كلمات اغانى لى عقد الجلاد

يابا مع السلامة

اشعار : محجوب شريف
الحان : شمت محمد نور

يابا مع السلامة يا سكة سلامة
في الحزن المطير
يا كالنخلة هامة
قامة واستقامة
هيبة مع البساطة
اصدق ما يكون
راحة ايديك تماماً متل الضفتين
ضلك كم ترامى حضناً لليتامى
خبزاً للذين هم لا يملكون
بنفس البساطة والهمس الحنون
ترحل يا حبيبي
من باب الحياة لباب المنون
روحك كالحمامة بترفرف هناك
كم سيرة وسريرا من حولك ضراك
والناس الذين خليتم وراك
وعيونم حزينة بتبلل ثراك
ابواب المدينة بتسلم عليك
والشارع يتاوق يتنفس هواك
يا حليلك حليلك يا حليل الحكاوي
تتونس كانك يوم ما كنت ناوي
تجمع لم تفرق بين الناس تساوي
نارك ما بتحرق ما بتشد تلاوي
ما بتحب تفرق من جيبك تداوي
الحلم الجماعي والعدل اجتماعي
والروح السماوي والحب الكبير
في الزمن المكندك والحزن الاضافي
جينا نقول نفرق نجي نلقاه مافي
لا سافر مشرق لافتران وغافي
وين عمي البطرق جواي القوافي
يا كرسيه وسريرو هل ما زلت دافي

يا مرتبتو امكن في مكتبتو
قاعد يقرا وزهنو صافي
يا تلك الترامس وينو الصوتو هامس
كالمترار يساسق يمشي كما الحفيف
كم في الذهن عالق ثرثرة
المعالق والشاي اللطيف
تصطف الكبابي اجمل من صبايا
بينات الروابي والضل الوريف
احمر زاهي باهي يلفت انتباهي
هل سكر زيادة ام سكر خفيف
ينده للبنية يديها الحلاوة
والخاطر يطيب
يدخل جنو منو محبوب الشقاوة
يستنى النصيب
الدفو والنداوة السنا والعبير
كالغزلان هناك في الوادي الخصيب
حيث الموية عذبة والغصن الرطيب
كم تحت المخدة اكتر من مودة
للجنا والغريب
عش وعشب اخضر جدول من حليب
يابا ابوي يا يابا
الشمس البتطلع بلت منو ريقا
والنجمة البتسطع فيه تشوف بريقا
الندى في حركتو يطفيها الحريقة
ننهل من بركتو زي شيخ الطريقة
شاييهو وطرقتو والايدي الصديقة
يلا نسد فرقتو حب الناس درقتو
يا موت لو تركتو مننا قد سرقتو
كنا نقول ده وقتو لكنك حقيقة
النفاجو فاتح ما بين دين ودين
نفحة محمدية دفئاً كالضريح
ميضنة كم تلالي جيداً في اليالي
مجداً في الاعالي
مريم والمسيح
قلباً نبضو واصل ما بين جيل جيل
ما بين كان وحاصل او ما قد يكون
ما بتشوف فواصل الا الذكريات
وآلام المفاصل بعضاً من شجون
يابا مع السلامة يا سكة سلامة
في الحزن المطير..

ودود الابتسامة

يا ودود الابتسامة
بشتكيلك منك الحزن الدفين
خلي بالك للغمامة تملى
تملى لما تنزل لا بتشكي ولا بتحكي
الا تطلع من انين الارض وردة وعش حمامة
شفتك امبارح معايا
كنت بين نايمة وصاحية
تحتويني الريدة والشوق والعنا
وانت صاحي ترفع ايدك للشموس العالية
وتدفئ الغنا
ينتميلك قلبي يا اب قلباً حنين
بشتكيلك منك الحزن الدفين ..

