|
|
|
|
|
|
| التميز خلال 24 ساعة | |||
 العضو الأكثر نشاطاً هذا اليوم |
الموضوع النشط هذا اليوم |
المشرف المميزلهذا اليوم |
|
قريبا |
بقلم :  |
قريبا |
|
آخر 10 مواضيع
|
الإهداءات |
|
|
|||||||
| ۩ﺴ ﺴ۩راكوبة الحصاحيصا۩ﺴ ﺴ۩ مساحة للونسة والضحك ونسيان بعض الهموم فيها |
 |
|
|
أدوات الموضوع | انواع عرض الموضوع |
|
#1
01-15-2009, 04:52 PM
|
||||||||
|
||||||||
أخوك يا ريا وقت الخيول يدبـــّـــكن
مسرحية المك نمر ل أبراهيم العبادي
.... أخوك يا ريا وقت الخيول يدبّــكن أخوك يا ريا وقت الرماح يتشبـّـكن كم بكيّت وكم قشيت دموع الببكن * وراك أسود علي مانمت أســع طيب بسم الله قولي ، أخوك طيب تصبح شديد وحاضر قلبي ماهو مغيّـب إلا الشفته في النوم من هوايله يشيــّب الزول في الصحي مهضوم عليه شقاهو وإن غمض شوية تجي الهموم لاحقاهو الصف أب لبوس انا ما بخافو لقاهو ياريت الحلم في صحية كان بلقاهو كان خير وللا شر بلقاهو ما بهم بالي وحارثني الثبات من الكبار قبالي إن اتلخبت الكون تاني ماني مبالي *كعب نوم النهار أمس العصير كت نايمة *رأيت قدام فريقنا أشوف صقوراً حايمة *كبيرن غار علي من نومي تبيت قايمه *صحيت مهجومة لا مفصل ولا في القايمه وإنتي كمان رأيتي صقور ؟ عبارة غريبة علامتاً كافية ظنيت الحكاية قريبة هاك مني الصحيصح الما بتدخلوا الريبة هادي الحلة بي عيني اشوف تخريبة *تف الشينة ليه فاجعني ليه ياطه *إنت الدغري وإنت الكاشفه بيك غتاها* *كان الدنيا هادي العاقبة تتخطاها *مابضلل سماها ومابتشيلني واطاها مابفيد البكي وكلامي أحسن تنسي *كيف ما ابكي وكيفأفوت مراتع أُنسي *تطلق فيني نار عقباًتقول لي أنسي فال الخير أخير ما شفنا شيتاً جدت كل الشفنا احلام في طريقها اتعدت قبل الليلة بيدي حمان قط ما ندت مابنهدم شرفنا لو السماء اتهدت * خير إن شاء الله خير والخير مساك وصباحك *والفال السمح فالك يضوي مراحك * شينك ما أشوف واشوف هناك أفراحك *بالضيفان اشوف عامر تملي مراحك خير الزول يقول مهما الأمر يتهوّل قالوا الناس علي قالوا الحلم يتأوّل غاية الحي مناه إن قرب أن طوّل يترك زكرة والناس الوره بتتقول *وريني الحلم التوّرك مذهول أصبري لي أروق حبل الفكر مبهول احكيلك شنو الشفته والله مهول شفت الوحدة شفت النار وشفت الهول احكي لك تمام الشفته ما بتغابه جايين العصير انا وانتي من الغابة سايقا لك بهم قدامي بي رُقّابه بينا والفريق إتولفت تُــقابة قدر ما نشوف بعيد قدامنا نلقي حريق وقت النار علت ماشفنا تاني فريق باصرنا المروق مالقينا لينا طريق نشكي من عطش واخوك يابس ريق ــــــــــ * النجمة أشارة لقول ريــّة* ـــــــــ استميحكم العزر إن كنت قد أخطأت ، بدأت لتوي بنفض غبار الزمن أرحب بتصحيحكم للفائدة ..... مـــأمون بدوي عبيد ( العجلاتي* 
|
|
01-16-2009, 06:09 AM
|
#2 | |
|
مامون بدوى عبيد
|
.....
فترتي قعدت انا محتار جلست وراكي حاقب الدرقة ختيت سيفي فوق اوراكي وقت بعد البهـم لي قِســعو قمتي براكي عسعستي وجيتي ومعاك كوم صقور تبراكي تبيــت بي عجل شافنّي جفلن طارن غابن من عيوني وفي اللعوت إتــّــضارن ما غابن كتيــر جن يقدلن يتبارن قدامن كبيرن عاينني وغارن سلّ السيـف ولاقاهن اخوك يا الضامرة تور عنز ام هشيم الفي المجامع دامرة سيل تل إندفق فوقو السحايب دامرة حجر الصاقعة فرتاق الصفوف العامرة بادرني الكبير ديك أستعدن وقفن مامهلتو طار راسو وجناحي يرفن طارن ديك وقت بي ريشو رقد إتكفن * عارض ومات خلاص لي الليلة يمكن عفــّــن نحمد ربنا الليلة مات عارضنا وإن كان عمرو طال يا رية كان قارضنا يلحقو بي عجل ديش همنا المارضنا نبدأ زواجنا من بكرة منو البجي يعارضنا * بطال البعيش في الدنيا أصلو مناهو إن كان مالو راح غير اهلو مين يدناهو سمح الفوق أساس ابواتو تم مناهو الزول دون قبيلة غناهو شن معناهو * ما بنفرح بمال ونقول كفانا ورثنا نفخر بالرجال في الحارة ببقوا ترسنا نجمع ناس هيلنا من الكبار حارسنا يحضروا اهلنا فرحانين يباركوا عرسنا كل بطحاني بفرح بعرسنا مناه ساعة جمعتن بيتنا يتم بناه عذاب عيش العـُــذب يا رية مر ضقناه سمح الزول صبي يلد ويربي جناه ..... |
