ |
|
01-27-2009, 06:36 AM | #51 |
|
عم عبدالرحيم
رائعة الرائع الشاعر حميد فتّاح يا عليم رزّاق يا كريم صلى على عجل همهم همهمة حصّن للعباد .. وهوزز سبحتو دنقر للتراب .. هم فوق هم هما صنقع لى السما وكان فى الجو فى غيم وكم نجمات بُعاد وكان الدنيى صيف لا قالتلوا كيف .. كيف أصبحت .. كيف لا لمسة وداد لا لمسة حنان لا رمشة طِريف من قلباً وفى زى أيام زمان .. أيام الدِفِى كانت ماها فِى .. كانت فى المراح شدَّتلو الحمار .. تحلب الغنم لى شاى الصباح والطير ما نضم .. ما رسـّل نغم عم عبدالرحيم إتوكـّل نزل .. فى المُشرَع لِقَى زُملان الشقا الجا من الجريف .. الجا من الجبل علْ الناس بخير صبّح هاظرُمْ .. نقْنقْ ناقَرُمْ غاظوهو .. ونعَل وعم عبدالرحيم ما بخَبِر زعل كل الناس هنا ما بتخبِر زعل تزعل فى شِنو .. وتزعل من منو.. كل الناس هِنا .. كل الناس صِحَابْ .. كل الناس أهَل والماهُم قُرَاب .. قرّبـُمْ العمل الطاق اليَطُقْ .. عشتْ .. آ .. أبوالزَمَل بى الحال العليك .. بى الفال .. بى الأمل عم عبدالرحيم .. كُتْ فلاح فى يوم فى إيدك تنوم .. على كيفك تقوم لا دفتر حضور .. لا حصة فطور تزرع بالقمر .. تقرع بى النجوم لكن الزمن .. دوّار .. آ .. بِدُوم عم عبدالرحيم .. ماشى على الشغل فى البال القديم .. من عار التُكل تنشايح جِراح .. كيف الغُسُل الدِنيِى أم صلاح تبدا من التُكُل من حِجـّة صباح .. فى حق المُلاح فى الغُبُن الجديد .. فى القسط القديم وبيناتِن عشم .. فى الفرج القريب أمونة الصباح .. قالتْلُو النـِّعال والطِرقى .. إنَهَرَنْ ما قالتْلُو جِيب .. شيلِن يا الحبيب غشّهِن النُقُلْتـِى والترزى القريب بس يا ام الحسن .. طقّهِن .. آ .. بِفيد .. طقّهِن .. آ .. بزيد إنطقّن زمن وإن طقّ الزمن .. لازمِك توب جديد بى أيـّاً تمَن غصباً لى الظروف .. والحال الحَرَنْ شان يا أم الرحوم .. ما تنكسفى يوم لو جاراتن جَنْ .. مارقات لى صُفاح أو بيريك نجاح ده الواجب .. إذن وأيه الدِنيِى غير .. لمّة ناس فى خير أو ساعة حُزُن عبد الرحيم يا حُر ماكا حُر يا ريت التمر .. ياريت لو يشيل كلِّ تَلاتْ .. أشـُرْ ولاّ أيام زمان كانت ما تمُر كان ماجاك هوان .. ما لاقاكى ضـُر كان لا ضِيق يضيق لا أنغرغَرْ صبر ولا شابيت غريق .. ولا طلوَحْ فقُر كان ماكان .. وكان أكسيكى دُر حيكومات تجى وحيكومات تغور بتحكم بى الحِجِى .. بى الدجل الكِجُور مرّة العسكرى .. كسـّار الجِبُور ويوم بإسم النبى .. تحكمك القبور تعرف يا صبى مرّة تلف .. تدور وللاّ تقول بَرِى .. أو تحرق بخور هِم يا الفنجرى .. يا الجرف الصبور كل السقتو ما باقى على التِمور وأرضك راقدِى بور لا تيراب وصل .. لا بابور يدور والماهية أُفْ عيشة هاك .. وكُف فى هذا الزمن .. تـُف يادنيا .. تـُف يا العَبِد الشقى ما أتعوّدْ شكى لكن الكفاف فوقك .. منتكى حالك ما بتسـُر إِلِّى كمان فى ناس فايتاك بى الصبُر ساكنين بى الإيجار .. لا طين .. لا تمُر وواحدين بى الإيجار .. ما لاقين جُحُر سِلعـتُمْ الضُراع .. والعرق اليخُر عمال المدن كلاّت الموانى الغُبُش التعانى بحّارة السُفُن حشّاشة القصوب لقاطّة القطن الجالبة الحبال الفِطن الفُرُن الشغلانتو نار والجو كيف سُخُن عيشُنْ كمّهو .. وديشُن هان قَدُر وناساً حالا زين مصنع .. مصنعين طين فى طين .. ووين ما مرابا مُر.. بارد همها لا يعرق جبين .. ولا وشاً يصُر عين والله .. عين كلها كمها .. وهمها هان قدُر فى الجنة أم نعيم .. فى الجنة أم قُصُر يا عبد الرحيم إلِّىِ ورا القبُر ويلكد فى النعال فتاح يا عليم وإن كان الفقر يا عبدالرحيم أشبه بى الكُفُر ونقرط لى الحمار نقريط الحمار .. لاتنسى النِعال الطِرقِى الخدار اللِّبِس الجديد تسريح السفر .. لى الماشى الصّعيد ماشى الدّيش .. نَفَر والبال إشتغَل بى الأبى ما يعِيد .. الحول ما أشتغل الغُبُن الشديد .. السابا ورحَل الضيق .. المحَل والفرج القريب الجا .. وما وصَل زى الحال ده يوم .. لا كان .. لا حصَل والبال