دكتور / محمد فرح شادول

	د احمد فرح شادول دكتور اطفال ومستشار منظمة الصحة العالمية لصحة الاطفال كلية الطب جامعة الخرطوم/ كلية الطب جامعة ليفربول انجلترا اب لاربعة ابناء ( فينوس ومضة محمد ومحمود ) تاريخ الميلاد 26 / 12 / 1954 م الشمالية ارقو

	الكلام المباح بتملي في رونق جمالك للصباح هو منو البقول: إنو التأمل ما مباح؟! اتألقي و غطي الشمس يا رايعة كان سقط الوشاح دنياك و اقدلي ما عليك فجة صباحاتك رباح اتهادي تبراكي النجوم و اتمادي لو طبعك أباح حوليك قلوب الناس تحوم يا حلوة و أديها الصراح في عيوني ترتاح مقلتيك وفي قلبي ينبسط البراح في روحي شايلك و مشتهيك يخوانا وين درب النصاح؟؟؟ في غفلة الليل البهيم نمو ونهيم غبطة و رواح و نتساقى زخات الهنا و نناجى بسطة وانشراح يا بختنا الكون حقنا شرباتنا روح ريدة و سماح كان قصرت لغة الكلام إحساسنا بالجوانا صاح تغمرنا نشوة حبنا لا لوعة لا أسى لا جراح كالنسمة نسري على النفوس في جناحها شايلانا الرياح طالقين شراع الريدة "فل" وهوانا هبابي و صلاح هي الروعة منك تمشي وين زيدينا لو شرعك اباح يا ألف ليلة من الشجون في سيرتك أدركني الصباح لكني ما بسكت جوى سمح الكلام فيكي و مباح

	هند أحبك هند أيا ذاتاً غدت ذاتى حوت سعدى و جناتى سرت كالروح تملأنى و توقظها مسراتى أحبك هند .. يا ذاتى بكل شراسة الغابات تكمن فى دعاباتى و كل ضراوة الأشجان غنتها فراشاتى و كل قداسة الأديان فى عينيك عاشتها خيالاتى و كنت الزاد فى سفرى رفيقى فى المسافات و كنت الصبح يبهجنى بوهجٍ ظل مرآتى و كنت النور يا نورى ينير ظلام طرقاتى و كنت الأمس يملأنى حنيناً للغد الآت و كنت الليل يأوينى فأنشد فيك منجاتى و كنت الروح كنت القلب كنت أدق خلجاتي و كان القلب يغريني يضخ هواك فى الذات و لكن رغم إيمانى و رغم عميق إحساسى غدوت اليوم مأساتى سفائن نوح لا تقوى لتحمل عب مأساتى طيور الدوح إن غنت فقد حسّت معاناتى و شادى الروض إن أشجى فتلكم بعض آهاتى و إن ما ناح محزونٌ فصوت الحزن أناتى و إن ما غنّ صداحٌ فتلكم فى .. مواساتى يد الأقدار ما زالت تضاجع أمّ مأساتى فأرزق كلما صبحٍ بآهاتٍ .. و أهاتٍ .. و أنات .. و تلك مآتمى هندٌ فهل خفّت ملماتى .. ؟ و ذلك نحس أيامى فهل يصفو غدى الآت .. ؟

	توأم الروح شاقينى .. رغم الشوق إليك سالينى .. وأنا سائل عليك يا بدر ما أجمل بهاك يا ويح قلبى الاشتهاك تيه فى علاك وانشر ضياك للراجى قربك وما لقاك عاشق صفاك ما طال سماك يسرح وراك صبحه ومساك ويتشابى بالاشواق اليك ياتوأم الروح والصبا يالغنى بيك قلبى وصبا اعذرنى مهما جاك نبا كل الإشاعات كذبا عزالى فيك ما اكذبا صدقني شوقك ما خبا رغم المسافات مشتهيك يا بلسم الروح والجروح يا الباقى لى ارواحنا روح بالريدة راجنك تبوح نوار سناك بالحب يفوح تنشر نداك فى كل دوح ونبداه مشوار الطموح بى خطوة بتوصلنا ليك ما بين مدارات الفصول ياريت مواسم الريد تطول بيناتنا ما دايرين عزول ياللى لقاك عزّ الوصول قفلت أبواب الدخول وعندك مفاتيح الحلول ما كان دا أصلو عشمنا فيك

