عاوز أسئ أو أتملق الحكومة..!؟

كتبت موضوع ضد الحكومة و قلتا يا ولد موضوعك ده إما سبق صحفي أو مقال يطير بيك السماء..؟؟قمتا بعد كتبتو إتذكرتا أمبارح كان متغدي معاي واحد صاحبي و قالي لي (شوف ناس الحكومة ديل مراقبين العالم دي كلهم القاعدين و المغتربين و عندهم تقارير عن ما يكتب في المنتديات شرق و غرب قبل الشمال و الجنوب).. أها مسكتني ليك خوفة موش علي بس..قلتا أولادي ديل البيعيشم و يحرسم منو علي بال ما ربك يهونا و أطلع من السجن بموقف (بطولي) علي فضاء السياسة يسبقه نفس الموقف علي الفضاء الإسفيري و يصبح لي متابعين و معجبين و معجبات .. قمتا حذفتو موش من الكمبيوتر، بل حتي من ذاكرتي نهااااااااااااااااااااااااااااااااااااااااائي..!!
قلتا يا ولد أعكس الأية و قوم أكتب ليك كلام أشكر فيهو الحكومة علي إنجازاتها الملموسة مهما حصل منها ؟؟،أي الحكومة ،أو علي الأقل شوف ليك واحد من المسئولين و أتناولوا بكل الخير بملق تحسد عليه و نفاق يشمئز منه رأس النفاق (عبد الله بن أبي سلول)..!!.. الدنيا ما معروفة، يمكن بكرة ناس الحكومة ديل تلقي ليك معاهم شغلانة أو المسئول البتشكروا و تتملقوا ده يزكيك ليهم..!!
كتبت ثلاثة سطور، راجعتهم للتنقيح عشان أواصل (التلصق و السذاجة).. قمتاصحيت..؟؟ (أنا بدري صحيت من نومي)..؟؟ و جيت راجع نص النهار وما جاني نوم للأن و ما لقيت كلام أكتبو غير الكلام ده..!!

يا ود العم الشوش .... أخبارك ... يظهر أن الهضربة دي ما ساي .... ويبدو أن صاحبك دا نجح في إخافتك ... أو إنت " هبشت " الحكومة ... وبعدين زي ما قال لي صاحبي إن الحكومة دي زي الكهرباء ممنوع " الهزار " و " اللعب" معاها ... وربنا إكفيك شر العوارض والهضربة " نص " النهار

غير مسجل

المشاركة الأصلية كتبت بواسطة أبو أديب

... أو إنت " هبشت " الحكومة ... وبعدين زي ما قال لي صاحبي إن الحكومة دي زي الكهرباء ممنوع " الهزار " و " اللعب" معاها ... وربنا إكفيك شر العوارض والهضربة " نص " النهار

إبن العم العزيز
في حد (يهابش) الحكومة..؟؟ و لا يهزر أو يلعب جمب الأسد..!!
كل الود لك مع أفضل الأمنيات

استاذ الرشيد
بعد التحية
اول حاجة زولك ده اظنه ضايق قرصة الدبيب ...
نمرة اتنين انت البوديك تهابش شنو ...
اسمعها منى نصيحة اكتب لافتة وعلقها فى نظاراتك (الحكومة ممنوع الاقتراب او التصوير قدحا او مدحا)
والتلاتة سطور الكتبتها فى المدح دى اكتب تحتها لما كنت عايز امدح الحكومة وخليها ذكرى لما تشيخ ترجع ليها ...
ذكرتنى جاتنى خترفات زى دى وقمت قبل ما اكتب شاورت واحد من المشرفين قال لى كلمتين (اعمل حسابك) مع انى كوز الا نصيحته ما ابيتها ...
والحمد لله لاحظ معاى البسويها ابراهيم خليل فى دارفور بلقاها الترابى فى الخرتوم ...
ولا كيف ...
امتنانى

