والله جد ب حليفتا كمان

* والله جد هي قالت لي كدة حين ارسلت لي هذا الايميل وبحليفتا ضحكت انا والحروف وسكتا
مشكورة ستي علي الرساله وياهدي نزلتها كيتن علي .....؟ فنانك الاحوص ومطوفش

كمية كبيرة من امراض العيون بتلاقينا وممكن نكون بنعرفا ... مثلا الرمد، الحوص او الحول والحساسيات المختلفة و.. بخلاف حول وحوص العيون في ناس عندهم حوص في الكلام
والله العظيم كلام احوص...؟
قد يكون هذا الحوص في موضوع النقاش او في الغناء .. يعني ممكن احوص الكلام هذا يكون وسط مجموعة رجال اعمال وخبراء اقتصاد بتكلموا حول (ما يحدث في العالم العربي واثره علي الاقتصاد ) فيقول لهم : (فعلاً لازم اي فنان يغني للاطفال ويشارك )
وممكن يقول اغاني الحقيبة خالدة وجميلة عشان نزار قباني شاعر مُجيد ورائع وتكتشف بالحديث معه ان (اسماء بت الجنيد) من شعراء الحقيبة وروبي عملت ديتو مع سرور ..
ولا تتفاجأ لو في عز فرحك قال ليك (اخر الاحزان يازول.). عشان هو عندو حوص في الكلام او الفهم ممكن يكون كان داير يقول ليك( مبروووك والفرح دائم) بس الكلام اتحول في لسانو اوفي قلبو ربما..!!
تقول له :( مادونا قالت ان يدهسها قطار اخير من الزواج يقول لك بت جيرانا بتشبه نانسي )
وهسه شربنا الشاي..
اما الحول في الاغاني فهو اكثر من حصحاص الحصاحيصا كلها واكثر من (شماشتنا زاتو) بكتييير.. الشاعر شخصياً وفي رواية اخري (ذاتو) لو سمع الاغنية ما بتعرف عليها إلا في المشرحة بعد عمل الفحوصات اللازمة....والتأكد من بعض ملامحها
بت اختي الصغيرة اخصائية حول اغاني سودانية علي عربية .. تلعب (لعبة الحروف) مع أغاني حوته وعجاج وما يتغني به نجوم الغد واليسا وطبعاً نانسي عجرم ....
تسمع منها (عشان هواك حبيت قمرية فوق (راس بيت) وهي بالطبع قمرية فوق الدوح) الي نهايتا وتضحك وتبكي.. وحول اختي هذا مقدور عليه لانه في نطاق بيتنا وبس... لكن ! الكلام في الذين يسمعونا الحول الغنائي عبر اجهزة الاعلام والوسائط المتعددة بالنسبة لهولاء ماهو الحل ؟ وسؤال حلال (نقبل وين)؟ .....نطفش ولاشنو..؟
الغريبة الكلمة البجيبا الحول للاغنية اكتر المرات بتكون عكس الكلمة الصحيحة بكل معانيها..
واذا الكلمة ماشة (كندا) تذهب بها بعيدا الي (نيجريا) وماقاصد البدري ياوصيفاب...؟
واذا بتتمشي بالنهار تمشي بخطواتها نحو الليل
ولا تعتذر الكلمة
وهسه شربنا الشاي
اعتقد وبعض الاعتقاد (يخرب بيتو) لو الحول جاي من السمع (مشكلة) ولو جاي من باب الفهم (كمية مشاكل) اما اذا الزول بينو وبين نفسو غير في كلمات الاغنية حتي تشبه حاله ومزاجه ؟ هذا لا يعتبر حول بل حساسية ..
هذا حسب فهمي البسيط
في حوص وحول لم يصل الي مراحل خطيرة ومتأخرة وممكن يتعالج ويتلاشي ويبقي مافي (حبة ثقافة) وشوية تركيز عند الاستماع من الاصل.. لكن ! (والله جد) زول زينا يقول (انا من طيورك اسدٌ) دا لا حوص لا حول لا حساسية لا موية بيضاء ولا حتي عمى ولا طشاش زاتو دا مع الاعتذار للاموات (ميت حي)...
انت من طيوره اسد ؟؟ طيب ليه ما (انت من حميره بلبل)
مفروض اقول ليك كلمة بهذه المناسبة بس بجد الكلمة المناسبة هي الكلمة (الضائعة)
والبيني وبين كلامك (حوص فكري) والبيني وبين فكرك (كلامي)
وان كان عن نفسي انا شخصياً (ما دايرة معاك)
و.........
خُد قلبك وامشي
والله جد