	ما حأستجديك ما حَأَسْتَجديك تَرْجَع أو فِ ريدك تانى بَطْمَع ريدنا ما أَوْفيته حَقُّه كانْ كَمَا الأمثال وأَرْوَع ما زمان كنت الأمانى وكنت ساعة الحارة مَرْجَع ولما حضن الكون يضيق بي بَلْقَى صَدْرَك مِنُّو أَوْسَع ولما ليل أشواقى يِسْدِل انت فى دنياي تسطع وكنت بَتْوَسَّدْ مشاعرك وعِنْدَك أحزان عمرى تهجع وكنت عايش فى عوالم فوق خيال الناس وأَبْدَع فَجْأَة وانهارت صِلاتْنا والبَنِينَا قُصُور تَصَدَّع ولما حبل الوُدْ نَمِدُّه كنت دايماً ليهو تقطع ولما كان الصَدْ خِيارَك ما حيَبْكِى عليكَ مَدْمَع وعِزَّة القلب اللِّى رادك ما حَتَسْمَح ليهو يركع ما تَحَاوِل تاني ريدنا يِِسْتَحيل الماضى يرجع !!!!

	أمانى الدنيا زيك أبداً ما لاقانى وما اتعشمت تطلى زمانى وتحفرى اسمك فى وجدانى خايفة من الأيام .. و أقدارها وعاملة حسابك من ادوارها سيبى الدنيا تدور محتارة ونحن نعيش العمر تهانى شيلى سماحك ويلا تعالى نشد صهوات الأمل الغالى نهشم سور الجفوة العالى وما فى إنسان فى الدنيا يعانى جيتى من الآمال منشرحة و شايلة معاكى سنين الفرحة وانا بتأمل أخدت السرحة و اتمنيت ما الدنيا امانى اتمنيتك تبقى معايا وطبل الفرحة يدق جوايا وبين السحب الماشة و جاية القى عيونك تتلقانى و أتمنيت ما الدنيا أمانى

	أغالب الشوق يا المالى حياتى غنا والحان طَمَّنى بَدَّل خوفى سرور وأمان عليهو بغنى الهذَّب فنى عليهو عزفت مقاطع دَنَِّى أطمِّن قلبى معاه واْمّنِّى أبيع الكون يوم يسأل عنى !!!! سمير وجدانى الهَزَّ كيانى وفوق للريد زَوَّدْنى أمانى !! أغالب الشوق لى شوفته وأعانى متين .. يا توم الروح تلقانى ؟؟؟ الساكن قلبي وكل منايا .. الزيّن حسنه معانى غنايا أمَنِّى الروح بى قربه معايا الشوفته .. مراد الروح والغاية !!! بَدَّل خوفي سرور وأمان

	في انتظارك فى انتظارك وفى انتظار نغمة هزارك وطلعة النور … من مزارك قلّ صبرى … وطال نهارك !! ياحبابك في انتظارك يلاّ كونى ياما عنك كلمونى حاسى بيك في روحى تسرى فى مسارى وفى سكونى تملى لي بالبهجة … كونى وتنسكب أفراح شجونى وينفتح لي سعدى بابك ياحبابك فى انتظارك نفحة هابة نسمة تضحك للتعابة حاسى بيك جواية جاية غيمة بتظلل غلابة بشرى بالمطرة اللى جاية تغسل الأسى والكآبة عن عيون عانت كفاية صابرة تترقب مآبك ياحبابك فى انتظارك يلا عودى عامرة بالخير والمحبة مرة أصدقى يا وعودى وحققى الأمل المخبا وبيكى تتفتح ورودى عن فرح من عمرى غبّ وليكى أهتف .. الله جابك الله جابك ياحبابك !!