السلام عليكم ورحمة الله تعالي وبركاته اخوي / الرشيد ....وانشاء الله الامور تمام والاسرة الكريمة ....عندما نبداء بالتحدث عن الحكومة دائما يكون الحديث كثير وباسهاب ونبتدي نحلل وننقد ونشكر في بعض الاحيان واصبح الكل له دراية ولو قليلة بالسياسة والساسة نتيجة لما يحدث في وطنا العزيز من احداث احسب انها لم تحدث في بلدان العالم.....وللحكومة مساوي مثل مالها من محاسن والسنين التي حكمت فيها البلد كانت كافية لمعرفة مشاكل البلد التي لم تنجح الي الان في حلها جميعا مان تنتهي من مشكلة وتحلها والاتظهر مشكلة اخري واظن السودان موعود بعدم الاستقرار وعيش اهله في امان وتنمية وهدوء اي كان اسباب ذلك اهله او من خارج الحدود....وماحديثك علي انك قررت ان تكتب مادحا او ذاما الحكومة هذا مايدور في عقل الكثيرين الذين ضاقت بهم سبل العيش الكريم في وطني العزيز .. واتمني ان تنجح الحكومة في توفير سبل العيش الكريم لجميع ابناء وطني وتوفير الوظائف دون انتماءت وابعاد كل سارقي قوت الشعب والالتفات الي التنمية الحقيقة وهي انسان السودان دون حرمان اي مواطن من ممارسة حقوقه داخل وطنه وعلي المواطن الارتقاء بالفهم لمفهوم المواطنة والانتماء للبلد ورفع درجة الوطنية .... تنمني من المولي الكريم بان يحفظ بلدنا من كل مكروه ويبعد عنه اعدائه والمتربصين به ويحفظ مجتمعنا واولادنا ......وبين وبينك ياالرشيد احسن الواحد يظل يحلم ويحلم بكل ماهوجميل الي ان يرث الله الارض ومن عليها....وانا ماعندي كلام اكتبو اكثر من ذلك...ودمت بالف خير

العزيز الرشيد .......

استغفرتا في سري ....... وقلتا الله يلعن ابليس مالو الاصلي ومال الكلام دا

واتذكرت رواية شرق المتوسط لعبد الرحم منيف ونخيلتا ما تخيلتا

وقلب رجف

والحمد لله الطلعتا تحلم

ود العم العزيز ... الشوش

الردود أعلاه وما سيأتي أدناه ... دي كلها موصلات جيدة للكهرباء ...

بالمناسبة : أنا جمبك في الخبر ... في مأمورية لمدة شهر ولاحقاً بعد شهرين إنشاء الله سأنفذّ نقلية بفرع الشركة بالخبر

أبو أديب

ابن عمى ابو حبيب
تحياتى وكل الشوق
طالعت الموضوع مره ومرتين
ولاننى حسن النيه
ظننت بانك اما بتهضرب
او ان ام حبيب (الحكومه الاصليه) ادتك قرصه
وساعتها حمدت الله كثيراً ان منحنا واياكم
حكومات حنينات هديات ورضيات
اتاحن لنا حرية التعبير
مدحاً وقدحاً

تخريمه
ابو رهف
بلاش الحركات دى

متأكد يا الرشيد كلامك ده في النوم او في الصحيان .... برضو اعمل حسبك

يا ناس
خوفتونا عدييييييييل كدة
يعني الزول ما يتكلم في الحكومة..؟؟
خلاص يا حكومة.. أنا خواااااااااااااااااااااف.. و بمشي بي الحيطة و الغنماية بتأكل عشاي و يمكن تأكلني معاهو..!!
إستوقفني وعيد الأخ تمساح و قوله (والتلاتة سطور الكتبتها فى المدح دى اكتب تحتها لما كنت عايز امدح الحكومة وخليها ذكرى لما تشيخ ترجع ليها ...)
يعني الحكومة دي قاعدة لي الزمن داك.. لو أنا عشتا..؟؟ وهل حتي الملق للحكومة من (الممنوعات) لديهم و لفئة بمواصفات (خاصة)..؟؟
و أتمني مع الأخ (قلب الحصاحيصا) أن أن تنجح الحكومة في توفير سبل العيش الكريم لجميع أبناء وطني وتوفير الوظائف دون إنتماءات وإبعاد كل سارقي قوت الشعب والالتفات الي التنمية الحقيقة وهي إنسان السودان دون حرمان أي مواطن من ممارسة حقوقه داخل وطنه وعلي المواطن الارتقاء بالفهم لمفهوم المواطنة والانتماء للبلد ورفع درجة الوطنية.. أو كما قال..
و يا الست.. الخوف من شنو.. (مشاعر حبوبات)..!!

