|
|
|
|
|
|
| التميز خلال 24 ساعة | |||
 العضو الأكثر نشاطاً هذا اليوم |
الموضوع النشط هذا اليوم |
المشرف المميزلهذا اليوم |
|
قريبا |
بقلم :  |
قريبا |
|
آخر 10 مواضيع
|
الإهداءات |
|
|
|||||||
| «۩۞۩-منتدى الحصاحيصا الحر-۩۞۩» ساحه للحوار الحر والمواضيع العامه التى تهم كل ابناء مدينة ومحلية الحصاحيصا بصفة خاصة وكل السودانين بصفة عامة |
 |
|
|
أدوات الموضوع | انواع عرض الموضوع |
07-15-2010, 11:49 AM
|
#31 | |||||||||
ود الزبيدي
|
بنتنا روعة ,,, أسعدني مرورك كثيرا والله يسلمك,,في إنتظار بصماتك وأفكارك... لكِ الود.
|
|||||||||
|
|
07-15-2010, 11:50 AM
|
#32 | |||||||||
|
ود الزبيدي
|
يا ناس المنتدى لو ما مسكتوني وصميتوا خشمي دا بجيب ليكم ضقلها يكركب!!
المرة والوليدات سافروا .. وخلوني مع التلفزيون .. على فكرة كانت عندي فكرة لي الناس العايزين يتزوجوا بنت ستين كلب .لكن خليتها!.. تشتري تلفزيون 27 بوصة مع شاشة بلازما وريسيفر النوع البفتح كل القنوات بي الdsl وكرت الجزيرة الرياضية والشو تايم , عشان مرات الدي اس ال بيقطع... شوف التكلفة كم والعرس التكلفة كم ؟ التلفزيون ما عايز سيرة ولا قولة خير ولا شبكة .. لكن محتاج تسأل عن الشركة المصنعة والماركة زي ما بتسأل عن أهل العروس !! هو الناس بيسألوا لسه ولا خلوها الحكاية دي ؟ التلفزيون ما عايز شهر عسل ولا بصل تلِبّه من الدكان في سدرك وعلى البيت على طول .. ولا عايز غرفة نوم ولا جلوس ولا يحزنون. ثانيا التلفزيون والرسيفر الأثنين ما بيستهلكوا كهرباء كثيرة ؟ ولا عايزين دهب ولا شئي!! ثالثا التلفزيون لو ما عجبك الكلام تحول لي قناة تانية ... طق وخلاص إنتهينا .. ولا تقفلوا كلو كلو!! لكن هناك لو عجبك ولو غلبك تسمع من دي وتفضي بي دي لكن أرجى الراجييك!! رابعا التلفزيون فيهو حاجات متنوعة .. تراجيديا .. كوميديا .. آكشن .. غناء .. أدب ... ونسوان سمحات!! في العرس آكشن وتراجيديا بس !! رابعا التلفزيون.. حيقعد معاك الله ورقبتو.. مافي تلفزيونات ناركوكات صغار بيجوا بعده... وكان عايز تغيرو مافي زول بيلومك !! هناك كان عايز تغير الله قال بي قولك وإمكن تغير تلقى إنو كان أخير قبيل!! وبعد ما يجو الناركوكات يعملوا عصابة مع أمهم وتكون إنت والبيت وكل حاجة حقتهم!! قادر الله!! لكن غيرت رأيي في موضوع الزواج التلفزيوني دا : أول حاجة خوفوني عديــــــــــــــــــــــــــــــــل. تاني حاجة التلفزيون الجرّبته في اليومين الفاتن ديل ..أخير الناركوكات وأمهم... تعالوا شوفوا تجربة يوم واحد مع التلفزيون... بعد أن هيأت المكان جيدا ... الموية في حفاظة معاها كباية .. وكباية الشاي .. وعلبة السجاير والولاعة والطفاية .. وكيس الصعوط منتفخ الأوداج...إتكيت علي الكرسي الوثير وزدته وثارة بي مخدة مدغلبة ... وهاك يا ريموت كنترول: الشروق .. النيل الأزرق.. السودان..زول .. إبوني.. طيبة.. ساهور الاسطي حاسس انواع الالوان تمام لانها الوان الشروق. وناس القمة بتحبو ,,, واساس (اثاث) منو البقيف جمبو والفائز وما ادراك ما الفائز ,,, ومأمون البرير اسم من ذهب. وعصير روتانا دوّب واشرب معانا ابو الفاضل بلازا ,,, تذوق طعم التسوق وجياد تتمني لكم موسما زراعيا مع جرارات جياد شارع الستين تقول لك حبابك جيتنا زائر وغرف النوم قاعديزيدن تهبهب فوقها الستائر البشائر,, وما ادراك ما البشائر وكمان في صالون ما عارف اسمو لازالة القشرة للرجال ,, وتزيين سيارات العرسان كمان!!!!!! في صالون واحد والله العظيم. شامبيون ,, خالي من الكحول ,,, انتاج البرير برضو وهايل ,,, ما معقول,, زيت هايل ونحنا زيتنا طلع,,,, طلع زيتو يعني عصروهو لمن جاب الزيت,,, زي الفول ,,, وطبعا العصارات فرق,, في عصر اربعة تروس وفي 3 وهكذا ,,, يعني العصر حاصل حاصل ,,, والداير يتعصر اقصد داير يعرس يشد حيلو ,,, زيتو حيطلع وامبازو حيطلع برضو ,,, يا جماعة امباز دي جاية من وين انجليزي ولا تركي ,,, زيت السمسم مفيد للفول ,, ولي وجع الراس ولتطويل الشعر,, ولي وجع العضام,, وللبعض فيه مآرب أخري ..... اهه ذكرتوني ,, بي الحلّ بله ,,, والبلات كتار ,, غايتو انا بعرف الشريف بله وبله الغايب,,, وبله جابر بالمناسبة بله جابر دا لو احترف ما حيكون عندو مشكلة في نطق اسمو عند الخواجات والمذيعين العرب ولا موسي الزومة ,,, المشكلة ميرغني كنيد وسيف مساوءي والله عصام الشوالي قالها كده ( مساوءي) أول مرة يقول كلام صاح؟؟؟ وزيت كابور الأول في العالم .... وأشرطة إهداءات وأخبار تتطاقش ... يسر المستوصف الفلاني حضور البروفيسر الفلاني المشهور لمعالجة شنو ما عارف بي شنو ما عارف" أذكر أنه بالسودان موضوع الأعلان الطبي كان محدد جدا وبقيود صارمة تصل إلي حجم اللافتة أمام العيادة بمقاييس معينة وأين توضع ,,, ووو. رحم الله ممارسةالطب والمرضى" قلنا نشوف روحانيات شوية ,, يا جماعة ما لقيت ليكم زول بيمدح في البشير "آآي البشير حقنا دا " مع أن شعار القناة أنها قناة لتعظيم الرسول وما تعظيم زول تاني ... طوالي حولتّ منو..القناة الثانية لقيت ليك زول صاري وشيهو وزبدو يتقطع وزعلان .. قلت الزول دا مالو؟؟ أتاريهو بيغالط في واحد تاني .. برضو ما مقصر ونفسو قايم وعرقو ينقط .. يا الله الليلة البيحلنا شنو؟ ياربي الحلّ بله بيحلنا؟؟؟ قال تعالى"ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ إِنَّ رَبَّكَ هُوَ أَعْلَمُ بِمَنْ ضَلَّ عَنْ سَبِيلِهِ وَهُوَ أَعْلَمُ بِالْمُهْتَدِينَ" صدق الله العظيم قال الله تعالى(( ولو كنت فظا غليظ القلب لانفضو من حولك)) آل عمران صدق الله العظيم من هنا بطني طمت من موضوع الزواج التلفزيوني .. وعرفت إنو أنا كنت حأورط الناس ورطة بت كلب , لو سمعوا كلامي .... عشان كده .. كلامي القلتو فوق دا ذاتو ما تسمعوهو... الجن بيتداوى ... كعبة الإندراوة. شرح المفردات: الأمباز يستعمل كعلف للأ بقار خاصة " بسكويت البقر" يصنع من بقايا عصر زيت البذور. الناركوكات: جمع ناركوك وهو الولد الصغير بلغة الدينكا على ماأظن. الإندراوة: أسألوا منها الجاهوري. وإلي اللقاء مع القنوات العربية اللابسة نص كم والما لابسة كلو كلو .. وشلة الإم بي سيهات والفوكسات... نلتقي. كلمتكم أنا وقلت ليكم دا كلام مجانين..أنتو قايلين الكيكوفرينيا دي شنو؟؟؟ |
|||||||||
التعديل الأخير تم بواسطة الكييك ; 07-15-2010 الساعة 09:59 PM
|
|
07-15-2010, 07:55 PM
|
#33 | |
أبو إسراء
|
اصلا يالكييك قبل تتصل عليهم انا كنت مجهز لي سرير هناك كدا يبقوا سريرين ممكن واحد يسبق التاني عشان يحجز حتي هناك بقي في حجز ولازم تخت طوبتك من بدري علي قولة بدري صحيت اقول ليك حاجة نقطة سطر جديد.
