التميز خلال 24 ساعة
 العضو الأكثر نشاطاً هذا اليوم   الموضوع النشط هذا اليوم   المشرف المميزلهذا اليوم 
قريبا

بقلم :
قريبا
آخر 10 مواضيع
الفقرا العزمو القطر (الكاتـب : - مشاركات : 0 - المشاهدات : 192 - الوقت: 06:16 AM - التاريخ: 01-18-2024)           »          إلى وطني .. لن تأتي العصافيرُ[ (الكاتـب : - مشاركات : 0 - المشاهدات : 615 - الوقت: 06:16 PM - التاريخ: 10-03-2023)           »          كل المواسم يا بلد إطاقَشَن (الكاتـب : - مشاركات : 0 - المشاهدات : 362 - الوقت: 06:11 PM - التاريخ: 10-03-2023)           »          الشوق غلب (الكاتـب : - مشاركات : 0 - المشاهدات : 838 - الوقت: 04:36 AM - التاريخ: 05-29-2023)           »          سلام ومحبة (الكاتـب : - مشاركات : 0 - المشاهدات : 7700 - الوقت: 08:04 AM - التاريخ: 10-03-2022)           »          «الفقرا» شوق وحنين (الكاتـب : - مشاركات : 0 - المشاهدات : 10309 - الوقت: 01:25 PM - التاريخ: 08-13-2022)           »          جمعية الصفوة السودانية تحتفي بتدشين كتاب ذكرياتي مع الشيخ الوالد محمد أحمد حسن بقاعة (الكاتـب : - مشاركات : 0 - المشاهدات : 10244 - الوقت: 03:00 PM - التاريخ: 07-16-2022)           »          يوم الرحول.. (الكاتـب : - مشاركات : 0 - المشاهدات : 6033 - الوقت: 03:36 PM - التاريخ: 07-14-2022)           »          سلام ومحبة (الكاتـب : - مشاركات : 1 - المشاهدات : 6842 - الوقت: 07:16 PM - التاريخ: 05-08-2022)           »          مبروووك (الكاتـب : - آخر مشاركة : - مشاركات : 1 - المشاهدات : 7252 - الوقت: 04:33 AM - التاريخ: 08-15-2021)


الإهداءات


العودة   منتديات الحصاحيصا نت alhasahisa > «۩۞۩-المنتديات العامه-۩۞۩» > «۩۞۩-قسم المكتبات والتوثيق -۩۞۩»

«۩۞۩-قسم المكتبات والتوثيق -۩۞۩» قسم للمكتبات يستضيف الكتاب والمبدعين من أبناء الحصاحيصا بصفة خاصة وكبار الكتاب والمبدعين السودانيين بصفة عامة

إنشاء موضوع جديد  إضافة رد
المنتدى المشاركات الجديدة ردود اليوم شاهدة المشاركات المشاركة التالية
 
أدوات الموضوع انواع عرض الموضوع
#1  
قديم 11-24-2013, 07:24 AM
المحجوب غير متواجد حالياً
لوني المفضل Brown
 رقم العضوية : 10156
 تاريخ التسجيل : Nov 2013
 فترة الأقامة : 3779 يوم
 أخر زيارة : 03-07-2016 (07:58 PM)
 المشاركات : 494 [ + ]
 التقييم : 18
 معدل التقييم : المحجوب is on a distinguished road
بيانات اضافيه [ + ]
Red face مكتبة المهندس المحجوب



التحية والشكر لكل من ساهم في الإنشاء وجمع كل هذا الحشد من ابناء الحصاحيصا علي صعيد واحد . لسان الحال يدعو لهم بالتوفيق ، وكتر الله خيركم ما مشحودين .





آخر تعديل ود الحصاحيصا يوم 12-02-2015 في 09:43 AM.
رد مع اقتباس
قديم 11-24-2013, 04:33 PM   #2


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
Red face حسناء :



سكنت بجوارحي حسناء
ذهبت بالعقل وباللب
ملكت من حسن الدنيا
ما فاق خيال بالوصف
فسألت من أين أتيتي
قالت من اعمق وديان الحب
أجهل عنوانك . . . سيدتي
قالت من يسأل أبدا لا يخطئ

( من خاص كلامي ).
المحجوبنقرتين لعرض الصورة في صفحة مستقلة


 
التعديل الأخير تم بواسطة ود الحصاحيصا ; 10-07-2014 الساعة 09:04 AM

رد مع اقتباس
قديم 11-25-2013, 06:59 AM   #3


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي مهن تحت المجهر



من باب ما تفهموني غلط
مهن تحت المجهر :
منذ أن وطئت قدماي ارض الوطن وخاصة في الفترة الاخيرة تعودت بعد صلاة الصبح الخروج للبحث الدائب عن شئ لا اعلمه ( ولكني لازلت ابحث عنه وسط كومة تبن ) ولما العين تشوف شوية ، اقوم اغير نمط البحث في ليلة البحث عن الزلابيا ، وادفع رسوم التحسين فمن البيت متوجها الي الركن الشمالي الشرقي للحي والذي تحتله الحاجة عشة ست اللقيمات والتي تعطي دروسا مجانية في النظام والتعامل مع البشر ( والله كان كسرت رقبتك ما تديك لو كان في واحد جا قبلك ) . والسبب في إدماني لهذه العادة الممتعة هو ما أشاهده من مناظر لأنماط بشرية متباينة وحركة سريعة متقاطعة في كل الاتجاهات بتناسق وحيوية غير عادية لسكان المنطقة من عمال وموظفين واساتذة وطلبة وطالبات بمجمعات التعليم الخاص بالحي وخارجه . وطبعا إتجاه الناس في زمن الغبرة الوطني بقي دلوقت نحو الكسب الصاروخي التصاعدي و الانجراف نحو الاعمق في ظل الهجمة الهمجية للتعليم والمناهج ، فبات الإستثمار في التعليم زي صيجان الطعمية وحيشان السمك وقطاطي البيتزا و كلاب الحر ، لانها ما محتاجة تخصص ولا مؤهلات ، بس تكون ( إيدك طاعمة ) ، لانهم وجدوا الشغلة افضل واكثر ربحا من البقالات والسوبرماركت والصيجان والركشات !!!!!!
وعلي ذكر الركشات دي ! من ضمن ملاحظاتي بالمراقبة والترقب والمشاهدة المباشرة البقوم بيها الصباح الباكر ، والمسح الراداري والاجتماعي وبما فيه من المتعة والعجب والتعجب من موقع حاجة عشة . تتجلي الدهشة في رؤية بقالة ( الحياة ) الجديدة المقابلة للمقر الدائم لحاجه عشة ست الزلابيا ( بالمنظار العادي والخاص بالجنب ) . ومما اثار دهشتي أن صاحب البقالة قد ركز بعلم واستراتيجية وتخصص في بيع الفحم المعبأ سلفا ( التغليف المقدم ) بورق السلفان في اكياس من البلاءستيك بعبوات مختلفة الاحجام حتي يجد كل مواطن قدر جيبه وما يكون في باقي يرجع والاكياس من نفس الفصيلة والنوع الذي حرّمه الوالي اطال الله بقاءه في الولاية بفرض العقوبات الرادعة ( ولازال البلاءستيك يباع في المحلات ويعاقب مستخدمه ( بس دي كيف دي ) يعني التصنيع والتحريم متلازمان يسيران بنفس الاتجاه !!!! ).
من اميز المبيعات الصباحية لصاحب البقالة هي الفحم ، تجي ركشة ماشة تقيف قدام البقالة قبالة ( قسم الفحم ) فتنزل شابة ، يا عيني علي الشباب والاناقة المتأنقة المكتملة من كلو مما يصيبي بالحيرة لدخول هذه التحفة المحلاة بالكريمة والقشدة للبقالة تدخل وتطلع شايلة ليها كم كيس بتاعة فحم ( يا أخوانا رسونا في شنو ؟ ) ثم تمتطي الركشة بعد قليل من الحوارات والمداولات والتوجيهات و مشوارين تلاته لداخل البقالة بأمر المعلمة المتواجدة داخل الركشة وعينك سرك ، معلمة ولا كل المعلمات كأنها بالتعليم العالي او الخاص . أيادي مكدسة بالأصفر البراق ، ومن الالوان الزاهية أثواب وبنفس لون الحذاء لون الطرحة ( يعني الراس والكراعين من نفس اللون ).
في بداية الامر كنت مندهش كإندهاشي بما يجري في البلد ، وانا أقول : ( البلد دي ماشيه كيف ؟ و وين ؟ وكيف ما زالت ؟ و محسوبة شنو ؟ ).
لما سألت من الظاهرة العجيبة دي قالوا لي ديل ستات الشاي والقهوة بكامل العُدة والعتاد . الزينة وحسن المظهر والمغنطة الموجبة والتمنع ، مما جعل الشباب يسيرون زرافات ووحدانا ضاربين بما يحدث للبلد عرض الحائط . وما أن يروا ست شاي ووصيفتها التي تكمل باقي الفضل فيهم ! حتي انفضوا من حوله وتركوه هاملا بلا وجيع ، صوب العارض المَرَضي . وازيدك من الشعر بيت ، كباية الشاي بي أثنين جنيه وكباية القهوة بثلاثة جنيهات ، اما القهوة في جبنة فبعشرة جنيهات .
لذا فانا العبد لله البالغ الراشد ، الممتلك لقراري وحريتي ، وبكامل قواي العقلية وبشهادة الجميع " ما عدا المدام ، عندها راي " قد قررت بلا رجعة ترك مهنتي الحالية ، وإلغاء المشروع المستقبلي قيد التنفيذ السابق لعمل ( حُقة سعوط ) تركا باينا وبلا رجعة ، وبلا ندامة ، وأن التزم أمام الجميع بان أعمل ست شاي برغم المصاعب التي ستواجهني حيث اني لا أملك المؤهلات المطلوبة !) وأن أحترم قوانين المهنة واعرافها ، واسرارها وخفاياها ، وبالله التوفيق .
صدر تحت توقيعي في اليوم الحادي والعشرين من نوفمبر من العام الميلادي 2013 .
* المحجوب *