إشتعَل السكة الحديد .. يا عمو القَطَر يا عبدالرحيم قِدّامك قطر ........... وسال الدم .. مطر وطارت دمعتين .. وإنشايح وتر يا طاحن الخبر ما بين القضا .. ومَرْحاكة القدر الشِّهدوا الدموم .. والدمع الهَدَر إيدُمْ فى التُراب .. والعين فى القطر عارفين الحصل عارفين فى حذر الخبر اليقين .. بوّخ .. وإنتشر أطفال القرى .. وعمال الحضَر أدوهو الطيور .. ودنّوا البحر إنصاعت سحاب وإنْدافَقْ مطر عم عبد الرحيم .. فى الشارع عَصر لى تالا اليسار متفادى الكَجر .. دورية الكجر جفّلت الحُمار .. وطلوَح زى حجر وعم عبد الرحيم .. إتلافا القطر فتاح يا عليم .. سال الدم مطر جرتق لى التُراب منشور بى كتاب روشتّة .. وجواب مفتاح أب قُراب .. أورنيقين سَهَر جنب لِبدة حُمار مقطوعين ضَهر ... عم عبد الرحيم ..يا كمِّين بشر صحِّى الموت سلام ما يغشاك شر .. |
|
01-27-2009, 03:23 PM | #52 |
عضو موقوف
|
الحبيب ابوكادوس
حبابك وحباب اهلي الشوايقه ,,,, هي مساحة لكل الالق متاحه للجميع ,,,, يعني اذنك معاك فبك وبجميع الاعضاء تزداد القاً فهيا ايها الاخوه والاخوات ضعوا بصماتكم علي هذا البوست حتي يستمتع الجميع بابداعات ابناء وطني |
|
01-27-2009, 05:21 PM | #53 |
عضو موقوف
|
عشرة مقاطع للحيـاة
محجوب شريف ********** ( 1 ) غطى الجبال الليل لكن هدير السيل لكن صهيل الخيل نار الغضب والجوع تحت الجبل مسموع يضووا عز الليل ( 2 ) والموج شديد الظلام غطى الشهيد الهمام لكن دماهو بتقيد لكن طريقو المجيد ابداً شديد الزحام رايات ترفرف غمام ينزل رزاز النشيد والنجمة تلمع هناك رغم المكان البعيد ( 3 ) والنهر عبر السنين يزحف بعنف وبلين في الليل بيلمع يبين فارس بسيفو السنين يحمينا حضنو الامين نطلع بكتفوا الشمال ننزل بكتفوا اليمين لكنو مين يقدر يقول أنا سيدو مين ( 4 ) في منحنى الدرب الطويل الحبة تفلت من جراب عابر سبيل مسكين هزيل عطشان يموت في السكة ما يتم الرحيل تكبر تشيل تلبس جميل تصبح مقيل عابر سبيل ( 5 ) عصفورة من أخر بلاد في رحلة لي أخر بلاد تعرف مواعيد الحصاد وكل دورات الفصول وأنضر ايام الحقول وتعادي أسراب الجراد وتنادي لوكركب زناد صياد على العش والولاد ( 6 ) أنسانة ابسط ما يقال لو صاح اعز من النساوين الرجال أنثى ولا دستة رجال تمشي وما بتطأطي ما بين بير وشاطي تطلع عالي واطي نهارها مع السواقي وليلها مع الطواقي وعمرها للجهال ( 7 ) والنملة في الصف العجيب وعلى انفراد نفس النشاط والأنضباط نفس الحماس تسعى وتجيب ولا من رقيب ولا حتي في الأمر التباس ولا في اختلاس أحسن كتير من بعض ناس ولا في اختلاس وهيلا .. وهيلا هيلا .. هيلا تلقى تفسها في سفينة وهيلا .. وهيلا هيلا .. هيلا تاني في شارع مدينة والحكمة بنفس الحماس تلقاها في الصف العجيب كم مرة تهرب من مداس من طفل عابث ومن لهيب بالحبة تمسك في عناد الحبة ملك الاتحاد ( 8 ) والحكمة في مر السحاب والعلاقة البينو ما بين الجذور واللسة في الباطن بذور وغنا الطيور والمعركة الدارت تصلصل بسيوفها وبالحراب والعلاقة البينو بين الغابة والهبابة والربابة والمنديل ومجرى النيل وضلفة باب وبكية طفلة في الكتّاب تفتش عن قلم رصاص وقع في الباص وحس رصاص هدر في ناحية فيها العيش حكر للجيش بتاكل من زمن مافيش وتشرب من زمن مافيش وكان اضراب ( 9 ) والشمس تطلع يبين ادق ما في الجبال تبدأ الموانئ العظيمة الهدور وتصحى المصانه بيهمة وتدور ووتملأ الشوارع وكل الجسور وتشفى الصدور جموع الشغيله خطاها ثقيلة تخلى القصور تحس بالفتور وحمى الزوال ( 10 ) تصحى المدينة تقوم تستحم وتولع سيجارة تدخن تسخن بشاى الصباح وحق الملاح وسيد الجزارة وتقعد تدندن تخيط زرارة ترتق هدوما وتفتق هموما وتسب الحكومة وتفن الريال وتنفض سريعاً غبار النعال وتنزل تواجه مشاكل عويصه تشرّط قميصا وتدق العيال ليه العيال يعيش النضال يخلى الحكومة تدخن تسخن بنار الكفاح وتقعد تطنطن لحدي الصباح بتطلع بتطلع حزينة وكتومة تشرّط هدوما وتحش المصحة يعيش الأصح يعيش النضال وضروري النضال |
