اخطاء املائية شائعة, تجنبها رجاءا

السلام عليكم
جابتني رسالة من الادارة بعد غياب طويل (يعني عندها فائدة الرسائل).
طبعا خشيت قريت في المواضيع الاولى وحمدت الله انو السلسلة اياها قد اختفت (على الاقل من الصفحة الاولى, ولا ادري ما بالداخل)
المهم, بما اني جئت, ففكرت انفذ حاجة كنت بفكر فيها من وقت (كمساهمة في المنتدى, حيث انو مساهماتي النافعة هنا شبه معدومة),
الا وهي عمل قائمة بالاخطاء الاملائية الشائعة لدينا.
فاذا قلتو خير نعمل القصة دي, واذا مافي فائدة يبقى مافي داعي.
موافقين؟
.
.
.

شكرا على الموافقة والدعم والتشجيع, هذا ما توقعته.
بسم الله نبدأ:
الخطة حتكون كما يلي ان شاء الله:
1- اي زول بيعرف خطا شائع يقولو عشان نضيفو
2- اي زول يراجع القائمة واذا لقى انو قعد يغلط ايا من الاغلاط المسجلة فعليه بالتوبة, ومن شروط التوبة: هجر الذنب )الخطأ( فورا, و العزم على عدم العودة اليه
3- ستنظم ان شاء الله بعد ذلك دوريات تجوب المنتدى, اي زول يغلط واحد من الاغلاط دي يعاقب عقوبة تعذيرية )لا تصل الى الحد(

الخطأ الصواب
لزيز لذيذ
اعتزار اعتذار
مذيد مزيد
يميذ يميز
خطاء خطأ
مسئول مسؤول
يذال يزال
ازكر اذكر

كل الملاحظات مقبولة, واية اضافات يرحب بها

فتح الرحمن
سلامات ومشتاقين
الاخطاء هنا قد تكون غير مقصودة بمعنى ان تكون اخطاء حاسوبية
الواحد ما ينتبه ان الكلمة خطاء الا بعد ان ينزل الموضوع بتدخل فيها عوامل السرعة و الزمن ومنها كمثال فى كلامك (جابتني رسالة من الادارة بعد غياب طويل) وكمثال تانى (انو السلسة اياها قد اختفت) دى العزر ليها مقبول لكن لو كتبتها ايام الانتخابات كان شفت شعاع ...
الملاحظة الثانية تجد البعض يكتب بخواطره وكانه يخاطب شخصا امامه لذلك تجده يدون كل الكلمات على علاتها ...
تخريمة ***
انت الاتفق معاك منو

الاخ فتحى
سلامات يا راجل وبركه الشفناك طيب
والحمدلله ان رسالة الاداره جابتك راجع
طبعاً هناك اخطاء انتشرت وتوافق الناس عليها (وركبت مكنة صواب)
فاصبحت صاح (والما عاجبو يحلق حواجبو)
والملاحظ ان الاخطاء تكثر باستعمال بعض الحروف
مثل الزين والذال
الغين والقاف
والسين والثاء
ولنا عوده
حاشيه
سلامات يا تمساح

الاخ فتح الرحمن سلام شديد وليك وحشة
اخى الطرح جميل ومافهمته انك تقصد الاخطاء الشائعة
فى اللغة العربية ويمكن استخدامها .
هذاء الموضوع اجريت فيه بحث بعنوان (الاخطاء الشائعة)
وكانت مرجعيتى للبروف/ عون الشريف قاسم فى كتابه (اللهجات العامية فى السودان)
فكانت نتيجة البحث ان الخطاء غير مقصود ولكن اللهجة لكل قبيلة لها الاثر الاكبر
فى تقيير الحروف مثال حرق القاف والغين تجد اهلنا فى غرب السودان ينطقونهما( خ )
كلمة القلم يقولون خلم والمغرب يقولون مخرب وهذاء لايحسب خطاء .
اما الاخطاء الشائعة مثال ممنوع التدخين العباره الصحيحة ان نقول التدخين ممنوع
لايجوز تقديم النكرة على المعرفة.
وهناك اخطاء شائعة ويجب تصحيحها
من الاخطاء الشائعة :-
ام بارح
بعد باكر
حسى
او هسة
اخى مشكور على الموضوع
ولك تحية