كل مانقول

كل مانقول خلصنا الليل
يطلع باكر ليلا أطول
كل مانقول خلصنا الشيل
تطلع شيلة باكر أتقل
بس نتحمل ونصبر ونأمل
إنو الجاي صباحا أجمل
لكن كيف
طعم الريد جوانا اتحول
مرة تشيلك فوق لفوق
مرات تملاك فاقة وضيق
تلقى الدنيا تلم في هموما
تفتح جرحك وانت تضوق
أنسى وأقول ما منها مني
دايما بحلم وأنا ممحوق
قنا كتير الشارع بقصر
لمن نصبر نحن نكون
لم الزول في يوم يتعثر
بكرة القاسى الشافة يقول
بكرة بنمشي الخطوة
الأولى
التانية
التالتة
الرابعة
الخامسة
وفجأة
نلقى الشارع قسى واتحجر
نلقى الحلم الفينا اتكسر
ويبقى الزول
مسجو ن مجنون مهضوم بالهم
مسكون ميئوس معفوص جواو
منحوس محبوس ويكوس
أسي دا شارع ماشي لي وين
لينا عليهو سنين وسنين
نمشي كأننا ما ماشين
نفتح سكة نسد اتني..

لي وين وكيف لمتين

لي وين وكيف لمتين
يا ضحكة ضاعت وين
يا حزن يا مرتاح
بين الدموع و العين
تعبت معاك الروح
والليل حشد سهروا
شباك حلم مقفول
حرس المسافة يطول
للفاتو ما رجعوا
يا سكة لبيـتنا
يا عتمة يا مشوار
يا شارع الحِـلة
ماضاعت الذكرى
للغابو و الحضرو
يا قمري يا قمرا
يا سنسنة و حمرا
بسأل عن الأفراح
و الخاطر المرتاح
عن دنيا فيها السماح
عن الصباح الراح
لا ضو و لا أثرو
علِمنا يا مسكين
ورينا عايش كيف
دي الريح وقول الزيف
بيشتتوا المطرة
والفكرة قولة الحق
مكتوفة مُكتسرة
الخطوة نحوِك كيف
والسكة دي خطرة
أطفالنا و الأُمات
آمالنا و أحلامنا
الهسة والجايات
طوالي في وكرة
لكن دا كلو يهون
مهما الصباح مرهون
والفرحة محتكرة
البذرة مهما يكون
حتبقى يوم شجرة..

صوت الإستحاله

كلمات: جمال عبدالرحيم
ألحان: حمزة سليمان

المناظر هي زاتا
الصور نفس المشاهد
الشوارع والبيوت
الأماكن والمقاعد
والزمان ثابت مكانو
والرقم اللسة واحد
وحشة الليل البهيم
ولمة الناس الحزانى
غصة الشوق القديم
بدموعا وبحنانا
وقصة الولد اليتيم
ونفس صوت الاسطوانة
دنيا تتغير ودنيا
ادمنت عشق الثوابت
صوت ينادي الاستحالة
والحقيقة صوتا خافت
جرح ينزف وقلب دامي
ولسة صابر ولسة ساكت..

مشاوير المحبة

كلمات : عماد الدين ابراهيم
الحان : الاستاذ النو

يا مشاوير المحبة
الكلمة تقلت
والخطيــوات الندية
الغيمة الشالت...دمعة مرة
غــرَ قت أناتا أرواحنا الوفية
الصدق أصبح في عيون الناس مظنة
الصدف أصبح فينا كلمات هامشية
والحقيقة بقت مخافة وانزوت في عمق أعماقنا الخفية
يا مشاوير ضيعيني
جدِدي الذاد للمشاوير الشقية
توهي النور بدِديهو
خلي إظلامك يغيب
كل لحظة فرحة فيا
بكي إحساسي الحنـيِــن
فتِريـني و دردِريـــني
وأصلي ليك أنا ماني هيِــن
كل نهاية تكون بداية
كل وجعة تفرهد الإحساس جوايا
وابقى عايش للعُوينات الوفية
وابدا عايش عمري للصادقيـــن هدية..

