(اثنين ونص) تعال وبص

(اثنين ونص ) تعال وبص
جلست انا وصاحبي من باب الوطنية الى قناة نيوز العربية لاستمع الى سيادة الرئيس عمر البشير لعلي اسمع جديدا ومفيدا ، فتصريح المسؤولين عندنا للقنوات الفضائية العالمية او قل غير المحلية يختلف تماماً عن التصريح لمؤسسة اعلامية محلية ، فخطابات الوثبة المحلية ما عُدتُ افهمها .
اقتربت من جهاز التلفزيون كثيراً وكأني اتابع مباراة بين برشلونة والريال ، ونظرات المدام تلاحقني كأنها تقول لي ، ده عمر البشير الجديد فيه شنو ؟، ففهمت انها تقول لي ما تعاين (للمُزة ) التي تجري معه الحوار .
وصاحبي صامت يترقب تصريحات الرئيس ، وفجأة تقول مذيعة اخرى انه تم الانتقال الى كاليفورنيا ، حزنت للرئيس واعتبرت ذلك اهانة لي كسوداني ، وقلت في نفسي لو كان الحوار مع رئيس اخر هل كان سيتم قطع بث اللقاء ؟
بل ان المذيعة اكتفت بالتنويه ولم تعتذر ، ما علينا هم حرين في قناتهم .
ولكني من باب اللياقة وعشان خاطر الرئيس قررت احضر الاعادة ، ففي الاعادة افادة .
وفجأة يقول الرئيس فيما يقول ان دخل الفرد السوداني الشهري (2500) دولار شهرياً ، وبدون شعور مني صرت اصفق واقول (اثنين ونص تعال وبص ) وانا ساعتها استحضر عادل امام وسعيد صالح في فيلم (سلام يا صحابي ) واردفتها بتصفيق و(اثنين وبس ).
التفت الى صاحبي وقلت له انت الرئيس قال (بطانية ولا بطارية ) ، أي جنية ام دولار .
ومن هنا بدأ الجدال بيني وبين صاحبي حول دخل الفرد بالسودان .
فقال لي معرفاً انت افهم اول شيء انه ارتفاع (متوسط دخل الفرد ) في حد ذاته لا يعني باي حال من الاحوال رفاهية الافراد في الدولة ، فهو يتم حسابه بتقسيم اجمالي الدخل على مجموع عدد السكان في الدولة (مواطنين واجانب ) ويسمى الناتج (متوسط دخل الفرد).
ضحكت وقلت له يعني نحن بعد الانفصال 33 مليون زائد 4 مليون من الاحباش زائد 3 مليون جنوبي زائد 2 مليون جنسيات متعددة نجمعها ، 42 مليون فرد في 2500 دولار في 12 شهر بيساوي اجمالي دخل البلد ، ما شائف المبلغ كثير علينا ونحن لا بترول ولا زراعة ولا صناعة .
يا صاحبي انا بصراحة غلبني احسبها ، والحسبة ما عاوزه تلفق معاي .
ضربتها بالجنية القديم ، بالدينار ، بالجنية الجديد ، ابت تلفق .
معليش يا صاحبي ممكن تسال الرئيس تقول ليه (2500) دولارفي الشهر ام في السنة ام في الستة وعشرين سنة التي حكمت فيها ؟
لأنه صدعت من الحساب وما لفقت ، اول مرة احس اني ضعيف في الرياضيات .
كنت كل اصرار اعرف الرئيس ده حسبها كيف ، لأنه ما ممكن يكون نقرها نقر ، اكيد قاصدها ، في زول بعرف اكثر من الحكومة ؟
فالأستاذ ربيع عبد العاطي في يوليو 2012 قال ان دخل الفرد 1800 دولار ، يعني الكلام هذا ليس من فراغ ، وكلام الرئيس تأكيدا لكلام سابق ، عشان ما تقيفوا للرئيس في حلقه ساكت.
يا حكومة نحن مقتنعين بكلامكم لكن دايرين نفهم بس .
حسبتوها كيف ؟
وجدتها ....
وجدتها وجدتها جيبوا ورقة وقلم واحسبوا معاي ، جوال البصل ،رطل الزيت وانبوبة الغاز ،ورسوم التعليم والعلاج والمواصلات والسكر التلفون الانترنت ،وحاجات وحاجات ورغيف وحاجات وحاجات ورغيف . تعرفوا لي للغلاط بس.
فاذا حسبت كل هذه الاشياء سوف تجد انك بتصرف اكثر 2500 دولار شهرياً ، ومادام بتصرف اكثر 2500 دولار شهرياً اذاً دخلك اكثر 2500 دولار شهرياً ، وهو المطلوب اثباته .
حسبه بسيطة و ما دايره ليها درس عصر .
شترة
عذرا سيدي الرئيس ظلمتك ، كنت فاكرك لمن قلت 2500 دولار انك زودتها واديتها (كوز)

هههههه والله يالؤى انا زاتى غلبنى استوعب القصة دى صراحة.اغلب السودانيين اما موظفين او شغالين مهن هامشية او عمال وقلة مزارعينوالاغلبية الساحقة عطالة وخريجين باحثين عن العمل وطلاب وربات بيوت واطفال وعجزة *يحسب متوسط دخل الفرد. باختصار بحاصل قسمة الناتج المحلي أو القومي الإجمالي على عدد السكان.*
يعنى متوسط دخل الفرد هو اجمالى انتاج السودانيين داخل السودان على عدد السكان!!!يعنى المغتربين مامعانا.
علما بانو اغلب السودانيين خارج القطاعات الانتاجية ومعلوم انو اغلب البيوت السودانية شايلنها المغتربين والبقية الباقية حواه واجمالى استهلاكهم اكبر من دخلهم والله كريم.
واكتر من كده انا مابفسر ويالؤى القصة دى ادركت كنهها طيور الروابى قبل عشرين سنة...غايتو خلينا نشتغل بالمقولة:كان قالوا ليك سمين قول ااامين.