تحياتى يا باشمهندس بساول مرة اعرف انك
مهندسفى اللغة العربية, واتفق معاك فى حكاية
(الاغلاط) دى لكن مرات الحكاية بتكون (ذلة كى بورد)
وكدة ومرات الحكاية بتكون نتيجة (للعجلة),,,,
اسمح لى بالمساهمة فى هذه المساحة:
(انشاء الله) خطأ والصواب هو (ان شاء الله) فالاولى
فعل مصدره انشأ وهنا الكلمة ليست فى مكانها ,,,,
عموماً لنا عودات فى هذه المساحة وتقبل تحياتى واشواقى

فتح الرحمن
سلامات ومشتاقين
الاخطاء هنا قد تكون غير مقصودة بمعنى ان تكون اخطاء حاسوبية
الواحد ما ينتبه ان الكلمة خطاء الا بعد ان ينزل الموضوع بتدخل فيها عوامل السرعة و الزمن ومنها كمثال فى كلامك (جابتني رسالة من الادارة بعد غياب طويل) وكمثال تانى (انو السلسة اياها قد اختفت) دى العزر ليها مقبول لكن لو كتبتها ايام الانتخابات كان شفت شعاع ...
الملاحظة الثانية تجد البعض يكتب بخواطره وكانه يخاطب شخصا امامه لذلك تجده يدون كل الكلمات على علاتها ...
تخريمة ***
انت الاتفق معاك منو

ياسر تمساح حسب ما تقدم ذكره 14/15 صوّب

ازيك يا باشمهندس

والله لكن غايتو حكاية الاغلاط دي ما تعد

انا مثلا الكيبورد بتاعي مخستك ومرة الضغطة بتجيب الحرف اكتر من مرة ومرة ما بتجيب حاجة خالص

وبعدين مرات الواحد بضغط الحرف الجنب الحرف البقصدوا


ويلا ........ بعد كدا مرات ما بلاحظ ومرات بكسل الزول ......... ويسيب الحكاية للقارئ الاكيد حيفهم الغلط لانو بكون هو زاتو مرة بيه قبل كدا


وتحياتي

المشاركة الأصلية كتبت بواسطة معتز عثمان عباس

الاخ فتح الرحمن سلام شديد وليك وحشة
اخى الطرح جميل ومافهمته انك تقصد الاخطاء الشائعة
فى اللغة العربية ويمكن استخدامها .
هذاء الموضوع اجريت فيه بحث بعنوان (الاخطاء الشائعة)
وكانت مرجعيتى للبروف/ عون الشريف قاسم فى كتابه (اللهجات العامية فى السودان)فكانت نتيجة البحث ان الخطاء غير مقصود ولكن اللهجة لكل قبيلة لها الاثر الاكبر
فى تقيير الحروف مثال حرق القاف والغين تجد اهلنا فى غرب السودان ينطقونهما( خ )
كلمة القلم يقولون خلم والمغرب يقولون مخرب وهذاء لايحسب خطاء .
اما الاخطاء الشائعة مثال ممنوع التدخين العباره الصحيحة ان نقول التدخين ممنوع
لايجوز تقديم النكرة على المعرفة.
وهناك اخطاء شائعة ويجب تصحيحها
من الاخطاء الشائعة :-
ام بارح
بعد باكر
حسى
او هسة
اخى مشكور على الموضوع
ولك تحية

