ود مسيخ يعزي حسناوات البرازيل ..

بعد طحن الماكينات الألمانية للبن البرازيلي بالهزيمة الساحقة لأبطال السامبا 7 أهداف مقابل 1 في مونديال 2014 والدموع الحزينة التي تقاطرت من مشجعي السامبا وخاصة من الفتيات ، تبادل مرتادي مواقع التواصل الإجتماعي من عشاق السامبا أشعاراً حزينة على هذه الهزيمة فكتب الشاعر ( ود مسيخ ) متحسراً على حزن الحسناوات قائلاً :

ليه ياكروز تبكيهو الغزال الشارد
برازيلية قدرها فى الثرى وعطارد
كان ما انت زول حقار ودمك بارد
ما بتقبل تشوف دمع العيون وتطارد

عيون كتالة لو شافن قبيلى كلوزا
ما بلعبلو تونى كروز واختها موزا
مقاعد السامبا وكتين للحسان محجوزة
شن خصانى فى المانيا وقضية فوزة

كان بى ايدى كل الكون اكون فى طوعن
والبكاء والنواح ما بنكتب لى نوعن
الشايلات ثمار البرتكان فى فروعن
نيمار كان شديد ما اكنا شفنا دموعن

وكتين قشت الدمع الملا النضارة
حسيت قعدتى وسندة قفايا خسارة
الما شالت الدوكة وبروها صغارة
ما تستاهل الدمعة البقت قطارة

ليه ياخديرة بتزود عليها جراحة
وتخلى اللؤلؤ اتقاطر على التفاحة
لو نيمار دخل بدرى ولقالو مساحة
كان شفنا ابتسامة وانشراح وسماحة

الشافعة التلووح للخلوق بى ايدة
كان عشمانة فى كورة ونتيجة سعيدة
لو شاف الحكم هادى الدموع فى خديدة
مفروض ارجى نيمار انجبر وإعيدة

يا المخرج اقيف واللقطة لى ما تعودة
وما بحمل اشوف سيل الدموع فى خدودة
بعد ما المانيا عملت ها العمائل السودة
كرهت المرسيدس و البورش والاسكودة