|
|
|
|
01-16-2009, 01:50 PM
|
#3 | |
|
مامون بدوى عبيد
|
*ده الأعوج تراه والشين نهاية حدو
إن شاع ده الخبر يملأ الفريق لي حدو بقولوا اب كبس من دخل ود احدو فرحوا وعرّسوا لا موجعُن لا حدو إن كان في الفريق ماتت مريّة ذليلة لي الحول يمنعو العرس الدخلتو الليلة خليه أب كبس راجل الرجال ودليله إن كان بي قبيلة تعدو تبقي قليلة *خليه الكلام وعرسنا في ده الحال من بالك امرقو محال وألف محال علي ميتين ابوي لي الليلة حول ما حال نصبح بكرة ونسة ونشوف بشاتين حال الموت ما شمت غاية البفوت والببرو والحد والحزن ما جابو زول من قبرو الزول في الشدايد أولي يلزم صبرو يترجي الكريم مولاه كسرو يجبرو بنخاطر من الوجعه هيلنا برانا نحن اهل المصاب والناس عزا مجابرانا في آخرالمراح دايماً تجي الفترانة هده الحد ندوس والناس عقب تبرانا * الناس بالمكارم والفعال بتباهو زي الفطرة بش الزول حسب مرباهو عادة جدو عادتو ومتل ابوه رباهو * من الليلة حول نقضيهو تاني اتكلم الدايرو بتم رب العباد ان سلّـم تاني امضــّي حول انا بالحسار أتألم علي حكمك صعب انا قابلو ما بتظلم نستني السة قاسية وصعيبه علينا * تم الإتفاق من الكلام خلينا زي عادة البلد لا زدنا لا قلينا إن شاء الله السنة بخيرها عايدة علينا يا طه البهم قرب رجوع سُــــرّاحو نصيحة سمعتها من الكبار الراحو قالوا العربي ما بنعز كان فــر مراحو . ........................... |
|
|
|
|
02-15-2009, 10:34 AM
|
#4 | |
|
الاخ/مامون بدوى
تحياتى الحاره شنو ياخ خليتنا مابين الارض والسماء نحن فى الانتظارللبقيه وماتطول الغيبه خالص ودى |
|
|
الى كل من وهبنى جرحا وتجربه عصيبه شكرا جزيلا
|
|
02-16-2009, 11:14 AM
|
#5 | |
أبو إسراء
|
رحم الله شاعرنا الكبير إبراهيم العبادى
وزى ماقال ليك عبد اللطيف شحتفت رويحتنا وفي انتظارك بس ماتطول |
|
|
|
02-19-2009, 02:45 PM
|
#6 | ||
 
|
[tabletext="width:70%;background-image:url('http://www.alhasahisa.net/vb/backgrounds/9.gif');border:9px ridge green;"]
| [/tabletext]تسلم حبيبنا دوزنه اختيار جميل واصل الله يديك العافيه |
|
|
|
|
02-22-2009, 08:33 AM
|
#7 | |
|
مامون بدوى عبيد
|
....
أخي عبد اللطيف لك الود أقصاه خارج النص ( ) نشاذ طه أغترب في السعودية الزموووه بي شيلة تقيلة جداً ويبدو انه لسة ما قدر يكون نفسه واحتمال الكشة تكون مرقتو في ام طرقا عراض . :) |
|
|
|
|
02-22-2009, 08:38 AM
|
#8 | |
|
مامون بدوى عبيد
|
....
أخي البرنـــس الحصة البعد دي أستاذ ميسرة عاشميق كان عامل تسميع واخوك ما كان حافظ ولا الحلاوي وما لقيت لي كركاسة امشي بيها الحال يعني راحت علي بس بشوف لي زول يكون حضر الحصة واشفها منو أقصي الود تحيتي .... |
|
|
|
|
02-22-2009, 08:41 AM
|
#9 | |
|
مامون بدوى عبيد
|
....
الثائر مقامك عالي ولكل مقام مقال أتمني ان تسمو حروفي يوما لتصل مقام من يتلقاها تحياتي عصينا عصينا علي الحرية منو بوصينا ... |
|
|
|
|
02-23-2009, 08:03 AM
|
#10 | ||
|
اقتباس:
بس ماتقول ليه ريا قبلوها فى ((الاحفاد)) و((ودالنعيسان)) جاوه لوترى و((وددكين))انتخبوا لمجلس الشيوخ خالص ودى ومنتظرينك |
||
|
الى كل من وهبنى جرحا وتجربه عصيبه شكرا جزيلا
|
|
02-24-2009, 12:44 AM
|
#11 | |
|
مامون بدوى عبيد
|
.....