اها يالحبيب صحيت الصباح بدري من غير العادة قلت الليلة مامشي الشغل حا اعمل ليك ليهم دكا مبينا هو كل يوم شغل عملت كباية شاي بي حليب السعودية من غير قنانة نجيبا من وين ومعاها كيكة من لوزين عرفتها يالكييك ديل البجيبوهم يتعاوروا (خدلك تصبيرة من لوزين وسكت بطنك) المهم فتحت التلفزيون وخلفت رجل علي رجل وكانت البداية مع صباح الخير ياعرب قعدوا يتضاحكو طوالي غيرت الريموت عالم التسوق لاحول الله استعمل البودرة وسوف ينتهي الصلع نهائيا قلت ليهم ياخ دي رسلوها لي الغريب مالينا فيها نفقة مشيت السودان لقيت ليك ونسة وكلام لايودي لايجيب قلبت علي النيل الازرق لقيت ليك ندي القلعة حاتاهو حت شين ويايابا شن سوين انا ما ابيت البيت هههههههه قلت احسن حاجة امشي لي قناتي المحببة ام بي سي 2 لقيت ليك فلم عن شخص بيفهم افكار النساء بس قلت دا ياهو الناقصنا والله كان بقينا نفهم أفكار الحررم ديل مابتجينا عوجة تب علي الاقل ننال رضي وزارة الداخلية ومن خلالها كل الوزارات سهلة خصوصا الناركوكات كما سميتها كملت الفلم بأفكار غريبة ومشيت الشغل وحالتي قلت ماماشي ياود نحنا نقعد نقابل التلفزيون دا والناس هناك فاتحين خشمهم منتظرننا والتجاني الماحي تنتظر ايضا بشوفك قريب قبل تجيب ضقلها يكركب |
|
|
|
|
10-12-2010, 12:36 AM
|
#34 | |||||||||
|
ود الزبيدي
|
أبدأ بالتحية للأخ البرنس وأعتذر عن إني ما هببتو ليهو .... لكن والله ماقاصد .... جات كده " مزاج " فترة طويلة لم أدخل المنتدى ولم أراجع المشاركات ما عدا بوستات الإدارة... آخر الزمن بقينا في الإدارات !!
المهم رجعت بمجموعة تداعيات من الإجازة سأوافيكم بها كل مرة عن لي فيها ذلك وأعتدل المزاج .... قولوا خير وزين وصلاةً علي محمد: ا ربي المجانين نحن ولا مجنونة الحكومة ... ولا مجنون السودان كلو ... الحكومة قبل الانتخابات بي شوية كانت لذيذة ومزاجها رايق وما بتغلط مع زول واذا خاطبهم الجاهلون قالوا سلاما ... مباحثات بي رواقة ونفس هادي مع حركات دارفور ... وعد الاطباء المضربين بزيادة المرتبات ... وقف كامل لاطلاق النار في دارفور ...وووو لكن عينك ماتشوف الا النور بعد الانتخابات والتمكين ... اول حاجة كرفسوا ليك الترابي ... وكرفسوا ليك خليل ما عرف ينزل وين ... وعلى فكرة الاثنين انا شمتان فيهم عديييييييييييييل وما ناكره ... وكرفسوا ليك الحركات في دارفور كلها ورشوهم رش جد في جبل مون ودي برضو أنا شمتان فيها .... وتعال شوف " ما عايزين مشاركة مع اي زول في الحكومة .. مش فزنا .. مش قلتوا ديمقراطية أهه إنتخابات وعملناها ليكم وفزنا .. مش من حقنا نعمل الحكومة العايزنها ... وللحقيقة مافي اي زول عنده منطق يقول غير كده !! لكن ما عجبتني كرفسة الاطباء " مش عشان انا طبيب ولا حاجة" لكن الحكومة عشمتهم قبل الانتخابات وبعدين نطت عدييل كده ... وتعال شوف يا قبيض ورفد ودق وكلو .... وقالوا إنو دا إضراب سياسي ... طيب نفرض إنو سياسي !! طيب مالو ؟ ما قلتوا ديمقراطية ...هل الاضراب السياسي ممنوع في الديمقراطية ؟؟ وللحقيقة الاضراب أساسه مطلبي وان آذرته مجموعات سياسية ... طيب إنتو تدوا فرصة للجهات السياسية فرص عشان تآذر ناس مطالب مشروعة لي شنو ؟؟؟ أنا لو كنت في الحكومة وبتكلم عن الديمقراطية حتى لو ما جادي فيها ما بدي فرصة لي ناس تانيين عايزين يكشفوني الفرصة!!! والله الدكاتره أنا شفتهم في الاجازة الفاتت والقبلها ... حالتهم تحنن الكافر .. خليك من الجبهة القومية الاسلامية !! رأيكم شنو بالله ما بنفع منظر سياسي؟ الحالة دي مجنون .. لو كنت عاقل كنت أكون كيف....؟ |
|||||||||
|
|
10-12-2010, 12:43 AM
|
#35 | |||||||||
|
ود الزبيدي
|
من الحاجات الحيرتني في الإجازة وجننت جني ... وما عرفت ليها صرفا ولا عدلا... جربت الفيزياء والأحياء والكيمياء ... وكله ما نفع .. وما لقيت أي تفسير .... وطيرت لي جني في رأسي وكان لقيتوا لي حل ولا تفسير خصمتكم بي الله تقولوهوا لي !!
