للجكسي فقط

للجكسي فقط
وانا برلوم في الجامعة تعرفت على طالب من الولاية الشرقية حينها كان يطلق عليها .
(ادروب) هذا تم قبوله بكلية اللغة العربية عن طريق الخطا بعد ان اخطا في كتابة رمز الكلية .
صديقي هذا ويدعى (عربي ) يجيد لغة الهدندوة والبني عامر والانجليزية ويدرس لغة عربية ومشلخ سلم كمان .
يدعي المعرفة في كل شي ، يبيع في كل شي من السبحة والمناديل للاراضي والعربية للبرادو .
استمتع دوما بسخريته ،في احد المرات قلت تعرف يا (عربي ) الليلة عرفت ليك من اين جاءت كلمة (جكسي ) وكلمة (جكسي) ايامها طالعة جديدة لنج ، بلهفة واستهتاره المعهود عليه ، قال لي اها معناها شنو ؟
فقلت له بثقة وبديت احكي ليه انه في ولد وبت بدرسوا كيمياء وبحبو بعض وما بتلاقو الا في المعمل ، الولد حنكو ما سنين ما بقدر يتكلم كلو كلو المهم شابكها ليك جيبي الجك هاك الجك خُتى الجك يوم قرفت منه شديد وحبت تتغاتت عليه اها الجك ولا داك ، صاحبنا قرب منها وداير يقول ليها الجل المقسم (سي سي ) ارتبك وقال ليها الجكسي وهنا اعترف بحبه لها ومن هنا جاء هذا الاسم .
عربي لم يبدي اي اندهاش لحديثي وبحبه للغلاط قال لي الرواية ضعيفة .
فقلت له خلاص وريني الرواية الصحيحة يا بخاري زمانك .
استعدل في جلسته وقال لي الكلمة هي جيكسي وتنقسم الى عدة مقاطع فكلمة (cheek) وهي كلمة انجليزية تعني (خد) والاس (س) للجمع لتصبح (cheeks)جيكس ، اي (خدود) وهنا اطلق الجزء (خدود) وارادوا الكل (المراة )، فقلت مقاطعا له وطيب الياء(ي) في جكسي دي لزومها شنو .
فضحك وقال اصبر لي لكن
الياء (ي) هي للنسب كما تقول صديقتي ، حبيبتي ، ثم اردف قائلا اها كده وقع ليك يا فردة .
فقلت له تعرف يا (عربي) انت زول (خنفشاري )