القوار وما ادراك ما القوار ؟

القوار وما ادراك ما القوار
استوقفني تصريح للقائم بالاعمال الامريكي لصحيفة اليوم التالي قال فيه سننظر في استثناء السمسم والقوار من العقوبات .
هنا انتهى تصريح الامريكي .
سمسم القضارف والزول صغير ما عارف دي فهمناها وما دايرة درس عصر .
القوار ده كمان منو عشان يرفعوا عنه العقوبات ؟؟؟
وحالتي عامل فيها ود مزارع عارف كل الحكاية من التقند لي ابو عشرين ومنقطة سرابة سرابة .
قلت اسال العم قوقل يوريني سر العلاقة بين القوار وامريكا .
قوقل ربنا يديه العافية ما بقول امش وتعال ، وجيب دمغة واورنيك 15 الالكتروني لسه ما تفعل ولا شي ، ما بتجاهلك الا تتثاقل عليك سوداني وزين وبقية الشبكات وتعمل رايحة .
قوقل قال لي القوار هو نبات شبيه بالفاصوليا وهو من ذات الفلقتين ويحمل ثماره في قرون .
قلت هل القرون كافية لرفع العقوبات عنه ؟
كان كده يارئيس اعمل ليك قرون او كن (قرن) ان شاء الله قرن شطة بس المريخاب ما يزعلوا .
وطبعا قوقل ثرثار زي النسوان عندنا تسالها عن فلان ده مر بالشارع تحكي ليك قصة حياته
قوقل قال لي انه منطقة البحر الاحمر هي الموطن الاصلي لنبات القوار ومنطقة جبل العرشكول في ولاية النيل الابيض في السودان،و عرف ايضا في منطقة جيزان في المملكة العربية السعودية كغذاء يستخدم في تحضير بعض الاطباق الشعبية.
قلت لقوقل هذا ليس كافي لرفع العقوبات عنه .
اديني من الاخر يا قوقل .
فقال لي اهم منتجات القوار:
تستخرج المادة الصمغية من طبقة الاندوسبيرم (Endosperm) وتشكل المادة الصمغية نسبة 20-30% من بذور القوار.
وتنقسم منتجات القوار الى نوعين :
صمغ القوارصمغ القوار:
وهو عبارة عن صمغ يحتوية الاندوسبيرم في بذرة في سلسلة نثريات متعددة من الجالاكتوز والمانوز بما يسمى glactomannan وله خصائص صناعية وغذائية تجعله من المركبات الانسب في العديد من الصناعات . ومن خصائصة انة لايتأثر بالحموضة والقلوية ويذوب بسهولة في الماء البارد والحار وله لزوجة عالية تعادل أضعاف لزوجة الصمغ العربى، ويستخدم ايضا كمكثف للسوائل .
شترة
هل يعمل القوار على رفع العقوبات عن السودان ؟
هل يكون القوار محصول بديل للقطن ؟
شترة
لسان حال الرئيس يقول
يا ليتني كنت قوارا

المشاركة الأصلية كتبت بواسطة لؤي الصادق

هل يعمل القوار على رفع العقوبات عن السودان ؟
هل يكون القوار محصول بديل للقطن ؟
شترة
لسان حال الرئيس يقول
يا ليتني كنت قوارا

لؤى سلامات
ربما ينجح القوار فى مافشل عنه كسير التلج
واللهث وراء السعودية ومصر وحلفاء الأمريكان
وتقديم صكوك الولاء والطاعة
وسبحان الله يضع سره فى اضعف خلقة