سلامات تانى مرة
يا هندسة
وكمان للكل
عارف اذا بتحاسبنى على عزر دى عاين لى كلام الباحث معتز عثمان
برجع تانى وبقول احيانا عامل الزمن وعدم الاحترافية فى التعامل مع لوحة الحاسب ...
****
ابو امجد
مشتاقين
ست البنات
خليك واضحة وقولى الكبر ما ترميها فى الكى بورد ساكت ذنبو شنو (زوقتك استايل)

سلامات ياسر وكيف الاخابير؟
مشكور جدا على التصليحات, وهذا ما يسمى في عرف الجيش "البيان بي انا زاتي" وكده تكون مهدت لينا للنقطة 3 اعلاه الخاصة بالدوريات والاجراءات العسكرية.
صلحت التانية القلتها لي (السلسلة) لكن الاولى قريتها مرات ومرات وما عرفت الخطأ وين, يا ريت لو تعلّمو لي بالاحمر مع توضيح الصواب. برضو وريني لو في اخطاء تانية عشان ما تبقى علي قصة الابرة البتكسي الناس. واني لك من الشاكرين في احوالي كلها.

اما الاخطاء المقصودة بهذه الحملة (راجع توقيعي) فهي بالتاكيد ما اخطاء العجلة (والموتر) والكيبورد, فدي لسنا مؤاخذين فيها. وانما الاخطاء الراكزة عند الزول, يعني مثلا كلمة عزر دي يكاد يجمع على خطئها عند بني جلدتنا من بني السودان وبناته, وفي ناس ممكن تكون ما عارفة اصلا كتابتها الصحيحة.
.فالهدف انو الناس تصلح الاخطاء دي, يعني لو انو الشباب الصغار جوا قروا هنا يقروا ويتعلموا صاح

في شأن التخريمة:
الاتفاق هنا من قبيل انو مافي زول اعترض بقول "لا", وانتم ادرى :).

ابو امجد
سلمك الله
والادارة تستغل ثغرة نفسية معروفة عند مشجعي البريد الالكتروني من امثالي, وهي شعور ملح يذكرك كل حين انو في زول رسل ليك رسالة وما رديت ليو. المرة الفاتت رديت ليهم الرسالة لكن يبدو انو بريدهم اتجاه واحد (برسل لكن ما بجيب راجع) فهسي جينا عديل.

المشاركة الأصلية كتبت بواسطة ابو امجد

الاخطاء تكثر باستعمال بعض الحروف
مثل الزين والذال
الغين والقاف
والسين والثاء

اصبت كلوة الحقيقة وفشفاشها بكلامك, هدف هذه الغزوة هو ما ذكرت تحديدا, العنوان الكامل هو:
اخطاء املائية شائعة لدى السودانيين, تجنبها رجاءا
وهي معنية بالاخطاء التي نتفرد بها كسودانيين ضمن ميزاتنا الاخرى التي نفاخر بها الشعوب.
فاذا صلحنا الاخطاء دي نكون قفزنا قفزة كبيرة الى فوق.
مشكور ونرجو دعمكم

السلام عليكم معتز, سلاما اشد من سلامك وتحيات واشياء اخرى مفيدة

المشاركة الأصلية كتبت بواسطة معتز عثمان عباس

مافهمته انك تقصد الاخطاء الشائعة
فى اللغة العربية

فهمك صحيح جملنا الله واياك بالعقل.

المشاركة الأصلية كتبت بواسطة معتز عثمان عباس

هذاء الموضوع اجريت فيه بحث بعنوان (الاخطاء الشائعة)

ده كلام مؤسس.
بهذا فقد عينّاك المراجع الفني ومسؤول الدعم التقني في الحملة, يعني لو جانا واحد يغالط زي ياسر الفوق ده نقوم نحولوا ليك عشان تتعامل معاو :).
تحياتي

اوووو عارف
سلامات, واتمنى ان كل شئ كما تحب (من اماني السودانيين المستحيلة, زي بتاعة الاعياد: السنة الجاية خريج وهو يادوبو دخل سنة اولى, مرة واحد ما سوداني زرّاني في المسالة دي زرّة شديدة خلاص).

