تنوير من ارتبك في من هو علي كبك !

حتى الساعات الأولى من صباح اليوم لم أكن معنياً بمعرفة من هو الفنان علي كبك
الموضوع عندي لا يحتاج إلى أكثر من نظرة واحدة لإدراك أن الأمر مجرد مزحة واتسابية ليس إلا
لكن انهمرت على هاتفي آخر الليل مجموعة من الرسائل والصور والقصائد لاحظت فيها شئ مريب! وهو أن أسلوب الشعر متغير ، والملصقات التي بدأت احترافية أصبحت عمل هواة !
وحينها عرفت أن هنالك أكثر من علي كبك
فضربت أكباد الفايرفوكس قاصداً شيخي العارف بالناس قوقل قدس الله سره الذي لا يُرد عنده صاحب حاجة ، وعند القوقل الخبر اليقين
وسأحكي لكم فتوى شيخي في قضية الساحة الواتسابية الفنان المبدع علي كبك

مبتكر شخصية علي كبك هو المخرج والمصور التلفزيوني محمد عبد الله محمد
وهذه بياناته التعريفية كما يكتبها على بروفايله https://www.facebook.com/mohammed.abdallah.7587 بالفيسبوك



ومن خلال هذه البطاقة يتضح لنا أن هذا الفنان رجل ذو لطافة ودم خفيف وما جادي كلو كلو
لكنه بالتأكيد فنان جداً في مجاله وقد قام بإخراج العديد من الفيديوكليبات لفنانين شباب أبرزهم منال بدر الدين وطلال الطاهر (الساته) وتجد أعماله على قناته في يوتيوب https://www.youtube.com/channel/UCJ_...18C6oschn9cdDQ

أما مصمم الملصقات الفنية فهو الفنان علي ميديا https://www.facebook.com/media.des

والمتشعلق على حائط الفنان محمد عبد الله بنواحي الفيسبوك يدرك أنه شخصية هزلية من الدرجة الأولى. لديه مجموعة جميلة من الأصدقاء جمعهم حب الضحك والمزاح فهو يبتدر منشوراته بعبارات ساخرة مثل (الناس في وادي .. وأنا في الشنقيطي) أو ( الناس اتغيرت والزمن اتغير .. حقو نلحق الزمن ونجلي الناس البتتغير دي) أو (هو السودان إيه غير مصورين .. وشوية ناس عاديين) أو (الأسود يليق بك .. لكن البطاطس لأ) أو (التفسير الوحيد لزحمة يوم الأحد إنه هناك كائنات فضائية تعيش معنا بتطلع يوم الأحد والخميس عشان تعمل زحمة وبس) أو عبارته التي قالها ليلة عيد الحب (ناس الإعدام بكرة ح يفكوهم والشارع كلو أحمر في أحمر .. بالجد أثبتوا إنه الحب إعدام) أو (الخرطوم بلد المليون ست شاي)
كما أن لديه صفحة على فيسبوك https://www.facebook.com/mohdlens.SD لعكس فنونه في التصوير الفوتوغرافي

الفنان محمد عبد الله كان يكتب أشعاراً ساخرة على طريقة أبيض اللون من حين لآخر وفي أحد المرات ابتكر لها مقدمة تقول بأنها من إلبوم فكيني منك للفنان الصاعد علي كبك. ويبدو أن صديقه الحميم علي ميديا التقط زمام المبادرة ليقوم بعمل أول ملصق للفنان علي كبك واختار له صورة المواطن الزيمبابوي وليم الذي يعمل بمهنة العتالة والذي حاز على جائزة أقبح رجل في زيمبابوي
وكانت النتيجة أن ذلك الملصق انتشر كما النار في الهشيم داخل بلاد الواتساب مما جعل الثنائي يبدأ في إطلاق القصائد الهزلية واحدة تلو الأخرى لتجد حظاً عظيماً من الانتشار والإعجاب والتبادل والمشاركات الاجتماعية.
وفي زمن قياسي امتلأ الفيسبوك بعشرات الصفحات التي تحمل اسم الصفحة الرسمية للفنان علي كبك مما حدا بالفنان أو من يمثله لعمل صفحة https://www.facebook.com/kabakOfficial والتي حازت على 6500 إعجاب خلال يومين فقط!