.... ... . وتقوم ريا فايته علي الفريق وطه يعاين فيها وهي ماشه ويقول: ياليت السعادة ان كان بقت بيديه كنت اعيش غني في الدنيا بالزنديه علي حكموا ناسي الفى اخذوا الديه اموت بالعطش والمويه بين ايديا آه يا ريا قاسيه وزايده فى التفنين اه يا رب ارحم صبري امس ضنين يمحق ديه السنه ربي الحليم وحنين يخصمه من حياتي رضيت بعشرة سنين كيف أتمهن واعيش وانا صبرى ولاّ مودع وسبب الرخرخ المن قام صغير متفدّع جنيت وجنى جنّ وحالى اصلُ مبدّع اهج فى الجيش اهج فاضلى تانى أجدع وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال بالضيفان تمري لا سلام لا كلام صدقوا اهل المثل توب العرب صح لام ردت عليه ريا حبابكم عشرة ومن دون كشرة والف سلام يا وجوه العرب المتلي ما بتلام انا بت الرجال اهل الدرق والسيف بت الما بهموا بي حساب الخريف والصيف بت البحجو لى المرقوب بكرموا الضيف انا ريا كان شفتكم افوتكم كيف قام العربي قال ليها من وين في الاهل كفاك فخر يا بنية ردت عليه ريا انا بت البيوت المن بعيد معنيه بى فوق السما نفوسنا وبيوتنا حنيه انا بت ابكبس في النسبه بطحانيه قام رد عليها ود دكين طبعاً عرفها انها هي زولتوا العاوز يعرسه زاته فقال عبد الله ابكبس عز البطانه وفخري في راس العرب بنعد ماهو الوخري كريم وهميم كان للقبائل دخري بت شيخ العرب هيلك صحيح تفتخري توقد ناره ديمه الما بكوس الجمره وفي الضيفان يهوش سكينو دايماً حمره بي كاس ما عبر لبنو بيجيك بالعمره هيلو الشكرة هيلو الرئاسه هيلو الامره المرحوم ابوك كان للقبيله غطاها عزك قديم عمك حسين ابو طه ان شاء الله اخوك ديه السكه ما تخطاها فردت عليه ريا قايله: كان ما يسد مكانن قدموا ليش يوطاها لا يفوت ولا يموت الساحتو يوم مغشيه تقابة الفريق يوقد صباح وعشيه زايد في الرجال طالق قفاي ووشيه ضيوف الليل يكفيهم مرارة وشيه رد عليها و دكين ما دخل التراب البركه في الذريه والخلاك وراه ما بقولوا مات يا ريه دايما في القبائل سيرة ابوك مطريه بيكي وبي اخوك تزيد ودى المحريه ــــــ ـ ــــــ الباقي بتمو ليكم غـُـلات ساي . .. ... .... |
|
|
|
|
04-21-2011, 11:26 AM
|
#12 | |
 
|
أخي مامون نتمني رجوعك للمنتدي وإن شاءالله تكون بخير
================================== الباقي بتموا ليك ( تاني العربي داك سأل ) . العربي : ما بتسألي لامن وين ولا وين ترسو ؟ ريا : كيف العربي يسأل ضيفو كيف تنسو أول بكرمــو وبخابـرو ساعة أنسو من مقلب حديــث تعرف أبوه وجنسو العربي : عملتي حسابو ضيفك وكرمو وجيتي ويخجل كان سألتيه وإسمو ما عرفتيه واسم شيـخ العرب سامعابو ما عرفتي ؟ ( داير إوريها بأنو حمد ود دكين ده راجل غني وراجل كذا وكذا عشان تقبل بيهو ) . ده خريـف البطانة الفيها ما لو مشـــارك هيلو السارحة .. هيلو الصاهلة .. هيلو البارك ما وقع ليك كلامي .. ساكتة لي شنو خبارك ؟ فخرك ود دكين جاك في فريقك زارك ريا : مرحب بالعز وموهو كفاية أب ناراً تولع لي الضيوف دفاية بي شيخ العرب الافتخار مو كفاية نتابعو إن جانا نفخربو ونخدمو حفايا شيخ العرب : بارك ربي فيك عقلك يــدوم يا ريا وكرمك موهو كلفة دي طبعتك فطرية إياك بت أب تروب والسمتة فيك محرية قديم فوت البطاحين عزة للشكرية ( هنا في المحل ده جاء داخل طه ود عمها ) . طه : سلام شيخ العرب مرحب خريفنا الزارنا مرحبتين حبابك واشرفنبو ديارنا تنـزلوا في الدرب ليه ماتت نارنا شيخ العرب : حباب طه الضرس الفي الصهيباب راس الجود والكـرم هيلك قديم ميراث نـارك ما بتمـوت يا ولدة الحُراس قاصديـن أم شديدة ومعانا عوجة راس طه : لعدوك العوجات في الكبس سراي راسك ما بدوس مليان رجالة ورأي باكر لأم شديدة بركب معاك براي يا شيخ العرب لكن تختوا كراي (كراي دي لخمت شيخ العرب ما قدر يعرفها قال لي طه) . شيخ العرب : هادي الشورة يا طه القلبنا دليلها كل البنزلو فيك نلقاهو قليلا طه : كراي الدايرو تبقوا ضيوفي إنتو الليلة ترقدوا في الفريق حتى إن عشاي بليلا |
|
|
|
|
04-21-2011, 11:27 AM
|
#13 | |
|
شيخ العرب : مسكنا الدرب أسرع قــوام ما تلعب