أحتاجُ دوزنة وتراً جديداً
لا ُيضيف إلى النشيدِ سوا النشـــــاز
لغةً تُفتشُ عن أراضٍ خِصبةٍ
شمساً تُغير طعم فاكهةِ الشتاء
أحتاجُ مِفرزةً من الشعراءِ و الجوعى
لنُعلن سُخطنا أو ننتهي منا باغنيةٍ تذاع
بالشهداء
بالفقراء
بطفلنا الآتي
بكوم اللاجِئين
بالداعين في الصلوات
هتـــــتفنا ما سمعتم
ثم هاجرنا انصرفتم

يا بحراً تجاوز في سكونِهِ كل حد
يا بحر قم..حرِك تحرك
أو فعُد نحو ابتلائك فالنهايات القديمة لا تُحد
ألفُظ جحيمك
أو فغادر ساحليك إلى الأبد
تابعوا من شئتمُ أو طاوعوا من خفتمُ
فالزاحفون إلى الفجيعة أنتمُ
فقط إفهمـــــــــــــوا
أن لا وثيقة أو وفاق
ولا حقيقة أو نفاق
تخفي عن الأطفال عورة من دفنتم مِن رِجال
يا بحر قم..حرِك تحرك
أو فعُد نحو ابتلائك فالنهايات القديمة لاتــحــــــد ..

تبتبا تبتبا تبتبا تبتب
باكر تعرف تقرا وتكتب
وياما ترتب
نحنا بنحلم وكم نتمنى
هي تحقق كل ما تحب
تبني حياتا الند بالند
اي مكانة وخانة تسد
هدهدا هدهد كل الورد ينوم ويفرهد
زي عصفورة تطير وترك
تحبا وتمسك وتاني تفك
سيبا تلكلك سيبا تفكفك عايزة تنطط
بكرة حترسم وياما تخطط
بكرة حا يبنوا مدائن ضو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب
تفتح بابك آمن تب
زي ما النهر بيلقى مصب
اي حمامة بتلقى الحب
تلقى الورده الندى في الكم
تلقى حداها جناها الام
يرضع صافي حليب الحب
نقدل نحنا الجد والعم
تملا عيونا كهارب سد
باباً جاب الهم والزم والصد ينسد
نفرح لما ندمع جد
مد البصر الامل يمتد
العمل يشتد البنا ينتم الغنا يمتد
هدهدا هدهد
اكتب اكتبي الف المد
حمام وسلام وسعادة بجد
اكتب اكتبي ياء المد
سرير وعصير وعبير ينشم
اكتب اكتبي واو المد
حقول وعقول تقرا المجهول و كتاب الغد
اكتبي علم وسلم
لا حد يئن لاتسمع بم
لا ينزف دم
لا يعجز رد
لا يعجز طب
لا دمعه في خد
تبتبا تبتبا تبتبا تبتب ..

يامحبوبي ...هـاك منّى مكتوبي ..
صـدّاح الغُنـا المكتوم .. ومدّاح الجمال والنور..
كلمة حُـب فى قلب ..حبيبي
وقليب حبيبي من توبي..!
تشـوِّش جـوّه قلب النيل..
مع اللهفة العلى ولدى..!
ويا معشوقي.. ليك من شوقى كل الشوق..
,,,,
فيا لخرطوم إذا نامت عليك عيون ..
تشوف الضلمة في الضحى ..والنَهار مكلوم !
ولو غنيتِ والغُـنا ..الكلام مخنوق ..!
أعرفي إنـّو الزمن اللى جاي شـروق..
و أعرفي إنـّو .. الزمن الحبيب ..وحنون.. !
,,,,,
فيالخرطوم ... عيون الحق ما بتنوم ..
عيون الحق ما بتنوم ..!

نقطة ضؤ

في اللحظة ديك والتو........ لحظة الميلاد
كنت نقطة ضؤ
فرهدت بيك فرهيد .... وانتشيت بالريد
وطرت بيك الجو
قالو ايضا بت .....
قلت مالو ولو
بختي بختي .. انت بتي .. امي واختي.. همي شيلي .. شيلي مني.. مني ختي

بشوفها عز التبتبة
بتي البريدة مرتبة
دولابا داك والمرتبا
جات من قبيل من مكتبا
ادت ابوها مرتبا
سددنا دين دكان حسين ...كستني توب
نجدنا كم.. كم مرتبه
جيهت بيتنا القديم
السقف داك والمسطبة

قيرا قيرا يا مهيرة
ياشتلاية جاتا مطيرة
تكبري انت تشيلي حملنا
وتزيدينا ترانا كملنا
نسمع عنك ما يفرحنا
الاستاذة دي كتر خيرا
يوم تلقانا ...بتوصلنا
وتحصلنا ...تفك الحيرة
ما بتتعنت وما بتتصنت
ما بتاوق في حق غيرا..