د/شادول
ذلك الشاعر المرهف
جميل تناغم الاسطر والاحرف
وأبداع اختيارك.
ولو تجود بمجارته لشاعر حسن الزبير
رحمه الله .
في أن شاءالله القيامة تقوم

	يقول الشاعرالراحل المقيم حسن الزبير كنت يوم في المكتب فجأة جاني زميل من زملانا وقال لي أنا عايز أوسطك تخطبلي زميلتنا دي قلت ليه انتو متفاهمين؟؟ قال لي متفاهمين قلت ليه خلاص ان شاء الله في اليوم التاني قالت لي انا برد ليك بكرة ولمن جات في الصباح قالت لي أنا ما بقدر أتزوج زميلنا ده وذكرت لي بعض الاسباب قلت ليها انا حا أقول ليه مخطوبة واتفقنا على كده بعد داك جاني هو في المكتب جا وقف قدام التربيزة قال لي اها قلت ليه اقعد قال لي ما قاعد نجيب ليك شاي؟ قال لي ما دايرشاي قلت ليه طبعا زميلتنا دي امبارح اخدو الفرصة ومشو كلمو ود عمهاالكان خاطبا ورفض وقال ما بخلي بت عمو دي مهما كانت الظروف وبنات حواء كتار وربنا يديك الابرك منها قال لي يعني ما حا تتزوجني؟؟؟ قلت ليه طبعاً لانها مخطوبة وانت جيت متأخر يعني ما حا تعرسني؟؟ قلت ليه طبعاً ما حا تعرسك ضرب التربيزة وشتت لي الورق وقال لي ان شاء الله القيامة تقوم عشان الناس كلهم يتلخبطو في بعض المهم قالا بطريقة فيها نوع من الالم والحسرة أنا داعبتهم الاثنين بالقصيدة ان شاءالله القيامة تقوم عشان ريدك معاي ما بدوم ناس سهرانة طوالي وناس طول الليالي تنوم أشوف انا كيف حسابك يطول على الوعدالدوام ممطول وانا الشايف كتير أحباب بعيشو الريدة عرض وطول أنا الشايل دوام همك وأريدك ريدة زي أمك وأغير من غيرتي زاتا عليك أخاف أنا يا الخفيف دمك ان شاءالله القيامة تقوم وكل زول يمشي في حالو عشان ما قلبي يرجع يقول حبيب الدنيا في بالو كان ممكن الحكاية تنتهي عند هذا الحد لكن أخونا الدكتور أحمد فرح شادول قال لي أبداً الحكاية دي ما حصلت لزميلك دي حاصلة ليك انت وقام عمل قصيدة هاجمني بيها

	هجوم الشاعر شادول لحسن الزبير ان شاء الله الحسادة تطير وتمتد السعادة تدوم والضاق العذاب في الريد بكرة يعيش ويشبع نوم وتقول القيامة تقوم؟؟ عشان حظك شقي ومشئوم وفتحن ليك بنات حواء وجافاك ليلة واحدة النوم بتقول القيامة تقوم؟؟ أنحنا لا عرفنا الريد ولا زيّك عشقنا الغيد وحبينا القريب وبعيد وراجعنا القديم وجديد ولا ضمانا حضن الليل مع الوجه البهي وغريد ولا لليل شكينا حبيب اذا حتى العشقنا عنيد ولا نظمنا في الحلوات غنا وموال درر وقصيد ولالينا بن عوف غنا لا الصابر ولا الباكي خيالِك عندي يوماتي صباح خيري ومساء أفراحي أعد ميعادو باللحظات وسهري معاه صباحي عيونِك فوق عيوني تنوم وفوق آلامي ترتاحي وريدِك من عواتي الريح المو وأضم عليو جناحي وتقول القيامة تقوم؟؟ أنحنا مع السعادة نسير مواكب فرحة هادرة هدير نحيا نحب نعيش ونغير ونعلن ثورة التغيير ناكل حب ونشرب حب ونلبس حب ونفرح بالمحبة نطير نعيش الريدةعرض وطول كبيرنا ملك صغيرنا أمير وتسمع صوت هتافنا يجيك ان شاء الله الحسادة تطير وتكبر وتنسى يا زغبير

	رد حسن الزبير ان شاءالله القيامة تقوم وعشمي في الله ما شويّة أدخل جنة المأوى وهناك يدوني حورية أتكي في الارائك أنووووووم بكل حبور وحرية وأرتاح من ده مافي وقوم وأمش جيبلي وجيب ليّا أفارق دنية المعدوم والقى مطالبي بالنية ولوحنيت للحم الطير تجيني الطيرة مشويّة عشانك كيّة يا دكتور تكون حوريتي خمرية تجرجر ديسا ده المردوم ولهجتا خالصة عربية أخلي ليك بنات حواء تحاحي صباح وعصرية وتبقى عواطلي يا دكتور هناك لا مرض ولا شكيّة هناك لا أذن سمعت ولابعيونا مرئية هناك حتى الرحيق مختوم وولدان طائفة دوريّة لا عشوائي في الخرطوم ولا صفقات تجارية صفي النية يا مهجوم بلاش هجمات هبوبية وان شاء الله القيامة تقوم وتنجح مية في المية