ودارك ديمـــة عامرة والسمح ما بتعب بكفينا الوصـف لا تشد جمل لا تتعب وهدنا الطريق عقب الوصول ما بصعب طه : يمين تخشـوا الفريـق بتفوتـوا نحنا مقابر ؟ شيخ العرب : ما تهدم فرحنا إن شاء الله أمر وإياك مرسى العابر (مشطوطين خلاص مسكنا في الزمل لزم خاف عوجة الطريق من للمغور خابر) . طه : دريـب جابر مزم والسكة سالكة ورايقة فـرقـان ما بلاقـوك ما بعقــوك عايقة أخـت خاطرن نحنا قالوا واصلة السايقة بتتراوح لي أم شديدة باكر وماملك فايقة شيخ العرب : الــزول إن وعد شين كان ميعادو يخلفو وفي ربط اللسان يسخابـو دمو يتلفو سفـري الليلة زولـين فيهو ما بختلفــوا ضروري أصل أم شديدة علي وعد بحلفو ما بعرف أزاوق من نشيـت تبيت فريقكم لي فريق وبيتكم يمين لي بيت أجيكـم ديناً علي إن بقيـت حفيت هاك وعداً نجيــض أرجاه بكره مبيت شوفتي للفريـق أيام بكاء أبواتك مو غابيني حال وسمعت بي أخواتك فريقك بكرة نحنا ضيفو وما بفوت وحياتك إلا أحققك وبراي أشوف نفحاتك يا ود الهميم النفسو مو معارضاه كرم الضيف عليك مكانة أبوك فارضاه جاييك في أمـر إن تابا وإن ترضى غيرك ما بكوس وأملي بس تقضاه طه : غرضك مقضي إن احتاج لخيل وجمال والضان والإبل سارح يمين وشمال شيخ العرب : فـوق القلتو أنا لي فيك آمال طه : ها الغرض بي دمي ده بقضاه خليه المال ( ده ماشي بي جاي وده ماشي بي جاي طه عرفو داير شنو ) . شيخ العرب : سمح وين الدرب خطرنا طه : دربكم في السلم |
|
|
|
|
04-21-2011, 11:28 AM
|
#14 | |
|
شيخ العرب : والله تـــب مـــــــــا ودرنا
وبكرة نجيك إن قلينا والله كترنا ... (وقاموا فاتوا) (باكر بتكلم طه مع بت عمو) . طه : في البال ضمير شيـــــخ العــــرب متعوب وقايم نفسو يختف في الكلام مزروب الراجل زمان كـــــــان ضحـــوك ولعوب مو خاتيك شيء ما شفتي كيف مرعوب ؟ حمد ود دكـــــين مرتع ديارو وربعو ده الشيء السمعتو من الآباء والتبعو الراجل فعايلــــــو ببيننلك من طبعو أنا ود الخلا البعرف أسودو وضبعو ريا : شـــــــــين كــــان إخلــــف الليلة ميعاد جيتو رجال وحريـم عموم أهل الفريق في رجيتـو قطع السارحة كل زول في مراحو وسعيتو كبـــار وصغـــار وحتى الراعـي خـلا رعيتو طه : محال يخلف محال قال جايبو غرضاً عندي ريا : كــــــــــان غرض صعب .. طه : كان راس نمر في شندي أوعدتو أقضيهو وأبذل كل جهدي العنــدي كان بي المال وكان بالراي وكان بالزندي ريا : هيلك قديـــــم إنـــــت البجيك تحجالو لكن ود دكين عاصر بدين برجالو ( تشعر بيها إنها عرفت حاجة ) . طه : ريا الكـــــلام ده أخيــر تقفلي مجالو وكت أوعدتو بقضالو غرضو الجالو ( ها في محلهم ده جو داخلين تلاتة بطاحين عبد الله ، خلف الله ، وأحمد قالوا سلام يا طه ) . طه : مرحـــــــب بكـــبار قبيلــتي وعــــــزي مرحب بالأسود البكبعوا المستهزي ريا جــات قبيلتك فوق انكعي بهزي وإن زحيتي يوم الحـــارة قرنك جزيـــه ريا : أولاد بطحان تعيشو ويزيد مراحكم ناير وناركــــم في سرات الــوادي تهدي الحاير بتحلوا النضــــــم بتصدو غارات الغاير ما هيلكم تزحوا إن كان يزح الداير ( هنا في واحد إسمو خلف الله قعد يرجف هاش ) . عبد الله : خلف الله ولدي أقعد قبالة عمك كــــــــــلام ريا ده بشوفــو غيــر دمك مـــــــــن زمنناً بعيد متمني أسمع نمك فـــــــــــــرج همنا مولاي إفــــــــرج همك ( دوبيلنا قول دوبيلنا ) . خلف الله : ( هنا قعد خلف الله يدوبي .. طه جاهم قال ليهم ) . طه : هـداك ود دكين بي زملو بان شفناهو داير اليـــوم يروح خلف الوعد خفناهـــو الراجل في الأصول مو خاتي لي معناهو يا ريا استعـــــــدي الــــــــــزول جميع نعناه ( جاهم شيخ العرب قال ليهم ) . شيخ العرب : أولاد بطحان سلام أهل النبأ والشكرا ســـلام عز العــــرب أهل الفحل والبكرا سلام يا طه يا أهل راس الكرم والضكرا جيت لي غرضي يا طيب الأصــــل والذكرا طه : مرحبتين حباب شيخ العرب حباب خريف الرازة مرحــــبتين حبابــو البيهو القبايــــل عـازة حباب سيف النصر البيهو هايشة وهازة في يمينـــــك قبيلـــة ما بتقبــــــــــــل فازة |
|
|
|
|
04-21-2011, 11:29 AM
|
#15 | |
|
عبد الله : هي جايهو الزمل
شيخ العرب : خليها يا عبد الله غرضي إن ما انقضى زملي ما بتدلا طه : النـــــــاس في رجـــــاك مـــــن الصبـاح في ملة كدي شوف الطعام شيخ العرب بسم الله شيخ العرب : ما باكـــل طعام كان ما حسابي اضرب وقضيــــان الغرض فيكــم حقيقة مجرب الأمـر العنيتــــو وجيتـــــــو كـــان ما أدرب ما بنفعني أكل وما برويني مهما أشرب عبد الله : يا شيــــخ العرب أمرك خلاص همانا قول غرضك عديل خصصنا أو عمانا هســع نقضـــــــاه ليك في محلنا اللمانا كان بي مالنا كان بي بالنا كان بي دمانا شيخ العرب : عندكم الغرض لا بدور قلم لا ورقة ومو غرضاً تسافرولو وتقيسو الفرقة بقضى كان قلتو خير لا بدور سيف لا درقة وإن قلتــــــــــــو لا يـــــروح شمـــــار في مرقــة ما مقبوض ولا جني جيتكم فوقي جنية بي خيــــــــــري ومرحاي وتاني نفسي غنية جيتكــــــــم نسيـــــب تـــــــــــدوني بطحانية عبد الله : خير سميها شيخ العرب : في بت أب كبس لي نية عبد الله : بفتخروا البطاحين ساحتهم