 

رد مع اقتباس
قديم 11-25-2013, 04:44 PM   #4


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي إنتو أرفعوا الدعم ونحنا نشد الاحزمة :



قبل فترة مشيت السوق اشتري كيلو موز ، وبما انو المسافة من البيت للسوق في حدود الكيلو متر واحد ، ركبت ركشة بي تلاته جنيه ماشي وتلاته جنيه جاي ، وده في مرحلة رفع الدعم الاولي ، يعني كلفتني ستة جنيهات للمواصلات فقط + تلاته جنيه كيلو الموز ، بقت كم ؟ تسعة جنيهات التكلفة الكلية . يعني عشان تاكل ليك كيلو موز لازم يكون عندك تسعه جنيهات عدا نقدا ( كاش ) يعني ، وبما إنو الموز بيستخدم من لعيبة التنس الارضي للطاقة الفورية ولا سائل في المصنف الاول في التنس الارضي ، ولعلمك ، كيلو الموز والكيلو متر تكلفتهم واحدة .
طيب ، امبارح برضو عملت رحلة مماثلة عشان اجيب السيد كيلو الموز في مرحلة رفع الدعم عن المحروقات الثانية ، اصلو انا دخلت دور الاربعة في (atp رولان غاروس ) وبرضو ركبت الركشة نفس مسافة الكيلومتر ! بس الركشة أخدت خمسة جنيهات المرة دي لزوم رفع الدعم ، ولقيت كيلو الموز بي اربعة جنيهات برضو لزوم رفع الدعم ، وطبعا من الناحية العلمية داخل في خانة الطاقة لسعراتو الحرارية العالية ، دي حقيقة علمية ما فيها شك و الواجب يدخل معاها في خانة المحروقات زي ما الطلح تم ضمه في تصنيف العالمي للمحروقات .
قلت يا ولد كده لحد هنا حسابك صاح ، ياها التسعه جنيهات بتاعة المرة الفاتت عدا ونقدا ، مع فارق بسيط في تركيبة الموضوع وهي إنك حا ترجع البيت كداري بدل الركشة في العودة وبما إنو الحركة محتاجة لي طاقة ! لذا حاتاكل كيلو الموز الاشتريتو لي ناس البيت . وأكيد حا تستهلك الطاقة بتاعتو دي في الرجعة للبيت ، وترجع ليهم بي سماحة الوصف . و كأنك يا ابوزيد ما غزيت .

نصيحة :
الكلام الما بدخل الراس ! الزول ما يقولو للناس .
" المحجوب "


 

رد مع اقتباس
قديم 11-26-2013, 07:32 AM   #5


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي شوقي المرسال ؛



مرسالي شوقاً تعب شوفت ملامحك مره
وكيف حالي المعاك وشكوت فؤادي المُره
مكتولك مجافي النوم مافيهو حيل بالمره
ما العين شافت والقليب حنه والحبيب مره

رباعيات ( من خاص كلامي ).
" المحجوب "


 

رد مع اقتباس
قديم 11-27-2013, 06:30 AM   #6


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي الشكية لي أب إيداً قوية ؛



من البارح ومما فكرت في النوم إلا و الهم اتشعبط فقرتي وكنكش ، ودلف علي المخيخ وعشعش وبيض وفرخ ، ومن المخيخ بي تخريمة ما بين فصيى المخ زحف زحفا بطيئا نحو الناصية المسكينة القابعة المستكينة في مقدمة الجمجمة . زحف عليها بخساسته المشهودة مقطوع الطاري الهم وبخفته المعهودة وتمسكن لها حتي تمكن منها ، وهنا بدأ بتنفيذ بنود الموآمرة الدنيئة بالاستحواز التعسفي والاحتلال الهمجي علي مخارج و مداخل قنوات الاتصال بالاوامر والسيطرة علي طرق الامدادات الدفاعية والمقاومة الوطنية وقطعها .
و الاسباب كلها من مقطوع الطاري الكيان الباعوضي المتسلط بالتعاون مع شركة إمدادات الطاقة الكهربائية ، شكيت الاتنين علي أقوي مني وأقوي منهم ، ويا الله توريني فيهم يوم وتبرد لي بطني فيهم يارب العالمين .
لانهم خلوني نمت نومة عدوكم لا عارف رقبتي في السما وللا في الواطه والليل كلو أدافر في المصارع جون سينا وشي ألاندرتيكر وكين وهم لآمين فيني خبت ، وهو كمان الله لا بارك فيهو هد حيلي وجابلي الهضربة الشايفنها دي والنوم طار طيرة الدولار الما ركَّ بعدا ، وده الخلاني أقعدت اكتب والمغسه شاقاني واقول إنو البحصل ده نتيجة حتمية للعكة الحاصلة " فالحياة أدوار يقوم بها الانسان في تكليف مستمر ، مبرمج علي الفطرة التي فطر الله الناس عليها ، وفي احداث مخططة بدقة متناهية تسير وفق تسلسل زمني وتوافقي ، ذو صلة متصلة موقوفة علي ما سبقه من أحداث مبنية عليها نتيجة وتزامنا . فكل شيء في هذه الدنيا بقدر الله ، ومن الخيارات ما هو بقدرة الفرد ، فلك الخيار في فعل دون الآخر وهو ما جادت به نفسك بحسب المعطيات المتاحة لديك من إيمان ووازع ديني وخُلُق بحسب البيئة المكتسبة من تربية بيتية وتعليمية ومجتمعية .
ولاة الامر ليسوا ببعيدين بل هم الاساس ولهم اكبر النصيب فيما يصيب ، فما لله هو لله ، فهو من لا يُسأل عما يفعل وهم يٌسألون . وما بيد ولاة الامر هو ’ كلكم راع وكلكم مسئول عن رعيته ‘ هوالمسئول عن الخُلُق العام من القوام والانحراف ، الخلق الصالح وسوء السلوك ، والجريمة والاصلاح ، الفشل والنجاح . . . الخوف و الترهيب و . . و . . و . . بدءا بالامر بالمعروف والنهي عن المنكر والبغي والربا واكل اموال اليتامى من الناس . فاليتيم ليس يتيم الاب والام فقط ، بل يتيم القانون ويتيم الدولة وولاتها ومؤسساتها ، و ديل كمان الله . . . . . . . . . !
فاما اليتيم فلا تقهر واما السائل فلا تنهر واما بنعمة ربك فحدث .
عليكم الله ما تلوموني في الكلام القلتو ، ده ما من العليى والفاهم حاجة يشرح لي .
والله لا يضيع أجر من احسن عملا .

نصيحة : الكلام الما بدخل الراس ! الزول ما يقولو لي الناس .
" المحجوب "




 

رد مع اقتباس
قديم 11-27-2013, 01:02 PM   #7


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي اللهم كفينا شر المحن البجن تارات





المسألة بقت ما بنسكت عليها ياناس ، والبشوف حاجة كدي عوجه وما راكبه عدلا ، ما يمر فوقا كدي مرور الكرام ! لازم ياخد فيها خطوة عسي ولعل يكون فيها الصلاح والنجاة .


الراجل ده كل يوم بمر من قدامي ويسلم علي بكل أدب وإحترام ، مافي كلام ، في منتهي الادب والهدوء والتواضع . ومنتهي الاناقة والنظافة ، يعني مالي هدومو فُل .
. من كم يوم جا كالعادة ماشي بكل أدب وهدوء واحترام ، منتهي الاناقة والنظافة . عاين لي وإبتسامة تملا وشو و سلم عليي بي إنحناءة ذي بتاعة اليابانيين من مسافة كده ، و رديت عليهو التحية بأحسن منها . لاحظت انو فيهو شي غريب ، اولا التحية بالانحناءة وما صاحبها من إبتسامة مافيها شي كتير يتقال ، وتانياٍ انو شايل كمية زهور كتيره في جيب القميص زهرية ما تشيلا ، ورافع لي يدو بالتحية مسافة وما نزلها لحد ما بدي انا خدرت و لحد ما غاب عن نظري بي ركن البيت . اخدني الشك وقلبي أكلني ووهوشت وقررت لازم اتابع الموضوع بي نفسي ، وأشوف الاسباب لي آخرها ، سألت المشتغلين بالشمار الطازج :
الحاصل شنو يا اخوانا . . . . الزول ده يا اخوان مالو ؟ والحصل ليهو شنو ؟
قالوا لي بعد ما إتفقوا علي الرواية من مختلف مصادرها : إنو الشخصية دي ، نام أمبارح في أمان الله ،بعد ما إتعشي وشرب اللبن وشاهد التلفزيون !وكان فيهو بالامارة برنامج إستضافوا فيهو أحد كبار رجال الدولة ، وكان بيتكلم عن اولويات المسئولين لتنفيذ الخطط المستقبلية للتنمية في البلاد ، وبعد ما إنتهي البرنامج قفل التلفزيون ، وبس . . . . . . . . صحوهو الصباح لقوهو مقلبن وما ياهو !. . . . . إكون العشا الاكلو وللا اللبن الشربو ده فيهو حاجة ؟؟؟؟؟


" المحجوب "
نصيحة : زي ما قلت ليكم ـ الكلام الما بدخل الراس الزول ما يقولوا للناس .


 

رد مع اقتباس
قديم 11-28-2013, 06:39 AM   #8


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي من أقوال أ . د . أبو العريف الحكيم :





قال أ. د . أبو العُريف الحكيم بعد الهضربة والتخريم :



والله يا أخوانا الجماعة ديل الشغَلًة دي فكـت منهم عدييييل وغلبتهم .


بس . . . . ! نحنا والله الما فاضيين !

. . . . . . . باقي عندنا سبق حمير . . . ! ! !

أ . د . أبو العريف الحكيم .