كانت المشكلة أن انتشار علي كبك أغرى الكثير من أصحاب الميول الأبيض لونية باستغلال اسمه لنشر إبداعهم حتى اختلط الحابل بالنابل ولم يعد معروفاً أي القصائد مؤلفها محمد عبد الله وأيها تبع راكبي موجه علي كبك
خاصة وأن الفنان محمد عبد الله لم ينكر علاقته باختلاق شخصية علي كبك كما لم يصرح بذلك أيضاً ويكتفي بالرد الضاحك على كل سائل بردود من شاكلة (إنتو ليه بتعادوا النجاح) أو ردود علي ميديا مثل (لازم نقيف مع الفنانين الجدد).

الآن نستعرض بعض الصور التي انتشرت في الواتساب مع بعض المقاطع التي نعتقد بنسبتها للفنان محمد عبد الله مع ترك المجال لكم لاختيار ما تشاءون من مقاطع ملأت جوالاتكم من روائع تلك الشخصية الوهمية التي أحبها الناس وعرضها داخل البوست

الحاجة يا اصلية
ما تعملي التقلية
و الجبنة بالضهرية
وشاي المغربية
وقطيعة الخالات
و الجبنة و الصرفات
و الحاجة الوداعية
تتزكري الفضية
اللونها باللبنية
ومعاها ناموسية
بتدخل الباعوضة
يلا يا اصلية عارفك سودانية بطلي اوهام
وكل سنه وانتي طيبة


==========================


في امبدة ما بلقاك
انا كل يوم في هلاك
من بحري للاملاك
لو قلت لي انساك
واتفشى في ذكراك
و اتونس مع الافلاك
او حتى يوم اطراك
في امبدة ما بلقاك
ولا حتى في الاشلاك
او مرة في رؤياك
حسيت بي شكل ملاك
قوم اطرد الاحلام
و اشرب عصير سيريلاك
ما اصلك هلاك في هلاك
ياخ قلت لي بلقاك
هههههه اديك كده
يلا اعملوا مطرة



===================




كلمات اغنية اقعد معاي لحظات
اقعد معاي لحظات يا شتت بالباصات
طلعت روحي معاك يا وهمي يا بركات
******. *********
انا يومي افتش فيك في الغُرز وفي الجمبات
اليومي ديك في مايو والقبلو في شمبات
***** *******
ياخ بطل الوهمات والجكس و الغنجات
حركات هناي و هناي والزنقة في امبدات
*****. ******
دي زاتها ما حكايات
ياخ من الاخر كده عايز تقعد اقعد ما عايز اتخارج ياخ دا شنو الزول البليل دا


======================


مرثية الديناصور
ديناصورات حلتنا بنات علوية السُمان
سعاد و خجيجة وهديل و ايمان
@@@@@@@@@@
كلللللللللللهن بحبو الشايقي سيد الدكان
انتي يا سعاد امشي لي عثمان
وانتي يا خجيجة كفتي ايمان
@@@@@@@@@@@
آآآآه من الزمن بعد المغرب و الشاي مع الاخوان علوية ست شاي نادت علي ايمان
وقفت رقشة و ركبو بي استعجال
هديل و ايمان وعلوية بت عثمان
بس الركشة ما استحملت الاوزان الخيالية دي و انبرشت بيهم
حاليا الركشة ملصقة في شارع الاربعين




======================






كلمات اغنية ريدك طلع ماسورة من البوم فكيني منك للفنان الصاعد علي كبك
ريدك طلع ماسورة
ياخ لي سنين راجيك
في حتة مهجورة
""""""
خليك معاي واضحة
وبطلي لعب كورة
راسك زي الجربوكس
رجلك بلف نافورة
""""""""""
تذكري الايام والفته و الصورة
واحساسك العوالاق بي مسكة الشورة

اهو ربنا ابتلاك بي نعمة البورة

مصعب سلامات
غايتو الله يخليك لينا ياحبيب لانو الزول ده فجأة طلع فى الكفر ومافى اى معلومات عنو
وانا شخصيا اهتميت بالموضوع شديد وشيرته صور واغانى ليو واصحابى بقو يشركونى فى المنشورات المتعلقة بيو
وقدر ماكسته فى قوقل ما لقيت ليو درب
احييك والله واحىى زمبابوى والرصاصات النحاسية زاتو