راحة بالك لكـــن ريـــا أمـــرها منهي مـــــن قبالك فات فيها الفوات لي طـــــــه هدا قبالك من دون ريـــــا قـــــول الدايـــــرو في بالك دا فريـق الصهيبان ما في واحدة حقيرة مال ورجال في الحلة ما في فقيرة كتير زي ريا مليان البلد من غيرها إن درت الكبار وإن كان قصدت صغيرة شيخ العرب : إن مـــــال الشجر ما بتكسرن فراعو وقمحان لي الطلب لمن يجيبوا ضراعو ليـــه يا أهلنا البيناتنـــــــــا ما بتراعوه القال راسي موجعني بربطولو كراعو عبد الله : حبل المهـــــــــل يربـــط وإنـــــــت ارتاح بيت وباكر نمر سوا ونفلي البيوت بيت بيت وسمي الدايــــــرو لــــــــوم البقــــــــــول أبيت شيخ العرب : يمين بالله غير الغاية ما لي مبيت طه : يا شيخ العرب أمرك بشوفو حقارة وما جابباك مرأة الجابتك بس غارة وقرناك كثير نفسك أبت وقارة خبرك هـــــذا ما بدورلو دق نقارة ( واحد مع شيخ العرب إسمو علي رد علي طه قال ليه ) . علي : قبلك في اللجج يا طه راحوا إنهدوا بتجــاسر علي شيــــخ العــــــرب بتهذو زولكم مو عاقل يا كبار أكمل تهدوه بعنادو الفريـــــق خايــــــــــف يسبب هدو طه : أنا المالح الكارب خريفي وصيفي المتلك تبيع ما أظن يطل فوق قيفي كـــــان ما الليلة في بيتي وبعدك ضيفي في الشيء السمعتو برد عليك بي سيفي شيخ العرب : كفى يا بطاحـــــــين فيكم أتغشينا وكرمك جانا طامح رخسة واتغشينا بعد الشيء السمعنا تاني كان ما مشينا خايــف في اجتماعنا تقــع وقايــــــعاً شينـة أها في وداعة الله ــــ تاني بيناتنا ما في علاقة وإت يا طـه إتشفيت شبعت شــلاقة عمرت الشر سعيت دليتو بي معلاقة نحنا وإنت بعد الليلة يوم نتلاقا |
|
|
|
|
04-21-2011, 11:30 AM
|
#16 | |
|
عبد الله : مـن ولد زعلت كــل البلد بتكــــــــاور
أرحكم بيت نبيت ونحنا زولنا بنداور نتقابـــل جميـــع نحـــزم جميـــع نتشــاور (هنا تشعر بيهم زي الخافو منهم كده شوية البطاحين خافوا من الشكرية لأنو في قلة بعدين شيخ العرب قال ليه ) . شيخ العرب : ضيف الغابة حالف ده الفريق ما بيجاور عبد الله : سمـح أرجانا يمكن طه نحنا نجبرو شيخ العرب : الزول في الرقاد شقو البريحو بخبرو والـــزول البليد بي يــدو بحفر قبـــرو عاد بنسوي عوسنا وطه يلــزم صبــرو طه : سوي الدايرو وكتر الكلام خليهو والشــر القصدتــو معاي أبقى عليهو طير أصـــل السما حتى القمــر دليهو يوم نتلاقى كل واحداً بعرف الليهو (بعدين هنا طه دايز إمرق قام أحمد لحقو قال ليهو ) أحمد : أقيف يا طه عندي نصيحة ليك أبداها العقــــــــدة الصعيبة العاقــــل بتعداها الشكرية كـــــــترة نحنا ما بنلداها أنا عندي العرب بي ريا أخير نفداها طه : خـــــــــــــلاص يا أحمــــد تــــــراك بفكرك روح لي ود دكـــين وريهو يسمع شكرك يديك مال كثيـر وقبيلتو ترفـــــع ذكرك تصبح عمدة فوق رؤوسنا تخلف حكرك (جاء عبد الله برضو قال لي طه غايتو أتعبو خلاص) . عبد الله : ليه أحمد تهينو نصيحتو مو ضاراك مـو حــق التقـــص إنت بتعرفــــو براك وكت بتسوي عوسك وما بتشوف بي وراك نشـــــــــــاور ريــا إمكــــن ريــا مـــــو دايــــــراك طه : صدق القالو خربانا البلد بي كبارها هديــــــــــــل ريا أسألوه واعرفوا أخبارو من غير السفـر ما عندي تاني دبـارة نحنا وإنتو بي دي الحالة ما بنتبارا أحمد : يا طــــه المصاعـــــب لـي القبيلـــة تقــــــودا مسافر وين مخلي النار بي وراك ميقودا طه : أنا السمتان جليس الردفولا عقودا حد السيف بقطع عقدتو المعقودة ما ولعـــت نــــــار إنتــــــــو تقعوا فيها شن دايرين براي وأنا ناري متدفيها أحلف ليك يمـــين دي الحلة متقفيها باكر من صباحي قبل يحس الفيها عبد الله : نحنا كبار أخيرلك ترضي بي عرفتنا مع الشكرية أحسن نشتــــري الفتنة نــــدي ود دكـين ريا ونكتل الفتنـــة ما من خوف .. ملاقاة الرجال حرفتنا طه : من الفيها ما بزح إن كان تزحزح مرة وإن حـــــين نعــــود إن طــــال زمنا ومـــرة عيش الدنيا إن كان يحلى وإن كان مرّ الزيـــن ما بــــدوم والـــزول بموت فد مرة عبد الله : وقت صممت ما ترجع وتسمع قولنا وسفرك ده محال ما بقبلنو عقولــــنا الموت ما بنخافو الخوف يمين ما هولنا بنعايـــــن بعيـــد بنخــاف بهـــادل عـولـــنا الشكريـة بسيوفـنا صغيرنا معتــق ما بنابا القتال ونقول جرحنا اتفتق مرحبتين حباب الشـر محل ما بتــق تنقـــــد الرهيفـة إن شـــاء ما تتلتـــــق طه : الشكرية غوش واكتر علينا حساب وضيف ليهـم لميم ما بتربطوا الأنساب وأنا لغارتهــــــــم حسبت ألف حساب لو تتعدوا رأي يقين عذابكـــــــم ساب بجيكم حمد ومعاهو الرجال تابعاهو قولـــــوا طـــــــــــــــه طفـــــــــش وريا معاهو كيف نرضي السفيه الأدبة ما برعاها يرفض طلبك إنت ونحنا كيف نسعاهو أبقوا قصادي وحدي القبيلة محايدة عقبال من رجع فوق الخساير عايده إن كان دارني أنا ما بترجع جموع الزايده وإن حصلني قـــــــط ما أظن إعود بي فايدة |
