بصات الممتاز سوف تمر بالحصاحيصا مرور الكرام

ساكتب وفى قلبى حسرة كبيرة
ساكتب والالم يعتصرنى لمغادرة الممتاز لفريق النيل الحصاحيصا
غادر النيل قطار الممتاز وترك حسرة كبيره وسط المريدين
غادر الى الليق كما كرر هذا العباراة اناس احسبهم جهلاء يعيشون وسط مديتنا
غادر النيل قطار الممتاز لان اهل مدينتى يريدون ذلك وهللو لذالك امام الجميع
غادر النيل دورى الاضواء ليفرح من يفرح من اهلى مدينتى
لكن ماهى الاسباب الحقيقية لهبوط النيل ؟؟؟؟؟
سؤال يفرض نفسه
ادارة النيل ادارة ضعيفة هلكانه لا يمكن ان تقود فريق ناشئ ناهيك عن فريق يلعب فى دورى ممتاز
ادارة لا تعرف ابجديات كرة القدم فكان لابد ان يغادر النيل قطار الممتاز
لاعبىن من كل ربوع السودان يلعبون للنيل بينما ابناء مدينتى من لاعبين يتجولون بين الفاشر والخرطوم
ومدنى وعطبرة وكادقلى وكل هذه المناطق تلعب فرقها فى منظومة الممتاز وذالك بفضل ابناء مدينتى
اذا كيف يكون الولاء من هولاء اللاعبين الذين ياتون من كل ربوع السودان ولا يعرفون الحصاحيصا الا
لكرة القدم كيف يكون ولاهم ؟؟؟
اضف لذلك الدور الاعلامى كان ضعيف فى عكس سلبيات ادارى الفريق
لتاتى الطامة الكبرى من الجمهور الذى يلعب الدور الاكبر فى انتصار الفريق
اغلبية جمهور الحصاحيصا لا يعجبهم فريق النيل ولا يريدون بقاء الفريق بالممتاز لماذا
اللهم الا حسد
وجود النيل فى الممتاز اضاف للحصاحيصا رونق خاص واصبحت مدينتنا على كل لسان اذاعة وتلفزيون وصحف
واصبحت كل الفرق تانى الى هنا لتبارى مع النيل ودونكم فريقى القمة الهلال والمريخ
وابعد من ذالك الم يمثل النيل الحصاحيصا فى الخارج لاول مرة فى تاريخ المنطقة الم يكن ذالك انجاز للولاية والسودان ؟؟؟؟
الان غادر النيل قطار الممتاز ليعود الفريق للعب امام المشعل اربجى والنهضة العكورة والضقالة والفريجاب والاهلى والهلال والمريخ فى دورى اشبه بان نطلق عليه عبارة الليق التى اطلقها من قبل بعض الدخلاء على مدينتى
يعنى بالدارجى تانى لا هلال ولا مريخ ولااهلى شندى ولا كورة متلفزة ولا اخبار الحصاحيصا فى التلفزيون ولا الصحف الا حاجة عابرة
وسوف تمر بصات الممتاز عبر الحصاحيصا مرور الكرام والكل ينظر اليها بحسرة والم
ويا حليلك يا نيلك نيلك جرى قدامك ويا حليل عبارة الحصاحيصا كورة حديثة
وداعا النيل
وفى ذالك فليفرح الشامتون

مقال جميل اخى محمد جعفر
وكنا قد كتبنا وكتبنا ولكن لاحياة لمن تنادى
ذهب النيل نتيجة لإهمال ابناء المدينة له ونتيجة لصراعات بين عدة جهات منها الواضح والمستتر
هبط النيل ممثل المدينة الوحيد فى الممتاز وحامل لؤائها لعدة سنوات فى منافسات الدورى الممتاز
غادرت الحصاحيصا الممتاز وهى من مؤسسى هذا الدورى العريق
ولا اعتقد ان العودة سهلة مالم يتم تلافى السلبيات الاخيرة التى نتج عنها هبوط النيل
اتمنى قيام الحادبين على مصلحة الحصاحيصا بتبنى عمل مؤسس لدراسة اسباب هذا التدهور المريع فى مستوى فريق النيل
والعمل على دعم اندية الهلال والمريخ والاهلى وغيرها من اندية المدينة العريقة حتى تعود المدينة لتحتل مقعدها فى صدارة المدن رياضيا كسابق عهدها
وان نعود جميعا لنررد ذلك الهتاف المحبب (الحصاحيصا كورة حديثة).

سؤال جميل ..... ؟اخى محمد جعفر لو عاوز تعرف الاجابه اساءل مواطنى مدينه الحصاحيصا وعلى راسهم مواطنى كمبو المحالج او بالاصح شباب الكمبو والسبب الدفع الناس لعدم مازره فريق النيل هو التعامل المشين الزى بدر من اداره نادى النيل والزى يقولون ان النادى نادى الشوايقه ولا يوجد اى عضويات لباقى الناس ارجوا من ادراه نادى يقوموا بمبادره صلح لكل الناس عشان نرجع الممتاز من جديد .......... ؟

سلامات امين وتحليلك منطقى بس ما اظن تانى ترجع الحصاحيصا لدورى الاضواء
وانت اتمنيت من الحادبين على مصلحة الحصاحيصا للجلوس ومنافقشة الامر
طيب ما كنا قاعدين لينا سنين فى الممتاز وقت يغادر الفريق نقعد نفتش ليها
مشكلتنا يا امين نحن ما عندنا حادبين عندنا ناس بتدعى معرفة كرة القدم
عندنا فلسفة اكتر من اللازم
تانى بتفرج فى الممتاز ذى ناس ام روابه والدمازين ومليط والتكلة جبارة

عوافى محمد الطاهر
دا ما سبب بخلى ناس الكمبو يشجعو ضد النيل او بالاصح ضد الحصاحيصا
النيل حق مدينة بحالها وليس الشوايقة
انا من مواطنين الحصاحيصا وليس لى اى علاقة بادارة النيل ولا التفت لسفاسف الامور
لو تزكر الموسم الماضى النيل بقاء بالممتاز بامر جمهور الحصاحيصا الذى توحد لاول مرة
مع الفريق
فاين كان مجلس الشوايقة ؟؟؟؟
المشكلة اخى محمد اكبر من مسطبة شمالية او من مجلس شوايقة
الكورة دايرة قروش وناس النيل قالوا ما عندهم قروش والولاية ما بتدعمهم
تبقى المصيبة كبيرة ويصعب حلها
لنعود مرة اخرى للدورى المحلى حيث العك الكروى
يا حليل الحصاحيصا