|
01-28-2009, 09:40 AM | #54 |
عضو موقوف
|
صــــامـــــتـون صامتون ولا نزال رغم التسكع بين أروقة الضلال وتائهون ...معذبون نترقب الفجر الذي يأتي الينا بالضياء متي يكون تبت يداً كتبت محال أن يكون تبت مزاميراً تغني مستحيل كنا لها قبل التسكع بين أرصفة المحال كنا نغني للمطر ونراقص النيل المعذب والقمر والآن نحن نحتضر لا نلتقي إلاّ مساء نتراشف الخمر المعتق نسكر وتلوك ألسنة الغباء تساؤلاً من يسرق الشمس التي غابت هناك من السماء من يسرق الفجر الذي يأتي الينا بالضياء من يصنع الافراح في قلب الصغار إن نحن كنا نسكر نتراشف الخمر المعتق نسكر ولا مجيب لنا سوي كأس تذيد غباءنا بعض الغباء صامتون و لا نزال نترقب الفجر الذي يأتي الينا ..بالضياء فلربما الشمس تهرب وحدها ولربما تأتي مساء هذا غباء هذا هراء الشمس تأتي بالكفاح فلنقتل الليل المخيم. هاهنا ولنغني للصباح ونودع الخمرالمعتق والمساء نستقبل الفجر الذي يأتي الينا بالضياء فالشمس تسطع هاهنا تتوسط كبد السماء 1995/9/20 بورتسودان الخضر الياس عبيد الله |
|
01-28-2009, 09:43 AM | #55 |
عضو موقوف
|
بت ابنوسه واخوها نخيل ما جاملتك أنا... يوم قلت عليكي حنينه... ولا شان شفتك .... أنا ناديتك يا دغريه.... ولا شان سامع صوت.... خطواتك جايه.... انا غنيتك يا حريه... إلاّ ظنوني عليك ما خابت... إنو...ترجّعي شمسي الغابت ... و إنو....بلاكي جروحي بتكبر... وترجع تاني بعد ما طابت... و الغيمات يا بنيه...الفاتت.... ترجع لينا عشان ما تمطر... أنا ...امبارح .... شفتك ...مارقة.... وكان متلفحه ...توب النيل ... و ماسكه يمينك...بت ابنوسه.... وكان في يسارك ماسكه نخيل... وقلتي...ارح..يا أولادي نقيّل ... عند خالتكم ...بت منيانق.... وفي بيوضه ...هناك لاقتكم.... تزرع بفره... والباباي موجود بي وفره.. وقالت ادخلو... حبابكم..كيف اخباركم... لينا زمن ...من ما اتلاقينا... شوقنا يدفق.... وعدم الشوفه ..دي ..حاره علينا... كيف اخبار اولاد ناس ...تيه... وناس ادروب والحاجة رضيه... وانشاء الله تكوني مشيتي ... لي راجا... وبارا ...وطوكر ..وكبكابيه... وبرضو اظنك ...رُحتي ... لي حلفا.... نحن هنا.... بالحيل بنحمدو.. الخيرباسط ...ممدود من يدو.... ورديتيلها ...بي خير ياحاجه... تب ما فيهم زولا.. اباهو عشاهو... والاّ عوجةً جات تغشاهو... تب في بسطة ونعمه شديده... والله نحمدو... وين اولادك؟؟؟؟ شول ..و مجوك..وبتك ميري... ما شايفاهم؟؟؟؟ مرقو.. قِّريب... شول ومجوك ديل راحو يصلو ... هناك في كنيسة حي الدومه... وميري ..دي راحت ناس التومه... اصلو طهارة حمدي الليله... أرقدو إتمدو.. قيلو عافيه... انا جاياكم... ماشه...اعوس الكسره... عشان نتغدو... وبين ما نايمه ..وصاحيه... انتي سمعتي... جوطة..فرحة... وجاتك سرحة.. والنسمات الهبت...شالت.. صوت زغروده...وحس نقاره... اصلو عرس بت قينق ..الليلة... وبيت اللعبة قريب من بيتنا .... وبت منيانق...قالت لك نمشي... عشان ما نبارك... ونلعب لعبة... ولعبو اولادك...وكانو ...كواتو... وبعد انتهت اللعبه مرقتو .... واتوادعتو... وبت منيانق...قالت جاياكم... والاسبوع الجاي معاكم.... وقلتي ارح يا اولادي ...كفاكم... تاني البيت بتجوهو براكم.... ارح ..يا اولادي مدينة راجا.... نمشي نزور عمتكم زينب ... ونعمل ليها.... زيارة ...مفاجاءه... ودخلت عليها ... حبابكم..اهلاً...قالت زينب... وكبت ..شاي المغرب .. لبنو مقنن... وكان البيت تتوسطو نخله... وكل ما صوت طنبورهم ...دندن.. هي بتتمايل... وكل ما مالت .. اخدت شبال... من النسمة الجات تتقدل... وين ناس احمد...وسارة وفاطمة... قالت زينب ... عند الحوش البي قدام ... وراحو اولادك... الابنوسة وأخوها نخيل... ولعبو معاهم... جرية وصفقة ...وغنوة... ولعبو شليل.... وانتي سرحتي... واتذكرتي ايام المُره... الايام الفاتت راحت... وراحت فيها رويحة السُره... قبّال ده ..