|
|
|
|
04-21-2011, 11:31 AM
|
#17 | |
|
عبد الله : ما بقيف ود دكين واصل السرج ملعوق
وفي دربك بســـــــــوق وإياك يا طه ملحوق وإت صنديد تصـــــــــد المية ماك ممحوق بنخاف كترتـــــــم وإيد الرجــال بتحوق ؟ طه : ليه خايفــــــين على الدنيـــــا عيشــا مخاطر الواجب نسويــــه ونرجى ستــــــر الساتر في وداعة الكريم الليلة نيتي خاطر يا دا ر ريا ما كان الفـــــــــراق بالخاطر كفاية مع السلامة انتهيت خلاص غير الشورة دي ما لينا تاني خلاص في يــمــــيني الحريري الدكري القصاص ما بخاف ود دكين إن جاني بالرصاص (قام مارق منهم وساق بت أعمو ماشي بيها طبعاً لأرض الجعليين .. ما شي للمك نمر يوريهو على إنو نسيبك ده جاي يقلع مني بت عمي ــ قام مارق ــ بعدين أحمد قال لي عبد الله) . أحمد : عـــــــم عبد الله خبرك هـــذا شيتاً فاجع كيف بنطاوعو من بيناتنا إطفش ناجع عبد الله : سمعـــت كــلامو مــــن الفيــها مـــا متراجع وفي الشيء الشايفو قط بي هينة ما بعود راجع أحمد : نركب نلحقو نخليهو يمشي بر اهو عبد الله : شورة القال أخير من لحقو ونبراهو العاقل بحسب للتجي تافراهو بفكر في القدامو والبي وراهو أحمد : فوق سقوط القطرة في ظني ما يخلوهو كيف موقفنا ساعة إلحقوا يكتلوه عبد الله : إن وقـــــــع القدر ما بتقدرو تصدوه وده كتر كلام أحسن أخير تخلوه (بعدين آ آ آ ساق بت عمو وفي الخلا كان بحجي فيها) . طه : درقي يكركب كيم ركبي يشيــل بر عمــو أصلي بطرز أمو مني تحود الأمـة جمل يكسر القـــربة سيف يحل من مجربة قلبي سنـــين تربة ما بتدماني الغربة يا ريا الحلم ما شفتي كيف إتهول واتفسر براهو وبالشين علينا إتأول داخــــل راسي فكــــــراً منو ما بتحـــول بقتلو ود دكين إن كان قرب أو طول ريا : أسو د ود دكين بي إسمو ما تحجينا هــو الفرقـــنا قمـــنا من البلـــد هجينا عقب في دار جعل تاني الخراب ما بجينا ما بســـــــــــوي الـــرماد المك نمــــر بحجينا ريا : ماك شايف الدرب ؟ طه : ما شيهو بي كرعي تلات أيام وضحي وكان معاي سعية كيف إلحقنا زول شندي ومعاه معية قبيلـــة دار جعــل محميــة فيها أسودا تقدل بالمكارم وديمة حاقدا حسودا را س المك نمر كل القبيلة يسودا ركازة القبايل في السنين الســـودا بكرة نجيه وسيفاً يجيك بولادو العز والكرم من الكبار تيــلادو ما أظن ود دكين بي شينة يوطأ بلادو ما خد بت أخوه شمة أم أولادو إن ودعتك المك ما بخاف المتلو أهــــون زي شراب الموية عندي أكتلو وارجـــــع للبطاحــــين وتاني راينا نفتلو والشكرية تقيــــــو غير حـــرب ما بتلو يا ريا البطاحـــــين أصبحت محقـــــورة علي الشكرية دايماً سارحتم مدفورة ما بتقــــــال عز وتعيد مكان وقـــــــورة إلا الغارة وتقضى صقورا ريا : في داب الشديــــــدة أبقالــــــنا قـــــوم دربنا بي وصفك دحين من شندي نحنا قربنا ما بفتـــــــق عشــــــــنا بالفتقـــــة دي تفرقنا ما بنـــــوم الرجال إمكن يمسكوا دربنا |
|
|
|
|
04-21-2011, 11:32 AM
|
#18 | |
|
طه : يسمع حركة ..
ريا : شد ديل يبقى رعاوية طه : حركة صُهب ده ركوب سروج مو حوية وقربــــــن مننا وفي ظـــــــني ناســا شوية وكان ناس فزع ما بجيبوا حتى ضوية ريا : ياهم ناسنا خمسة عقاب رجالــــو وينن ما بتشوف ود دكين برز براهو هوينو طه : الشيء البــــين نحنا سعينا لي تهويلو وضايقنا الصعج ما أظن يعود لعويلو الناس المعاهو عـــرب صعيد يا ريا ما أولاد عم ديل والله ما شكرية معروفين تمام في كل بلد وجرية كان حفرولو بير ولقــــوه شجرة ضرية عارفين ود دكين ما بهم بخيل وجمال بكتلني ويســـــــوقك وهم بسوقوا المال وبقتلوا ود دكين ودي الطانها في فكري بتشوفي الفضايـــــــح المابجيك من شكري الشكرية فرســـــــان ومستحقين شكري ده الصح قلتو ليك أنا لا بخاف لا مكري ريا : يا طــه استعــد الناس عنـــــونا عديل طه : وين شفتي القطاع بتسوي هم قديل بضاير العوقة أخوك المابهــم من ديل براك بتشوفي ياما أشبعهم من بهديل (هنا شيخ العرب جاء وقف جمبهم قال لي طه) شيخ العرب : أتعبت الزمل حفيت وراك مستبقاً أحسن ليك تفوت ريا وتحل الرفقا طه : كان كل القبايل جات علي منطبقا أفوت من ريا يا شيــــخ العرب ما بتبقا شيخ العرب : البــــلاوي القبايل ما بسوي سواتك خربـــــــت قبيلتك يا طه وين داواتك