سطــــــــــــور الواطــــــــــــــــة

المشاركة الأصلية كتبت بواسطة بنت أمها

ود ابوعاقلة

سطورك ما ممحية ... ولا منسية

لكن غبار الزمن ختا عليها ..

لكن كلماتك منحوتة .. ومجبودة عليا

سطورك ما موجودة بس في المنتدي .. وكمان جوانا

فسطر وابحت .. وانحت ونحن نبيح لك كل المسافات والاماكن

ودمت طيب

بت أمها آسف للرد المتأخر وبهديك الكلام التحت دا ليك ولاخواتنا ودمت بألف خير وصحة فت ...

وانا بكتبِك ...
شولة وسكون .. بى لون ولون ...
والضمة برضو بتكتبِك ...
في كل حرفين من غُنا ...
وفي كل اصبع مرتبِك ...
اللمسة والخدر البناوش في المسام ...
أنفاس تحاول تجذبِك ...
في كل حالاتك معاي ...
بلقاكي كلمة شوق تتور فيني حاجة تدوّبك ...
وانا فيكي دوبني الكلام ...
والفاظ كتيييييرة بتكتبِك ...
لو عارفة يا سفري الطويل !!!
ميل القليب والخطوة ميل !!!
جوايا شايلك وبحجِبك ...
عن حتة فيها الشوق خطر ...
عن عيون كل البشر ...
وناس بترمي عيونا فيك تتوهطك ...
مااااااااا اجملك ...
وانتي شايفة الدنيا الوان من قزح
تضحك سماك يوم تدخلك ...
والقمرة شالت نورا منك واختفت ...
مااااا إكتفت ...
بس إستحت !! من تاني تظهر وتشحدِك ...
وانا شمعة سارق ضوي منك ...
نفخة منك تكتليني ...
ونظرة منك اضوي ليك
الباقي من دربك معاي ...
يا ضل مشتت في المسير ...
راكوبة الساعة الهجير ...
يا شقشقة كل العصافير
التّرِك جواكي زيي تعشّشِك ...
ما تتني عودك للرياح ...
ما تكوركي لو طلع الصباح ...
وتقوم عصافيرك تطير ... وتمقلبِك !!!
دي الوحدة شينة علي البِرِيد ...
والشوق برااااااااهو بقردنِك ...
وخلي طاقتك فاتحة فيك ...
بابك عيونك ... ضلفة ليك ....
والتانية لى قاسي الظروف .. يوم تغلبِك ....
وما ترمي روحك لاحتمالات المقاس
وتختاري زول ما بلبِّسِك
ما تعايني فوق !!!
دي النجمة لو قالت تَخُر في يوم .. أكيييد ما بتعجبك ...
وما تدسي في قلبك كلام عارفاهو مُقلق .. وبِِتعِبِِك ...
وما تنسي يوم .. أحمر شفاك ...
برواز مثيييييير لى بسمتك ...
دي البسمة لو هجرت ملامحك ...
ما بتعود ...
حتى المرايا الما بتحس ... ما بتقبلِك ...
شن باقي من عمرك فرح ...
شن باقي من جرح الزمان الما نتح ...
والباقي من عمرك سنينو بتحسبِك ...
والباقي من كلك جسد ...
نظرة الناس الحسد ...
بتخشي وين .. يوم تدخلك ...
إتحصني وغطيني بيك ...
إنستري ...
ما تبقي نقناقة كلام ...
كُتر الكلام والنقة ما بِتوصلِك ...
وابقي عشرة على العيون ...
البشرة بى لون .. أو بدون ...
وحاجات كتييييييييرة بتعرفيها براك ...
بدونا مين يستحملِك ...
خليها انفاسك عطر ...
وما بين شهيقك وزفرتك .. تلقيهو بين رئتيك عِتِرْ ...
يستنشقك ...
أو مِدّي حبل الصّرة دم ...
ما دمو كان نفس الفصيلة .. وبشبهِك ...
أبقى جواك كل شى ...
وتبقي جواي أغلى شي ...
نعلّم الروح المشي ...
تاتيها لو مرقت عليك ...
دسيها لو كان فيها شي ...
دقاتو في قلبك تئن ...
والآهة لو عصرت قليِبو ... ينبّهِك ...
خليكي زي ما إنتي .. إنسان فيهو زول ...
بقى كلي شي ...
دمّك ...
عرِوقِك ...
وبصمتِك ...