هههههههههههههه غيرنا طريقة البحث يامصعب

مرثية الديناصور
ديناصورات حلتنا بنات علوية السُمان
سعاد و خجيجة وهديل و ايمان
@@@@@@@@@@
كلللللللللللهن بحبو الشايقي سيد الدكان
انتي يا سعاد امشي لي عثمان
وانتي يا خجيجة كفتي ايمان
@@@@@@@@@@@
آآآآه من الزمن بعد المغرب و الشاي مع الاخوان علوية ست شاي نادت علي ايمان
وقفت رقشة و ركبو بي استعجال
هديل و ايمان وعلوية بت عثمان
بس الركشة ما استحملت الاوزان الخيالية دي و انبرشت بيهم
حاليا الركشة ملصقة في شارع الاربعين



d:::)d:::)d:::)d:::)d:::)d:::)d:::)
والله لكن متعتنا عديل
ده لاكلام

السلام عليكم استاذ مصعب
الفنان ده انا قريت عنو كتير
وحتى جريدة الدار عامله معاو لقاء قبل كم يوم
ولما قريت الموضوع ده راجعته فى قوقل ولقيت الزول الزمبابوى ده
موش ممكن يكون تشابه ويخلق من الشبه اربعين

ده اللقاء

[/URL]

شكراً ود الحصاحيصا على رفد البوست وسأعود مساء لمزيد من تجميع أعمال معشوق الشباب علي كبك

يوليسا
لا يوجد لقاء في جريدة الدار
صورة اللقاء فوتشوب

زولنا طلع من فصيلة ابيض اللون
و دى سلامه كبيرة
لانه اذا كان نهج جديد للفن
فالامور كان حتكون باااااااايظه



شكراً للباحث مصعب
شكراً للتنوير و معالجة الارتبك بشأن الشيخ كبك

لازالت الدنيا بخير 00
طالما اخونا القامة { كبك } هو الذي سيشرط هدومو !!!!!!
المشكلة تطلع { بـــاتــــا } تانية وتصر على ان تشرط هدوما
وهدوم الحبيب
وهدوم راجل المرا
وهدوم الجمهور !!!!!
وبالتالي يبقى السودان كله من غير هدوم

واذكر حينما زار عبد الناصر مع المشير نميري بعض القبائل
والتي كانت من غير هدوم نهائيا
سال عبد الناصر المشير 00 لماذا هؤلاء عراة ؟؟
فرد عليه النميري 00 هذا هو زيهم القومي ؟؟؟؟؟؟

واذا كان كبك الذي طلع { ريده ماااااااسورة }
فهناك مواسير كثر دخلاء على قبيلة الفن والغناء الأصيل
عوضية عضلات
وحليمة باقات
ومحاسن فرار
وفاطنة سااااااطور
ولا ننسى اخينا المعجب جدا بالفنان حيدر بورتسودان
وهو من نواحي القضارف
فاطلق على نفسه اسما فنيا رائعا { حيدر بورتسودان القضارف }
تمنيت ان يخرج احدهم من { أم ضريوة } ويكون معجباً باخونا القضارف
ليطلق على نفسه { حيدر بورتسودان القضارف أم ضريوة وبالعكس } !!!!

هجمة مرتدة
والله على الرغم مما نعانيه من رهق الحياة وغموض المستقبل
الا ان مثل هؤلاء يمنحونك الابتسامة
وترمي ولو لبرهة باقراص الاسبرين التي تساعد على سيولة الدم
لأن الضحك يحرك العضلات
وبالتالي ينساب دمك بكل سلاسة داخل الشرايين والأوردة

وهجمة اخرى
تحسرت كثيرا حينما كنت بالمرحلة الابتدائية
حينما اصررت على والدي بأن يشتري لي { كبك }
وثلاثة ايام وانا احرد { الأكل } واحرش في الوالدة
حتى خضع الوالد أخيرا واتى لي به وكان رائعا جداً
ولبسته في نفس اليوم
ولكن للأسف { ما صبت } ولا نقطة مطرة واحدة !!!!!

