الفكاهة والشعر في قمة المريخ والهلال

صلاح الدين عبد الحفيظ مالك

ظلت مباريات القمة في زمان ماضٍ مناسبة لظهور
أدب الشعر الرياضي بين الفريقين من هذا تحديداً فترة
الستينات التي شهدت بروز عدد من شعراء قطبي القمة
وأشهرهم كمال كيشو من الهلال
ومرسي صالح سراج والسر قدور من المريخ وغيرهم.
كانت أشهر القصائد هي التي تخرج بعد فوز إحدى فريقي القمة
ومن هذا حين فاز المريخ على الهلال في إحدى مباريات التوالي
الأشهر والتي كان بطلها اللاعب ماجد عثمان فنظم أحد شعراء
المريخ هذه القصيدة:

ثريا لمن أرادها نالها – بهدف ماجدي
للأهلة حسرة – ولنا فرح غير موصوف
قل للحزانى صبراً – فالإثبات حتماً لنا

وفي نهاية الستينات نظم أحد شعراء الهلال قصيدة بمناسبة
فوز الهلال قال فيها.

الهلال ظهر وغابت النجمة
لينا الانتصار والفرحة مجتمعة
جكسا بيمينو فرتق اللمة
وسبت منع منهم البسمة.

وذات مرة انتصر المريخ على الهلال وبالطبع حزن أهل
الهلال لضياع الدوري وفراق كأسه من ديارهم
وفي اليوم الذي يليه دلف كمال كيشو نحو دار الرياضة
أم درمان لمشاهدة إحدى مباريات الدرجة الثانية
وبعد مضي نصف ساعة من انطلاقة المباراة حضر
الفنان خلف الله حمد المشهور بإحيائه لحفلات الصبحية
ببيوت الأعراس. فسأل الفنان خلف حمد، كيشو قائلاً
يا كيشو (الكورة فيها كم) قاصداً نتيجة المباراة
فرد كيشو ممتعضاً (في صبحية).

وتتعدد طرائف أهل الهلال والمريخ شعراً ومنها طرفة
حاج حسن عثمان مع العم عبد اللطيف حسن القطب
الهلالي حين انتصر الهلال على المريخ في ختام الدوري
في العام 1967م وبعد أيام التقى القطبان في مناسبة
زواج وبعد السلام قال عبد اللطيف حسن
لحاج حسن عثمان (جكسا ما ظهر هنا يا حاج)
رد حاج حسن عثمان (لا ظهر ماجد – ثمانية مرات)
في إشارة لإنتصارات المريخ أيام ماجد في الستينات.

تصادف أن ظهر السباح العالمي سلطان كيجاب سباح ماهر
وسعت إدارة المريخ لضمه ليلعب ضمن فريق السباحة
فذهب مسئول السباحة للعم شاخور لإبلاغه استلام مبلغ
من المال لإكمال إجراءات تسجيله. فقال لهم شاخور
(بيغلب لي الهلال؟) فردوا عليه (لا.. ياريس لاعب سباحة)
فقال لهم (ما في فايدة جيبوا لي لاعب يغلب الهلال)
ومن ضمن الطرائف التي حدثت من قبل لأهل القمة
حادثة أبو العائلة مع لاعبي المريخ حين هزيمة المريخ
من الهلال هزيمة نكراء بلغت الثلاثة أهداف. مع عدم
تقديم لاعبو المريخ للعرض المنتظر. وبعد انتهاء المباراة
جلس لاعبو المريخ يتناولون عصير الليمون في أريحية
بدار النادي. فدخل عليهم أبو العائلة وهو في أشد حالات
غضبه، وحين رؤيتهم يتناولون الليمون من جرادل كبيرة
قام بقذفها برجله قائلاً:
(دمكم ميت مغلوبين وكمان تشربوا في الليمون).