 

رد مع اقتباس
قديم 11-28-2013, 07:54 AM   #9


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي الاعوج العمرو ما بتعدل ؛




صاحبي الطيب من محبي تربية الحيوانات ألأليفة منذ الصغر في البيت وكان يربي الغنم والحملان والعتان والارانب وتلقي البيت جايط جداد وكدايس وسواسيو بمختلف ألألوان والاحجام حتي الكلاب وألأرانب عندو ممثلين ليهم في الجالية ألأليفة بتاعتو دي ، وبالرغم من تحفيرها لي البيت والجحور وسبحان الله ، و برغم ألإختلافات والعداوات الازلية بين بعض أعضاء الجالية إلا انهم متعايشين مع بعضهم البعض بحكم النشأة والتعود والولاء التام والإمتنان لرعايتهم وتوفير ألأمن وألأمان وألإطمئنان من أخونا الطيب .
أخونا الطيب ماشاء الله حسو ألأمني عالي ويحب أن يكون مطمئنا علي عدم تمرد مقتنياته والمجموعة النادرة بتاعتو من الفصائل ألمتآلفة . جادت عليهو القريحة الفزعة بفكرة تأسيس جهاز أمني لضمان سلامتو و حراسة تلك الفصائل النادرة التآلف والتمازج ذات الطباع المتباينة ، رغما عن الأعراق والأعراف المختلفة المتباينة.
لم يتوصل ألأخ الطيب لشئ مضمون وما يرضي طموحو في شركات ألأمن المتخصصة في المجال الامني . وبعد دراسة متأنية للاوضاع الامنية ، قرر صرف النظر عنها واستقر رأيه علي ألإكتفاء بشراء كلب ( الله يكرمكم ) من الفصائل النادرة الشرسة المفترسة والعاتية المتجبرة ، دراءأً للأخطار المحدقة ولكل من تسول له نفسه شرا ، ويكفّي نفسو شر الوقوع في براثن المجهول ( والجن البتعرفو أخير من الجن الما بتعرفو ) وبعدين دا ماعندو تكاليف عالية من الناحية المادية أو من ناحية الولاء ، ما في أوفي من الكلاب إضافة لانها طويلة الاعمار ! ! ! ! وما بتعرف أبوها ! ولو عايز تخلص منو لو سِعِر او جنا أو خرج عن الطوع ، ممكن توديهو في ستين داهية وتمشي في جنازتو . وده طبعا من باب الوهوشة ألامنية الكتيره و الزعر والضل البخوف . بوووو ! . . . رصاصة !
وقع ألإختيار علي كلب يحمل كل المواصفات المطلوبة من إنو مقطوع من شجرة وحاقد وداير يتم نواقص شخصيتو ، والرحمة ما سمع بيها غير إنها كفتيريا في شارع الاستوديوهات بتاعة سندوتشات وحاجه باردة . واكيد مدرب بكفاءة عالية وفيهو من الوجاهة والصرامة وقوة الشخصية ما يكفي للقيام بالمهام المطلوبة .
لكن أخونا بعد فترة من استخدام الكلب لقي عندو إحساس قوي جدا بتجدد كل يوم ، إنو في حاجة ماتمام في الكلب ده ! بس هي شنو ؟ هو ما قادر يحدد ، وقدر مايقلب الكلب يمين شمال ! مافي شي ، ويعاين فيهو بي كل ألإتجاهات ! ما شايف حاجة واضحة وملموسة يستند عليها في الغموض الحاصل ، وبرضو ألإحساس ده ما فارقو !
في يوم وهو سارح مع اللغز المحير ده ، شاف واحد من اولادو الصغار تعود بلعب مع الكلب ، يعني زي ما تقول في روابط إلفة كده بتربطهم ببعض ، يشد الكلب من ضنبو ولما يفكو الضنب يرجع يتعوج مرة تانية وتالتة ورابعة ، ونفس الشي يتكرر مرات ومرات !
بس ! . . . أخونا عرف مصدر ألإحساس الغريب ألإعتراهو . أتاريهو العيب في عوجت الضنب خلافا للمظهر العام . وبما أنو حاسي بأهمية وجوده و ارتياط احد ألأولاد ببهو شديده ، خشي التمرد من الداخل وهو ما يخشاه أكثر ! يعني مافي طريقة خلاص منو بالحساب العديل ، و احسن حل لقاهو إنو يقوم عوج الضنب بأي وسيلة ومهما كلفو الامر ، ومن سُكات . جاب ( ماسورة ) ودخل ضنب الكلب جووا ( الماسورة ) وخلاهو لفترة تعدل الما بتعدل ، لضمان الاعتدال التام والما بتعقبو عوجة .
في يوم فك ألإرتباط ما بين ( الضنب ) و ( الماسورة ) وتحت رعاية المؤتمر العام واللجنة المكلفة المنبثقة عن اللجنة الامنية بضمان التنفيذ ، و بحضور المشرف العام وممثل الشركتين المنفذة من الظاهر واخري المنفذة من الباطن والاعيان وكبار المسئولين . و بمجرد سحب ( الماسورة ) من الضنب ! إنت يا الضنب الشقي الما بتنستر ، بعد كل السووه ليك ارجع تاآآآآآني لي وضعك القديم الاعوج . . . ! ! ! أهآ و بعدين ؟
" المحجوب ".


’والكلام الما بدخل الراس ! الزول ما يقولو للناس ‘.


 

رد مع اقتباس
قديم 11-28-2013, 10:05 AM   #10


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي إعتذار :



من رباعيات المحجوب ؛

أعذريني . . ، إن تجرأت وقلت أنت روحي
فإني قد مَلّكَتُ الهوي . . . نفسي وروحي
فإن ما قلت لا ومودتي . . . فخلّي وروحي
أو أرحميني . . . و أشفني من داء روحي


( من خاص كلامي )
" المحجوب "


 

رد مع اقتباس
قديم 11-28-2013, 04:38 PM   #11


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي من أقوال أ . د . ابو العريف الحكيم :



قال أ . د . ابوالعريف الحكيم بعد الهضربة والتخريم :
يا أخوانا ما بننكر إننا كايسين الضل ، لكن الزنك الامريكي ده سخن لينا راسنا ، والمفروض بدل ما نستورد زنك أمريكي نستورد مكيفات امريكية ، والمفروض نبقي عاقلين نعمل تلقيمة بي عازل حراري من الدبلوماسية الحكيمة ولو مؤقتة ، لانو الراكوبة دي ما بتفيدنا لي قدام خاصة وانو الخريف داخل علينا وكمان نحنا ما عايشين تحتها برانا ! وللا شنو ؟
أ . د . ابو العريف الحكيم .



 

رد مع اقتباس
قديم 11-29-2013, 06:22 AM   #12


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي رهام بت صفاء ؛



و أنا داخل علي البيت جاي من السوق لقيت شابة في العقد الثالث من العمر يبدو عليها انها متحضرة وبنت اسرة مما لفت نظري اليها هي و طفلة في الرابعة او الخامسة من العمر ، واقفة في السبيل قدام البيت تغسل للطفلة في يديها ورجليها . التفت نحو الشابة وقلت ليها : السلام عليكم ، لو عايزين موية باردة أجيب ليكم من جوه البيت . شكرتني الشابة وقالت مافي داعي اصلو نحنا طالعين من بيت خالتي في نهاية شارعكم ، البنت جرت قدامي فاكرة عربية الحلة وصلت ، فجاءة وقعت واتغبرت فجيت انظفها بموية السبيل هنا ، لانو العربية جاية علينا في الطريق ما عايزة ارجع بيت خالتي و العربية تفوتنا . قلت ليها : طيب ، اجيب ليكم كراسي علي بال العربية ما توصل ؟ قالت شكرا ليك هي علي وصول تقريبا ..
أصريت ودخلت البيت وجبت موية باردة وكراسي وقعدتهم . ومن باب الملاطفة داعبت الطفلة وقلت ليها : اسمك منو يا شاطرة ؟ قالت : إسمي رهام بت صفاء . قلت : اسم ابوك يا رهام ؟ قالت ياسين . قلت ياسين منو ؟ فرفعت حاجبيها وكتفيها وارخت جانبي فمها تعبيرا عن عدم معرفتها لاسم جدها مدعومة بي " انا عارفة ؟ قلت : معقول في بنت حلوه كده زيك ما بتعرف إسم جدو ؟ ردت الطفلة : ما أنا ما شفتو ولا بعرفو ! صاحت الشابة : رهام بلاش غلبة ! فسألت الشابة معتذرا : جدها متوفي وللا شنو ؟ لم ترد الشابة لفترة احسست فيها بالحرج واعتقدت إني بالغت في الظرف والملاطفة .
ساد الصمت وهممت دخول البيت والحرج باد . أنا آسفة ، قالت الشابة : رهام دي بنتي الوحيدة ، وجدها لابوها ما شافتو ودي حكاية تانية . قلت : انا كمان آسف ، والله ما كان القصد واكيد ما كل شي بتقال ولي أي زول . ردت وكأنها تعتذر : ابدا l مش القصد . . . . بالعكس في بعض الاحيان وفي حالات نفسية معينة ، تجتاحك لحظة تكون محتاج تتكلم مع شخص ما عن همومك ومن الصعب جدا تلقي شخص بي عينه تحس انك بدون حرج ممكن تفضفض ليهو بي الفي نفسك من هموم ، مع إنها ما عادت هموم ، فأنا أقتنعت بواقع الامر وتعايشت معه ومع وضعي الحالي والحمد لله ، بس برضو ما بيمنع تجيك لحظة كده تحس بالقهر وتنتابك نوبة غضب لا مخرج منها سوي الفضفضة ، ومش لاي زول زي ما قلت انت . فضحكت وقلت الحمد لله المرة دي جات منك .
برهة صمت كست وجهها ببقايا مسحة حزن باهتة ابرزت ملامح عزيمتها وقوة شخصيتها . اعقبها انفراج في اساريرها كمن يريد ان يبرر او يخفي احساسه في تلك اللحظة وهي تقول : زوجي ياسين ، دفعتي في الجامعة واتزوجنا بعد سنتين من التخرج ولم يمضي من عمر زواجنا سوي خمسة عشر شهرا حتي انفصلنا بسبب والدته التي كانت في مقام والدتي ، إلا ان تأخر الحمل ازعجها وجعلها تسعي لبديل خصب . ولقوة شخصيتها علي ابنها الوحيد ووالده جعل كلمتها هي العليا . وتم لها ما أرادت وفي وقت وجيز لم يبلغ الشهرين كنت أنا خارج التشكيلة وتم الاستبدال بواحدة من اسرتهم ، تقربهم قبل إنفصالي وانا لا علم لي بذلك . وبعدها بشهر اكتشفت أني حامل بي رهام ، ولم اخبره إلا بعد ان اتممت ثلاثة اشهر . وقد اقنعته بأن لا رجعة اليه أبدا رغم محاولاته . وما كان اتصالي به إلا لان الشرع يؤكد علي اخباره ، وإلا ما كنت اتصلت به ، وطبعا أكيد انت عارف الكبرياء والشغل البيعملو . ومنذ ذلك الحين لم اري اي فرد من اسرتهم يزورنا . وانا والحمد لله اشتغلت بشهادتي ومش محتاجة لاي دعم مادي منهم ، مستورة والحمد لله . مع انهم حاولوا المساعدة والحق لله .
قلت لها : طبعا ده قرارك وانت صاحبة الشأن ومطلق الحرية ، ولكن ما فكرتي في لحظة او حسيتي انه من حق رهام ان تعيش بكنف والديها وتحت مظلة الاستقرار الاسري ، وانت خولتي نفسك واديتيها الحق بدون توكيل انك تقرري مصيرها وما حسبتي حساب ممكن يكون رايها غير كده لما تكبر ؟ قالت : انا حكّمت عقلي وليس قلبي . . . وإلا كان قبلت ورجعت لي ياسين لما حاول لان البينا مش ممكن يتمحي بأستيكة في الوقت الانت عايزو وبمزاجك فالحب والكراهية إنسيابية التفاعل لا تأتي فجاءة او تنتهي فجاءة . ولكن ضعف شخصيته وتبعيته لقرارت غيره كانت حاسمة لامر تحكيم العقل . فلم ارد ان تكون رهام بلا شخصية وبلا قرار وكل ما تمتلكه قدرا من الخنوع والتبعية كفيل بهدم حياتها وحياة اسرتها المستقبلية وربما يمتد ذلك الي احفادها ، تري هل اكون علي صواب أن فكرت بقلبي حينها ، لا بعقلي ؟ ......... ؟ فقلت لها : والله يا ست ...... ! حقيقة في اللحظة دي ما عارف اكون معاك وللا في الحياد ..... فعلا معادلة صعبة !
وأنقطع النقاش بحركة وقوف عربية الحلة في اول الشارع وصوت السائق ينادي : يلا يا أستاذة صفاء ، معليش اتأخرت عليكم شوية ، بس حجزت ليكم المقعدين القدام .