تاني بحد جريك البشهدنو أخواتك فارقــــــت الثبات فارق درب أبواتك أبواتك تيوباً كانوا باعهـــــــم طايل إيـــدن في الـــرقاب تحـــجى وتعـــــــدل المايل سيف باعك كراعك ما بتخاف قول قايل أفــــو يا ود حسين فيك الســــؤال مـــو خايل أبـــــقى لي نسيـــب أحجاك وآمن روعك وقول الدايرو في الملك أجيك في طوعك من هـــــذا الغرور يا ولدي أولى رجوعك طه : يا شيـــخ العـــــــرب جربت لحسة كـوعك كل ما أوغرك ... في الشينة أراك تتقدم إتعرميت خلاص أنا صبري حسمو إتهدم أصلــــــو البينا ما بتنفك مــــن غير دم الكاينة التكون بي وراك مافي ندم (واحد جاي مع شيخ العرب ـــ عربي ــ قال لي طه) العربي : أصلو الخملا مابسمع نصيحة الهادي أول خفـــــــــنا ليك من البهادي الهادي يا طه البهــــــــدي الما بضــــرب الــــوادي يمشوا علي الرجال ويقرن مقبل فاضي ! طه : هسع وصلت الميس دحين حديد يلاقي حديد ينبــــرش الطرور ويثبت الصنديد خليهو المضى لاقي البجيك جديد (واحد برضو مع شيخ العرب قال لي طه) عربي آخر : ما بتشيل قدر يا طــــه إنت عميت وفي المروق وقعت عترت ما سميت من الجاية قضيت وبقيت خلاص زول ميت في تركتك كفاي أنا بركب أب سوميت (أب سوميت ده جمل طه) |
|
|
|
|
04-21-2011, 11:33 AM
|
#19 | |
|
طه : الداير الغنى يعمل حساب لي فقرو
وكعب الزلـة وين المتلي تكابــرو أب سوميت خليهو الليلة سيدكم أعقروه وين تاني الملاذ وكت يتلب صبرو شيخ العرب : لم باقي الكلام يا طه بهمك سرب جيتك استعد طه : مرحب حبابك قرب من قومــــة الجهل أنا لي لقاك مدرب يا شيـــــــخ العــــرب الليلة يخمل غرب (وهنا وقع القتال ها ها ها ها ها طه ضرب شيخ العرب جدعو والتفت علي جما عتو قال ليهم) . طه : ترا شيخ العرب قبض الربح من تجرو واتوسد تقيلو إن شاء الله ما بتصبــرو إنتو الليلة كيف عند الزمل بتحجرو صنقعوا دي السما بتطــــول ولا بتجروا أحمد : أنزل يا عمر الـروح في يد الخالـــــق بتجايه الضرب وفي الدركة ساسك غالق عمر : عاين ده الخشيم دايماً تنط متشالق ما تنزل عليه إت ماك بالغ ؟ طه : دربي صعب على وصف البوصف عازر وفي قارب التلوج أنا ما يدي دايماً عازر أسمعوا يا طرش كان ما يجيني مبارز واحد منكـم بضرب طــــــــرف ما فارز ترا أب سوميت أركب يا عمر سافرت قبيل وقت الكلام من الأسد طفرت ما لو دمك بهت متل التقول جفرت عمر : من القلب أنا ليك تبت واستغفرت طه : أنا علي حلف إن كــان بقيتو سرية منكم انتهي قبــــــال تجي العصرية جيتكم استعدوا تاني ما فيش نية (وكلهم قالوا ليها) . هادي السيوف واقعين وراك يا ريا طه : يا خضرة المفرهد فوق جروفو نديــة على الواقع وراك أنا كيف أشيل إيديا حتى إن كان قتلني أعفي ليهو الدية دمــــــــــي ومالي هيلك وأقبليهو هديـــة ريا : رجال التابــة إنتو السترة تب ما فالكم إتأمنتم خلاص قوموا سوقوا جمالكم حتى جمل ود دكين سوقوه إتبع مالكم نحنا نمشي في حالنا وإنتو أمشوا في حالكم (الجماعة قاموا صوف إتلفت طه علي ود دكين قال لي ريا ) . طه : زايلــــــــة رقــــد دكــــــــين أســـد القبيلــة الراعـي كان ما ضايقني هو ما كنت قطعتو ضراعي ريا: تتأسفلو ليه كان داير يجزبو الــــراعي والنعلات حرام ما تضوقا تاني كراعي (يعني إن مات ود عمها ده لي القيامة ما تلبس نعال ) . طه : موت المتلــو نقصــان للعــــــرب في الجملة كان راس الجراري وهو البقود الحملة أطرف عايل إقيف ليه .. إقيف بعد ما يملا كان ما شــوية كـــــان داير إعمــــل العملة (بعدين قاموا طوالي مشوا في دربهم .. برضوا يعني في مسيرن برضو ما شيين للمك نمر .. طبعاً قبيل كانوا ماشيين وحصل ما حصل .. هم برضو حيكلموا المك نمر .. ساق بت عمو ولقى المك نمر قاعد وجماعتو قاعدين جمة الجعليين وأولادو قاعدين وهنا جاهم قال ليهم) . طه : التلـب الذوم مدخور يفيد العايلة أقدل تمهل فوقو الحمول الهائلة إياك ميز القبايل فيك تسند المايلة فـــراج كربة الهم أب قبائلاً جايلــة عامر جمعكم إن شاء الله ما ينفض ما جابني مال مابدور ذهــب ولا فضة بــــدور المك نمر سيد النحاس الجضة جيتــو علي حملة غيـــــــــــرو ما تنقضّة المك : تقضى كان بقدرها طه : إنت اللزوم ماك حاشي |
|
|
|
|
04-21-2011, 11:34 AM
|
#20 | |
|
ألف زي حزمتي تشيلا تقدل ماشي