يا النبي نوح !
82 نفر بشاهدوا في الموضوع هسع

أتاري كبك دة ما هين

والله يا أخوي الهادي محمد عبد الله حبيبنا أبيض اللون ذاتو ما هين
ياخي دة فتح آفاق في عالم الشعر ما وصلها زول غيره
أما عن النهج الجديد للفن أخير لينا أبيض اللون وأشباهو من جنس فن المغارز المنتشر دة


عارف يا أبو حراز
مرات كدة الأمواد (جمع موود) ما بتسمح بي سماع الحزن القديم ومريم الأخرى
أها جماعتك ناس عوضية خور ونجاة غرزة وغيرهم استغلوا حوجة الناس لي حاجة خفيفة ودخلوا لينا فنون غريبة كدة .. فجأة كدة الرجال بقوا يغنوا غناء الحريم .. والله صحي

النوع دة من الفن موجود من زمان
بتذكر كان عندنا شريط بتاع قعدة لي زيدان ابراهيم الله يرحمه بغني فيه أغاني من نوع يا حاجة ما تقولي كاروشة
فاااا شنو .. اللي موده ما بسمح ليه بي سماع وردي يجي لي حبيبنا كبك دة .. أقلاهو غناهو غناء رجال .. عليك الله موش احسن من حمادة بت وكبشور وشنو كدة ما عارف

ومن هنا برسل تحية خاصة لي مبتكر شخصية علي كبك لأنه فرق علي الناس وصنع ليهم برنامج جميل خلال الأيام الفاتت وياريت تتواصل القصائد الخفيفة دي

الذين يشاهدون محتوى الموضوع الآن : 89

خلاص وقت بقى عددكم زائد كدة النديكم جديد علي كبك

ياخ زول ما بحس
بشعر بالدس
و مباري الجكس
ما عارف انو الريده فرص
و الحب في البص
احسن من انك تركب بص الوالي في مقعد نص

المشاركة الأصلية كتبت بواسطة مصعب

الذين يشاهدون محتوى الموضوع الآن : 89

خلاص وقت بقى عددكم زائد كدة النديكم جديد علي كبك

ياخ زول ما بحس
بشعر بالدس
و مباري الجكس
ما عارف انو الريده فرص
و الحب في البص
احسن من انك تركب بص الوالي في مقعد نص

ياخى والله يامصعب متعتنا
جيب من جوه
تقول لى انتخابات وشجرة
اضرب الهم بالفرح

نص منى للاستاذ كبك

جيتك بمعط فى الشعر
و ابصق على الزمن الغدر
راجيك و صابر منتظر
شريتنى لى عز الضهر
لا اعتذرتى ولا هببتى لى
بس شيلى الصبر
بتسده
اى والله جد
ما انت عارفه دقالتى كيف
بركبك ماسوره زى احرف حريف
واكان بكيتى
واكان جعرتى زى بص الجريف
واكان جبتى كل الدنيا تتوسط تقيف
نوهائى ما بسامحك ولا بتراجع
وده الشغل النضيف
راحت عليك يا عويره
و شوفى الرصه كيف