" المحجوب "


 

رد مع اقتباس
قديم 11-29-2013, 09:09 AM   #13


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي بشري سارة للبيع بغرض السفر :



بشري سارة للبيع بغرض السفر ، مرارة غير مفقوعة بمناسبة السفر النهائي ، أستعمال دبلوماسي ، بيدوروها الصباح يسخنوها وبس ، لا مرقت ولا شافت ، صاحبها قلبو ميت ما دخل السوق ولم ينجز اي معاملات في دواوين الدولة ، ما عارف الحاكم البلد منو ، قايل عبود لي هسه في الحكومة ، بعيد كل البعد عن الاحداث ومجريات الامور ، ما بعرف عملة غير الدولار وياعيني من البيت للمطار ، لاشاف الظلط ولا المطبات الكتار ، قايل الملاريا دي سندوتشات ، والحوادث متنزهات . المرارة أعلاه خالية الطرف من الضرائب والزكاة والعوائد والقيمة المضافة والرسوم الجمركية وحماية المستهلك و الدمغة وإيصالات المخالفات المسبقة ( الآجلة و العاجلة ) مؤمنة تأمين شامل ضد المواد الحافظة والمحسنات والاسمدة والمبيدات الحشرية والتقاوي الفاسدة والملوثات والنفايات بمختلف مسمياتها .
فل أوبشن مع سيفتي إيكوبمنت ( إس آر إس ) باكياس أتي صافية .
للراغبين الاتصال علي الرقم التالي .0000000000 .
الوسطاء يمتنعون .
" دلالة المحجوب ".


 

رد مع اقتباس
قديم 11-29-2013, 09:09 AM   #14


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي بشري سارة للبيع بغرض السفر :



بشري سارة للبيع بغرض السفر ، مرارة غير مفقوعة بمناسبة السفر النهائي ، أستعمال دبلوماسي ، بيدوروها الصباح يسخنوها وبس ، لا مرقت ولا شافت ، صاحبها قلبو ميت ما دخل السوق ولم ينجز اي معاملات في دواوين الدولة ، ما عارف الحاكم البلد منو ، قايل عبود لي هسه في الحكومة ، بعيد كل البعد عن الاحداث ومجريات الامور ، ما بعرف عملة غير الدولار وياعيني من البيت للمطار ، لاشاف الظلط ولا المطبات الكتار ، قايل الملاريا دي سندوتشات ، والحوادث متنزهات . المرارة أعلاه خالية الطرف من الضرائب والزكاة والعوائد والقيمة المضافة والرسوم الجمركية وحماية المستهلك و الدمغة وإيصالات المخالفات المسبقة ( الآجلة و العاجلة ) مؤمنة تأمين شامل ضد المواد الحافظة والمحسنات والاسمدة والمبيدات الحشرية والتقاوي الفاسدة والملوثات والنفايات بمختلف مسمياتها .
فل أوبشن مع سيفتي إيكوبمنت ( إس آر إس ) باكياس أتي صافية .
للراغبين الاتصال علي الرقم التالي .0000000000 .
الوسطاء يمتنعون .
" دلالة المحجوب ".


 

رد مع اقتباس
قديم 11-29-2013, 11:52 AM   #15


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي من أقوال أ . د . ابو العريف الحكيم :



قال أ . د . أبو العريف الحكيم ؛
عجبت لأ خونا المحاضر وهو يتكلم عن مدينته وهو يمتدح ويعدد ويباهي بجمالها ، وسماحتها وصفاتها الغير متوفرة لأي مدينة غيرها ، ويتغني بحبها وعشقها بما قيل فيها من قصائد المستشعرين من أبناءها .
والمصيبة ولا واحد من أولادها يحتل أي منصب تنفيذي فيها . تركوها ليرتع فيها السوس والقمل الذي يمتص دماءها في كل ميزانية وتركوها خاوية علي عروشها ، وعلي عينك ومن إعتمدوا عليها ، وهم من يعملون بنظام برنامج " دخلت قملة وأخذت هبرة وخرجت " و " ورِد . . . تدوم " هل منكم من سمع بالحمي الراجعة ؟ هل منكم من سمع بفقر الدم ؟ هل منكم من سمع بالخلايا السرطانية ؟ هل منكم من سمع بهشاشة العظام ؟
فمن اصابته تلك الامراض ، فالأمر مسألة وقت ليس إلا .
والحي الله والدايم الله .
" أ . د . أبو العريف الحكيم "


 

رد مع اقتباس
قديم 11-30-2013, 04:54 PM   #16


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي نشلة في قطار الزمن ؛






دخلت محل لبيع الاعشاب كعادتي دايما بالإعتماد علي الطبيعة في التداوي والبعد عن المركبات الكيماوية . وحقيقة المحل كان مزدحم بصورة لفتت نظرى ، وبدون قصد او تفكير وبصوت هامس ، قلت : الحكاية شنو ؟
لحسن الحظ مافى زول سمعنى وبديت أعاين فى الناس لاتأكد انو مافى زول سمع حاجة خالص . لفت نظرى واحد قدامى على طول وشكلو مألوف عندي " وبما إنى آخر واحد فالناس كلها مديانى ضهرها ". إنتظرت لحد ما المحل بقى شبه فاضى وجيت وقفت جنب أخونا المشتبه به ، وأديتو نظرة من زاوية ، فإذا به زميلي في الدراسة .
الطيب ! إزيك ياأخي !
فإذا بزميل الدراسة ينط وبالاحضان : سلامات . . وكيف حالك . . فقلت ليهو : إن شاء الله إنت كويس وين ياخى من المرحلة المتوسطة تانى ما اتلاقينا .قال : نعم ، والله انا خلصت الدراسة من هنا وعديل على السعودية من هنا . قلت ليهو : والله أنا بسأل عنك دائما أخونا فلان وعلان فلتكان ! وادونى اخبارك بالتفصيل وحتى آخر مرة قابلت فلان وقال لي الزول دا هسة رجع الحلة واحتمال تلقاهو فى المواصلات ولكن للاسف كنت انت اتحركت وما لحقتك .
وياخى إن شاء الله البركة فيكم ، عرفت إنو الصادق أخوك إستشهد فى الجنوب . رد هو : الله يبارك فيك ، وحسيت واحسست بمرارة الفقد فى صوتو .
والله يا الطيب زمن . . ! ودايما مع زملاءنا بنجيب سيرتك بكل الخير والذكريات الطيبة ، بتذكر صلاح على واحمد عوض والهادى بشير واخونا وفردتى معاوية كمال ؟ فرد والله زمن ياخى ، دى مرحلة ما بتتنسى أبدا ، سبحان الله . فسألتو : ياخى كيف أخونا ايراهيم أحمد ؟ فرد : تعيش انت ، مرض فترة بسيطة واتوفى بعدها على طول . عندو اولاد ياالطيب ؟ قال لي ما لحق اتزوج ، الله يرحمو ويغفر ليهو .
لاحظت انو ما سالنى عن اى واحد من زملانا ولا جاب إسمي ودايما انا البذكر الاسماء !
ياالطيب مايكون نسيت إسمى يا أخي بى طول المدة ؟ فرد هو : والله ياخى ما اتذكرتك . طيب انا ذاتى اتذكرتنى ؟ يعني شكلي ما راح عليك ؟ قال لي : لا والله . قلت ليهو ياخى انا فلان الفلانى وكنا مع بعض دايما بحكم اننا من اولاد الجزيرة ودايما طالعين نازلين مع بعض ووصفت ليهو اشياء كتيرة بتربطنا مع بعض ، ولكن دون جدوى .
الله يا الدنيا ! اما أنا . . . ! فقد احسست بمرارة ، أعتقد انها اشد وطئأ مما احس به هو لفقده أخيه الشهيد ، فذاك قد أستشهد في الجنوب لكي لا ينفصل ودفن ، اما انا فإني فقدت أخ وصديق وزميل دراسة وهو أمامي حي لم يدفن ، وذكريات وحفنة من السنين ووقت كم اجتريت فيه من الذكريات وتمنيت فيه مثل هذه اللحظات وكم أخرجت وصورت واعددت من السيناريوهات حتى أمتع واستمتع لكى نعيش هذا الزمن العجيب بإقاع ذلك الزمن الجميل ومستحيل ، وذهبت الى البيت ونصبت سرادق العزاء ولكنه لم ينتهى بإنتهاء مراسم الدفن ، بل استمرت الاحزان الي يومنا .
ومازال العزاء مستمرا لمن له الرغبة او أراد النحيب علي زمن مضي .