وعشمان في ناس الهندسة كتير خلاس!! يالله أقول ليكم: أنا عارف وكلكم عارفين في السودان لما تجي المطرة بتقوم الكهرباء تقطع .. أقصد بيقطعوها ناس الإدارة عشان خايفين السلوك يطاقشن يقومن يعملن ماس .. أو يكونن إتطاقشن قبل ما يقطعوها وعملن ماس والكهرباء تقطع... دي حدود معرفتي في قطع الكهرباء مع المطرة ... لكن في الإجازة دي وفي حينا في اركويت السنة دي لاحظت ... صبة مطيرة.. مش مطيرة .. نقيطة مطرة كدي ... تقوم الموية تقطع ... الموية العديلة الفي المواسير دي والكهرباء شغالة زي العجب ... يا أخوانا أنا ما ساهرت الليالي وحكيت رأسي دا لما جاب الدم ما عرفت لي سبب!! قلت إمكن الناس ديل عندهم بابور بيرفع الموية في الصهريج والبابور دا قاعد بره في السهلة والناس ديل ناس عاقلين خايفين علي البابور من الحكاية بتاعة الماس القلنا عليها قبيل... ماركبت لي في رأسي لأنو الموية دي ,قولة طق كده نقطة مطرة الموية بتقطع .. يعني كان الصهريج دا فيهو صفيحة موية بس ما بتقطع !! طيب السبب شنو؟ إمكن الناس ديل بيقولوا الناس ديل وكت جاتهم موية الله نخليهم عليها! يا ربي! إمكن يا ربي ناس الموية ديل سمعوا بي حكاية الإشعاعات والنفايات والإجهاضات والتشوهات البتعملها الموية دي وقالوا أحسن يخففوا الأضرار؟ جزاهم الله خير ما قصروا!! المهم إنو أنا ما لقيت أي سبب مقنع ... وإجازتي كلها راحت لي في موضوع الموية وما حصلت حاجة... قلت أسأل زول بيعرف في التكنولوجيا لكن خجلت وقتها .. معقول زول كبير قدر ده ما عارف المويه بتقطع مع المطره ليه؟؟ خفت يكون السبب معروف للناس كلها و أنا الماعارف براي... عشان كده الناس ساكته وما بتناقش الموضوع خالص خالص!! إجازتي راحت شمار في مرقة ... ولأني ماشي الإجازة الجاية ... وإمكن أرجع كلو كلو فبالله عليكم يا العاقلين شوفوا لي سبب عشان إجازتي الجاية أو باقي عمري مايضيع بين ناس الموية والخريف... |
|||||||||
|
|
10-20-2010, 11:08 AM
|
#36 | |||||||||
|
ود الزبيدي
|
المدارس الخاصة لذيذة جدا .. ويا ريت لو كنا قرينا خاص ... الأساتذة سياحيين زي الجرسونات بتاعين الفنادق 7 نجوم .. تحت طلب الطالب .. والزبون على حق دائما يعني ممكن حصة التاريخ ما تنفع معاك .. تفرطق أصابعك للجرسون" أقصد الأستاذ" وتقول ليهو عايز المنيو ...وطبعا حيكون واقف جنبك وأنت تمرر في أصبعك على اللستة بتاعة الحصص... واحدة واحدة ..
علوم أحياء مع بريك قصير . .. جغرافيا العالم مع شرح بالبور بوينت ... لغة عربية مع قصائد لنزار قباني .. وممكن أغنيتين لكاظم الساهر .. أو الأطلال لابراهيم ناجي مع أم كلثوم في الأداء ... تربية رياضية تنس إسكواتش بلياردو .. وممكن أهداف ميسي في الدوري الاسباني ... .بعدها تشير بأصبعك للجرسون الذي هو الاستاذ الذي ينخفض عليك وأذنه قرب فمك لتهمس طالبا 2 لغة عربية وواحد إنجليزي مايكل جاكسون ...... إدارة المدرسة لاتتردد في تحقيق طلبات أولياء الأمور في توفير وسائل الراحة للطلاب ...والترفيه عنهم وعدم الضغط عليهم كما تنص عليه أصول التربية السياحية الحديثة ..... حليل زمننا ... تجي مردٍف يوم السبت والثلاثاء .. يوم النظافة فالويل لك إن كان هناك زرار مقطوع أو أظافر غير مقلمة أو بقعة حبر علي ملابسك أو يدك ..والويل لك في أيام الأسبوع الأخري ... تسميع جدول الضرب .. تسميع الأحاديث والآيات .. تسميع الأناشيد والمحفوظات .. الإملاء ..والأستاذ وما أدراك ما البعبع الذي تفر هاربا إن رآك خلسة في الطريق تلعب الكرة أو البلي أو غيره ......وأبوك الذي أول ما يقتادك الي المدرسة محدثا إدارة المدرسة أن لكم اللحم ولنا العظم ,, إيدكم والبركة ...أحسدهم كثيرا أبناء هذا الزمن .الجميــــــــــــــــــــــــــــــــــل..!! |
|||||||||
|
|
11-10-2010, 01:24 PM
|
#37 | |||||||||
|
ود الزبيدي
|
مقاول يعاني من موضوع الإنفصال .... مشكلتو حتكون طُلَب !! ونحن بدورنا نطمنو جدا لأنو الصعايدة وصلوا!!
بتاع سجاير سيفرح من موضوع الإنفصال...مافي حد حيضايقو في تجارته!! ونحن بدورنا حنقول ليهو ما تفرح شديد.. الناس بقت تمباك بس !! بعض الحكومة سعيد بالإنفصال .... دولة إسلامية 100% زي بنغلاديش ؟؟ ونحن بنقول ليهو ما تفرح شديد لسه في جبال النوبة وفي أقباط برضو!! وبعض الحكومة زعلان من الانفصال عشان موضوع البترول !! ونحن مش دورنا نطمنوا برضو....ستقل نفقات الانفاق العسكري ونفقات ال500 وزير جنوبي و300 مستشار !! طيب السياح نجيب ليهم أناتيك وأبنوس وعاج منو وين ؟؟؟ مشكلة !! لكن حلها ساهل في البروتوكول التجاري بين جمهورية السودان الشمالية وجمهورية السودان الجنوبية حنضمن موضوع الأناتيك ... ضروري !! طيب منو القال ذاتو حيكون السودان الجنوبي !! الناس ديل كلمة جنوبي دي ذاتها كرهوها بي الله واحد .. وهي واحدة من أسباب الإنفصال!!! موضوع النشرة الانجليزية ساهل بنلقلى ليهو حل .طيب ... ناس ساحات الفداء وسائحون ديل حيلقوا مواضيع وين ؟ والله آآ دارفور حتكون ساحات فداء برضو !!.. المشكلة حتكون في الدراما بتاعة الشروق .. وين حيلقو مواضيع زي بتاعة ملوال وعثمان !! ما مشكلة الوالي في بيلقى ليها حل . وبمناسبة الوالي دي ... هل سيؤثر إنفصال الجنوب على إنتخابات الإتحاد العام ولا لا؟ وهل سيطالب صلاح إدريس أو شداد بإعادة الإنتخابات ... ثم ماذا عن هلا ل جوبا ومريخ جوبا ... هل سنرجع للهلال والمريخ العاصمي أو سيصبح هلال ومريخ السودان الشمالي ؟ أهه وناس ألعاب القوة وكرة السلة حنعمل فيهم شنو ... ؟ والله أنا بفتكر إنو في ناس جرايين جدا في الخلا نحن ما مستفيدين منهم ! وأهو " عسى أن تكرهوا شيئا وهوخير لكم ". طيب السكة حديد بتاعة واو .. حتمشي للحكومة ديك ولا دي ؟؟ عشان نحن عايزين حقنا حديدة!! وأهم حاجة جامعة جوبا !! يعني زي ناس نحنا حنكون خريجين من السودان ولا من الخارج !! وهي الجامعة الهسه دي حيقسموها نصين .. نصنا نحن حيكون جامعة جوبا فرع الخرطوم ... طيب لو الجنوبيين قالوا نحن نصنا التحت نسوي شنــــــــــــــــــــــــــــــــــــــــــو؟ طيب سؤال برضو ... ناس الحركة الشعبية ديل لما جوا ما قالوا نحن عايزين ديمقراطية وكده ... وما عارف منسقية المفصولين تعسفيا و ما عارف لجنة شنو العليا وبقوا للحكومة في رقبتها .. المهم ديمقراطية ما عليك بيها , لكن الكحة ولا صمة الخشم ... ناس ديل ما حيفكونا عكس الهوا .. ويخلونا علي ناس نقد والميرغني والصادقين وهلم جرا ... وبيني وبينكم نحنا هينين المشكلة في الشماليين المع الحركة الشعبية ... ديل حتكون قِصتم كيـــــــــــــــــــــــــــــــــــــــــف؟ واحد مغترب .. قال مشكلتو مع الإنفصال إنو الدولة ما حتكون عندها مصادر دخل عشان كده حيرجعوا الضرائب بتاعة المغتربين .... واحد تاني قال ليهو مافي مشكلة لأنو الريال سعرو حيزيد !! وبعدين قصة الخدمة الإلزامية حيلقوها .. ما خلاص بقى مافي جهاد .. نجاهد منو؟؟؟ قلبي على وطني !! وكل ما أذكر خريطة السودان the heart of africa رأسي يعمل زنّ... وأتخيل الخريطة كده حتكون على شكل كلوة ... أب دمام " ما قلت الدمام عشان المنصوري ما يطير لي في حلقي" أو على شكل فشفاش بعد ما نخش القراش .... كل يغني على ليلاه وهناك يرقد وطن جريح ينتظر مبضع أطباء قليلي الخبرة وقصار النظر , رأوا أن البتر هو العلاج .....لاأدري كيف تبتر عضوا سليما ليبرأ باقي الجسد !! وهناك يجلس محمد أحمد مطرقا برأسه بين كفيه ...ينتظر النهاية لا يحرك ساكنا ولا نحرك ساكنا فينا إلا اللسان .... لكم ودي. |
