وصل حد السيجارة نفس

وصل حد السيجارة نفس
و زاد هم الهموم و كبس
...
و شماعة الكلام ضاقت
و بشتنا الحروف بي الرص
وصل حد السيجارة نفس
و لسه الفينا حرَاقة
و لا وطنك صبح مرتاح و لا ريحة الفرح ضاقا
خلائق قاعدة تتكلم و حاجات قاعدة صفَاقة
بعد قلنا القيامة تقوم
قمر ليل السعادة غطس
وصل حد السيجارة نفس
و قلبي ال من وقع ما قام
و لسه الفيهو ما بتندس
أكان قعدت تقوم بالشوق
و كان وقفت تشوفا فرس
بنيَة عيونا بتنخِر
عشوقاً بالغرام سوَس
رموشا سهام
و شعرا فيهو نام الليل
ضفايراً قاعدة تتنفس
وصل حد السيجارة نفس
و ناس البيت ديون و فلس
متين بالدين يحلوا الدين
أهل بالطيبة مليانين
و زوق و شروق يجوك بي بسمة الدنيا
و هم من جوة مجروحين
و و ناســـــــــــــين
ونسة تورِق الخدرة
وشفَع لعبتم دس دس
وصل حد السيجارة نفس
و بتخيل بلد مبسوط و قاعد فوق
و لا مسروق ولا ملحوق
ولا بحِصل شروقو شروق
تنوم مرتاح تقوم مرتاح
و تمشي السوق
تجيب حاجات كتار بالحيل
قرش موفور يعدل الميل
و كلمة حق تشد الحيل
وطن بارز علي الأطلس
وصل حد السيجارة نفس
و بتخيل حبيب عمري الظلمني زمان
و لي نعمة قليبي رفس
يجيني وكلو يتحسس
و أقش دمعاتو بي قلبي
و يقول الكون خلاص عرَس
و أحلامي المعاو تصدق
و يروح رمد العيون بي المس
وصل حد السيجارة نفس

و بتخيل ضحك من جوه قلب البيت
و مافيش زول يقول ياريت
و أطفال الفريق تلبس
خلاص حد السيجارة كمل
مع الدخان رحل كل البنيتو عبس
ولا حلما بيتحقق
و لا هما بيتشقق
ده كان آخر السيجارة و بس
ده كان آخر سيجارة و بس

كلمات محمود الجيلي

الحرة : اســـراء

الالف العديل .. اساس الساس

والسين الجميل.. سلسبيل مياس

اقيف فى الراء ..

واعاين فى كتاباتك ..

حروفك جد دوى الرصاص ..

وهمزة وصلك المعجونة ..

بى تعب الخلوق اجناس ..


اسراء اساس ..

واسراء احداث

ومعراج وصفو كان حساس

ومعجزة الرسول فى الناس ..


يا مغمــوســـة بالاحساس ..

كمل نفس السجــارة خلاس..

ـــ

بعد نفس السجارة كمل ..

رجعنا نراجع الاحداث ..

لقينا وطنــا زى ما كان ...

جسد ممدود

وناقص راس ..

سجن ممتد ..

بى سجانو والحراس ..

بى بابو التلاته ضلف

وطبلة تكلبش الترباس

أخى الخمجان
سطورك الجمت لسانى
و اعجزت حرفى
و حيرت وصفى
اشكر

كلماتك الندية
و حروفك العذبة