	رد شادول ما مقبولة اعذارك وما معروف مصيرك وين وماهي صالح اعمالك عشان يدوك حوراً عين لو انت على الصراط ماشي وشركوا ليك ببنية حا تختل كل حساباتك وحا تحتل حتلة ابدية أما لو ضرب حظك وجابوا ليك بنات الحور تموت واقف على طولك ويشيلك حيلك المشلول وتتلفت يمين وشمال مشدوه بالجمال مبهور وتحتار باقي عقلك طار فيمن يهوي او يختار ديك قواما سمهر وطول وديك دعج العيون مكحول وديك جمالا يسبي عقول وديك من فيها حلو القول ودييييييييييييييييك خليها لي شادول وديك شعراً كمان خلي قدر ما يزيد نعومة وطول عذابنا وليلنا فيه يطول وديك خشيما بنقط كلام معسول تقيف مشدوه وتفوت القيامة عليك واقف انت تتلفت طرب وذهول حسن دنياك للزي ديل وديل يا صاحبي هم دنياك يودّنك ويجيبّنك ويختنّك ويشيلنك يجلبّنك ويبيعّنك يغسلّنك ويشرّنك ويدفنّنك ويكتلنك يقيدو النار يشدّنك ويبرن عودك المسلوب يحرقنّك تفوح انت ويزيد دنّك وتغني الدنيا بي فنك ده حال الدنيا ما بتدوم مرة تلام ومرة تلوم ويوم تتعب مرة تحب وتشبع حب ومرة تحب وما تنحب حسن خليهم السمعوك وارجع لحلوكلامك معقولة القيامة تقوم قبل ماتلقى احلامك الا رحم الله الشاعر حسن الزبير وادخله فسيح جناتة مع الصديقين والشهداء وادام الله الصحة والعافية علي دكتور شادول

	الريد بالريد بتربى مهدود البال والحيل مسنود على باب الذكرى وعشمان فى طول الليل الغطَّى جبال الفكرة تاريخ الريد الحافل بى فُرْقَة وقسوة ونَكْبَة خَلِّينا نعيدها صياغته ويِتْهَنُّوا الكانوا أحِبَّة ياخايف سَطْوَة ريدك الخوف ما دَسَّ محبة بادِرْ بالشوق العندك الريد بالريد بِتْرَبَّى قالوا الايام بِتْغَيِّرْ فيك ما بْتِتْبَدَّل شَعْرَة رغم السنوات المَرَّتْ نفس الاشراق والنفرة استبشر قلبى و أَمَّلْ فى فرحة بِتَشْرِقْ بُكْرة وقال انت الدنيا الحلوة الجاى وماضى الذكرى عجلات الزمن الدايرة ما وِقْفَتْ لى مشجون عُمْرُه التاريخ ما اتْوَقَّف يِسْتَنَّى علاج محزون يلاكَ نَسَايْرَ الفَرْحة ونِتْهَنَّى .. كفانا ظنون العمر الباقى قِصَيَّرْ مُمْكِنْ نَمْلاهُ فُنُون !!

	تامنة عجايب الدنيا صباحات الله بى خيرها وصباحك أحلى ما فى الكون يا الوهج البقيد صباحى فى أعماقى نار وشجون يا تامنة عجايب الدنيا يا اللا كان ولا حيكون !! يا الحُسْن البِغازِل روحُو يا مِحْور مدار الكون ترتاح روحى و أتنفس على هدب الطريف مفتون واشتاق للشقا واْتْشَهَّى وعداً قاطْعَا أحلى عيون ما همانا وانتى معانا والكائن مصيره يكون راجى هواكى واترجى و أساهر ليلى كله ظنون البِجِى من عيونك زين!!! سعادة دنيا ولا شجون !!! حتى إذا أذتنى رموشها رضيان بالأذى وممنون !! لا بطلاً بلاقى سهامها لا صابراً بلاها بكون !!! يا تامنة عجايب الدنيا يا اللا كان ولا حيكون