السوداني


الخرطوم: محاسن أحمد عبدالله
(حجتي الأصيلة..زولة مية مية..من ما كت صغير..في جوايا حية..يا حاجة يا أصيلة ..يا حجة يا أصيلة)..هذا مقطع لأغنية تغني بها الفنان الوهمي المثير للجدل (علي كبك) الذي أطل على قروبات الواتساب فجأة، فلفت الأنظار إليه عبر الألبوم الذي زج به البعض عبر القروبات والذي أعلن من خلاله إحياءه عدداً من الحفلات الجماهيرية إلى جانب حفل خاص بمناسبة عيد الأم.!
أسئلة عديدة:
قضية (علي كبك) الفنان (المختلق من العدم) خلفت العديد من الأسئلة وفي مقدمتها سبب اهتمام المجتمع السوداني مؤخراً بمثل تلك الأنماط الفنية الغرائبية التى تظهر، ففي وقت سابق تفاعل الناس وبدرجة كبيرة للغاية-ومازالوا- مع أحد الشعراء الذين أطلوا عبر الانترنت ليقدم بعض القصائد المرتجلة، ووصل الأمر إلى أبعد من ذلك عندما تم تصميم صفحات خاصة لذلك الشاعر (الفكاهي) بلغ عدد زوارها أكثر من (10) آلاف متابع.!
الصورة هي السبب:
عدد كبير من المواطنين الذين استطلعتهم (فلاشات) أكدوا أن سبب تركيزهم الشديد مع (كبك) هو صورته الغريبة والتي جعلت بعضهم يبحث عن تأكيد لصحتها بدواعي أن الفنان لابد أن يحمل قدراً من الوسامة، الأمر الذي تعارض وبشدة مع صورة (كبك) والتي كانت مزيفة هي أيضاً، فهي صورة لمواطن من دولة زمبابوي يدعي (وليم ماس فينو) ترشح لجائزة نظمها أحد الاندية الرياضية لأقبح شخصية في دولته، وبالفعل فاز بالجائزة مع آخرين.!
أغنيات بسيطة:
مجموعة أخرى أكدت لـ(فلاشات) أن اهتمامها الكبير بـ(كبك) كان من دواعي كلمات الأغنيات التي تناولها فهي لا تخلو من البساطة والواقعية والمباشرة، الأمر الذي جذب الناس إليها، فيما يرى آخرون أن صوت ذلك الفنان (الوهمي) كان أيضاً مستفزاً للتركيز معه والسعي خلف التأكيد بحقية كونه فناناً أم لا.!
دايرين تذاكر:
جماهيرية (علي كبك) المباغتة لم تتوقف عند الإسفير وحسب، بل تعدته إلى الواقع، حيث شهدت محلات عوضية للأسماك خلال اليومين الماضيين تدافعاً غير مسبوق من مواطنين يسألون عن تذاكر حفل علي كبك بمناسبة عيد الأم، ذلك السؤال الذى حير عوضية صاحبة محلات السمك نفسها وجعلها تنفي وجود أي تذاكر لعدد من الصحف، بينما قالت إحدى العاملات بمحلاتها لـ(فلاشات): (والله الإعلان اللقيناهو بي سبب الكبك دا في حياتنا مالقيناهو).!
تأثير كبير:
تأثير شخصية (علي كبك) الوهمية انتقل بسرعة كبيرة من الكبار ليصل إلى الأطفال، وهذا ما أكدته ربة المنزل أشواق أحمد والتي قالت لـ(فلاشات) بقلق: (طفلي الصغير جاء إلى المنزل وهو يردد عبارة بشرط ليك هدومي...وعندما سألته عن ما يقول، أخبرني بأنها أغنية (ضاربة في السوق) لفنان اسمه (علي كبك)، وتواصل أشواق: (أخبرت والده بالأمر، لأنني وبصراحة خفت جداً من اسم ذلك الفنان قبل كل شيء).!
ضجة عادية:
الباحث الاجتماعي محمد الخليل قال لـ(فلاشات) إن الضجة الكبيرة التي لازمت ظهور الفنان (المصنوع) علي كبك، هي ضجة طبيعية للغاية في ظل تردي الأوضاع الثقافية في البلاد بشكل عام، وهيمنة الانترنت على كل نوافذ الاطلاع والمتابعة، واصفاً الأمر بـ(الخطير جداً) ومضيفاً: (كثيرون يلجأون لإطلاق الشائعات عبر الانترنت لعلمهم المسبق بسرعة انتشارها وسط الناس) فيما يؤكد أنه من الضروري أن ينتبه الجميع إلى تلك الحالة من (الاختراق) التي تحدث لمجتمعنا السوداني عبر استغلال غير أمثل للإسفير، مختتماً: (علينا أن نتعامل مع ماحدث كعثرة نصلح من خلالها مشي مجتمعنا، وألا نكتفي بالضحك فقط للأمر، لأن القادم ربما يكون أسوأ بكثير من فنان وهمي يغني أغنيات ركيكة ليس إلا).!
تخوف كبير:
على سياق متصل، أبدى عدد من الفنانين الشباب توجسهم وتخوفهم الشديد إبان ظهور بوسترات الفنان (المصنوع) علي كبك وتوجس بعضهم من أن يسحب البساط من تحت أقدامهم إن كان بالفعل شخصية حقيقية، في الوقت الذى تنفس فيه بعضهم الصعداء إثر اكتشاف شخصية كبك المزيفة ومن بينهم فنان شاب رفض ذكر اسمه قال لـ(فلاشات): (لقد اندهشنا في البدء عند سماعنا بظهور فنان يدعى علي كبك ولكن تحولت الدهشة إلى حالة من القلق والتوتر بعد النجاح والإعجاب الكبير الذي حققه الفنان (علي كبك) واهتمام الآخرين به ما جعلنا نتحسس أماكننا خوفاً من سحب البساط من تحت أرجلنا، و لكن حمدنا الله بعد أن أصبح (كبك) شخصية وهمية ولا يوجد فنان اسمه (علي كبك) نهائياً).!
ضرورة ضبط:
في ذات التوقيت قلل عدد من الفنانين من أهمية الموضوع، ومن بينهم الفنان عبدالقادر سالم والفنان عصام محمد نور وأكدا بأن الأمر حدث فيه تهويل وتضخيم لم يستفاد منه بشيء سوى المزاح والضحك، مطالبين بضرورة حسم و ضبط بعض مواقع التواصل الاجتماعي وذلك لعدم الخوض في تفاصيل قد تصل إلى الإساءة أو إنتاج كذبة كبيرة يتم ترويجها ويصدقها البعض، والاستفادة من تلك المواقع لما فيه فائدة للجميع.