|||||||||
|
|
11-10-2010, 02:08 PM
|
#38 | ||
|
اقتباس:
انا كمان زي ماقالت حبوبه بلهفة منتظرنك ومن غير كلل ولا ملل بنعيد قرايه حرف بيرسم فينا سؤال وابتسامة وعلامة تعجب انا ماعندي ديك و شنري .. الانجليزي دا منزلا كنت كنتظرا حبوبة تعرف وتكلمني شكلنا الاتنين حننتظر الرشيد |
||
|
|
|
11-10-2010, 02:22 PM
|
#39 | |
|
من السهل اننا نتحرر من السهل نعلن ثورة
من السهل نموت علشان الوطن بس من الصعب اننا نحرر جوانا ونعلن ثورة على فساد دواخلنا من الصعب نحيا علشان الوطن ونحافظ عليه ونقاوم اغراءات السلطة والمال واشياء اخرى سؤال سالتو لابوي بسذاجة لو الحكومة قدمت استقالتا قبل الاستفتاء ممكن الاستفتاء يسقط بسقوط احد طرفي العقد قال يابتي وليه يعملوا كدا قلت ليه علشان البلد قال يا بتي لو البلد اتقسمت ما فضل غير القصر الجمهوري دا هم قاعدين فيه ماعندهم مانع طال ماهم في السلطة قال يستقيلوا كنت قايلا نفسي عويرة عوارة ناس المويه البقطعوها مع المطرة لكن باقي لي المواسير بقت مضروبه زي الحكومة ناس المويه بخافوا المويه يتلموا على الشوارع مويه المطر ومويه المواسير المضروبه والناس تقوم تاني تجيب سيرة الخريف |
|
|
|
|
11-10-2010, 03:35 PM
|
#40 | |||||||||
|
ود الزبيدي
|
سِتَهِن/ كيف حالك ... تعرفي أنا كنت متخيل مافي زول بيقرأ في كلام المجانين دا ..والناس فاتحين للراجل المخرف دا. لكني سعدت جدا وكمان ست البنات ذاتها !!
تعرفي يا ست البنات طلعتي بريئة بشكل!! الكرسي دا ما حكاية خليها براها .... كنكشة لي بعد بكرة ... ولا تحلمي بعالم سعيد ... معليش لكن دي حقيقة ... تعرفي في مسلسل أو فيلم لاأذكر ... فيهو واحد بيقرأ أفكار النسوان ... أنا لو لقيت الخاصية دي لكن نسوان ورجال حأطلع ليك بلاوي وبالدليل القاطع .... كلنا غير ما نبدو عليه ... وأسوأنا الساسة والإداريين فهم طينة واحدة حب السيطرة والتملك والتميز عن الآخرين شكلا لا موضوعا .... حقيقة سعيد بمرورك وخلينا نعرف كل مرة إنك جيتي ولو بحرف عند كلام المجانين ..فهذا قطعا يسعدنا..... لك وافر الود والإحترام. |
|||||||||
|
|
11-22-2010, 04:24 PM
|
#41 | |||||||||
|
ود الزبيدي
|
زمــــــــــــــــــــــــــــــــــــــــــــــــ ـــــــــــان عندما تزوجت كلما تكون المرأة حامل أتمنى المولود ذكرا .. كعادة كل الذكور المنحازين إلى جنسهم .. الحكاية دي ضربت في الاولى والتانية لكن جلّن في الثالث والرابع ... ولكن بعد هذا العمر المديد تبين لي خطل ما كنت أرتأيه .. قولوا لي كيف؟
الأولاد الزمن دا قرايتهم تلتلة زي قراية البنات زمان وهسه يعني مافي فرق بين قراية بت وولد ... زمان شلن الفطور ويفكوك عكس الهوا لحدي الثانوي العالي ولا مواصلات ولا يحزنون ... تدق الكدر ..يردفك صاحب في عجلة المهم تشيل شيلتك ....بعد داك تستلمك الحكومة في الجلمعه ترحيل أكل وسكن .. والله يا جماعه وما طالبني حليفة الناس الكانوا بيلعبوا كورة الجامعة كانت بتصرف ليهم كدارات ... ومصاريف شهرية " أيوه مصاريف .....الحكومة كانت بتصرف لينا قروش كل آخر شهر" وهذا الإستثمار الحكومي إستفادت منه دول أخرى غير السودان والخليج على وجه التحديد!! دا ما موضوعنا هسه موضوعنا الإستثمار في البنات ... وزي ما قلت ليكم إكتشفت إنو أنا كنت غلطان ثم غلطان ... عندي بتين بجهز واحده فيهم مذيعة ودي الصفراء شوية كده .. أعلمها ليك مخارج الحروف وتقعد يوميا قدام المراية وتستضيفني في برنامجها .. وتعرف متى تلتفت ومتى تضحك ومتى تبتسم ... ومتى تحدث المشاهدين عن ذلك الألق الموشى بالعبير ... والليل المتدثر بالحروف واصطفاق الموج على حواف أم در ... دي واحدة . الثانية : كل يوم من الصباح قبل ما تمشي المدرسة تسمٍع لي أغنية حقيبة بدل جدول الضرب" برا ضرب برا زفت وهو نحن الضرب عمل لينا شنو؟"... حأقعد أسن ليك في صوتها لحدي ما يجهز أسوقها أوديها لي ناس محمد سليمان تبكيهو بي كم أغنية كده ... وبابكر صديق بيتم الباقي جزاه الله عنا كل خير .... بس ما حأدويها لي أحمد المك يقول ليك هويحب إحتضان المواهب الشابة ... الزمن دا كلو ماشفت أحمد الجن دا إحتضن ليهو موهبة راجل!! ولا يعملها لي عرس وما عرس وانا مافاضي لي الكلام دا ....أحمد المك هين .. المشكلة ناس دوغري وما دوغري الطالعين فيها اليومين دي !!... ولا أقول ليكم حاجة خليت الغنا حنقلب مديح .. والله برضو بيجيب ما بطال .!!!. أربط ليك رأسها من فوق كده زي ناس فدرير ونادال وأعلمها غميض العيون لما تندمج في المديح .. ولا ضرر من التمايل قليلا أثناء المديح " جوّزه بعض الفقهاء مع الكراهة"... المهم البنات المستقبل مضمون وما فيه أي مشكلة بالإضافة لظهوري في التلفزيون بين الفينة والأخرى للحديث عن هذا البيت الموهوب .. لكن بس ختّوني ناس الدار ...والجرايد إياها... الأولاد العوض على الله الإتنين طلعوا ما بعرفوا كورة ... وإلا كانت تمت الناقصة .... بس بفكر أفتل شعر واحد فيهم وأعلمه التمتمة في الحديث ومقاطعة الآخرين والتعصب الأعمي والحديث عن كل شيئ في نادي الهلال إلا عن كرة القدم.... إمكن إطلع لي زي صاحبنا رمضان وقوووووووووووووووووووووووووووووووووووووووووووووووو وون. التاني بلبسه أحمر وأصفر بس ...وأعلمه الغلاط والمكاواة ... ويركز لي علي حكاية" راعي الضان في الخلا بيعرفها" ..... وفرق يا أبراهيم .. وإتجعرني ... إمكن يطلع لينا بي كلوة حقيقة ولا فشفاش يهرد بيهو فشفاشكم... المهم جيبو إتملي !! المهم الآن أنا عملت العليّ وجهزت الأولاد وضمنت ليهم مستقبلهم ... وسأنام قرير العين هانيها... وإي زول رأسو ضارب ممكن إتصل بينا ونعمل معاينة لي ولده أو بنته ... وبعد الدراسة المستفيضة سنوجهه التوجيه الصحيح بإذن الله ... أرزقي حكومي ودقن وجلابية وكرش ولسان سنين وكثير من البسملة والحوقلة والإستغفار....أو قمصان صفر وبترقش وكرافتة ما مربوطة كويس وحلاقة مكوجنة أو شعر مفتل وهاك يا غنى.. حليل زمن ناس مهدي بكش ...المهم ما حتندموا إتصل نصل.. |
|||||||||
|
|
11-22-2010, 04:40 PM
|
#42 | |
|
د/ميرغني ..
