بعض من اقوال الهمباتة

ماكا القليل ضـرب القواسـي بحقـرك

فى الحر والدواس دايماً متلّب صقـرك

بلّاع الكبار فى عيونـو بايـن دقـرك

اوعاك من صديق أن خزّ أمكن اعقـرك

******

مايغرّك زمـن قبّـل عليـك واتبـارك

شين ان قلب باكـر بمـرق اسـرارك

العمل السمح سويهـو اكـرم جـارك

اديهو القرش صدقـة وبتبـرد نـارك

******

الدنيا يوم والتانـى تـب مـو هولـك

وان جار الزمن ساويهو قنّـب طولـك

الزول الغشيم عافيهـو بـى مبذولـك

واللايك الصبر فى الحارة بصبح زولـك

******

خربيش الزمن فـوق النواعـم ظاهـر

والفقر ان غرز شيطانو ماكـر وقاهـر

طرف السقيد الفـى خلاهـو مساهـر

الليلة البعينـك بيهـا بكـرة بجاهـر

******

الليلة الخلـوق المـال قطـع طاريهـا

فى الدنيا ام زوال الناس تلملـم فيهـا

الزول الشحيح لى نفسـو مـو مديهـا

غاراهو العبوس والآخرة ديك ناسيهـا

******

مافينا العـرور الفـى منامـو مجلّـخ

فى بيت العويل وسط البنـات متفلّـخ

فينا الجنـا اب نـاراً هواهـا يسلّـخ

قرّان الحجامـة الفـى رقابنـا مشلّـخ

******

يااللسـد الـرزم مابعجبـك الهبيـش

يا مضاير الصفوف تقلع مشيك بشّيش

ان دقّ النحاس جات القبايـل جيـش

بتجزّ الرقـاب قبّـال تجيـك معليـش

******

الكى النجيض فـوق الرقـاب بتخلفـو

والضيف اب حمل بتكرمو- زاملو تعلفو

ممحوق الرجال قولو البسيهو اخلفـو

بودة وسعـد بخـرب مسـورك اتلفـو

******

نحنا السوادنة وفى المكرمات بنصابـق

والقايلين طوال بلقونـا فوقـم طابـق

حرّم ناس همج مافى القدرنـا مطابـق

بنفّج ام لهيب فى الحارة لينا سوابـق

******

ماكلين القرض دابغنـا فـى فشفاشنـا

واب ريش ان نفش بندوسو بى درّاشنا

والمووز الفزع حرّم نمرقـو طراشنـا

لا بنحسب عليهو لا بنفرشلو فراشنـا