شكراً مصعب وأن تضيء لنا شمعة
لعل علي كبك يذكرنا بخطورة الإشاعة وأثرها في المجتمعات خاصة مع قنوات التواصل الاجتماعي
كثيرون هم المبدعون في بلادنا ولكن فشلنا في تسويق أنفسنا جعلنا قابعين في أماكننا
وسائل الإعلام المختلفة ظلت حبيسة العاصمة ولم تكلف نفسها عناء اكتشاف المواهب
الدورات المدرسية لم تعد كما في السابق ينبوع لاكتشاف المواهب
تقدم لبرنامج (نجوم الغد) في الدورة الأخيرة أكثر من (1000) فنان فهل يجوز لنا أن نطلق على بلدنا بدل مليون ميل مربع بلد المليون فنان؟!

المشاركة الأصلية كتبت بواسطة عصمت الصادق حماد

فهل يجوز لنا أن نطلق على بلدنا بدل مليون ميل مربع بلد المليون فنان؟!

فنانّا الجميل علي كبك سماها بلد المليون ست شاي

شكراً أبو أمجد على المقال .. الناس ديل اجتهدوا شديد خلاص ياخ
شكراً الهادي على نص الأستاذ
شكراً عصمت على التعقيب

لكن أنا شايف الناس خافت من لا شئ .. يعني الموضوع مضحك ما مرعب
الراجل أشعارو حلوة هسة عليك الله مقطع أركب بص الوالي في مقعد نص دة فرقو شنو من رائعة مصطفى سيد أحمد الشعر المعطار !
إذا عادت بنا الأيام ولو في مركب يمضي إلى الصحراء عبر سراب
مع العلم بي إنه بص الوالي ما فيه مقعد نص

أنا شايف فكرة علي كبك كانت ممتعة والشعبية اللقاها نافست شعبية أبيض اللون
أبيض اللون انضرب يا اخوانا المرة دي طلعت آوت لكن لو ما اجتهد المرة الجاية شعبيتو في خطر

قام أحد أصدقاء الفنان محمد عبد الله بعمل لقاء معه على صفحته بالفيس بوك للحديث عن شخصية علي كبك . ورغم أن إجاباته كانت مقتضبة وتنم عن ضيق واضح وتملّص من تبعات انتهاك خصوصية وليام الزيمبابوي واستخدام صورته في البوسترات والإعلان عن الحفلة إلا أن بعض الإجابات تدحض نظرية المؤامرة وعلاقة الحكومة والانتخابات بتوقيت انتشار علي كبك
وبالطبع وردت سيرتنا في مضابط الحوار من أحد المشاركين

أخ امجد أمس تصفحت منتديات الحصاحيصا فيها موضوع على كبك وكشفو فيه شخصية محمد ونزلو الأغاني الكتبها محمد