المشاركة الأصلية كتبت بواسطة عارف

تحياتى يا باشمهندس

"وَلا تَنَابَزُوا بِالألْقَابِ" ياخي, وانت قدوة في هذا المكان فارجو ان تكون قدوة حسنة وان تنتبه لتصرفاتك اكثر.

المشاركة الأصلية كتبت بواسطة عارف

اسمح لى بالمساهمة فى هذه المساحة:
(انشاء الله) خطأ والصواب هو (ان شاء الله) فالاولى
فعل مصدره انشأ وهنا الكلمة ليست فى مكانها ,,,,

حرقت لي اهم خطأ والامر لله, يعني انا كنت داير انبه الناس لفداحة الاخطاء الاملائية باستخدام الكتابة الخاطئة ل ان شاء الله كاوضح مثال, وانو الخطأ قد يفسد المعنى شديد جدا خالص.
برضو مساهماتك التانية مطلوبة, وانا في هذه الايام نويت ان اعمل مشروعين اصلاحيين بعون الله, ده واحد منهم والتاني بطلع ليك قريب ان شاء الله وبهمّك, دعمك مطلوب فيهن الاتنين.

المشاركة الأصلية كتبت بواسطة عارف

ياسر تمساح حسب ما تقدم ذكره 14/15 صوّب

الله يديك العافية, ادرش لي ياسر ده. انا شفتها لكن ما صلحتها لانو ماسك علي غلطين فوق.
14 كتيرة لكن, ما بستاهلها.

السلام عليكم ست البنات ومرحب

المشاركة الأصلية كتبت بواسطة sit_albanat

ازيك يا باشمهندس

العملتها يا عارف رقدت بامبي.

المشاركة الأصلية كتبت بواسطة sit_albanat

انا مثلا الكيبورد بتاعي مخستك

خستكات الكيبورد من الاعذار القانونية المعتبرة المانعة للعقوبة في حملتنا هذه, خستكي كما تريدين ولك العذر.
زي ما وضحت فوق, المقصود الاغلاط الساكنة في الحنايا (انا ما عارف الحنايا دي شنو بالضبط لكن اتوقع انو معناها الخلايا واهملت نقطة الخاء للتخفيف).
يعني اذا في كلمة الزول بكتبها غلط ننبهو للرسم الصحيح بتاعها, كلمة عزر اوضح مثال وهي ما غلطة كيبورد وانما غلطة منهجية مموسقة (نفس شرح حنايا السابق, كلمة اجراها الله على اصابعي).

المشاركة الأصلية كتبت بواسطة sit_albanat

وتحياتي

لك مثلها وزيادة درهمين.

عدو الحملة الاول وهدفها الاكبر, ياسر الذي عبس و بسر

المشاركة الأصلية كتبت بواسطة ياسر تمساح

سلامات تانى مرة
##### حذف بامر الرقابة
وكمان للكل
عارف اذا بتحاسبنى على عزر دى عاين لى كلام الباحث معتز عثمان
برجع تانى وبقول احيانا عامل الزمن وعدم الاحترافية فى التعامل مع لوحة الحاسب ...

الفقرة الرابعة من لوائح الحملة تقول:
لا يكفي ان تشير الى الخطأ, بل لا بد من توضيح الصواب.
فهسي لو سمحت وضح لي اول حاجة خطئي القلتو فوق, بعدداك ممكن نجي لاخطاء المسؤول التقني في الحملة وبقية القادة (هسي عون الشريف قاسم دي مالها ملونها بالاحمر؟).
زي ما قلت قبيل, اخطاء الكيبورد مغفورة وان جاوزت هامات الجبال.