سلامات عوافي .. وكيفنك انت والوليدات حقنك ؟ ياخوي انت بتجيب الكلام دا من وين .. انا بدت من الاخر وماشي للاول .. وغايتو الله يستر من هسي الجنبي بقول لي مالك بتضحك زي المجنون !! ودا من جنس كلامك البتكتب لينا فيهو دا .. الله يديك العافيه ويخليك لي وليداتك كما تقول جدتي (لها الرحمه) .. (بس ما حأدويها لي أحمد المك يقول ليك هويحب إحتضان المواهب الشابة) عين الصواب مافعلت ههههههههههههههههههههه ومنطقك البديت بيه الموضوع الاخير دا .. انا كنت منتهجه مع صديقي بيكا حين رزق بمولودته شمس الشموس التي سماها تيمناً بحبيبته التي اخذت منه الكثير من السنين !! والغريبه شبه اقتنع .. يا الله تكون اتصلت انت عليه وقلت ليه الكلام دا قبليني !! وانا مُتفن هنا لحد ما اكمل ماخطته يداك بالكيبورت .. ولك ودي واحترامي .. |
|
 نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !!
|
|
11-22-2010, 04:52 PM
|
#43 | |||||||||
|
ود الزبيدي
|
محمد عوض / وما طالبني حليفة ... علي الط... سعيد جدا بأنك تقرأ لي بذلك الفهم الواسع ... تحياتي لك ولبيكا ... وزمن شمس الشموس يمكن تطلع حاجات تانية ... ما تستعجلوا عليها .. بعد 7 سنة كان الله مدّ في العمر بنلقى ليها حاجة عصرية وقتها .... لك وافر الود.
|
|||||||||
|
|
11-23-2010, 08:06 AM
|
#44 | |
|
اخي وصديقي الكيك تحياتي واشواقي ياخي اخر مرة كنت معاك ماكان عندك علاقة بالساسة والسياسة لكن الظاهر كدا نويت بعد ترجع السودان ( الفضل) خلال ثلاثة سنوات تترشح في المجلس الوطني وتبدأ في الحصول على الامتيازات ..... غايتو انا من جانبي مسئول عن ( كسير الثلج) العلاقات العامة زمان .... وقصة الزواج التلفزيوني جميلة وهو تمشي جنبا الى جنب مع المسيار والذي منو ..... مع تحياتي
|
|
|
لما ترجع بالسلامة وترجع ايامنا الجميلة
|
|
11-23-2010, 08:21 AM
|
#45 | |
|
عزيزي الكيك ... لا حرية بدون حيز مكاني للممارسة وفي عالمنا العربي عامة والسوداني خاصة حدود الحرية مربوط بمدى تسلط الاخر رئيس بلد او ولاية او مدينة او قرية او حي/ ، زوج / زوجة / اب / اخ / عم / خال/ تغيب الحرية كلما زاد التسلط ونزيد كلما قل ..... وحدودها الطبيعية هي مخافة الله وحفظ حدوده ومراعاة حق الاخرين
|
|
|
لما ترجع بالسلامة وترجع ايامنا الجميلة
|
|
11-23-2010, 09:24 PM
|
#46 | |||||||||
|
ود الزبيدي
|
الأخ / مناع يا حليلك وحليل أيامك ... ياأخي مشتاقين بي الجد جد...
تخيل يا مناع إنو لحدي هسه ما عندي علاقة بي ساس يسوس ... وأطمنك عمري ما حأخش اللعبة دي ... جني وجن الإدارة والسياسة ... لم أكن عضوا في لجنة تنفيذية لنادي .. أو رابطة أو ما إليه من المسميات ... بس بقعد بعيد وما بسكت ساكت " يمكن يكون عيب " لكن هذا أنا وسأظل هكذا ...ما لاقيتك في الاجازتين الفاتو .. وحقيقة لو اجتهدت شوية كنت لاقيتك ... بس تعرف الإجازة !! أديني سنة سنتين وجاييك... سعيد بمداخلتك ورؤية أحرفك الزاهية ثانية ... لك وافر ودي وتقديري. |
|||||||||
|
|
11-24-2010, 07:22 AM
|
#48 | |||||||||
|
ود الزبيدي
|
مرحب بيك يا سامي وكل سنة وأنت طيب .. أشكر تواجدك وطلتك عبر هذا البوست ... وحتى نلتقي لك الود.