وهذه إجابات الفنان محمد عبد الله على بعض الأسئلة المطروحة

شباب مساء الخير
انا محمد عبد الله
بشتغل في الميديا عموما

مبدئيا كده تعالوا نتفق انو الكلام الكتبتو دا ما شعر من وجهة نظري

طيب انا احكي ليكم قصة علي كبك
في واحد نزل بوستر لي علي كبك و مكتوبة فيه اسامي الاغاني انا استغربت من الموضوع الشكل و كلمات الاغاني و بقيت اقول انو هل الكلام دا حقيقي يعني هل ممكن يكون في غناء بالاسامي دي ح ينزل في شكل البوم ( الموضوع بحير )
طيب انا عملت كومنت عند احد الاصدقاء بي اني بحاول اكتب كلام يكون في متماشي مع اسم الاغنية و كانت اول اغنية ( فكيني منك ) وكتبت الخستكة حقتي
تاني يوم الصباح لقيت اسكرين شوت حق الكومنت حقي مرسل لي في الوتساب بعداك الناس ابتدت تسال من انو انت مفروض تكتب باقي الحاجات دي و ابتديت اكتب فيها بي غرضين واحد منهم انو انا بحب الهزل و التاني انو اشوف الناس هل ح تتابع الكلام الركيك دا و صراحة اتفاجأت بي الانتشار للكتابات حقتي ،،
بعداك بديت افتش في حقيقة الشخصية ( كبك ) اكتشفت الحقيقة انو شخصية وهمية

طيب بالنسبة للتصميم الاول و الصورة انا ما عندي بيهم اي علاقة
الاغنية الاتسجلت دي من كلمات حسن طلس ما عندي عنها اي خلفيه جاتني في الوتساب

التوقيت النزل فيه البوستر دا اللي انا ما عارف الصممو منو اصلا دا سؤال وجيه لكن بالنسبة لي انا ما عندي اي انتماء حزبي او لون سياسي
زول بحب يضحك و يحاول يخلي الحولينو مبسوطين و بضحكوا برغم المعاناة النحن عايشين فيهت

طيب امجد انت محتاج تجيب الشخص الصمم البوستر الاول بتاع الالبوم لانو في ناس بتعتقد انو الحكومة ورا سبب انو التوقيت النزل فيه البوستر

طيب معظم الناس الاتداولت الخبر بتقول انو الموضوع دا مقصود من الحكومة عشان تلهي الناس من الانتخابات
طيب نفس الشخص البقول الكلام دا بقول ليك الانتخابات دي محسومة اساسا
طيب طالما عي محسومة يلهو الناس لي ؟؟؟

شكراً لي كل الناس الاتقبلوا الحاجة دي و الما اتقبلوها شكراً للناس الاتكلمت كلام سمح شكراً للناس الظنت فينا ظن كويس وظن كعب

ولعل من أجمل التعليقات

أنا متابع للظاهرة دي من فترة، واكتشفت إنه في فرص كبيرة للعاوزين يشتهروا، والحاجة العملوها الشباب كانت فكرتها جديدة وغريبة في نفس الوقت وده أداها فرصة إنها تنتشر، وده في النهاية بيقودني لأنه في امكانية لنجاح حملات السوشيال ميديا في السودان إذا جابت أفكار جديدة وغريبة، وأنا ما متفق مع نظرية إنه الحكومة هي السبب في الفكرة لالهاء الناس عن المشكلات.

والخلاصة كانت في تعليق الشاعرة إيمان متوكل

أستعجب في زول يقول ليك البوست وهمي .. وسيدو وهمي ...وشخصية البوست وهمي ... التحليل المنطقي الجذبتك الوهمنة دي ذااااته ...إذن إنت الوهمي الكبير هنا ...

والخلاصة كانت في تعليق الشاعرة إيمان متوكل
اقتباس :
أستعجب في زول يقول ليك البوست وهمي .. وسيدو وهمي ...وشخصية البوست وهمي ... التحليل المنطقي الجذبتك الوهمنة دي ذااااته ...إذن إنت الوهمي الكبير هنا ...

مصعب سلامات
الزوله دى قاصده شنو؟
يعنى نحن وهميين ولا كيف؟
دى مااااااا إسأة عديل كده

المشاركة الأصلية كتبت بواسطة ود الحصاحيصا

مصعب سلامات
الزوله دى قاصده شنو؟
يعنى نحن وهميين ولا كيف؟
دى مااااااا إسأة عديل كده

لا لا ما قالت كدة
بتقول لو انت بستوهم الحاصل دة معناها انت بتحب الوهم لأنك ساكيهو لحدي ما وصلت الصفحة وقريت اللقاء
يعني ما تجي تتجارى ورانا بي أوهامنا دي وتدعي إنك ما مستوهم زينا
اعترف إنه الموضوع عجبك ولا اعتبر نفسك وهمي مع الناس الوصفتهم بالوهمية ديل

[/url][/IMG]