عليك به يا عارف.
والتحيات

نسيت اقول يا معتز انو "امبارح" دي انا مرة لاقاني ليها تفسير مما يقف له شعر السخل الذي لمّا يبلغ الفطام.
قالليك في لغة قديمة من لغات العرب اداة التعريف فيها هي "ام" وليس "ال". وبكده تكون ترجمتها الى لغة قريش السائدة "البارح", وتكون كلمة صميمة "البارحة" وطبعا التاء الاخيرة ما بيناتنا.
في شاهد على المسالة دي اتخيل لي من القران ولّ من السنة, هسي مستعجل لكن اذا حبيت ممكن احاول اتذكرو ليك.

	الأخ فتح الرحمن لك التحايا الموضوع في قمة الروعة وفعلآ نحتاجهُ لتصحيح الكثير من الأخطاء التي شاعت بيننا حتي كادت ان تكون هي الأصح .... بخلاف الكتابة نحن ايضآ نخطأ في النطق خصوصآ في حرفي الغين والقاف .... الموضوع قيّم جدآ ويمكن رفد هذا البوست بالكثير من التداخلات المفيدة . لك التحايا

هلا اخي ############# ( حذفت بأمر الرقيب ) فتح الرحمن
تحياتي للجميع قال الاخ تمساح ((زوقتك استايل)) والصحيح ((زوغتك )) والاصل فيها (( زاغ )) يعني (( اخدا موزه )) واستعملت الموزة هنا وهي فاكهه معروفه لا لمذاقها بل لشكلها المعقوف الملتوي . والذين ( يزوغون ) هم الاشخاص الملتوون كما الموز المعروفون لدى العامة ( بالمواسير ) و هذه شرعنتها الصحف والوسائل الاعلاميه عبر قضية السوق المشهوره ( سوق المواسير ).
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــ
قلت يا باش (اوووو عارف) وأووو هذه ليست من الكلمات المعروفه في اللغة العربيه وانما دخلتها عنوة و إقتداراً يا فرده من خلال الاخطلات اللغوي والتبادل الثقافي المعرفي مع ((الراندوك )) وهي لغة ال######### ( الله يجازي الرقابه ) وهم الذين اكتشفوا استعمالات أخرى للكلمات المعروفه في اللغة العربيه . تحمل الكلمة نصاً ولا تعنيها معني هم علماء (الراندوك ) و( الرندكه ) هي تحوير الكمات واعطاءها معاني لا تمت للكلمة بصلة .
مثل ماسوره والمقصود بها بتاع مقالب ........... موزه والمقصد لفه حاده مفاجئة........... حبه و تعني اخ صديق وكذلك تستعمل للاستخفاف............ فرده وتعني زميل..... حميرا وهي ورقه فئة عشرين الفاً ج/ س .............. لحسه فرصه او سرقه او نشله............ طقه وتعني وليمه........ الخ ...لخ ...هذا والله أعلم

سبحان الله كل الناس الكتبت اخطاءت ((اخدا موزه )) واستعملت الموزة ايهما الأصح

سلامات بالجمله أخوي فتح الرحمن
العبدلله إتعود علي الأخطاء الإملائيه, أصلها لاحقاهو _ أكان في الأنترنت أكان في الجامعه _!
أتخيل أستأذ في الجامعه يكتب ليك (بؤرتي هما) !
يا ربي يكون زر الإسبايس بتاع الطبشيره بايظ و نحن ما إنتبهنا ليو ؟
طبعاً مافي زول نبهو و الناس كلها أكلتها في حنانها ,
...............
لو كلو زول شاف الموضوع ده , راجع عربي مع ولدو أو أخوهو الصغير ( زي ما أخوي الكبير خالد لما كنت في سنه أولى إبتدائي ملاني كتاب قدر الضربه من أولو لآخرو ) بيكون ساهموافي علاج المشكله بصوره فعاله أكتر .
................

من خلال الاخطلات اللغوي

خطأ أخوي الطيب جابو في مويتنا !
إختلاط : من خلط يخلط خلطاً , إذا ما دمج مادتين أو عنصرين مع بعضهما و في إصطلاح الراندوكاب إذا ما قطًع النجيله مع شخص آخر إثناء إنغماسهما في البحث عن سماد يجعل من خيار الوحده خياراً جاذباً ...!