" المحجوب "


 

رد مع اقتباس
قديم 12-01-2013, 09:38 AM   #17


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي الروتين القاتل والفهم المايل ؛



واحد من أخوانا المتعبين شديد جدا ، قرر يكشف حالنا ، ويقلل مقامنا ويبهدلنا في الدنيا دي ويفرج فينا خلق الله ، ويشمت فينا الغاشى والماشى ، وسيرتنا تلوكا تجمعات المدينة في المناسبات الرياضية والقعدات الخاصة والعامة وحفلات التخريج والحنة وصالات الافراح وصيوانات الاتراح وحبيبي مفلس ، وستات الشاي والقهوة . يقوم يودينا لي مكاتب إدارة حكومية لإجراء بعض المعاملات الخاصة ، وأكد علينا لازم كل واحد فينا يجيب البطاقة الشخصية أو ما يثبت . وبي فرحتي ديك طوالي إتذكرت ليك الرقم الوطني من يوم ما استلمتو ما طلعت بيهو تيستا . قلت يا حبيب دي فرصة تجربو تشوفو شغال وللا لا وكان ما شغال ترجعو ليهم .
قالوا المواعيد الساعة 8:30 ص ، و أنا من الساعة 8:00 إتلبست واتهندمت والعطر فايح والتسريحة أبراهيم عوض والجزمة قزاز الله يكرمكم . مشينا قالو تقيفوا في الصف ، قلنا ما مشكلة ، كلها دقيقتين تلاتة والمهمة تخلص ، أها ، ، الحكاية جرّت شوية والزمن مشي ونحنا واقفين ، قلنا معليش ، الزمن ما مشكلة ، أصلو ماعندو قيمة عندنا ما هو راقد زي الهم في القلب ، والشمس بقت في نص الراس والعرق جاري بين الجلد والقميص والبلة طلعت الريحة ، والململة حصلت والجماعة المسئولين في الادارة علي اليمين كأنما الواقفين في الحر ديل ما ناس ، اما المرضي عنهم دخلوا المكاتب مع المسئول والشاي والقهوة والضحكة والكندشة وأخوانا داخل المكاتب وأنا أعاين ليهم وهم يتبسموا وضاربين الونسة ونازلين سب في ........... ولا حد سامعهم .
بما إني كنت شايل في يدي صحيفة الرقم الوطني وهي طبعا مقاس كبير ، وبصراحة كده . . .كنت متضايق منها شديد . لكن دلوقت اكتشفت بعد المرمطة العملية والبهدلة النظرية ، أدركت بعين الخبير الفاحصة وعرفت ليه المسئولين عملوها بحجم ورقة الفلوسكاب . وقد بانت لي العبقرية الفذة والنظرة المستقبلية وبعد النظر والاستراتيجية المدروسة وألاحساس بمعانات البشر ، انه تصميم ذو أغراض متعددة ، وقد أدت رسالتها وما خصصت له بجدارة فقد تدرقت بها من عين الشمس وإتهببت بيها من كتمة الهواء وجلست عليها لما تعبت ارجلي من الوقفة وإتلقيت بيها نقط الموية بتاعة الكندشن الفوق راسي ، وإتضاريت بيها من سموم المروحة الخارجية للكندشن . وعند آذان الظهر تيممت وانا في الصف !!! وأديت عليها فريضة صلاة الظهر واستخدمتها زي المكرفون أنادي بيها المارة من الاصحاب البشوفهم من علي البعد طلبا للنجدة والمعونة مناديا " يا أبو مُرّووة ". ( ومن هنا أناشد المسئولين عدم تغيير أو إلغاء هذا المستند لمنافعه الجمة وقضائه لكثير من إحتياجات المترددين علي دواوين خدمات الجماهير الوفية ).
وبعد ما كاد أن يتفجر الوضع ، ويتفلت الامن ، وتتصعد الارواح ، وتزمجر الحناجر وتهدر الجموع مطالبة بالأماني العذبة ، تم إستدعائنا ، ودخلنا المكتب ومددت صحيفة الرقم الوطني بكل الفخر والاعتزاز وأنا حاسي إني فوّتَ علي الموظف فرصة الإفتراء والتهكم والسخرية عليي أنا الغلبان المسكين ده !
الموظف عاين ليى من فوق لي تحت مدة طويلة كده ، وبدون ما يحول عينو مني قال لي : دي شنو ياسيد ؟ قلت ليهو ده الرقم الوطني ! قال ليى ده غير معتمد ياسيد ‘ لوعندك البطاقة القومية جيبا وللا ما تضيع زمنا ، ناس فاضية !
. . . . بس !!!!! جات حاجة كده مضلمة قدام وشي وحسيت بي كتمت نفس وزي الفي زرقينة عصرت مخي من جوه ، تاني ما شفت حاجة ! لما وعيت وفتحت عينيى لقيت الجماعة ماسكني علي الحيطة ، و يدي ماسكه ليها مركوب والتانية فيها نظارة ، وقميصي بدون الأكمام ، واللياقة في خشمي ومافيهوا غير الزرارة الفوق بس !!!


" المحجوب "


 

رد مع اقتباس
قديم 12-02-2013, 06:22 AM   #18


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي صمت الذليل ؛



ما صمت الذليل والمقهور في عهد الدياجي والعصور المظلما
فساد السواد حياتهم ،، فلم يروا من يومهم سعد او خيرا تيمما
فولوا أمرهم سفهاءهم ، فما راعوا كهلا ولا طفلا بريئا تيتما
فلما تملكوا سلطان قومهم لم يعدلوا ولكن بطش الحقود الظالما
" من خاص كلامي "
" المحجوب "


 

رد مع اقتباس
قديم 12-02-2013, 05:52 PM   #19


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي بشري لمن لم يحالفهم الحظ ؛



إعلان هام :
وبشري لمن لم يحالفهم الحظ ؛
تعلن دلالة المحجوب وتزف البشري لكل المواطنين الكرام الذين أتصلوا بالمكتب الرئيسي لحجز كميات من المرارة الغير مفقوعة وقد اعتذرت لهم الادارة لنفاذ الكمية . قد قام المكتب الرئيسي بإرسال وفد من المختصين في مجال المرارة بنوعيها المفقوعة منها وغير المفقوعة ، لدولة المنشأ لبحث تزويد مخازن الشركة بكميات من المرارة غير المفقوعة وتم الاتفاق علي التسليم بحوش الحاويات و بضمان تسليم ادارتنا الكمايات المتفق عليها سالمة ومختومة بختم الشركة المصنعة بالمنشأ تسليم المخازن .
هذا ويهنئ السيد المدير العام المواطنين الكرام ويطمئنهم بمناسبة وصول الكميات المطلوبة و الكافية و التي ستغطي احتياجات مرحلة رفع الدعم الثانية !
تنويه :
" علي المواطنين التأكد من تاريخ الصلاحية وسلامة المنتج عند الاستلام من المخازن . اي منتج لم يتم استلامه من المخازن بالاوراق الثبوتية ، الادارة غير مسئولة عنه . و غير مسئولين عن أي تلف ماعدا عيوب التصنيع ".
" شعارنا انتو أرفعوا الدعم ونحن نستورد المرارات الغير مفقوعة ".
الادارة
" دلالة المحجوب "


 

رد مع اقتباس
قديم 12-03-2013, 07:44 AM   #20


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي



" شـركـة دلالـة الـــمـحـجـوبــــــــ "
________________________
وتحت شعار ؛
( انتو أرفعوا الدعم ونحنا نستورد المرارات الغير مفقوعة )
في ورشة العمل التي اقيمت بمقر الشركة تحت رعاية رئيس مجلس الادارة ( اللي هو أنا !)
تقدم أحد المستفسرين بسؤال عن بنود الضمانات المنصوص عليها بكرت الضمان لمرارتنا الغير مفقوعة ،،،،،،
فأقول له :
1) مراراتا مضمونة بضمان المصنع ،،، وبحسب الاتفاقيات الدولية لضبط الجودة وحماية المستهلك من الغش التجاري ،،،

2) البنود المنصوص عليها في تعاقد شركتنا مع المصنع تحمي المشتري من اي تلاعب تجاري ،،،

3) الضمان المنصوص عليه في بنود الاتفاقية المبرمة بيننا والشركة المصنعة سنتان من تاريخ الاستلام ’ أو الف فقعة مرارة ،،، ايهما اول ،،،


( الضمان لا يشمل ورم الفشفاش وهرد الكبدة وقطيع المصارين ) .
تنبيه :
" للشركة الحق في سحب اي ضمان او تعديله متي ما تغير الوضع الحالي ،،،


( يعني مثلاً ، إنقلبت ) ،،،"
وبالــلــه التـوفـيـق .
" دلالـة الـمـحـجـوبـــــــ ".


