ساستنا العظام

اتلموا ساستنا العظام
من شمال وغرب وشرق
توثبوا قالوا دائرين نتفق
طيب وينه الجنوب ؟
جنوبنا يا سلاااااااااام
امات طه لحق
اتلموا ساستنا العظام
لفوا العمائم
فوق الولائم
كم دقن عائم
وعمك خنق
ما قلنا ليك ما تاكل براك
ساستنا العظام
توثبوا وقالوا دائرين نتفق
نعيش في سلام
ننسى الخصام
ونلحق الوطن الغرق
نشيل منه راكوبته شليه
او عود مرق
واتلموا ساستنا العظام
رفعوا التمام
قالوا الوثبة افضل كلام
خاتية الملام
والرافض بالجاز يتحرق
ده اصلا ود حرام
كايس الخصام
وقطر حوارنا فات بسلام
واصلا ما بتحلق
واتلموا ساستنا العظام
في عزاء الوطن الحطام
وقالوا دايرين نتفق
ثم جاءوا بالوصايا
ادوه سارقنا حق الوصايا
اعادوا تدوير النفايا
قالوا يحكمنا الامام
هو فارسنا الهمام
ما يضير يا غبايا
لو يحكم الف عام
بالكراسي والهدايا
باعوا ارواح الضحايا
وقالوا المقطوع بتلتق
اتلموا ساستنا العظام
وحكموا على وطنا الشنق
وقالوا تاني من جديد
لسيرة ابو هاشم نعيد
ونبقى نحن دراويش المسيد
للفتة نتمطق مطق
واتلموا ساستنا العظام
اتوثبوا قالوا دايرين نتفق
قالوا بالدموع يا حرام
الناس فاتت المريخ والقمر
ونحن من مؤتمر
لي مؤتمر
من قمنا كايسين السلام
شيخنا و المهدي المنتظر
كنانة نيفاشا وكوكدام
موائد مستديرة
وهلمجر
وساستنا العظام
اتوثبوا تموا عام
وبعد اطناشر شهر
مبروك وثبتنا ولدت بسلام
جابت ضكر
بعد اطناشر شهر
بتجادلو كيف للسطة اقتسام
ولينا ما جايبين خبر
ما جابوا سيرة او كلام
للمشرد في الرواكيب والخيام
وللرصاص النازل مطر
وللمالاقي حق الطعام
للباع الوطن
وللبختلس
للمالاقي حقنة واكسجين
ولي حق الدرس
وللبغتصب
والكايس العرس
بعد عام
كل توصيات الختام
رمتنا في ذات المكب
وقعنا في ذات المطب
الكنا منه بنحترس
بعد عام
رجعتناا لذاك الفَقُر
دخلنا لذات الجُحر
المنه كنا بننقرص
بعد عام
قالت توصيات الختام
الما راضي بالحيط ينفلق
اتلموا ساستنا العظام
اتوثبوا قالوا دايرين نتفق
لموا احلامهم والاحاجي
اتلموا والكل راجي
لمة بشارة سجاد وتراجي
يلموا اطفال الملاجئ
ويرجعوا الوطن السرق
اتلموا ساستنا العظام
اتوثبوا قالوا دائرين نتفق
دايرين نحدد للهوية
بسال سؤال والسلام
الناس ذاته وينه هيه
والمطارات تضج بالزحام
شعب لساستنا الضحية
للشواطي هو الطعام
والما بهاجر في الافيون غرق
اتلموا ساستنا العظام
اتوثبوا وقالوا دايرين نتفق
وبعد عام
واطناشر شهر
قالت توصيات الختام
اتفقنا على الا نتفق