بت هندسة وبت بيطره...........

بت هندسه

انا راسى جاط ما بين هواك والدبرسة
الفت عشرين الف بيت سبعين قصيدة مؤسسة
عشان اقدر الفت انتباه ومرة اقدر احسسة
ويا حلوة يا بت هندسة

يا حلوة يازينة البنات يا نجمة الليل والمساء
انا رغم اشكال الشتات حاضن عواطفك وحارسا
انا فى هواك بقيت فتات ودخلت عشرين مدرسه
جنيت مع كلمات هواك بقلبى قاعد اتنفسا
ويا حلوة يا بت هندسة

اكان شفتى يا بت هندسة خطواتى دائما بالغلط
وامورى ديمة معكسة
يوم داك مساهر فى الهدوم وكويتها جد شان
البسها
لقيتها الصباح حقت اخوى وهدومى قاعدة مكرفسا
كان للهدوم ما مشكلة بشوف لى نصيبة البسها
لكن هواك اعملو ايه دشدش عضامى وهرسا
دار لى فرصة اكون قريب طبلة قليبك افلسا
عشان تشوفى هواك كيف بهدل عواطفىودحفسا
كلماتى ليك اتبشتنت ما زى زمان متهندسة
حتى الشعر الكان زمان كلماتو حلوة مملسة
هسع اتلخم بقى كيف كده ما فيهو كلمة مهندسة
انتى السبب فى كل ده يا احلى اسباب الاسى
انا ياخ بريدك اعمل ايه ورينى يا بت هندسة
امشى واكورك فى الزلط يا ناس بريد بت هندسة
يا ناس بريد بت هندسة

كم مرة قلت اقوم براى اقعد معاها واونسها
لكنىما بقدر عديل ما بقدر انضم اونسها خليك
من اشرح ليها حالى وحبى ليك والدبرسة

ويا هناية دا اقول ليك كلام انا يا ملاك انا بعشقك
وما اظن بلاك ارجى المساء دايرك تكونى لحبيبة
وابقى ليك حبيب قسا
ويا ربى كل عاشق نبيل تديهو زى بت هندسة
وترعاه من عين الحسود
وياربى تحفظها تحرسها ويا ربى تحفظها تحرسها

اها وده قال مافيش حد احسن من حد وكتب بت بيطرة

بت بيطرة - منتصر العاقب

بت بيطره
احلي الكلام لغة العشق واحلي البنات بت بيطرة
دي الراكبة مرجيحة هواي وفي قلبي ساكنة مسطرة
دي العقلي بيها صبح عليل وانا خوفي من الجنترة
تغشاك ولا بتاخد اذن تدخل مسامك وتعبره
جوة الغنا وجوة الشعر وفوق للورود المزهرة
تلقاها ذي موج البحر تلقاها قاااعدة محكرة
سكنت دواليب العشق...يا ظبية يا بت بيطرة
يا حلوة زينة بيطرة......
وانا كنت داير اثبتها...قلت النجيبها واقعده
واحكيلها بالحاصل علي ..وبي حبها الساكن جواي اشهده
لكني قبال ما اقيف قدامها تتراجف كريعاتي
وبدل ما امشي قدام ...القي نفسي مشيت ورا...
وانا والوراي والجنبي والما جنبي والقاعد معاي...نتشابي بي فوق الشبابيك والحيط
شان بس نشوفها وننظره....
ويوم داك لقيتها براااها قلت الليلة بس لازم تحس
بالكاتمو في سري ومدسدس بالضرة...
وانا بي عليها مشيت وجيت ..ومشيت وجيت ومشيت.....
لقيت هناي قاعد معاها وجسترة
جستر فهم قلبي المدشدش بي هواها وناظرة
نبذتو ما خليت نبذ...ود الهناي..يا رمة يا شين ياااااا.........
ضيعت شوالين حنك....
وكلمات رقيقة عشان اقولها انا لي شهور محضرة
وانا رغم اني بليد وطيش...لكني حبيت بيطرة
وانا شان عيون بت بيطرة ممكن اجي الاول عدييييل
ممكن اكون دكتور حمير وبقر وطير.....واسرح مع الغنم الورا
.....يالرايقة يا ست البنات يالزاهي لونها ومنظرة
مذكورة في كتب الغرام حلوة وجميلة وسكرة
رايقة وانيقة وبت حلال ست الدلال...الديمة زاهية معطرة
يا رب تصونها وتحفظها من عين حسود من عين غتيت تمرق تصيبها وتسحرا
وقالو الشعر..بت هندسة وبت صيدلة وبت ايه وايه...
بس مافي زول بقدر يوصف طيب جمال الساكنة في قلبي ودماي....بت بيطرة
وانا ما بكيت..بس دمعي من عيني جري
وانا ما بسلم قلبي بت...بس قلبي من غير ما احس سابني ونده:
يا ناس بريد بت بيطرة ...يا ناس بحب بت بيطرة
الفي عيونها بريق وضي...وضلوعي بيها مكسرة
كاوياني كي...ماكلاني ني...عطشان وفي تحناها ري
رويانة من حبي وهواي....وانا حالتي بيها مدهورة
والدمعة لو غلبها النزول ...تنزل عشان عينيك سحابة ممطرة
وانا شوقي لو غلبو الصبر...ما برضي غيرك لي مرة
لو قلبي يتقطع معاك...بتذل ليك ورضيااان معاك بالجرجرة
ما انتي ضواية سماي...وردة هواي المبهرة
يا رائعة ياااااااااا......بت بيطرة

والله هي في النهاية بت بلدي يا ود الحصاحيصا وديل نماذج هندسة وبيطرة ...

هههههههههههههه