|
|||||||||
|
|
11-24-2010, 12:57 PM
|
#49 | ||
|
اقتباس:
اها لقيتني كيف امعانا فى رفع البوست |
||
|
|
|
11-24-2010, 12:59 PM
|
#50 | |
|
دكتورنا العزيز
كل سنه وانت طيب واحسرتي علي بلد كانت الجامعة فيها الثالثه علي مستوى العالم واحسرتي علي بلد اصبح المثل الاعلى فيها طه سليمان والمرجعيه ندى القلعة .............. ولقيتك اكبر مستشار اقتصادي لشئون الاسرة السودانيه وكمان لو اتلمت مع الفكرة الاقتصاديه دي خاصيه قراءة الافكار .... وتمشي اللجنة وانت عارف كل واحد عايز شنو واتخيل تهيئ لكل واحد ما يجودبه ذهنه واذا ظن انه نال الثريا .... يجد الكاميرا الخفيه عند بوابه السماء وهاك يا ابتزاز من كل نوع وعلى نفسها جنت براقش |
|
|
|
|
11-24-2010, 01:40 PM
|
#51 | |
|
الكلام كبار وانت تلامس القضايا لانك انسان وبعيد من السياسة ولكن تعيش الواقع ولو من الحكي....... والمداخلات اكثر من رائعة ودا نوع من الحرية
|
|
|
لما ترجع بالسلامة وترجع ايامنا الجميلة
|
|
11-25-2010, 11:08 AM
|
#52 | |||||||||
|
ود الزبيدي
|
اقتباس:
بركة لك التحية ... وشكرا للمرور والإضافة والتحية عبرك للرائعة أحلام ... لك ودي. |
|||||||||
|
|
11-25-2010, 11:13 AM
|
#53 | |||||||||
|
ود الزبيدي
|
اقتباس:
ست البنات كيف حالك ؟ نفسك حار !! والله تباري الحاصل في البلد دي إلا ينقطع ... وثانيا لا تحلمي بعالم سعيد ... أهو العك دا... وبكرة أسوأ .... عايزك بس تركز لي علي حكاية مستشار إقتصادي دي وتقرطي علي كده ... لأنو زي ما قال مناع إحتمال الرجعه وارد كبير جدا ...ومع مستشار إقتصادي ممكن نلقى لينا زاوية باردة كما أقترح مناع .... لك فائق ودي وتقديري ..لحضورك المميز دائما. |
|||||||||
|
|
11-25-2010, 11:18 AM
|
#54 | |||||||||
|
ود الزبيدي
|
اقتباس:
مناع كيف حالك؟ أشكر متابعتك وحضورك ... عايزنك إنت كمان مش تلامس بس ... عايزنك تخش جوه القضايا .. وزي ما قلت هي مساحه من الحرية للفضفضه .. تعال معاي وقول ... ولاشك عندي أنك ستضيف الكثير قولا وحكمة ... لك ودي. |
|||||||||
|
|
11-25-2010, 02:17 PM
|
#55 | ||
|
اقتباس:
وهي تستقطب افضل المدرسين والترحيل والفصول المريحه والغير مزدحمه والحصه ما محتاجه تاني كورس تقويه !! والرديف دا قصه براها كانت بالمدرسه فله اصحابه ومن يستشارون فيه .. اذكر بالابتدائيه وبالمدرسه الشرقيه غرب نادي المريخ .. وبطابور الصباح دخل استاذ يوسف الذي كنا نطلق عليه لقب (سيوو) وهو صارم لدرجه مخيفة .. فنده علي احد الطلبه المشهورين بالمدرسه وطالبه بالخروج من الطابور والوقوف قربه بالوسط !! فغرنا فاهنا بانتظار الامر الجلل الذي صيح له به .. وبلا شك بندق ليه دقه كاااااااربه بتخليه ينوم يومين علي بطنه !! وقال بصوت عالي : الزول دا امس كان بالاستاد وبشجع في المريخ ولامن نبذ الحكم بي يافاشل !! واخذ ينهزر فيه : في افشل منك عليك الله ياجزمة .. وطاخ طيخ طراخ كم كف وقعن علي جضوم اخينا حتي سالت منه دمعات كادت ان تعصف بعتوليته(ضخم الجته) التي يباهي بها !! ونادي علي 2 عتاله امثاله ليمسكوه حتي يتسني له جلده بي مزاج دون فرفره !! وما كان الا ان افترت ابتسامه خبيثه منهم وواحد منهم امسك بيديه والاخر برجليه وتم رفعه في الهواء كما لاشئ !! وانزل به سوط العنج للمواقف الكبيره .. فصرخ وبكي وتلولو .. ورغم ذلك .. قال نزلوه .. دا مردف !! همهمات بين الصفوف .. مردف مردف .. وبدا التحقيق .. لابس شنو انت ؟ ولا شئ يازول قول لابس شنو احسن ليك ؟ ما لابس حاجة وحات الله .. وقال امسكوه .. وانزل الرداء منه واذا به يلبس بنطال تحت .. وتحسس ايضا البنطال .. وانزله . لامن قبلنا لي غادي .. وبرضو طلع لابس ردا تحت تاااااااااااااااااااااااااني .. واخر المسلسل .. قاده الي الحمام (بدون مؤاخذه) واخرج كركاسه لستك !!! انبوبه عجل لسياره .. يحيط به جسده .. وضحكنا .. وتم زجرنا .. وزولنا عيونو مرقن بره من راسه لهول ما بنتظره !! وهاااااااااااااااااااااااااك ياجلد وكواريك وعياااااااااااط والروووووووووب ويايمه .. وكلما تذكرتها اضحك مل فمي لذلك !! واسف للمداخله الطويله ياكيك .. تخريمه بتكيف : تعرف ياكيك انا والله ما اندقيت لحد ما كملت القرايه كلو كلو !! ولك ودي واحترامي .. |
||
|
نضــج الحــــــــلم ولكــــن الزمـــــــــــن هو الذي لم يســــــــتو بعد فما جدوى أن يبلغ القـــــــلب رشـــــــــــــــــداً ســــــــــــــريعاً (احلام مستغانمي )
•
فــــــوضي الأحـــــــزان !!
• في ذاكرة الغناء الســــــــــــــــــــــــــــــــــــوداني .. • تُكل السرة !!
|
|
11-29-2010, 12:12 PM
|
#56 | |||||||||
|
ود الزبيدي
|
محمد عوض / كيف حالك ... نحن والله إتدقينا ... يا محمد .. وما عندنا مانع تجينا كل يوم وتكتب صفحة كاملة .. شكرا لدفق هذه الذكريات .....لك الود.
أعجبتني هذه فنقلتها بي ضبانتها... هل التفت أحدكم يوماً لشخص مبدع بمعنى الكلمة ورآه في حالٍ يرثى له ! هو وبقية المبتكرين المبدعين الذين تضاءلت المساحة المخصصة لهم بشكل مخيف ومثير للقلق ! أرى أن المجتمع وصل لأقصى درجة من تفخيم وتسمين الفقاعات والشكليات البائدة مما ألحق بالمبدعين حالة غبن لا تتكرر ! مما يراه من تلميع غير مستحق لذوي الشهادات العليا وتوظيف العادي والمفلس والمتعلم بذات الامتيازات فيما لو نالوا ذات الشهادة العلمية المخصصة أصلاً لدون متوسط الذكاء الطبيعي ! ولما يراه من انقضاض التافهين والمجوفين للمناصب القيادية والمؤثرة في مسيرة المجتمع _ لا أعني المُلك إطلاقاً _ التي أفرزت لدينا ركاكة المهنية ورداء التنفيذ والأداء ! المبدعين تجدهم في طبيعتهم الربانية لا يكترثون بما يتنافس عليه العامة ولا يسعون لكسب عاجل وفوري أو مغنم مادي ! بل يسعون لمعرفة الحقيقة بشكل فطري منزوع كلياً من عوامل التزمت والأحقاد والتشنج والإنحياز حتى من العلم نفسه ! في مجتمعنا ولنتناول المستوى الفكري فقط من يتابع الكتابات الثقافية تجدها في الغالب من أولئك المتورطون باستخدام تمجيد الذات بشكل مقزز ! والمتربصون لرصد الهفوات المعللة لصالحهم حتى لو ستنقلب ضدهم بعد حين لديهم من الخواء ما يكفي لتوضيح مواقفهم المتبدلة والتي تعكس هشاشة معرفتهم وقدرتهم مما يشكل ضغط مهول على المبدعين والمبتكرين الذين من خلال هذا الضغط وهذه البيئة يفقدون أهم عنصر في الإبداع وهو الإهتمام ! ولا تمر عشر سنوات إلا وتلك الملكة الربانية الجميلة النادرة فقدت قدرتها على إذكاء موهبتها وانصهرت في بيئة موبوءة بالتنفيخ والتلميع بشكل موجع موجع جداً هذه البيئة الإجتماعية الجديدة تشكلت وعَظُم شأنها تقريباً في الـ 15 سنة