تحياتى يا ingenieur (لقيتنى كيف بالله ؟)

شايف الموضوع مشى بصورة كويسة جداً وانا عاوز
اتناول حتة تانية وهى مسالة التعريب فكتير من الكلمات
الانجليزية لا يوجد لها مقابل فى العربية واحياناً يوجد
مقابل لها فى العربية ولكن غير مقنع او غير معترف به
الامر الذى يجبر الكاتب على الاستعانة بهذه الكلمات
بدون حرج وبدون تشدد ولا شنو ؟ والحتة دى بتودينا
لحتة حقو تفكر معانا فيها بوصفك مسؤول الاسناد العسكري
والمتابعة بحركة الم (ان شاء الله كلنا نبرى من الالم)
مرة دخلت على موقع جوجل ووجدت رسالة ترحيب:
Welcome Googlers وبعد جهد توصلت لتعريب
لهذه الرسالةوهو: مرحباً بكم ايها المتقوقلون والمتقوقلات
فهنا لا حرج فى تناول مثل هذه الكلمات من باب الحقارة
فهو اسم اعجمى (ضقل) به واكتبه كما تشاء ,,,,

تخريمة:
يا المنصورى اخوى والله احييك على المشاركة الجميلة
وعلى التشكيل وعدم اغفال الهمزة, شكلك خايف من اخونا
العسكرى دة ولا شنو ؟؟؟؟

تحياتى اخونا الرقيب اللغوى فتح الرحمن وهاك بعض الاغلاط
الشائعة وهى استخدام كلمة (طقس) وهى تعنى شعيرة دينية
والصحيح هو مناخ ,,,,
فتكم بعافية والى لقاء ,,,,

المشاركة الأصلية كتبت بواسطة فتح الرحمن بحيرى

عدو الحملة الاول وهدفها الاكبر, ياسر الذي عبس و بسر
الفقرة الرابعة من لوائح الحملة تقول:
لا يكفي ان تشير الى الخطأ, بل لا بد من توضيح الصواب.
فهسي لو سمحت وضح لي اول حاجة خطئي القلتو فوق, بعدداك ممكن نجي لاخطاء المسؤول التقني في الحملة وبقية القادة (هسي عون الشريف قاسم دي مالها ملونها بالاحمر؟).
زي ما قلت قبيل, اخطاء الكيبورد مغفورة وان جاوزت هامات الجبال.

عليك به يا عارف.والتحيات

سلامات يا فتح الرحمن يا ود الخالة (دى كيف مع الرقابة)
بالغت عديل فى داعى تجيب سيرت القروش قدام الدفار ده ... كتبت عدو ومن اليوم داك بقيت ما قادر اسجل دخول بتعذرو لى بالخطاء فى كلمة المرور مع انى مرخص لى اكثر من سنة وكلمتهم عمرى ما نسيتها ... اتصلت بواحد من الادارة مشكور دلانى على طريقة رجعت لى ترخيص قديم حا استفيد منه مؤقتاً لحدى ما تتعالج حكايتى ...
دى اخطاء ناس الادارة ونرجع لى اخطاء الناس فى اللغة ...
ياسر تمساح

شكرا باشمهندس
ينبغي توخي الحذر ونحن نهم بالكتابة .. ثم لدينا فرصة لمعاينة الموضوع قبل ارساله .. كلما تجنبنا الاخطاء كلما كان الموضوع سهلا وسلسا للقاري واضم صوتي مؤيدا من قال ان الاخطاء هنا غير مقصوده واغلبها يأتي بفعل السرعة فى الكتابة او بعض التعقيدات الفنية
تقبل مروري

