يا يمة ولدك مات شهيد

الموت حق هي عبارة حقيقة ولكن يظل المها يعتصرنا كلما ذكرناها

ولكن ما اعظم الموت علي طريق الشهداء

رصاصة غادرة تستقر في قلب شاب كل اللي اتمناهو انو يكون حر

يعيش في وطن حر ويملك قرارو شاب ليس بالفقير ولا المحتاج ولكن كانت امانيهو

انو يعيش شعبو سعيد وينعم بلدو بالاستقرار والهدؤ

رصاصة غادرة في قلب الصغير اللسة يادوب عرف الكلام مرقوهو من المدرسة شان

يقول يعيش السودان حر مستقل وامي التعبانة من شيل الحطب بكرة ابقي ليها

دكتور او مهندس وتفرح بي واشيل يايمة من حملك شوية اصلو الشايله انتي كتير خلاص

رصاصة طايشة وماها طايشة تستقر في جسد عامل حزين كل همو انو اليوم يعدي والليل يجي

عشان كتفو الهزيل من شيل المونة والطوب يرتاح وكل الشايلو كيس لحمة وخضار وحق الركوب

تعبان نهارو كلو عشان يأمن للعيال لقمة طعام بس رصاصة الغدر قالت ليهو حتي الخضار حرمان علي كوم العيال

لما يايمة تقولي لولدك ما تمرق يا ولدي للمظاهرات قالو البنبان دا يا ولدي بعمي العيون وانت يا ولدي ما بتقدر تشوف تاني

ما تمشي اموت ليك ما تمشي المظاهرات

يا يمة انا بس بعاين من بعيد وفي ركن البيت يا يمة بقعد وما بمش لبعيد ويجوهو اولاد الفريق يازول ارح يازول نمش

الموت دا واحد نحنا تعبنا والليلة مرقنا وتاني الرجعة ما بندورا يمشي معاهم وفي نص الجوطة تجيو رصاصة

وامو هديك في الباب بتعاين وشايفة وليدا دمو الطاهر سايح ويسقي ارضنا الطاهرة الطيبة

يا يمة ولدك مات شهيد

حرقة حشا ونار بتوقد في القلب علي كل الشباب المات غدر


ربنا يتقبلهم جميعا ويرحمهم برحمته الواسعة ويصبر اهاليهم وكل والدة فقدت ابنها ربنا يصبرا يا الله ويعوض شبابهم الجنة

بعض منك لا يلقاك الا فى المداد
وهكذا النيران تطفى غبنها فى حضن ذاكرة الرماد
فاحفظ لنفسك ضؤها ان مسها شىء من التهميش
فى غبش الحياد...
هنويا سلامات
ما اصدق القضية حينما تلامس عمق الاحساس
وما اجمل الحرف عندما يحكى مأساة البسطاء
كم هو مؤلم فقد الاحباء وخاصة الأبناء
كل من رحلوا رحلوا فجأة ولم يمهلهم الموت بالقاء ولو نظرة
على من يحبون
نظرة ربما تكون هى عزاء لاب حنون او ام قاست وعانت من اجل تنشئة ابنها
ليكون كما تتمنى
الا ان ايدى الغدر والخيانة كانت اقرب
لتختطفه وتلقى به فى غياهب الموت
الى غير رجعه....
اسأل الله المغفرة والرحمة لشهداء الشباب
واساله ان يتقبلهم ويجعلهم فى مرتبة الشفعاء.
شكرا هنويا ولله درك

رصاصة طايشة وماها طايشة تستقر في جسد عامل حزين كل همو انو اليوم يعدي والليل يجي ....الجمتي لساني مشاهد مدمعة ...مكللة بالشهادة فوق تراب الوطن ...احسبهم قد فازو بها وتقبلهم الله بواسع رحمته ..

ربنا يتقبلهم قبولا حسنا ويكتبهم مع الصديقين والشهداء
ويلهم آلهم الصبر والسلوان

هنويه حمدلله علي السلامة

بركه الشفناك طيبه اختي الكريمة

نسأل الله ان يلطف بالسودان واهله