الأخيرة ! ومن بعدها بدأ الإنهيار على كافة الأصعدة تدريجياً بدءاً من الرياضة بانحسار نجم المبدعين وتمجيد التوافه ومروراً بوفاة العلماء المبدعين فطرياً وحلول حقبة علماء الجدل والتلقين إلى أن نصل للمستوى الفني أيضاً الذي يخسر إمكاناته الطربية الأصيلة ويعتليها ممن لا يملكون أبسط مقومات الفن ! وعلى المستوى الفكري والثقافي تراجعت المساحة المعطاة للساعين للحقيقة والمعرفة بشكل إبداعي حتى حجبت عنهم تماماً وتم تسليم المتذاكين والمستظرفين والبسطاء والناقلين صفحات وعواميد وما أن يبزغ نجمه إلا ويطمع بالمزيد ويتجرأ على الأحكام ويتطرق للمرأة بآراء جريئة ! والفريق الآخر تم اقتياده مع رقبته ليبلبل علينا ليل نهار بشكل يبعث على التقيؤ وهو يهذي بفلسفات بائدة ومشنوقة ومعطلة وتوقفت عن العمل ونتائجها لا تتجاوز أرنبة الأنف وعوضاً عن ذلك يشكك ويحارب ويقلل من شرائع فذة ومنظومة حياتية مستحيلة الإيجاد....... هذا التشكيك يبعث أعلى درجات اليأس لمتوسطي الذكاء فضلاً عن المبدعين الذين ينصدمون فوراً من فئات مسحوقة بشكل درامي أليم ! تتفرغ لدلق أفكار دبقة لا يمكن لأقدام تسعى للمعرفة والرقي أن تسير عليها ! الموهبين والمبتكرين الآن تحت وطأة الفئة التي من المفترض أن تُقاد أصبحت تقود الدفة وتحاكي انتفاخاً ، والردىء الآخر منهم يمتطي تياره وينفلت علينا بكامل جهله جهله الفظيع عما تعني الحياة ! ولا حول ولا قوة للمبدعين سوى الصبر أو الهجرة مما أدى إلى إنهيار شبه كُلي في أغلى ثروة (الموهبة ) . |
|||||||||
|
|
12-02-2010, 12:20 AM
|
#57 | |||||||||
|
ود الزبيدي
|
صديقي / معاوية علي الشفيع ... قد لا يعرفه معظمكم .. قضى وقتا قليل في فترات متقطعه بالحصاحيصا .. درس بالجنوبية الإبتدائية .. وهو رجل مسكون بالإبداع والكسل ...له رأي سالب في بعض الأمثال السودانية .. وكان قد إبتدر نقاشا في هذا الإطار وكتب حوله ولكن توقف لأسباب أهمها قد تم ذكره ... وهذه محاولة مني لتقليده ...
الراجل افجخي بصلة قبل ما يبقي اصلة يعني بإختصار الراجل تِفيهو قبل ما يتِفِك ... حرب عديـــــــــــــــــــــــــــــــل دا ما عرس ولا حاجة ... ولشرح المثل للذين لا يعرفون فجخ البصلة " وأكيد لغير المتزوجين " .. تفجخ البصلة عادة ليس في فنادق كنون .. وليس على رخام ولا تحت المكيفات ... وليس بيد هيثم أو لؤي أو حتي صلاح أو عادل ... فاجخ البصلة غالبا ما يكون خير الله أو عبد الجبار أو آدم .. وساحة الفجخ تكون في شمش الله الحارة دي حيث لاوقت لأي من هؤلاء لتقشير أو خلافه .. توضع البصلة على سطح صلب " خشبة حجر.. أو ركبة الفاجخ نفسه أو يده الأخرى" ثم يقوم الفاجخ بضربها على أم رأسها تتفرطق بعدها البصلة علي ستين حته.. وشظايا أصغر مما يستطيعه الشيف أسامة بكل أدواته .... تقدم الشظايا للضيوف لقرشها مع الوجبة ... وبالهنا والشفا ..... عليكم الله شوفوا النسوان ديل القدرن عليها ؟ ... فجخ زي دا مالهم عليهو الناس الماشين فوق دربنا ؟ وشوف كمان التهديد للما بتفجخ البصلة ! يعني يا هناية كان ما فجختيهو حيبلعك جب زي الأصلة .. وهذا التهديد لضمان القيام بالفجخ كما تفعل سابقاتها!! نحن غايتو " أنا وأخوي الجاهوري " إتفجخنا وإتفرطقنا علي 600 قطعة الدور والباقي علي الجايين .والمفجوخين جديد" أنا قلت إسم زول يا جماعه؟".. ما تخافوا فجيخة بسيطة كده والأمور تمشي !! يمكن لمن إنتوى الزواج ... أن يحدد قبل الزواج مع الخطيبة كيفية الفجخ وشدته وما تتغشوا .. ما ترضوا بي أكثر من فجخة واحدة يا صابت يا جابت !!! خاتمة: بالله يا جماعه شوفوا ليكم جنس فهم !! الرجال يوصوا في العريس : أضبح الكديس وما ضبحت الكديسة !! والنسوان يوصن في العروس : أفجخيه وما تفجخيه!! دي بداية قالوا لحياة زوجية سعيدة ... نفرين مفترض فيهم يعيشوا مع بعض طول العمر .. يقتسمان الحلو والمر " وما أكثر المر" .. نفرين عايزين يكونوا أسرة فيها أطفال يجب تربيتهم وليس إطعامهم وكسوتهم فقط!! دي بداية دي ؟ والله أخير منها بداية هلال مريخ الأخيرة !! حرب عديل زي ما قلنا ! طيب الجابرنا والجابركم شنو ... لا تفجخونا ولا نبلعكم .. ما دام الحكاية كده كل قرد يطلع جبله ويا دار ما دخلك شر .... بحثت كثيرا في التراث الشعري العربي قديمه وحديثه ..فلم أجد إلا النذر القليل عن الزوجة تحديدا وليس الحبيبة عموما .... وخليكم شاهدين يا جماعة أنا ما جبت سيرة أي زول : ولا بيكا ولا أبو ذر حسن طه ... عشان بعدين ما تقولونا كلام ما قلناه..... لكم ودي... وكديستي. |
|||||||||
|
|
12-07-2010, 11:20 PM
|
#58 | |||||||||
|
ود الزبيدي
|
النسوان ... وما أدراك ما النسوان ؟؟
إطلعت على موضوع في إحدى المنتديات يطرح سؤال على الزوجة: أيهما أحسن لك... زوجك يتزوج عليك ولا يموت؟؟ أعجبتني الفكرة والسؤال نفسه يعني حكاية إنو إتزوج دي زي المات .. يعني خيارين قريبين من بعض .. إتخيلت إجابات بعض نسواننا وتصرفت في بعض الإجابات الموجودة بالمنتدى ... يلا نشوف: السُرة بت بابكر: قالت بعد أن قشقشت دميعاتها : الموت حق ... والدنيا دار الغش .. داير بيها شنو ؟ أخير ليهو يموت...إستغرك يا ربي .. ما دايم إلا وجهه. ست النفر بت الدابي : قالت بعد أن عضت على أصبعها السبابة: أحيّ عليه: يتزوج وبعدها يموت طوالي عشان ما أزعل وأبكي عليه. ست البنات بت منصور" على فكرة دي ما ست البنات حقتنا": يتزوج لكن بشرط يبني لي فيلا في المهندسين ... ويدخل الأولاد مدارس أجنبية ويدفع أقساطهم كلها ... ويملى لي يديني ورقبتي دهب ... ويسجل لي العمارة حقتو بي إسمو وبعد داك يموت. حبوبة بت تاج السر " برضو دي ما حبوبة بتاعتنا": شوفوا يا أخوانا لمصلحته أحسن يموت لأنه بعد ما يموت أنا حأدعو ليه ... لكن لو إتزوج حأدعو عليه .... شايفين الحنية دي ؟؟ السارة بت جاه الرسول قالت: أحسن يموت .. حياته من موته فرقها شنو ؟؟ أرملة ممكن ألقى لي زول يعرسني .... لكن زوجة تانية ما عندي فرصة ... ولو طلقني فرصة الأرملة أحسن من المطلقة .... سلوي عادل: أحسن يموت ... بس أنا حأموت معاهو .. وبعدين نخش الجنة ونكون زوجين فيها ونعيش في تبات ونبات!! يا أخي دي جنس عنكشة !! سيك سيك معلق فيك . سألت زوجتي الفاضلة فقالت: إن شاء الله لا تفوت لا تموت !! طيب لو فرضنا مثلا .. إفتراض ساكت كده إنه الموضوع ما فيهو فوته .. يعني أنا ما حأمشي كله كله... يوم هنا ويوم هناك ؟ قالت وهي تلوي ببوزها: والله ما سمعنا بيهو زول يوم ميت ويوم حي!! لكم ودي . |
|||||||||
|
|
12-13-2010, 03:02 PM
|
#59 | |||||||||
|
ود الزبيدي
|
كنت قد وعدتكم بمناقشة بعض الامثال السودانية التي لم تتواءم مع تلافيف دماغي الخربة .....