سلامات وعوافى
راجع ليك ما تبعد
ياسر تمساح

المشاركة الأصلية كتبت بواسطة محمد المنصورى

العزيز محمد المنصورى ما شاء الله ولا كلمة 15.5/15

المشاركة الأصلية كتبت بواسطة الطيب عبدو

هلا اخي ############# ( حذفت بأمر الرقيب )
قلت يا باش (اوووو عارف) وأووو هذه ليست من الكلمات المعروفه في اللغة العربيه وانما دخلتها عنوة و إقتداراً يا فرده من خلال الاخطلات اللغوي والتبادل الثقافي المعرفي مع ((الراندوك )) وهي لغة ال######### ( الله يجازي الرقابه ) وهم الذين اكتشفوا استعمالات أخرى للكلمات المعروفه في اللغة العربيه . تحمل الكلمة نصاً ولا تعنيها معني هم علماء (الراندوك ) و( الرندكه ) هي تحوير الكمات واعطاءها معاني لا تمت للكلمة بصلة .
مثل ماسوره والمقصود بها بتاع مقالب ........... موزه والمقصد لفه حاده مفاجئة........... حبه و تعني اخ صديق وكذلك تستعمل للاستخفاف............ فرده وتعني زميل..... حميرا وهي ورقه فئة عشرين الفاً ج/ س .............. لحسه فرصه او سرقه او نشله............ طقه وتعني وليمه........ الخ ...لخ ...هذا والله أعلم

الطيب عبدو
سلامات
شكرا على التصويب
تعالنى جاى
اولا الاخطلات من الخطل (خلى الرقيب العسكرى يورينا معناها باقى غلبنى) والصحيح الاختلاط من الخلط ( اجارنا الله واياكم )
ثانيا ياكافى البلاء ناس الرقابة ديل ما لقوا حروف صالحة فى كلمتك الكتبتها دى غير الالف واللام ... محنتنا ..
قلبتها راندوك ...
أخير جنى
ياسر تمساح

سلام يا جماعة
اشكركم كثيرا جميعا (وفي رواية جميعا كثيرا), رفعتم روحي المعنوية بعد ان احبطني ياسر ايما احباط وافشلني ايما افشال, والان يمكنني ان اواصل بروح معنوية مرتفعة (كنت انوي ان اواصل على اية حال, لكن الروح المرتفعة خير وابقى من المنخفضة ).

الطيب سلام عليكم
وكيف الاخبار
اشكرك على الشرح الوافي والامثلة التي هي في السلك.
فقد نورتنا بمستجدات اللغة وتطورها في السودان.
ومشكور مرة اخرى على درش ياسر, ندرس الان مقترحا باتخاذه انموذجا للمعارضة من اجل المعارضة, يغلف جيدا ويسوق خارجيا. وبالتاكيد سيتحمل كل اخفاقات الحملة المتوقعة.

السلام عليكم زينة
مرحب بيك كجديدة ومشكورة على التعليق.
اخطاء الطباعة ما همية, المهم الزول يكون عارف الرسم الصحيح.
كلام الطيب ممكن تبريرو ببساطة, مافي غضاضة انو الزول لمن يكتب بالدارجي يكتب حسب النطق (زاتو, تور, الاتنين, تلتمية وهلمجرا).
فالاولى هو كتبها حسب النطق بالهاء, والتانية الصحيحة بالتاء المقفولة لانو كان سياق عربي فصيح.
ودي بالمناسبة مشكلة كبيرة, الزول يبدا الجملة في ام عضام (دارجي) وبعد شوية تسخن المسالة يقوم ينهيها في شبشة (فصيح). انا واحد من الناس القعد يجهجه الناس بالطريقة دي.

سلامات يا حافظ (كتبت اووو حافظ بعدداك اتذكرت الطيب)
صراحة الواحد بخجل ياخي لمن يغلط غلط املائي, قالليك الاخطاء الاملائية تنقسم لنوعين:
1- نوع يمكن تجنبه
2- نوع تجنبه ممكن.
فبس الناس محتاجة تجتهد شوية.