و أسأل إبن العم (أبو أديب) عن الموصلا ت الجيدة (للكهرباء) التي ذكرها..هل هي من (السد) أم (المد) الإنقاذي الذي عمّ القري و الحضر..؟؟

و يا أخ أبو أمجد
لو قلنا أن (أم حبيب) هي (الحكومة الأصلية) كما قلت، زعلت الحكومة (الأولي)..!!
و إياك تسألني الحكومة (الأولي) دي منو..؟؟
و إذا قلت أنها ليست (الأصلية)، زعلت تبعاً لذلك الإدارة (الداخلية)..؟؟

و يا ود العطا
ذدتنا خوف..!! يعني نعيش كدة من خوف لي خوف..خوف من الحكومة و خوف في العمل و حذر من غضب صغارك الذين أنجبتهم و محاذير إجتماعية و خوف من (الولية) و خوف من (الخوف) نفسه..!!
و يسبق كل ذلك خوف من الله تعالي و سخطه و نقمته.. و الله المستعان.
و دمتم

نسيت أن أقول أنه قبل فترة أعجبتني رسالة علي هاتفي الجوال و هي (دعاء) جميل أرسله لي صديق عزيز و قمت بإرساله لأخر كنت أعتقد ب(غباوة) أن (المعزة) بيننا لا زالت قائمة..؟؟
فرد لي الأخير بالتالي :
شايفك الأيام دي داخل في شخصية (كوز)..!!
لم أرد عليه و قلت في نفسي أنه حتي الدعاء بالخير يصنفه البعض علي أنه من فعل (أولاد الحكومة)..!!
و يا حكومة خوفي الناس و أدعوا لهم أن لا يخافوا..
و لا زلت صاحياً و لم أنم بعد..؟؟

تحياتى استاذ الرشيد
ارجع و استعرض الانتخابات من الحملة الى اعلان النتيجة
ما قبل الانتخابات الكل كان ساخط على الحكومة ما تتلفت انت ذاتك منهم ...
حتى خيل لامثال عبد العزيز خالد (امثال دى حلوة) انهم كاسحون لا محالة وما درى ان الكل مبطن الخوف اما من الحكومة وكانّ الحكومة تجلس خلف الستار فى غرفة الاقتراع مع انه اصلا ما كان فى ستار ... لاقيت كم واحد كانوا بيعلنوا انهم ما حا يصوتوا للشجرة ولكن بعد ان دقُ الميس تراهم سكارى وماهم .... أو خايف من الاخر والحكم المسبق على تجربة لم تبداء ...
الرجعنى لى كلامك ده موقف امس مع البقال اللى جنبنا ... لى مده طويلة ما قابلته اول ما شافنى وبعد السلام الذى منه طوالى راح خاشى فى الحكومة وشكر تقيل ونحن لو ما جاءت الحكومة دى كان تعبنا و .... و ..... انتهزت فرصة زبون جاء داخل و اعتذرت و هرولة ،،، شاهدى انه قبل كده كان اكثر الناس عداوة على الحكومة والكيزان وكانوا هم أس البلاء فى كل ما ينقص حياته ... فى خوف اكتر من كده ...
اذا ساكن فى شقة ارحل لى بيت فيه حيط عشان تعرف تمشى
امتنانى

يا رشيد مرات بقول لي كلام للشباب بعتبره ذي المثل او قريب لايه

انت ما سمعت العسكري لا تخوايهُ ولا تلاويهُ .... واضيف ليك كمان

من وحي الغربة ( مال الملك ما بتملك ) خيط انت الكلام واربطه مع

بعض - خوفنا كتر ماعارفين من حكومة البيت ولا حيكومات الفـُــــقر .

تحياتي . مستعجل لأني مرسل ... سلام .

الرشيد اخوي هضربتك دي برضو مابتصنف هضربة انما بتصنف ضمير مستتر تقديره (ليست هضربة) عشان كدا ياخوي حاول ماتنوم بي النهار انا الصباح هضربت بي هناك ولالقيت واحد ردا قلت احسن زاتو بدل الهضربة دي تودينا لي احلام مفزعة وتجينا الاشباح قبل غرف الاشباح وساعتها اسبايدر مان مابحلك كل الود

المشاركة الأصلية كتبت بواسطة ياسر تمساح

تحياتى استاذ الرشيد

الرجعنى لى كلامك ده موقف امس مع البقال اللى جنبنا ... لى مده طويلة ما قابلته اول ما شافنى وبعد السلام الذى منه طوالى راح خاشى فى الحكومة وشكر تقيل ونحن لو ما جاءت الحكومة دى كان تعبنا و .... و ..... انتهزت فرصة زبون جاء داخل و اعتذرت و هرولة ،،، شاهدى انه قبل كده كان اكثر الناس عداوة على الحكومة والكيزان وكانوا هم أس البلاء فى كل ما ينقص حياته ... فى خوف اكتر من كده ...
اذا ساكن فى شقة ارحل لى بيت فيه حيط عشان تعرف تمشى
امتنانى

تحياتي للأخ ياسر..
أنا كلمتك و غيرك في المداخلة أعلاه إني زول خواااااف و رجااااااف..!! في داعي تمشي تنكت البوست ده تاني و تمارس علينا (التمسحة) دي ..؟؟
يا ساتر منك يا ياسر..
و يا ستار علي من حيطتك..
و الحيطة ذاتا من الفلين..؟؟

كل الود

المشاركة الأصلية كتبت بواسطة محمد المنصورى

خفنا كتر ماعارفين من حكومة البيت ولا حيكومات الفـُــــقر .