 
التعديل الأخير تم بواسطة ابوعمر ; 08-27-2014 الساعة 10:46 AM

رد مع اقتباس
قديم 12-03-2013, 07:46 PM   #21


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي لمن يهمه الامر سلام ؛



اصبحت اليوم وفي نفسي كلام ؛

لمن يهمه الامر سلام

ونايم في العسل المر :

الذكري السعيدة المبهجة امانينا وحلم الغلابا منذ عهد " يا الحله تنوري،،، يا بنية تنوري ،،،


انت حاشاك تتغيري ،،، شتتي الشبال كتري ،،، يا قلوب الناس كبري ،،، ويا عيوني اتصبري،،،

الله اكبر تخرج من افواههم بطعم النوبة وانغام حلقات الذكر صادقة بلا خلفية ذهنية سوي الله ،،،

هذا ما كان يفترض انها تكون كذلك ،،، قلب عامر بالإيمان ،،، لازيف ،،، ولا ملق ،،، ولامآرب أخري ،،،


و في الكثير من ألاحيان تكون الحياة قاسية مؤلمة لدرجة الاحساس بعدم الامان ،،،

خاصة في زمن فرض علينا العيش فيه بالقليل النادر من متطلبات الحياة ولكنه لا مشكلة ،،،

نكملها بالكثير الثر من ذكريات زمن الحياة البسيطة المثلي ،،، وعلي أنغام الماض النادر تترنح اشباح الانسان الحاضر ،،،

فمن عاش ذلك الزمن ، هو من يعتصره الم الذكري لزمن طالما سعد به وتكون وجدانه بنتاجه ،،،

وبالعامر من حكاوي البطولات الوطنية وشهداء الاستقلال من عمي علي حسين طيب الله ثراه ،،،


فقد عاش ما يعتبر رفاهية حياتية نادرة الوجود ( في زمننا هذا ) مليئة ومفعمة بالحرية البسيطة ،،،، ( وهذه قصة أخري )

فما لهذا الزمن الغث الثقافة الوطنية إن وجدت ،،، هل صارت الارض غير الارض ،،، ام صارت السماء غير السماء ،،، هل صار الناس غير الناس ،،، ام يجب أن يكون حب الوطن رهيناً بما دفع من الاجر مقدماً ،،، رهيناً بما

يقدمه لك من الحياة الكريمة لتحبه وتفتديه

وتنميه .

لا شك في انه بما لك من دور مفروض عليك من الله بحكم الدين والارض والعِرض .

والله لاتدري نفس ماذا يحدث غدا حتي تفاجأ بما لم يكن في الحسبان ،،، ومن لا يصدقني فالينظر لما يحدث من حولنا وفي الدول المحيطة !

والله فوق الجميع . وهو أعلم بمن أهتدي ،،،،

بقلم " المحجوب "


 

رد مع اقتباس
قديم 12-04-2013, 06:49 AM   #22


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي مع الإعتذار للمدام ؛



مع ألإعتذار للمدام :
قدر ما أدخل البيت القي المدام الله يعينها فاتحة التليفزيون ، وأسامه السيد اديهو سماحة الوصف ،،، يعجبك لما ريقك يجم ،،، يشيل ويوصف ، شي بالبشمل وشي بالفرن وشى مقلي وشي ني وشي يجهزوه ويودوه الشواية وحاجات من الشواية تنزل تحت التربيزة وحاجات مفرومة وضلع يدقو فيها بالشاكوش ويرموها في دقيق ،،، وحاجات تانية من الشواية تخش التلاجة وبالعكس ومنها شي يدلف علي الفرن بعد ما كان فوق الرف ،،، وشي مسلوق و مخلوط ، وشي متفوف والسكاكين اشكال وشي سواطير وشواكيش ، وكراشة بي جاي ،و بشّارة بي هناك ، وقوار هنا ومصافي فوق ،،، شي غرابيل من ناعم لي خشن والخضار شي بصل ومعاه طماطم وبقدونس والخيار والتوم معاهم زيت الزيتون ،،، وشي تعرفو وشي ماتعرفو،،، صحون صغيرة مليانه حاجات والبهارات أحمر أخضر وأصفر ،،، صيدلية بس ! وشي يشيلوه من النار يدخلوهو الفرن مرة تانية ، واحد من الفرن يختوهو تحت التربيزة ، واحد من تحت التربيزة يرفعو في النار ،،، وشي حلويات أشكال وألوان ، وشغلانة تقول للستات الله يعظم أجركم ويديكم العافية ،،، قادر ياكريم .
أعاين للمدام بي نظرة كلها إعجاب وتقدير وامتنان وعرفان بالجميل ،،، لانها فعلا مجتهدة ،،، وبتزاكر مع أسامة السيد نظرياً وعملياً ،،، الله يعينكن ياستات ويديكم العافية ،،، وآخد بعضي بالراحة وأطلع ،،، فاسحا المجال للمدام للإبداع المتمكن ، والتجلي المتجسد ، مدعوما بالعبقرية الفذة ، والمهارات الفردية المتألقة ، والروعة الخلابة ، والخيال الواسع المبدع ، والذهن المتقد المتفتق الخلاق ، والعقلية الجبارة ، وانا ممنيا النفس في هذا اليوم بغداء مميز ،،، وتجى مواعيد الغدا تتهادي تمشي الهوينى كأنك بأنتظار فطور رمضان وبفارغ الصبر ،،، حاسباً الدقائق والزمن بالثواني وكل شوية أقوم أغسل يدي ،،، ممنيا وفاسحاً المجال وألآفاق الرحبة للنفس لتشتهي ، ما لا عين رأت ، ولا انف شمّ ،ولا لسان تذوق ، ولا معدة هضمت ، وأطيب ما جرّوا فيهو السايفون ،،، وانا في هذا الحلم الجميل والامل المبهج وتلك اللحظات السعيدة التي ستجمعني بصينية الغداء وجها لوجه ،،، وفيساً تو فيس ،،، سمعت صوت المدام يناديني ،،، واضحا جليا كنغمات الموسيقي الحالمة ،،، كأنه آتٍ من تحت الاشجار الوارفة الظلال ،،، بجوار النبع وخرير الماء العذب عند الجدول يعزف خلفية موسيقية بعذوبة مائه ،،، وهي تطلب مني : " أدي الولد عشرة جنيهات يجيب بيها كسرة من المرا العصامية جارتنا ،،، عشان هي عاملة لينا الليلة ملاح أم رقيقة يجنن !!!
" المحجوب "


 

رد مع اقتباس
قديم 12-04-2013, 04:27 PM   #23


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي ما لا أقبله لنفسي ؛



إن احط مراحل إنهيار الانسان ،، وفقده لإنسانيته ،، و آدميته ،،،
وايمانه بربه وبوطنه وبذاته ،،،،،
في اليوم الذي يصبح فيه ،،،،، جائعا ،،،،، وجبانا .
فإنه ما تبقي له شيء يميزه ،،، سوي الحيوانية في احط صورها ،،،
وهذا ما لا اقبله لنفسي !
شهيد .

" الكلام ده ما جابوهو ليى ،،،، قالو لي الشهيد بعضمة لسانو ونحنا شايلنوا علي المقابر ".


 

رد مع اقتباس
قديم 12-05-2013, 11:49 AM   #24


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي نـــــــعــــــــــما تـــــــــ