المشاركة الأصلية كتبت بواسطة حافظ

لو كلو زول شاف الموضوع ده , راجع عربي مع ولدو أو أخوهو الصغير ( زي ما أخوي الكبير خالد لما كنت في سنه أولى إبتدائي ملاني كتاب قدر الضربه من أولو لآخرو ) بيكون ساهموافي علاج المشكله بصوره فعاله أكتر .

ده الكلام النجيض.
ومشكور على تعريف الخلط ومشتقاته تعريفا كافيا وافيا.

محمد المنصوري سلامات
مشكور على الاطراء, وكلامك صاح ده جهد محتاج نفير من الكل, سافصل لاحقا بعون الله في نظرية النملة التي بني عليها هذا المشروع (وفي رواية الحملة).
مسالة النطق دي نظرية النملة ما بتنفع معاها, انا بقترح نظرية الخرتيت الراكب فوق الفيل, كان ما خارجت ممكن يردف معاو فرس نهر.

اسف للرد المتاخر, دقسة بس.
الطيب وزينة و حافظ ارجعوا ورا شوية, جايين متاخرين وداخلين في الصف طوالي؟!

اهلا عارف الراعي القانوني للحملة
شايف نحن لي هسي بنحاول ازالة آثار مايو السويتها لينا اول فما تجيب لينا يونيو.

امابالنسبة للكلمات التي لا يوجد لها بديل, فقد توصل المجلس الاستشاري للحملة الى خيارين:
اما ان يجتهد الانسان في الترجمة ويكون بذلك قد حل المشكلة له ولغيره
او ان يستخدم الكلمة الاجنبية بحروف اجنبية حتى لا تجهجه الناس
والخيار الثاني حكمه في مذهبنا الكراهة المغلظة.

اما بالنسبة لقوقل:
فيا عارف مع انك الراعي الرسمي واي حاجة, لكن ارجوك ما تغلط على قوقل ده ابدا ولا تذكره بسوء. واذا قال هو قوقلة او اي شيء آخر فصدقه.
جد المسالة دي كبيرة تتجاوز الصلاحيات الثورية التي بيد مجلسنا, لانو حتى في الانجليزي المسالة ما مستساغة شديد, يعني كلام زي:
I googled it. Please google it first.
بعض الناس يعتبره كلام الطير في ابو عشر (وهل تختلف لغات الطيور باختلاف الاماكن؟)
فالمسالة دي لا نفتي فيها, وانّا معكم منتظرون.

مشكور على المساهمة, وانت اول من مد لنا يده غير بيضاء.
بس دايرين نحصر القصة في الاخطاء الاملائية السودانية الاصيلة, يعني نحاول كلنا نتجنب الاخطاء من شاكلة عزر ومذيد, الباقي هين على من هونه الله عليه.

ياسر عشان تاني تجي
نسيت ان انبه ان الفكي الرسمي للحملة هو الشيخ ود اب قدح, راعيا ومتابعا, جاهزا لرفع يديه الى السماء عند ظهور اي معارض في طرف الشارع.
ونمتنى ان يستجيب الله لدعاء فكيّنا في كل من تسول له نفسه الامارة بالسوء اعتراض حملتنا والوقوف بوجه غزوتنا القاصدة.
وان يصحو معارضنا في الصباح فيجد ان باسوورده قد قفلت في صندوق يشبه صندوق ابو القدح, لا يستطيع لها وصولا ولا تذكرا.

عارف, ارجو ان يترك هذا الزول في قدحه, وان يوضع القدح في صندوق زجاجي في مدخل المقر الرئيس للحملة حتى يكون عبرة لمن يعتبر ومن لا يعتبر زاتو.
كما ارجو عقد مجلس محاسبة للاداري الذي "دلّاه" فجاءنا نازلا متعلقا بحبل قديم نسيتم ان تفكوه.
والتحيات لابي مجتبى