التقيـــان تغشو والضعيف بتراشيه ما داب قبيلتك النحنا بيك نفاشي جيتك وأملي فيك يا مك تكشف همي في الأول وداعتك وفي حماك بـــت عــمي وقتين تقبـلا إت شلت تلتين همي والتلت الأخير تحجاني تحقن دمي بت عمي أب كبس ما كان أبوها فقير أبوي قبال مات ورباني كنت صغير وقت أعيش وراه ماني حقير أصد الغارة على جاري ولعروضي أغير المك : مالك هسع شن جاك ؟ طه : جاتني جنية حربة ربي ما بخاطري ما بالنية المك : قتلت منو وجريت ؟ (التفت على بت عمو قال ليها) . طه : ها ما بتسمعي يا بنية هدي المابيها لكن خفت ورانية الموت ما بخافو الخوف مو هولي الشيء البخافو بخاف بهادل عولي الناس الوراي كان بي راي يسعولي في راس الكتلتو أقيف يمين للحولي كان هم برضو بتارتو ياخدوا الهيلتي ما كنت التجيت ضاقت علي مهيلتي يا مك ناسي قلة بخاف إخربوا قبيلتي بجعل احتميت فوقك سندت تقيلتي الشكرية تقيوا وللجوار ما براعو حمد ود دكين في راسي خت كراعو سمع بي سفري لي شنــــدي قام فسراع وقاطع دربي يخرط ريا قال بي ضراعو جيتك من أهلي قاصدك ما بقبل تار انكشــــــف الأمر براك دحين اختار إما تبقــــــــــى بيني والبخافـــــا ستار إما تكتلني إنت نسيبو تاخد التار إياك عز القبائل والكرم فيك طبع وجارك ما بهــــــــم إن يســـــوي السبع إن كان أجلو تم أخد قصاصو السبع واللياكلو الأســــد أخير لـو من الضبع ( آآآآ .. المك نمر هنا التفت على الجعليين قال ليهم ) . المك : مطارق جعل إنتو الكلام سامعنو قولوا دحين رايكم وفكركم الشارعنو (واحد جعلي تلب وقف علي حيلو قال ليهو) . جعلي : كان ضيفنا ما نحجاه وندافع عنو نرمي سيوفنا ليه تاني الحصان ساعينو قديم يا مك ديارنا مرتع الآمال وشربة الكون .. ركازة الزمان إن مال سعينا من جاري العوق يمين وشمال بدمانا النــــــزيل نحجاهــو قبل المال أديهو الأمان يقدل ويلقى مناه البقى في أمان المك منو البدناه كل إسم جعلي من أعلاه لي أدناه محـــــال يقربــــو والمك نمــــــــر أدناه |
|
|
|
|
04-21-2011, 11:36 AM
|
#21 | |
|
المك : انتو كبارنا شورتكم ما معنى بتعمرو
ما رستو الدهر ضايقين حناضلو وتمرو غايــــة الحي فناه الموت نهايــــــة أمرو لكن بي وراهو ذكرو يصبح عمرو إياها الضامرها وعليها كنت مصمم ما اتعداه رايكم جاي ليها متمم صار في أماني طه الزمام متزمزم أدوه هدومي وبي عمامتي اليكون متعمم أرتع في أماني أنا البقش البطقو إلزمني غرورو وللرقاق ما اعتقو بالمال الشريتو عازم أباصر رتقو وإن قـــــــال لا عقباً نوســـــع فتقو تقدل بالأمان فوق النحاس بشربو لامن يسمعو الناس البعاد والقربـو عقب البدنو طه يمين عقابو نخربو أنا المك نمر كبريتي يحرق الجربو (طه طبعاً اتكيف من كلام المك نمر خلاص قال) . طه : نمراً يركب الكيك البطل إتحرن نمراً يقلب العوقا أب صفوفاً جـــرن خلوات صدرو في علوم الجروب كم قرّن سيفو بينسف الدرع الحديد مقرن مو متل الشدر حاضن فروعو مقيل ده النمر البضاير الصف محل ما يميل كـل ما أقول شكر ألقاهو فيهو قليل كفو بيخجل العين أب سحاباً ميل غابــــــــة المك قبيلة ما تخطى أصولا العشمان يعيش فــــوق ظلها ومحصولها بالشينة البدورها بعيد عليهو وصــــولها فروعو سيوفها ومطارق جعل في أصولا عرمان جدكم والنسبة عباسية وأيام فضلكم لليلة ما منسيـــــة هاهي الدنيا حية بفخركم مكسية نزيلكم ما بهم إن سوى ألف سيئة من سابقة العرب في أصلها وفخورة مثبوت الرجالـة وعندكم مأخــــوذة صغيركم يدخل الحارة أم ميوس ويخوضها مجرب من قديم سيفكم بوابر الخودة (واحد حاجب كان قاعد جنب نمر قال) . الحاجب : نبه بالأمان فرسان فازت وهــزت دقين النحاس فوق الرجال إنعزت عروس الكجرة فرحانة وطرب أهتزت عرمان عز لله قبيلة بيك اعتزت المك : وصلــوا طــه للبيــت المخصص ليـه واحفظوا كل موجودو وجميع ما ليه خدمتك بأحسن تقعد معاه تسليه في كل يوم تعين ناس غفر عليـه طه : عشمكم ... المك : أبــدأ بنصايحـــك وبيها أخير أنصحنا واختم بالحماس بالفيها قول لي نحنا النصيح : خلي عجب النفس الدنيا قيدا قصير وجهك أطرحــــو لا يكون دوام متغير لا يغرك هواء ظـــل الضـــــــــحى المدور كــــــم سبـــق الأجل خلا الأمل متحير الروح على أي حال يأتيها نصيبها والصايباها من خالق البرية تصيبا أرضى بمسـودك قدرة وتنصيبا وإن لـم تـرض قد زدت المصيـبا مصيبا الليك إن قاطعك كان كنت فاضل واصل وأعفي لـم أسـاء واجعل برك واصـل تـــــــــــــــــــــــــمــــــــــــــــــــت |
|
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| نفسياااات .... الجنس اللطيف ممنوع الدخول | عمادبندي | «۩۞۩-منتدى الحصاحيصا الحر-۩۞۩» | 2 | 10-18-2009 05:22 PM |
| الدخول للمجانيين فقط هااااااااااام | عمادبندي | «۩۞۩-منتدى الحصاحيصا الحر-۩۞۩» | 7 | 10-07-2008 04:26 PM |
| ممنوع الدخول لغير المفلسين | خرباش | «۩۞۩-منتدى الحصاحيصا الحر-۩۞۩» | 10 | 08-01-2007 07:16 AM |
 |
 |
 |
|
 |
العرض العادي