الليل... كان طوّل... وقلتي اريتو... الايام ترجع زي اول... كان قلبك للفرحه اتحوّل... بس ياريت لو كان .... الرحمة... زّي النفس الطالع ونازل.... بين الناس تصبح منقسمه... آهـــ...يا دنيا ... يا ما فيكي مهازل...ولخمه.... آهـــ...دنيا...و آهـــ...يا زحمه... وإستغفرتي... تُف يا دنيا... عفنه..عِفينه... واتذكرتي...مديح اجدادك... يا رقراق الضو الفيّنا... ليه الريح بتشيل مجدافها... و بطفّينا.... يا فانوس الرحمة البينا.... اتدلي وصلي... وشيل طوريتك... وانقح وشيل في تراب النيه... واشتل في جوانا محبه... وخلي نفوس الناس تتطايب... وتبقي رضية... والنسمات التبدا تهبهب.. وشايله اريج البسمه جوازنا ... والمفتاح الكلمة الطيبه... تبقي دخولنا... هيي...يا السمحه... شايك ببرد... قالت زينب ...واستغفرتي... كيف اخباركم.؟؟؟؟ وين حاج احمد؟؟؟ الله نحمدوا... ردت زينب...قات حاج احمد... راح لي فاتحة... ناس ادروب ...و أوشيك ...جيرانا... اصلو ..هو...جاهم... هي خِبير..جابتو عربيه... خالهم هُمد...جاو امر الله.. اتوفي..هناك في كبكابيه... واترحمتي...عليهو ..وزدتي.. وقلتي ...عليها الروح هول الله.. هو البيعيشها...هوالبيشيلها... وهي البتفضل بيها المولي... وقلت لي زينب... ما بنستغني ..ادينا الخاطر... يبقي نصل لي طوكر باكر... ردت...قالت الله معاكم... هو الفي الدنيا ...يبقي غتاكم... سلمي لّي علي ناس أدّومه... وزوجتو آمنه...وحبصة... وبت مريومة... يلا خلاص .. يا أولادي ..مشينا... ومسكو يمينك بت ابنوسة... وكان في يسارك انتي نخيل... 3-7-2001/2002 الخضر الياس عبيد الله مدني - هيبان (جبال النوبة) |
|
01-28-2009, 09:46 AM | #56 |
عضو موقوف
|
غــداً نمــــضي
تبعثرنا كما الأشياء... تلاشينا.... لأنّا ..كنّا ...لاندري ... طلاسم هذه الدنيا... وصرنا مركباً...تطفو... علي كف من الاقدار... لأنّا ..نحن لادرك... ولانعرف... طلاسم هذه الاسرار.... لأنّا نحن....عذبنا.. وقتّلنا ضمائرنا... دفناها... وحررنا غرائزنا... وصرنا نحن عبداناً... بلون الماء.... وأصبحنا ذوي الف .... من الأوجه... لكل فريسةٍ وجه... كما الحرباء.... لأنّا نحن قد....صرنا... كلاباً خلف سادتنا... ونلعق نحن أيديهم.... لنستجدي ...دراهمنا... لانّا نحن قد صرنا... مزاميراً.... طبولاً خلف سادتنا... لآنّا لم نكن نعرف.... طلاسم هذه الدنيا.... غداً نمضي الي اللحد... فلا تجدي أغانينا.... غداً نمضي ... ونعرف كيف أن كنا... مزاميراً لسادتنا....ولايجدي.... غداً نمضي ونعرف عن .... تفاهة هذه الدنيا... ولايجدي.... غداً نرحل الي ... دارٍ بلا سمّار.... الي القبر... ولكن اين سادتنا.... لكل منهمو لحد... فلا قصر ولا دار .... سوي الاعمال في القبر.... فمن شر ومن خير ... ترافقنا الي اللحد... ولا سمّار.... غداً نمضي ونعرف عن .... تفاهة هذه الدنيا... ولايجدي.... يوليو 1996 الخضر الياس عبيد الله بورتسودان |
|
01-28-2009, 09:59 AM | #57 |
عضو موقوف
|
افــلامـــنا تـتواصـــل هييي... أقيفو شفتو آخر مسرحية ياته.؟؟؟ دستور التوالي؟؟؟؟؟ يا هو ذاتو والبطل ماهو الترابي؟؟؟؟؟ يا هو ذاتو يا اااخ قديمة اصلو شيخنا حبه يوم يلعب شويه مره فكر ...ثم دبر ثم أدبر ... وتولي للجماعة قال تعالو عندي ليكم أحلي لعبة تبقي للناس هي القضية وينشغل بالهم شويه ناس يقولو التوالي ... أصلو اثبات للهوية ثورة ضد الطائفية و ناس يقولو لا لا... لالا لا توالي ولا توازي ما المبادئ هيه.. هيه وتبقي عايمه وكل مية ليهم الحق في التوالي و... يكتر المتوالين لدينا مره حزب الحاكمية ومره توليف حزب أمة وإتحادي .. و مايو ذاتها و حزب الله ... وجبهجية وبرضو حزب الاغلبية و أوعو تنسو انتو حزب المكوجية وحزب باسم الراسمالية وأيّ ناس بيتمو ميه سجلوهم ... حتي ناس الطائفية و مابهم الخمسة مليون أصلو ديل خالصين علّي المهم الناس تجيكم و تشغلم كلمة توالي وتبقي للناس هي القضية الاّ آخر المسرحية أصلو معروف قولو لينا النهاية هي النهاية والحكاية ابتدت