تحياتي . مستعجل لأني مرسل ... سلام .

يا منصوري..

جيب مراسيلك و كمل مشاويرك و أقعد أقرأ النت ده ..و شجع المريخ و لا عب الصغار لديك.. و إياك و سيرة ..........؟؟ هم يتوعدون..!!

المشاركة الأصلية كتبت بواسطة البرنس

الرشيد اخوي هضربتك دي برضو مابتصنف هضربة انما بتصنف ضمير مستتر تقديره (ليست هضربة) عشان كدا ياخوي حاول ماتنوم بي النهار انا الصباح هضربت بي هناك ولالقيت واحد ردا قلت احسن زاتو بدل الهضربة دي تودينا لي احلام مفزعة وتجينا الاشباح قبل غرف الاشباح وساعتها اسبايدر مان مابحلك كل الود

و الله يا برنس أنا قريت هضربتك البي هناك و كتبت لي رد و حذفتوا..!! إتذكرت البوست بتاعي ده و قلتا (الإتبلبل ..ما يعوم)..!!
يا البرنس.. أختار ما بين مغايس الحكومة و مغايس الهلال..
أو خليك محتار.. و الحل عند الواحد القهار الجبار..
كل الود

إلى أولاد الحكومة..

الكوز (الأصلي) يرفع إيدو.. و الكوز (التايواني) يجيب لي (أضانو) قريب.. و الكوز (تحت.. تحت)، أفضل لى يبقى شيوعي، و الكوز (عصا نايمة و عصا قايمة)، يجي يحتفل معاي بيوم الخميس..

قالوا الكيزان (مقامات)، أسوأهم لم أذكره هنا.. فما هو..؟
و دمتم
و دمتم تااااااااااااني

المشاركة الأصلية كتبت بواسطة الرشيد حبيب الله

إلى أولاد الحكومة..

الكوز (الأصلي) يرفع إيدو.. و الكوز (التايواني) يجيب لي (أضانو) قريب.. و الكوز (تحت.. تحت)، أفضل لى يبقى شيوعي، و الكوز (عصا نايمة و عصا قايمة)، يجي يحتفل معاي بيوم الخميس..

قالوا الكيزان (مقامات)، أسوأهم لم أذكره هنا.. فما هو..؟
و دمتم
و دمتم تااااااااااااني

أصلي هنا مافي ..... أما صاحبنا كان ( امنجي )

وما ادراك ما ( الامنجية ) ودمت .

المشاركة الأصلية كتبت بواسطة أبو أديب

يا ود العم الشوش .... أخبارك ... يظهر أن الهضربة دي ما ساي .... ويبدو أن صاحبك دا نجح في إخافتك ... أو إنت " هبشت " الحكومة ... وبعدين زي ما قال لي صاحبي إن الحكومة دي زي الكهرباء ممنوع " الهزار " و " اللعب" معاها ... وربنا إكفيك شر العوارض والهضربة " نص " النهار

امين 1967

ابواديب تحية طيبة وانا قلت حاجة
الحكومة دى ديمقراطية فحرية الراى والتعبير ملك للجميع
لانوا الناس الرفعو السلاح عايزة تتفاوض معاهم
خلى بيقول مجرد راى فاكيد دا حايجد اذن صاغية
ولا شنو يااستاذ الرشيد

المشاركة الأصلية كتبت بواسطة محمد المنصورى

أصلي هنا مافي ..... أما صاحبنا كان ( امنجي )

وما ادراك ما ( الامنجية ) ودمت .

الود ده من (الشبيحة) و المفرد (شبيح) يا عزيزي..!!

المشاركة الأصلية كتبت بواسطة امين 1967

ابواديب تحية طيبة وانا قلت حاجة
الحكومة دى ديمقراطية فحرية الراى والتعبير ملك للجميع
لانوا الناس الرفعو السلاح عايزة تتفاوض معاهم
خلى بيقول مجرد راى فاكيد دا حايجد اذن صاغية
ولا شنو يااستاذ الرشيد

و لا مناص من التفاوض مع من رفع السلاح أو أشهر أقلمه أو جاهر برأيه.. و يزل ما نقوله رأي قابل للتفاوض مع الأفراد و ربما الحكومات..
و دمت