يـبـــــاس

كان صوتي بحّاهـو العـذاب
أو هـدّ حيلـو إنطـارشـي
ياعامري في الزمن الخـراب
مسكونة بـي تعـب المشـي
مشورتَ فيك نزف الجـراح
قيلـت بـك ساعـة العشـي
وقُت لِك صباحك بعض ليـل
ينعل قفاهـو الشيـن وشـي
قُت لك جفا الأطفـال شليـل
والهم طمح فوق كـل شـي
قُتّي لـي داخـلاك بالهديـل
خايفـك معـاي تنطرطشـي
وأنـا دارة للحـزن الطويـل
بالآهـة تسـكـر تنتـشـي
أنا دنيا كلها زيـف وخـوف
إنسانـي يسـرق يرتـشـي
وأنا دوحة هاجراها الطيـور
ليه فوقي دايـري تعشعشـي
وأنـا لانـي ليليـة حنـيـن
لاحضـرة شـان تندروشـي
يبّسـت شـتـل الأغنـيـات
ماب يحيا حـد ماترشرشـي
وقبلـك دهتنـي الأمنـيـات
بي طفلـة نايـري منعوشـي
رحلت ولا اعتـذر الزمـان
لا انضاري مكسوف مختشي
قبلـك رميـت الريـد وراي
ودفنتـو ليـه دار تنبشـي ؟
مشّطت بدري سبيـب أسـاي
لمّيتـو أوعــك تنكـشـي
طعّمـت بالأحـزان غـنـاي
هبّرتـو لاتـجـي تنهـشـي
لوّنت بـي أسفـي الـدروب
إن تمشـي فيهـا تطشّشـي
شن جابرك إنت علي الركوب
فوق خيل ضلامـي تدقّشـي
إن تنجي من وحـل الذنـوب
حجـر المواجـع تدقـشـي
يانادهي حسّك كـان قريـب
لكـن فـي دنيـا مطنِّـشـي
وهجك شلع ضـوّا الدريـب
صادف بصيرتـي مدعمشـي
خلينـي بيـن أمـواج بكـاي
إحساسـي وان ماتعـرشـي
من حزني أترسي قيف هواك
بستـان عواطفـك حوّشـي
وإن جاك هواي من أي بـاب
فوق ضلّّو صبـرك حرّشـي
أنا قلبـي مصلايـة عـذاب
فوقـا الزمـن بيّـن وشـي
قبلـك وعـدت بكـل شـي
لكنـي مـا أوفيـت بـشــــــي

شعر / طيبان