يادوبها لينا واللعب حانواصلو نحنه بالرٍّمه والحراس سيفاً بشيل الراس سيفاً حديدو سنين ويمين تجزو دقون والله والله يمين ما نحنه ما ضد دين ضد البيبيعو الدين اللبسو منو دقون ويمين نجزها جز ما تقول تسأل كيف والله بحد السيف بي حكم شرع الله سيفاً حديدو سنين ويمين بشيل الراس راجنو لينا سنين سوّاي وما حداث بس شان نرد الدين نسقيك بنفس الكاس والله والله يمين تصبح حديث للناس نعمل سناريو عديل ونصّور افلامنا ابطالها ناس حامد والخاين الهندي وافلامنا تتواصل يا شيخنا شيخ الظار ما قلت زول حقار عينك تسوي شرار والليلة زول باطل أمرق علي المغوار زولا بياكل النار سوداني بالفطره ما قلت زول حقار يا شيخنا شيخ الظار و افلامنا تتواصل ناس مجدي والتايه مالسه في حكاية ما بين زعيط ومعيط بس ضاعت امونه ودوها لي دايه ولدت جنايا مات شالوها امونه ضبحوها في سمايه مالسه في حكاية الليلة بينا حساب جيناك بالكراس . شان نجردو نهاية وافلامنا تتواصل في ثورة التعليم أو بالاصح تأليم . ما كل بيت ناصية دقيت عليو يافطة سميتها قال جامعة تملاها زي دفار تملاها شماعة وتجيبو كمساري بيقيف في خشم الباب يخلص من الطلاب تدفع او الارهاب لا تخته لا معمل ولا حتي فيها كتاب. لا عيشة لا صحة ولا حتي فيها اسكان. يحليلها والله زمان اديتها للصندوق لرعاية الطلاب و أمونة عرفت مين مين البكون كضاب و رفعنا نحنه شعار فلندعم الصندوق ولندفع الايجار وافلامنا تتواصل والمرة دي ابطالنا ناس بحبو الطين النور وحاج الزين ورفعتو لينا شعار المرة دي الناكل من ها الارض والطين قلناها بس آمين ما ده الكلام الزين ما فوقو شيتا شين وجعنا للقمحات وشتلنا للنخلات لكنو بس هيهات يالزين قطارك فات صبح الصباح بي جاي واقلعت نخلات السيل غشانا وفات ما شال معا القمحات باقي الزرع يالزين ياحليلو ضبلن مات يالزين قطارك فات برضك تقول انقذ وانا للضعيف بانحاز انجاز ورا انجاز يا ود حفيد الجاز ودرت مني الجاز واطفطفت لمبات وفلحت في الكشات اسميتها وطنية وينو الوطن وينو شان يلقي وطنية يا حليلو بس ما مات تحفر لو طورية غشغش ولاد الناس شان يدخلو الجنة اصبحت كالوسواس انته البتضمنا انته البتكتب بس عندك شهادة قيد في الجنة يبق شهيد تصرفلو حورا عين وتشفع السبعين بي ياتو حق او دين تصبح امير للناس وخليفة للراشدين وآخر كلامك جيت يا آمنة في البترول علي مين تصيح يازول انا من زمان من جيت بسمع ... تقول وتقول حنجيب ونحنه نجيب والقلتو كلو يزول ياآمنة في البترول علي مين تصيح يازول وانا خوفي بكرة تقول حنجيب ونحنه نجيب حنجيبه عين الشمس والشمس بكرة تزول وافلامنا تتواصل وانا خوفي بكرة تقول حنجيب ونحنه نجيب حنجيبه عين الشمس. والشمس بكرة تزول وافلامنا تتواصل الخضر الياس عبيد الله 1999/3/26 ابوحراز |
|
01-28-2009, 10:03 AM | #58 |
عضو موقوف
|
مـــاذا هـــناك ماذا هناك.... ماذا هنا فالكل يلعن بعضنا. فكأنما إبليس ....قد سئم التسكع بين حانات الموانئ والحواري الآن يطرق بابنا قد بات بين قلوبنا يقتل بخنجره اللعين حياتنا أحلامنا كل المني ماذا هناك ماذا هنا ابليس فرق بيننا قد حال بين قلوبنا وكأنما إبليس يطفئ ضوءنا ماذا هناك ماذا هنا فالكل يلعن بعضنا الخضر الياس عبيد الله 1997/4/3 ابو حراز |
|
01-28-2009, 10:08 AM | #59 |
عضو موقوف
|
كلـــمة الـــسر اتاوق جوه في خاطرك افتش صدق كلماتك واقص اتر الولف عندك واجس نبضات بسيماتك وابحت حتي في الشريان عشان اسمع صهيل قلبك واناتو وصوت حرفك وكت يسرح يحجي الليل ونجماتو ولما يدوبي للقمرة يدندن ليها غنواتو . وحاتك لا نجاوب قبل ما تسال وحاتك لا بنتعذب وكت ترحل وحاتك لا وما بنقدر نعيش بالخوف ولا حتي الحروف ترتاح أركزي عشان يجينا صباح أفتحي شرفة فيك لي الضو وخلي البسمة تتحكر وتملأ الفجة تتمدد وخلي النسمة تتقدل وتتجاوز خطوط الرجعة لي ميسك تفوت الحد وحاتك لا نجاوب قبل ما تسأل قرايتك ؟؟؟ انتي مين بقراك من غير زول معاهو دليل او زول موهط قلبو وراسو بين مساقط او منابع النيل ويعرف كيف يلقط بوسة من خشم الفراشات المعبق بالرحيق بالليل وحاتك لا نجاوب قبل ما تسأل مداخلك؟؟؟؟؟؟؟ مين البيقدر يدخلك من غير خرايط قبلتك أو حتي تأشيرة دخول ممهورة بي ختم القبول بس بعد ما كلمة السر تتكتب اول سطر بين صفحتين جوه القلب والكلمة حب الخضر الياس عبيد الله 2000/11/1 الدروشاب |