ما أجمل أن يكون جارك محبوب منك وانت محبوب منه ، تحس بأحاسيسه ، فرحه وحزنه ، ضيقه وفرجه ، كربه وسعادته ، أنسه وصمته ، حبه وبغضه ، خيره وشره . تحبه علي علاته ، فلا كمال إلا لله وحده .
فقد كنت و نعمات بنت جيراننا في الحي كذلك . وبرغم إنها فتاة وتكبرني بثلاثة أعوام ، فقد كنت في السادسة من عمري ، إلا وإن صداقتنا لم تكن صداقة عادية ولم تكن هي عادية كذلك كبقية الفتيات في الحي ، لقد كانت شيء آخر لا تفسير له في نفسي آنذاك . لم تكن نعمات تبتسم إلا وتري كل شيء قد أبتسم ولم تكن تحزن إلا وحزن كل شيء ولم تكن تغيب عني إلا وغاب عنا الفرح والسرور ، ما من يوم لم أري فيه نعمات إلا كان كيوم مقداره اعوام و اعوام ، ولم تكن هي ترغب في الذهاب لتلعب مع بقية البنات في الحي ، فقد انقطعت عن تلك العادة يوم اصبحنا صديقين ، لا تفارقني أبدا إلا بعد مناكفة وعناد مع اهلها فانا وهي لا نشرب إلا معا ولا نأكل إلا معا . أما إذا اصاب احدنا مرض أصاب الآخر معنويا ، واما إن كان معد فسيصيب الآخر لا محالة .
نمضي جل يومنا معا ، ولكننا لم نكن نتحدث كثيرا فهي و انا قليلي الكلام ، نجلس علي مقعد من الخشب صغير موضوع علي حوض من الجرجير تعودت زراعته دائما مع بعض الخضروات في مكان قصي من الحوش . يأتي عليه ظل العصر ، لذا فقد كان العصر موعدنا دائما ، وقد جلس كل واحد منا في نفس المقعد معطيا ظهره للآخر ، فإن أغضبتها في شيء او اغضبتني ! دفعتني بظهرها بقوة . أذكر في احدي المرات انها دفعتني بقوة كما اعتادت ولكنها فاجأتني بتلك الدفعة فسقطت علي الحوض ، وكنت قد سقيته قبل لحظات من موعدنا ، فابتلت ملابسي ووجهي بالطين ، ما كان منها إلا أن جثت علي ركبتيها في الطين وأخذت ترفعني منه وتنظف وجهي بيديها وهي تنظر الي نظرة لم أفهمها في حينها لان جدارا من الدمع بعينيها قد حجبها عني في تلك اللحظة . فدمعت عيناي معها وابتسمنا معا ابتسامة اختلطت بطين امتزج بدموع حب طفولي طاهر نقي صاف كماء المطر .
تلك هي نعمات صديقة الطفولة والتي لا ولم ولن تمحي من ذاكرتي أبدا ما حييت . فلا زلت أبحث عنها . ابحث عن تلك ( النعمات)، فقد كانت نعمة الجار ، نعمة الطفولة والبراءة ، نعمة الوفاء و الاخلاص ، نعمة المودة والرحمة ، نعمة الحب الصادق الطاهر العفيف مجتمعة فصارت اسم علي مسمي ( نعمات ) .
كان يوم افترقنا يوم لم أشهد له مثيل في حياتي قط .يوم اهتزت فيه مشاعري وتزلزل فيه كياني وتهاوت فيه روحي في مكان سحيق . يوم أظلمت فيه نفسي وتاه الوجدان في ظلمتها بلا نجم ولا بدر منير . ذلك اليوم كان مشهده مثل دراما هندية ، يوم بلا إحساس وبلا وعي وبلا تاريخ ، بلا لون وبلا طعم ولا شهية ، يوم توقف فيه الزمن وغاب المكان وشاخت وانزوت الحياة في ركن قصيى . فقد كان قد مضي علي وفاة والدها عام كامل ، لم تنشغل فيه نعمات عني ولست كذلك عن برنامجنا المعتاد إلا في ايام العزاء ، و لم يكن رحيل والدها ليؤثر علي تلك الصداقة السمحة المتينة بهذه السهولة بل زادها إرتباطا ووثوقا وحكمة . ولم تتأثر صداقتنا بأي سبب آخر ، سواء ان كان بسبب دخولي المدرسة الابتدائية وذلك كان بعد وفاة والدها بعام ، او صداقات المدرسة وفريق الكرة في الحي . فمازالت عصرياتنا بخير وصداقتنا متينة عدا بعض القصور في زمن الانُس الصامت . بل اصبح التقارب اقوي بفعل المذاكرة التي كُلفت بها نعمات لمراجعة دروسي بحكم انها تسبقني في المدرسة ، فأنا في الاول وهي في الثالث واعني بذلك تحفيظ القرآن و الاناشيد .
مرت الايام ونحن بهذا النسق المستكين إلا من بعض المناسبات هنا وهناك مما يحملنا لتعديلات طفيفة تقربنا زلفي ، لما لها من قدرة علي تأجيج الاشواق بإحساس الفراق والفرق بين وجود ولا وجود . والقدر بنسج خفية بين خيوط الود واللقيا جدارا عازلا يفصل به ما بين الاصدقاء والاحباب ولا خيار في ذلك لاحد .
في نهاية العام الدراسي وبعد الامتحانات ، جاءت العطلة الكبيرة وبداء ت الاسر في التحضير للبرنامج الجديد كلٌ بحسب الوضع ، فمن كان في غير مدينته ، نسق الاهل للعطلة في الديار و من كان لديه زيارات للأهل المتفرقين أعد للوضع بما يناسبه .
فكر اهل نعمات القيام بزيارة الديار لأول مرة منذ سنين عددا ، فوجود الوالد قبل وفاته وتضارب مصالحه مع العطلة جعلها مهمة شبه مستحيلة ، إلا علي المستوي الفردي وقد حدثت بالمناسبات .
هنا بدأت حالات متفرقة من التمرد والعصيان من جانبنا واستراتيجية تفويت بعض الوجبات ( الدخول في اضراب معلن عن الطعام ) حردا وتهديدا بإعلان عصيان مدني مرتقب إن لم تستجاب المطالب او تكون هنالك مرونة في التفاوض ، وكان الحل الوسط لنعمات أن تستأذن اسرتها والدي ، لأقضي العطلة معهم وإلا فإنها لن تسافر معهم وستبقي معنا إلي ان يعودوا نهاية العطلة .
صادف تلك العطلة فكرة مسبقة لوالدي الذهاب لزيارة مدينة كسلا وقد اعد العدة لذلك من تصاريح سفر الي ملابس وحقائب قبل ان يؤكد النية بها ، فكانت اقرب الحلول الوسط قبولا لدينا ، وبعد الوعود بالموافقة علي مشروعنا في العطلة القادمة ، فقبلنا علي مضض .
مرت العطلة ورددنا الي سابق العهد وقد بلغ منا الشوق والحنين مبلغا تمنينا فيه العودة تحليقا وعلو في سماء اشواقنا ، وكان اللقاء لوحة من الالوان منسابة بلا حدود ، وبلا تباين شاذ ممزوجة بماء الورد والقرنفل والصندل في امسية ظل الشفق ساطعا علي بقايا سحب عكست ضوء المساء بلونه علي الارض حينا ، حتي خلصت التحايا والوصايا ، ولم يلحظ احدا غيابنا حينها فقد كنا جلوسا علي المقد الخشبي ظهورنا لبعض ، وكان الاُنس الصمت الصارخ . كسرته نغمة حزن من نعمات لتقول لقد قرر اعمامها ان تنهي الفصل الرابع ، وحينها سيرحلون نهائيا الي الديار بلا عودة . لم يتركوا لنا خيارا آخر وسيعودون لامحالة .
فكانت تلك السنة دهرا من المعاناة والترقب المفزع والانتظار المبغض ، ولحظات قليلة من حب اخوي صادق دمغ آثاره في ذاكرة الزمن محفورة بإزميل الود ، محماة بنار الفراق المر ، وكانت تلك اللحظات آخر عهدي بها ، إلا من بعض الاخبار المتقطعة .
فإنها بقيت لم ترحل ،،،،،،،،،، ! بل رحل الزمن الجميل .
" المحجوب "


 

رد مع اقتباس
قديم 12-05-2013, 04:58 PM   #25


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي كلمة حق أريد بها حق :



الجسر معبر بين موقعين يفصل بينهما عائق ،،،
يًمكّن من التواصل بين الموقعين بسهولة ويسر و سرعة وامان ،،،
فأنا لا اري أي جسر يربط بين السلطة و المواطن ،،،
إذن كل ما أسمعه لا يعني لي شيئا حتي أري ،،،
فقد سمعنا كثيرا ولم نري !!!!
نقرتين لعرض الصورة في صفحة مستقلة
ملفات و مشاريع تطوير وتجميل مدينة الحصاحيصا (2-3) | الحصاحيصا نت



"المحجوب "


 

رد مع اقتباس
قديم 12-06-2013, 06:50 AM   #26


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي يوميات حيران في السودان .



يوميات حيران فى السودان :
إتحرك بينا السياحى من الحصاحيصا ماشين الخرطوم انا و معاى حيران , وبعد مجابدا لقينا لينا مقعدين ،،، حمدنا الله وقرينا دعاء السفر ، واتحرك بينا السياحي ،ويادوب خمسة دقايق وحيران جاتو الدقسة , ولما صلنا ابوعشر , فرملة السياحي صحت اخونا حيران لما قام مخلوع،،،،
قال لي : فى شنو في شنو في شنو ،،، يا زول ؟
قلت ليهو : مافى حاجة ياحيران ياخي ،،، مالك ؟؟؟ ده العبور .
قال لي : عبور القنال وللا دايرين نقطع بحر ؟
قلت ليهو : لا ياخى ،،، لا قنال ولا بحر ،،، دا التفتيش .
قال : ياخى كل ما نمشى فى سفرة يقيفو يقولو ده التفتيش ! ده التفتيش !
الناس دى بفتشوا طوااااااااالى الرايح ليهم شنو ؟
قلت ليهو : رايحه ليهم قروش ياحيران و لسه ما لّموا فيها من 89 لي الليلة دي .
قال لى حيران بى طريقة غريبة :
طيب ياخى , دى مشكلة !!!!!!!!!!! مايفتشوا خشم البقرة ؟
قلت ليهو : ياحيران ياتو خشم بقرة ؟ انت بديت تهلوس ؟
عاينت ليهو , لقيتو دقس تانى .

" المحجوب "


 

رد مع اقتباس
قديم 12-06-2013, 05:13 PM   #27


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي حلول في الميزان :



أخوياً لينا راعى ، وكل راع مسئول عن رعيته ، بعد ما أطمئن على بهايمو ، الله يكرمكم ، و حلالو ، قال ياخد ليهو تكلة تحت الشجرة على بال ما برتعن ويشبعن ،،،
إتأكد من إنو البهايم كلها موجودة قريبة منو ، وعلى مرمى ومحيط السمع والبصر ، حتى لا يأكل الذئب منها القاصية ،،، صاحبنا أطمئن شديد لدرجة إنو استسلم للنوم لدرجة إنو فتح خشمو شهيق و زفير ، والتيارات الهوائية جيئة وذهابا فى تواتر وتزامن إيقاعى ،،،
إنتى يا الحشرة الشقية ، مقطوعة الطاري ، تعالى طايرة على مرمى من التيارات الهوائية ،،، ماشة جاية ،،، جاية ماشة ، لا رقيب لا وآلى يهدى ( زي ولاة آخر الزمن ده ) ولى شقاوة خينا الراعي ! تصادف ليك واحدة من شهقاتو الغلاد ، وهو نايم وأريتا نومة السواد والما كسب من وراها عافية ،،، والبقت لى الحشرة سبب تقعد فى الحلق ، وشفطا الهوا وعلى الحلق عديل ،،، ماتصادف ليك إلا مزمار الحلق ومسكت ليك في المزمار ،،، وديك يا الكنكشة ،،، كنكشة الما مصدق لقي ليهو حاجة يمسك فيها ،،، بى رجليها وايدينها و اسنانها .
اخونا قام من النوم مخلوع ويكح ويتف وبقى فى حالة تانية ،،، وقدر ما سوا و قدر ما حاول يخلص نفسو منها ! مافى فايدة ،،، ومن محلو ديك جري على العيادة بتاعت البلد ، نسى البهائم ( الله يكرمكم ) ونسى الوراهو والقدامو ،،،
الطبيب الموجود قال يدخلوهو العملية فورا ،،،
وبالفعل حاول الطبيب يمسك الحشرة بالملقط ويسحبها ولكن مافى فايدة ، كل مايسحب ، الحشرة ماسكة والدم ينزف بغزارة والراعى يتألم من قبضة الحشرة ، يرجع يفكها ويحاول مرة تانية وتالتة والحال فى حالو ،
أها وبعدين ،،، العمل شنو ياأخوانا ؟
واحد من المساعدين من مجموعة العملية صاحب خبرة ودراية وحكمة عقل متفتح ومخلص ، قال لي الطبيب الحشرة دي بتأذي الزول ده ساكت بالطريقة دي ،،، شنو رايك لو نجيب محلول مخدر ، نبلل لينا قطنة صغيرة بالمحلول ، ونعصر بيهو على الحشرة لحد ما تتخدر وتسترخى نقوم نسحبها براحة وبكل هدوء و بدون إراقة دماء الراعي المسكين ده ، لا ألم ولا يحزنون ويقدر الراعى يرجع لي بهائمو سليم معافي وبدون جراحة .
أها والله نحنا دحين بي وضعنا الحالي ده ،،، ما شايف شي غير إننا فعلا محتاجين لينا لى واحد صاحب خبرة وكفاءة وحكمة ودراية ومخلص أمين يحلنا من الكنكشة النحنا فيها دي و بدون ما تجيب ليها دم ولا ألم ! ! !
رايكم شنووو ،،،
" المحجوب "




