بله الغائب والطائرة الماليزية

اكد المثير للجدل بله الغائب ان الطائرة الماليزية المختفية محتجزة في بلاد الجن الاحمر
ويقول انه قادر على العثور عليها ؟
مؤكداً ان كل ركابها احياء
......
انتهى حديث بله

بله بليله كذبه تقيله مرقت منه زادت جنه

الطيارة يحلها الحل بله
بله الغائب يزيد حيرة المالزيين (بله )
اخاف الصينيين والماليزيين يطلعوا مظاهرات ويهتفوا (وينه بله )
شتره
جن احمر راكب محمود

الاخ لؤى

السلام عليكم ورحمه الله و بركاته

طيب الشيخ بله ما اشتغل و اخلص الناس

المساكين من الجن الاحمر على طول

هو منتظر ايه ؟

حاشية

سؤال حابى افهم

هو الجن الاحمر مختلف من الجن العادى ولا الحاصل شنو؟

التقيك لو بعمرنا بقية باذن الله

كلموهو يحل لينا مشكلة دارفور دي طيب

كذب المنجمون ولوصدقوا

المشاركة الأصلية كتبت بواسطة ايهاب عبد القادر

الاخ لؤى

السلام عليكم ورحمه الله و بركاته

طيب الشيخ بله ما اشتغل و اخلص الناس

المساكين من الجن الاحمر على طول

هو منتظر ايه ؟

حاشية

سؤال حابى افهم

هو الجن الاحمر مختلف من الجن العادى ولا الحاصل شنو؟

التقيك لو بعمرنا بقية باذن الله

كما نقول ان الجنون فنون فان الجن انواع وشكل ولون
فمن حيث اللون فهنالك سبعة الوان للجن( أزرق وأحمر وأصفر وأبيض وأخضر وأسود ورمادى)
يعني تختار اللون البعجبك .
ولان الجن مخلوق من نار فان تلك الالوان هي درجات للون النار
وانواعهم فهنالك جن عادي و(جن بالطوة) ومارد وعفريت
والعفريت هو اخف واذكي انواع الجن (عامل فيها عغريت ) لكن ما عارف علاقتها بكلمة (العفريته) شنو
والمارد هو اقوى انواع الجن لكنه قليل الذكاء وهي التى تصفد في رمضان
لذا نجد في مسلسلات الاطفال هذا المارد يمثل القوة
وبين انواع واشكال الجن يمكن التزاوج فلا ينظرون لقبيلته شنو (جنوبي جعلي غرابي شايقي محس ) ما فارق عندهم
مرتاحين من مشاكل (الهامش والمركز )
والمولود ينسب لقبيلة ابيه شفت النظام ده كيف
شتره
الحبيب ايهاب
الشغل ده داير مقاولات
الحكاية اكل عيش ودعاية
قال يفكهم قال

المشاركة الأصلية كتبت بواسطة ابوعمر

كلموهو يحل لينا مشكلة دارفور دي طيب

كذب المنجمون ولوصدقوا

الرائع ابو عمر
الشيخ بله عالمي لا تكلمني
المحليون يمتنعون
ثانياً بله تخصصه في( الجن) ومادة المعارضة والهامش وعقار دي ما شايلها
في بداية ظهور الكمبيوتر وعدم المام الناس بما هو الكمبيوتر قدمت فرقة (ود حبوبة المسرحية ) على شاشة تلفزيون ولاية الجزيرة (عليه الرحمه) عمل مسرحي يحكي ان كل واحد يقوم بكتابة مشكلته في ورقة ويقوم بادخالها في جهاز الكمبيوتر وفي الجانب الاخر تخرج الورقة ومعها الحل .
وبدا الناس يكتبون مشاكلهم وفي الجانب الاخر تخرج الورقة مكتوب عليها الحل ، الا واحد كلما ادخل الورقة لفظها الكمبيوتر ، فتسال الناس عن مشكلة هذا الرجل التي اعجزت الكمبيوتر .
فقال الرجل للناس كل مشكلتي ان كتبت للكمبيوتر قيمة راتبي في الشهر وبجانبه ما احتاجه من متطلبات سكن ، ومدارس ، ووجبات ، وعلاج ، ومجاملات
وطالبته بان يقسم الراتب على تلك الاحتياجات .............
شتره
يعني الكمبيوتر لو اديناه مشكلة دارفور والوضع الاقتصادي بطق عديل

دابة الأرض نفسها غلبت الجن الأحمر والأزرق والأصفر{ 8 صفر }
يعني هؤلاء الجماعة الطيبين لم يعرفوا بان سيدنا سليمان قد توفى الا بعد أن راووا عصاته تتساقط
معنى ذلك أنهم مواسير بكل معنى الكلمة
فهؤلاء لم يتعرفوا على موت النبي سليمان
فكيف لهم بمعرفة مكان الطائرة ؟؟؟؟
يا أخي مرة واحد دجال طلب من الجماعة تيس ازرق !!!!
اها دا علي بالطلاق في استاد الهلال ماتلقاه !!!
ومرة واحد طلب { نملة ضكر } !!!!
خلانا اليوم كله نفتش ونتصيد النمل وهو في ايابه وذهابه
فجأة شوفنا لينا نملة ركبت فوق ضهر نملة قلنا خلاص وجدنا الكنز
وديناها ليهو قال دي أنثى حامل !!!
تقول عنده موجات صوتية !!!!
في مرة من المرات كتبت لكم هنا عن تاجر البنقو الذي كتب لافتة كبيرة على مكتبه
{{{{ هذا من فضل ربي }}}
ابليس جاء ماشي بالصدفة
قرأ اللافتة وبدأ يبكي بحرارة شديدة والدموع والمخاخيت سايلة يمين وشمال
سالوه لماذا تبكي يا ابليس ؟؟
فرد عليهم {{ بالله شوف زي النوع دا نديهو نحن القروش وينكرنا !!!! }}
يا اخي والله هناك من البشر مايحتار فيهم ابليس نفسه
العالم يتطور ويتقدم
ونحن لسه جن أحمر وجن أخدر وجن بمبي !!!

ده مش حل المشكلة ده راد الطين بلة وهو اسمه بلة وهذا الشخص ذكرني بنكتة - تتحدث عن شخص اسمه بلة
وقد كانت احواله المادية صعبة جد كما يقولون ( اباطو والنجم ) ولديه اطفال كثيرون جدا - وفجاة وجد زوجته حامل بطفل جديد ولم
يكن يملك حتى حق السماية - فقام بعمل السماية ببليلة فقال لصاحبه ماذا اسمي هذا المولود الجديد وقد كان صديقه هذا بتاع سجارة
صحب خيال واسع فقال له ( سميه ذاد الطين ) - ليصبح الاسم ذاد الطين بلة.