|
01-28-2009, 05:32 PM | #60 |
عضو موقوف
|
حكاية السمحة بت الأربعين
داير أحكي ليكم عن حكايات السمحة بت الأربعين عن حكايات زول مبشتن بالو شين مدفون هناك بين نخلتين وشكلو مدفون مرتين ساب البلد قبال سنين إغترب شان يبني بيت شان يبقى زي عبد المعين الرغم هوان الغربة الضاقو ورغم عذاب الزمن الماسخ جاي سمين و إتزوج مرتين وفارق بيت الطين عن إذنكم داير أحكي ليكم قصة الموج و البحر و أحلام مهند في السفر و أنا جاي من شاطئ البحر شايف الملح فوق كل شيء حتى فوق وش البشر داير أحكي ليكم عن جزيرة مسّورة مكسّوة بي كثبان ذرة زي قمرة في صورة مرة بي صفاتها منورة واقفة في شمس الصباح مشفوعة بالزين والعديل مزدانة حلوة معطرة موكب ندى أحلى حنة أصادفها كل البيوت متلاصقة فيها ملاطفة نهر الضحك ما جف يوم و لا عاندت سحب المحنة الوارفة باب الضيوف ما اتسد يوم بركات شيوخنا الزادو لينا المعرفة يوم تجي تلقى الكرم تلقى العلم تلقى الوزير تلقى الفقير تلقى المعلم والصغير عايشين سواء في الحلوة و الشين والسمح عامرات قلوبهم مترفة كيل القمح ما كَلّ يوم ولا شافو يوم العاصفة نخلات تبين فوق الجبين غرة صلاة ليلهم شليل صفقة ورقيص ضحكهم حلا فجرهم صلاة فوق كل شينة معاك ملأ مكان ما تقبل ضحكة تواسي أي مآسي للزمن القاسي يخليك ناسي عصرية يوم نامت جفون لحظة غضب إتوسدت غصن التعب و ما عاد صحو و مغربت و النومة طالت و إتمددت كبت عواصف البهدلة دفق عليك من جار قفاك المهزلة و في ذات صباح الشمس أبت المروق وأبت السحب الممطرة لما الوليدات سافرت والخوازيق امطرت لتيق وكثرة جرجرة لما العوالم الفينا صارت سمسرة لما المصايب الجاتنا بعد القرقرة الخلاوي إتهدمت و المآذن دنقرت ماتو الشيوخ راح الذكر و صبحت صلاتنا مكسرة و جات الليالي المسخرة بالبلاوي مشفرة بين النخيل و الأسورة داير أحكي ليكم قصة الحوش الكبير الناس الكتار والعيشة نار عبد الله شقيان بالنهار عبد الله يحلم يبقى زي كل الكبار عبد الله شايل فاسو في وسط الخضار عبد الله يسأل و يتكئ ينزل من القوز و الرمال عبد الله مسكون بدوار نفس السؤال وينو الفرق بين الحرام و بين الحلال ؟ نفس السؤال هو البيزرع وهو البيقلع و الكبار قاعدين كبار و نفس السؤال و الحمار بفضل حمار عبد الله سار ثم فكر ثم دار ثم صنقر ثم دنقر ثم قرر إنو يتزوج بنية زيو هو بنية تلعب هودنا و تسأل بلهفة و دندنا ما شبعت يا جنا ما رقصت مع الغنا ما رضعت من الهنا يا هودنا بنية تكبر زينا فنانة تبهر حيها بنية تشرق و تنتشر زي شمس تدينا دايما ضيّها بنية غير كل البنات وكت الآذان وكت الرقيص جوة التكل وكت المشي هي الأولى ديمة في كل شيء قومي بدري و أخدمي بدري و صلي بدري و الله ما بتنقدري الوصيّة الفي أضانها المضمخة بي غنانا السمحة دايما مشتهانا عبد الله قال في نفسو هوي يا ولد هي الحليوة الفي البلد كم ماتو فيها الناس كمد كل العيون مفتونة بيها المذهلة تشتهيها و تسألها و الكبار سادّين منافذ اليوصلّها عبد الله قام وقّف مراكب الدهشة شال باقي الكلام و الشوق دفر يا عمي هوي داير البنية المرمرية بخطبها وداير وحاتك أغني ليها و أشرفها تعرفني زين و أنا بعرفها عبد الله ما قد دق باب ما حس بي نظرة عتاب ولهان و منتظر الجواب منتظر قولة حباب عمو ما إتكلم سكت عمو حدق في البعيد والشوق بهت تاني عدت الكان خمد ؟ العَبَرة وقفت في الحلق و شهقت كما رئة البلد عمو حدق في البعيد شاف نفسو شايل شتلتين و أبوه في الحوش الكبير و الدم كتير و الخنجر المسموم على صدر الحمد كيف إنغمد الناس كتار والدم مرصع بالخضار و الكل جمد سعدية بت الحاج حمد سمحة و أصيلة و ست بلد واقفة و تكورك في الرجال و ما لاقية رد سعدية زعلانة و مشت و الكل سكت سعدية شافت كم طريقة شان بيها تكتشف الحقيقة لكن وقت مات المؤذن و الإمام و انتشر صوت الحرام سعدية عارفة وموقنة الباع زوجتو شان حوجتو كيفن يواجه عالم الناس الكبار الإشترو و الباع البلد زي بيع جريد نفس القبيل قناهو للزول الذليل كيفن يكون مرق البيرجع مئذنة و يلعب مع الزمن الجميل ألعاب شليل وهودنا صاب الحكومة سهم الذهول لا لوم سؤال لا صوت عويل كل الخيول الراكضة مكتومة صهيل مين الكتلو ؟ ليه إنكتل ؟ ما سمعت بي صوت البطل ما سمعت بي موت البطل عبد الله سرحان في البروش وصوت العريس شايف البنات في الرقيص والقرمصيص و العريس كيفن حريص من إيدو ما تقع العروس شايف الفرح سكن الوشوش لكنو ما عرف النفوس ما شكرو في الدنيا غير ناس الفلوس من حاج حمد قيلتو من كوم بروش سيارتو دحشين زي سبيل أحلامو فدان من نخيل و أطفال كتار كيفن بعد طول السنين ما قد ولد سموه زي جدو الواقف حد عبد الله يسأل عمو تاني عقاب سؤال و صوت عمو بطلع من جديد تاني عدت الكان خمد ؟ عم طلب لم الخطاب ودق الطنبور وقال يا نحن يا السمحة تبور و عمو فات ساب المكان لا رد لا قال لا أتكى عبد الله يسمع صوت بكى صوت واطة في الحوش الكبير و الفقراء يدفنو في غفير و الغفراء يدفنو في فقير و عبد الله ما فهم السؤال و لا فهم طنبور طلب و الراوي قال في الرادي في قلب التعب عبد الله ضاق و الخوف البيكبر زيك و يزهر غطى الحوش البصمة تغطي دروبك إنت المارق من تالاك النيل شمسك فوقك تشرق صوبك زي النخلة في طولك واقف حيلك إيدك طولك حاوي اليتما و حريم الحلة و كل الفقراء قدر قولك أول ناسنا شايل فاسنا رافع راسنا مين القدرك ديمة في شيلك يا القدر قولك و عمو فات ساب المكان ساب الحريق الإشتعل و صوت طنبور من تالا الوجعة بنادي يا نحن يا السمحة تبور عبد الله شال باقى السؤال .. فك الوتد و عض الدريب شم الدخاخين في النكد ثم إنطلق حيران و مقبوض مندهش و بالقوة راح ناطي البرش و داخل على برواز حمد في الدونكا متمدد صمد لاقى عمة و حولو كم ملمومة أمة حمد الواقف بين النخلة و بين النسمة جوة الرقصة يدوب في الدمعة و فوق الحزن المالح بسمة تضيق الفرحة أصبعو شار للدم الطار عينو تقول للبقرأ تمام باكر أجمل و أحلى نهار عبد الله دنقر و صوت طنبور في أضانو يلولي و عمو طلب راجل كعب طنبورو سيفو مع الغنا عبد الله مارق زي لهيب الأمكنة و في لحظة شاف جسد البلد ممدود مكتف بالمسد شاف شتلتين شتلة في جيدو المرق و الثانية زي عمو حمد الدم غزير و الجسد ممدود على سطح البيوت فوق كل جامع عندو صوت جوة البحر فاكرنو حوت لا وين يفوت لا وين يفوت كيف الشمس تقدر تفوت من غير وداع كيف الضحك يصبح بكى و لوعة و ضياع كيفن يصدق إنو هذا الأسمر الممدود على كتف الشجر راح انتحر يا خوفي من هوس البصر يا خوفي من شوق السفر سعدية جات ناحت و شالت كوم تراب كشحت مرارات فرجة الزمن الخراب في لحظة صوت الدونكي غاب غابو الصحاب حتى السؤال روّح سراب و ما فضل غير دهشة الولد الغبي القطع البحر و حصارو كان موية الرهاب و ضحكة طلب رغم الحزن رسم الطريق للفقراء يدفنو في الفقير و الفقراء يدفنو في غفير لا زول يقول مين الكتل لا زول يصلي على الرسول و عبد الله القشة في ايدو و رغم الموت ما كورك ما نزلت دمعة الدهشة بقت هي الفي ايدو و يحفر حفرة يغني ( دخلت نملة و أخدت حبة وخرجت خرجت نملة ماخدة الحبة ودخلت دخلت نملة و أخدت حبة و خرجت ) و سوق السبت زي كل سوق لا زول بكى لا زول سأل و الباص السفري و عطايا البجري ( السمحة جايا سجمي نورا يا حليلة هي البقت في عيونا صورة ) مريم تتاوق للبخيت أحلام توسوس لي بتول عبد السميع جنب البحر في إيدو صبارة سمك وماكلوّ فول بدرية في ساعة الأصيل مشتاقة رجعة زول رسول لكن منال بت الرشيد بتشيل كلام أبو زيد تعيد فوقو بتزيد سوسن تقول للخير تعال زنوبة في قلب النخيل شايلة منجل و حاشة قش شان الوليدات