أ


 

رد مع اقتباس
قديم 12-09-2013, 02:30 PM   #28


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي المفهوم في علوم الواضح والمعلوم



المفهوم في علم الواضح والمعلوم :
قالوا الحاجة أم الخير حرم المرحوم حاج العبيد ،،، لحقت الصح ،، الله يرحمها ويغفر ليها ،، ضربوا التلفونات والموبايلات وكتبوها في النت والمغتربين سمعوا الخبر قبال اهل البلد وكل من يهمه الامر من قريب أو من بعيد كلموهو ،، كل الاهل سمعت والجيران ، وناس المناطق المجاورة والحَلَّال ،، كل المساجد في البلد وبراتا أخدت خبر والمكرفونات أشتغلت ،،
" ،،، والذين إذا اصابتهم مصيبة قالوا إنا لله وإنا اليه راجعون ،،، انتقلت الي الدار الآخرة ،، الحاجة أم الخير بت حاج الدغري وحرم حاج العبيد ،،، والدة كل من فلان وعلان ،، الصلاة عليها بالمسجد الكبير عقب صلاة المغرب ،، ".
أم الخير ،، ماتت وشبعت موت بعد صراع طويل مع المرض العضال الكانت بتعاني منو لما فطست ،، الله يرحمها ويغفر ليها ،،،
قالوا أذكروا محاسن موتاكم ،، آخر عمرها بقت مشاكلها كتيرة ومعادية الخلق بدون سبب ومتطاولة شديد ،، عندها كبير الديناصور ، المرحومة عندها أخوان غير أشقاء بس من ناحية الاب ،،، وبما إنو الام ما هي منهم ،، أخوانا ما شغالين بيها كتير ،، بالاضافة لي إنها طويلة لسان وقليلة إحسان ،، لسانها متبري منها ،، وماتجي مناسبة إلا تلقاها بتهاجم فيهم وتطلع في عيوبهم ،، حكاية تستُر ليها واحد منهم ده شي بعيييد ،،، وما عندها زول كدي حبيب إلا البجيها علي عدلها ،، ويتقرب منها بالكلام البرضيها وهي عايزة تسمعوا ، يعني شايفا نفسها بالحيل ،، وبالرغم من شوفة الفلاحة في كلامها وجرأتها وقوة عينها ،،، بس فصاحة ساكت وقدرة ماعندها ساعة الجد . وبي تحت ،، تحت تقعد تتعذر وتبرر وتقل في مقامها وعدم احترامها ،،،، الفهم شنو من البتسوي فيهو ده ؟ ما اتعرف ! والمصيبة انو وكت مات ابوهم وقبال ما يرفعوا الفراش ، ، والقبر لي هسه لين ، طوبتو ما يبست ،، قالت شنو ؟ يوزعوا التركة ! وهي شن التركة ! لي شلاقتهم لقوا ديون أبوهم أكتر من الخلاهو ليهم ! قبلوا ليك عليها وقالوا ليها انت كل البلاوي والمصايب دي من تحت راسك انت يا أم الخير ،،
في نهاية المطاف الناس صلت عليها في الجامع الكبير ،، بعد صلاة المغرب ، وشالوها طوالي علي المقابر ومثواها الاخير .
صورة العنقريب شايلاهو مجموعة يمشوا لما يكتفوا وشوية كدي تجي مجموعة تانية تقول ليهم صلوا علي النبي ويمسكوا يشيلوهوا منهم كمان لما يكتفوا ،،،
أها ،،، مجموعة ورا مجموعة لما في النهاية دخلوها القبر .
فما أشبهنا اليوم بي عنقريب جنازة أم الخير !!!!

" المحجوب "


 

رد مع اقتباس
قديم 12-09-2013, 04:32 PM   #29


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي لا أنا بريدك ،،، لا أنت بتخليني .



لا أنا بريدك ولا إنت بتخليني :

واحد استأذن يشرب موية من الصبارة القدامي جنب الباب ،
ممكن أشرب ،،، لو سمحت ؟
قلت ليهو : أتفضل ياأخي أشرب .
بعد ماشرب قال لي : أنت ما بتحب الشعر ؟
قلت ليهو والله الكلام الجميل بعجب !
. قال : طيب أنا عندي كلام ممكن أقولو ليك .
قلت ليهو : أتفضل .
قال لي هي قصيدة بتقول :
بتمناك ما معاي ،،، وبعيد مني ،،، عشان ما أفكر فيك ،
بتمناك تخاصمني وتطفش من البلد ،،، عشان ما أقرب ليك ،
وبتمناك ما بتريد شوفتي وشاميني عشان ما أعاين ليك ،
وبتمناك بعيد عني أرتاح منك و تريحني وما أشوف عينيك ،
سكت مدة كده وبعدين عاين لي بعد ما كان رافع راسو ،
قال لي : بالله رأيك شنو في القصيدة دي ؟
قلت ليهو : كلام جميل .
قال لي : طيب ،، أنا داير ارسلا الجرايد ينشروها لي ، إنت ما بتعرف زول في الجرايد ؟
قلت ليهو : والله للاسف أبدا يا أخي .
قال لي : سمح . . . ما بتعرف المعتمد ! يعني ممكن يتوسط لي عند ناس الجرايد !
قلت ليهو : والله ما بعرف المعتمد ولا شفت معتمد قبل كده . هو شكلهم بكون كيف المعتمدين ديل ؟ بشبهونا وللا طينة تانية ؟
قال لي : المعتمد دا يا سيدي الامانتي ليك ناس كده زي حالة حبيبي الكتبت ليهو القصيدة دي ، بالله أنت ما شفت معتمد قبال دا ؟
قلت ليهو : أبدا أشوفو وين يعني ؟ لاهم بجوا في مناسبات المواطنين ، كان أفراح وللا أتراح ولا بكونو مع الناس في النشاطات البتهم المواطنين والمدينة ،
ولا حتي بجوا السوق يشتروا حاجاتهم زينا ؟ ما ياها المراسم البتسوي كل شي وكلوا علي الميزانية !
إلا خدمات المواطنين والبلد ، دي بس ! الخارج الميزانية و النثريات .
قال لي : ياخي أنا قلت ليك بتعرفو وللا ما بتعرفوا ، تقوم تعمل لي محاضرة ؟
هو ياخي الواحد ما يسألكم من شي يا السودانيين إلا تدخلوا السياسة في الموضوع كده طوالي ؟
انا زاتي غلطان ،والله أنا ما عندي شغلة ساكت ، اقول ليك حاجة؟
ياخي القصيدة دي ذاتها أنا خليتها ، ياخي كرهتونا الشعر زاتو .
ضرب ( الكوز ) بالصبارة ومشي مني وهو يطنطن ويلعن وانا مندهش في الزول ده مالو ،،،
وفجاءة ضرب الواطه ،
بعدين رفع راسو عاين لي ،،،
وقال : اوعي يكونوا شافوني ، هق ،
قلت ليهو : هم منو الشافوك ؟
قال لي : بتاعين النظام العام ياخي !!!

" المحجوب "




 

رد مع اقتباس
قديم 12-11-2013, 01:06 PM   #30


المحجوب غير متواجد حالياً

بيانات اضافيه [ + ]
 رقم العضوية : 10156
 تاريخ التسجيل :  Nov 2013
 أخر زيارة : 03-07-2016 (07:58 PM)
 المشاركات : 494 [ + ]
 التقييم :  18
لوني المفضل : Brown
افتراضي " غـــــيــــــابـــــــــ "



لمن تغيبي ،،،
بكون في الحسبة ما موجود ،،،
ولمن تعودي ،،، الروح للجسد بتعود ،،،
بيك النفوس تفرح ،،،
طربانة ،،، وآه من عود ،،،
و من سحر عينيك ،،،
سبحان العلي المعبود !!!
________________

( من خاص كلامي ).
رباعيات " المحجوب "


 

رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
تحية طيبة الى أهل المنتدى السماني كمال الدين محمد «۩۞۩-المنتدي الاجتماعى-۩۞۩» 13 06-15-2014 07:59 PM
تحية لمن كان لهم الفضل : المحجوب «۩۞۩- شهد الحروف -۩۞۩ 7 11-26-2013 01:35 PM
(ان الذين يعملون الصالحات سيجعل لهم الرحمن ودًا) اي يجعل لهم محبةً في قلوب الخلق... ودالمدنية «۩۞۩-المنتدى الاسلامى-۩۞۩» 3 09-22-2010 11:32 PM
ترليون مبرك لمن لم نبارك لهم صداح حسن عبدالرحيم «۩۞۩-المنتدي الاجتماعى-۩۞۩» 5 06-26-2009 01:03 AM


الساعة الآن 05:50 AM.


Powered by vBulletin Version 3.8.7
Copyright ©2000 - 2024, Jelsoft Enterprises Ltd
HêĽм √ 3.1 BY: ! ωαнαм ! © 2010
vEhdaa 1.1 by NLP ©2009