مثل بيقول: القحة ولا صمة الخشم .... نعم ..... نعم !!! والله أخير صمة الخشم خمسمائة مرة .... أكيد الزول القال الكلام دا ... ما شاف الكتكوتة" القتقوته" " السعال الديكي" معنى المثل أن يحدث لك شيئ أيا كان .. خير من أن يصير لا شيئ.... العكس تماما مثل أو قول متعارف عليه عند الغربيينno news ,good news أن يحدث لك شيئ سيئ مثل الكحة مثلا لا يمكن بأية حال خير من أن يظل فمك مغلقا .... ما دفعني لكتابة هذه المداخلة .. أنني لفترة لم أكتب بهذا البوست " ربما صرت عاقلا قليلا!! لا أدري.."....فحدثت نفسي بكتابة أي شيئ , والقحة ولا صمة الخشم .... على فكرة الخشم هنا في بلاد اللغة العربية تعني الأنف .... يقولون مثلا عندما تطلب طلبا من أحد : من ها الخشم.... إي من عيوني ... فتخيل صمة الخشم عندهم ستكون كيف؟؟ يعني أن الكحة خير من أنف مقفل " يعني ولا نفس" وفي هذه الحالة .. يكون المثل صحيحا .... كسرة: في أول أيامي هنا عندما يأتي أحد يشكو من ألم بالحلق , كنت أطالبه بفتح خشمه لمعاينة اللوزتين ... كان بعضهم يبقى مندهشا لا يفعل شيئا ويكتفي بالنظر إليك بعينين واسعتين ... بينما يحاول الأكثر ذكاء جل جهده لفتح أنفه.. أما أنا عندما تكرر عدم فتح الفم عند طلبي بفتح خشومهم .... ظننت وبعض الظن إثم , أن فتح الخشم عندهم عيب أو قلة أدب , فتوقفت عن طلبهم ذلك , حتى تبين لي ماهية الخشم عندهم.... ولكن طاف بذهني أولا موضوع فتحة الخشم بتاعة العريس .... تخيلوا زول يدفع فتحة نخرين !! لكم ودي. |
|||||||||
|
|
01-22-2011, 04:01 PM
|
#60 | |||||||||
|
ود الزبيدي
|
Csi _hassheisa
تهيؤات الرقيب أول عثمان على وزن csi ميامي ونيو يورك .....في مكتب التحري .. البتجاويش " رقيب أول "عثمان يحدث العريف / رقية وهومتكئي على باب المكتب قائلا: ألم تجدوا تطابقا للdna الموجود على جثة القتيل. العريف رقية : لم نجد أي تطابق من خلال قاعدة البيانات المركزية . فغر الرقيب أول فاهه من الدهشة: إنتِ بي صحك يا رقية؟ : أعمل ليك شنو إنت ما عامل لي فيها سي أس آي ... بإختصار جنابك سقنا القصّاص ... وبارينا الدرب لحدي قريب أبو عشر , بعدين المطرة بتاعة أول أمبارح روّحت أي حاجة!! عثمان محدثا نفسه: والله المسلسلات دي حتبوظ لينا الشغل عديـــل! سي أس آي وسي أس زفت ....تعالوا شوفوا العك دا هنا كيف ... قصاص وعربية دخانها معلق في السماء زي كومرات المنتدى ... وعساكر ما لقوا شغل في مكان تاني قالوا أحسن يشتغلوا عساكر....وحكاية هايصة غير مرتبات أخير منها القعاد ساكت .... بالله ديك بوليس ونحن بوليس؟؟ لكن بيني وبينكم هم ما عندهم جرائم تفتح النفس ... ومجرمين زي الليل .... نضــــــــــــــــــــــــــــاف والله الواحد يجي عندنا هنا يكون وزير خارجية ... يا جماعة مجرم حرامي لابس بدلة وكرافته؟ ثم: ياأخي والله في ! اليومين دي الحرامية الجد جد عندنا كرافتاتهم تتخابت .. لكن مافي نط حيطة ! أنا قاصد الحرامية الصغار ناس أبو فرار وأبو منشار ... لكن تعالوا إنتو مافي نط حيطه في ميامي لي شنو؟؟ ولا عشان ما عندهم قصاصين؟؟ وجرائم الكتل دي عندهم زي شراب الموية ؟ نحن نحمد الله جريمة في السنة مرة....لكن يا عثمان ياأخوي نحن الكتيل عندنا جماعي وبرضو أصحابنا بتاعين الكرافتات...بي الجوع بي الغم بي المبيدات... بي الحرب عديل غربا وشرقا وجنوبا !! حكاية غريبة والله !! تعرف أنا أخلي البوليس دا وأشتغل محلل في القنوات الماليات الدنيا ديل!! يعني شوف المجرمين والقتله عندهم هم حثالة مجتمعاتهم ومنبوذيين مهما عملوا وكنزوا من مال!! ونحن عندنا المجرمين هم الصفوة من مثقفينا ... قريناهم بي قروشنا عشان يجوا يطلعوا زيتنا ويفتروا علينا! طيب بي كده نحن أحسن منهم ... نحن عامتنا أحسن من خاصتنا مليون مرة ولو واحد إرتكب جريمة تكون بدافع الحاجة....وخاصتنا الهم شوية لكن عينهم طايرة وما محتاجين ! : تعرف أنا المسلسلات دي حتخربني وتقطع عيشي ... مالي ومال الخاصة والعامة ... والموضوع يجر ويجيب ليهو سياسة وكلام فارغ ...شيل قفتك دي يا ولد وأدقش السوق المولع دا ... كانت رقية تراقب عثمان خلال حديثه لنفسه ... وتحدث هي نفسها بترك هذه الشغلانة التي جعلت من عثمان يحدث نفسه بصوت مسموع ....ست الشاي أجي وأمشي بي كيف لا جنابك ولا حبابك .... قال الزين لزميله وكيل عريف عادل: الدنيا دي كلها صواميلها حلجت ... وكل زول بيكلم في نفسه...!! ثم محدثا نفسه أيضا:ديل مواهيم وعايزين يصلحوا الدنيا ... سيبك يا عمك ... بكرة أحلى!!! |
|||||||||
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
 |
 |
 |
|
 |
العرض العادي