في البرش و عبد لكريم في حوش حريم أدوني شاي و في تمتمة زي بحكي قصة همهمة بسافر بسافر عشان العواصم المدينة الكلام الكبار بسافر وشفع كتار دعاهم نهار ما ح تسافر و عبد الكريم ينتفض في لحظة جنون بسافر بسافر يلوح عكازو في قلب الخاطر يرمي الوجع الماجن يسب الـما متربي و يشرب شايو يعبي و شوية كمان ينسى حكاية الشافع الأجرب و يضحك تاني و صوت الشفطة و صوت طنبور و غنا البنوت هي الحليوة الفي البلد السمحة ما حقت نكد و رجعت سواقي الدهشة بالفال بالولد و كيت على ناس البلد لا صلو لا ذكرو لا قالو بي الله الصمد و الكبار في الونسة في الحوش الكبير صوت الضحك و الشراب والقرقرة دلوكة البيع الرخيص والثرثرة و عبد الله برسم في الأرض لون السحابة الممطرة و شكل الدريب المسطرة وسعدية تحكي عن رجالنا المسخرة و كبارنا برسمو فينا زي ضلاية زي هباية زي مشرع .. زي قنديلة زي واسوق و زي شفع كبارنا مشونا في الخيط و الزلط إلا سعدية البقت خازوق و مسمار و ضد الغلط مرقت تكسر في بيوت العنكبوت رافعة البنية المبهرة زي سحابات ممطرة و شالت عكاكيز الحقيقة اليها كسرّت المظالم و الساقية الشقت بطن الليل روت الناس الفكرة و فجأة ظلام الليل أتهد و جفت برك الفارغة و كل ما مّر ولاد الحلة في شارع بشبة شارعك يا أحمد الشفع بجرو . بشوفو حمد في الضلمة و أبو التاي تاي و الجاي جاي و يا عبد الله مد ايدك من شباكك جر سبيطة الوجع الجاتك ساقية ليلك صوتك جرحك فاتح شرفة لا تحزن و تقفل صوتك جوة الغرفة قساوة الألفة تبين في المحنة معاك أحضان القرية بتوسع تركض صوب أحلامك نحنا ايدك في الفاكرو أخوك و أخوك في ايدو عدوك و عدوك في ايدو الخنجر مغروز فيك ضميرك صبرك حدك مدك وخنجر ناسك في حشاك مغروز يا حسن النية الما قادتني و يا رمل الحلة الما بحميني أبو الدفان كبار الحلة إتلمو .. و قعدو و عبد الله في ايدو البنية و شوية من باقي البخور كبا الحلة اتلمو فيهو .. و صوت طمبور و الصفقة في قلب الروادي .. و في الأتاوي و الكبار يتوسوسوا و طلب الكعب .. يا أنا .. يا البت تبور و الكبار يتدسدسوا .. آخر المطاف طلع القرار البنية تموت كمد .. لا عبد الله لا طلب الكعب عبد الله مستور بالظروف و عمك طلب مستور عن كبار البلد .. و الكان خمد .. مارق بصوت الود حمد سعدية تحلب قوس قزح .. شان تسقي للبنوت فرح فطومة للقمرة بتزح .. شان هي البتزرع في المرح عبد الله و الممرات .. بٌكم و كب في الجرح الملح و كبار الحلة .. بي وراء عبد الله باعو حريمنا .. باعو نخلنا .. باعو جدارنا .. بيوت الحة إتهدو ختو بحار ما بينا وبينهم وعدو .. خلونا غرقانين حتى الإيد ما مدو جبنا المركب قنا نعدي .. حتى المركب قدو النخلة الليلة بتاعتك باكر تصبح ما هولك الضحكة الكانت بالمجان .. بقيت شان تضحك تدفع طولك كبارنا الفتحو قبورنا ونحن نعاين .. كل السكك الودتنا ورا .. تودر قولك و سعدية بت الحاج حمد .. سابت درب ناسنا الكبار ردعت ورا و اتذكرت .. درس الصغار ** دخلت نملة و أخذت حبة و خرجت مرقت لمت كل صغار الحي .. و قالت حي .. و يدخل شافع يقرأ الحمدو .. و يطلع يكبر فيهم نخيلنا .. عيونهم تلمع كبارنا يربو النحل البلسع و سعدية تقري الشفع .. دخلت نملة و أخدت حبة وخرجت ** يا صبرا من جيهة المسجد .. يا قرآن يا ألف المد شجرة بتقرأ .. دخلت نملة و أخذت حبة و خرجت شافع بيقرأ مع سعدية .. الله أحد .. الله الصمد و مئذنة تطلع .. من فوق شتلة .. و شتلة بترسم احمد و شافع وراء شافع بطلعو شفع بقرو الحمدو .. و يقرو الله أحد الله الصمد كبارنا جرو .. من سيلاُ داخل بي ألف المد من عنوان ما عندو الحد .. و الحلة تنوم .. لا غل لا حسد دخلت نملة و أخذت حبة و خرجت .. و داخل شافع يقرأ الحمدو و قل هو الله أحد .. الله الصمد .. ثم انطلق .. لي ربي لي رب الفلق الشاعر محمد عبد الله حرسم |
التعديل الأخير تم بواسطة ابوسفيان ابراهيم احمد ; 01-28-2009 الساعة 05:35 PM
|
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|