تبدو طرفة اللاعب عبد الهادي ود الشايقي مع أحد لاعبي
الهلال المسجلين حديثاً بالكشف ذات شهرة لم تدانيها أي
طرفة أخرى وتفاصيلها كالآتي:-

انتصر الهلال على المريخ في مباراة مصيرية بهدفين دون
مقابل. وبدار النادي تم توزيع مبلغ عشرة جنيهات لكل لاعب
كحافز انتصار وحينها كانت العشرة جنيهات بمثابة كنز مالي
ضخم وحين وصل أمر توزيع المبلغ للاعب الوافد الجديد
لفرقة الهلال قال للشخص الذي وزعها (أفكها)
أي أقوم بفكها لإرجاع الباقي. فرد عليه ود الشايقي
(يفك حنكك). وفي إشارة لعدم حسن تصرفه مع الإداري
الذي قام بتوزيع الحافز وعلى ذكر الطرف يبرز أيضاً دور
الشعر المغنى للاعبي القمة ومنهم دكتور الكرة السودانية
كمال عبد الوهاب الذي تغنى له محبي المريخ بأغنية شهيرة تقول:

الميدان مليان وكمال فنان
ده العذب الهلال وفرق الناس بالبمبان
الله يخليهو دكتور الكفر رقاص الجان

1/ البمبان إشارة لأحد المباريات التي فاز فيها المريخ وحدث
شغب كان نتيجته ففرق جماهير الهلال بالبمبان.
2/ الجان لقب من ألقاب أسد الهلال فوزي المرضي
حين كان لاعباً بالهلال.

نجم السعد

السر أحمد قدور

نجم السعد
انواره هلت في البلد
مريخينا عالى ومعتمد
وقالوا الهلال في الخط رقد
والحظ همد
وبقت حكايته (حمد لبد)
بالفرحة ما طال الامد
ايام قليلة بلا عدد
يوم الخميس جاه النكد
لم ينتظر يوم الاحد

جمهوره جقلب ما صمد
ومرق من الاستاد شرد
قالوا الثقاة اهل البلد
شافوه فى حلة حمد

مريخنا دائما معتمد
تاج النصر
بطل البلد
ما جاب حكم بيهو انسند
وابطاله في الميدان سند
ما بخلى تاره الى الابد
ويفوز على الخصم الالد
بالقوة بالفن والجلد

جمهوره يهتف كالرعد
ثابت معاه وما ابتعد
اما الهلال قام او قعد
مريخينا بالاصرار صعد
فوق الجميع
والكل بعد
مريخينا بالقمة انفرد
ساب الحسار لى غيره
للافراح ورد
واصحابنا شوف حيلن برد
وكان الدرس قاسى
ما اب زرد

من بدري ناديكم هجد
فتشنا واحد ما اتوجد
ومريخينا طول تاريخه جد
وراكم الفن الاجد

شارع فرحكم اتوصد
خسران حسابكم واترصد
وفريقنا حقق ما قصد
في اخر الموسم حصد
مريخنا زينه دفاعه سد
وهجومه اشبال الاسد
يا زيكو تسلم يا ولد
قونك مؤكد معتمد
ما فيه سرقه ولمس يد

قصيدة قلعة المريخ الشماء
د. مصطفى مزمل أبوالريش

كيفن عاد بخافوا عليك يا مريخنا بالله
و إنت الدود تسد القيف علي الواردين؟
حَمار عينيك مرعب منه يا ستار!
شراره نجوم و شهب ترجم معاقل العادين
متين هنت يا المريخ تشمت في أعادينا
و توزع في الكرامات زي رضى الوالدين؟
حلفنا يمين و اسمع كيف يمين بتحق
نرجع كل مواقعنا و نسبق الفاتوا و الجايين
تكون نبراس يضوي حماره يهدي الضال
مكانه قمما عالية ما بصلوها ناس خاملين
يمين أولادك أسود الغاب و صقور الجو
نجوم مريخنا سنداله و ما هنت عليهم حين
قدر بس صاب وحياتك دي كانت عين
و عتره تصلح مسيرة المشوار لى القادرين
و كان يومها القدر لي ديارنا بالمرصاد
و كان الموت مكشر وشه كايس لي الميتين
رفرف بي جنحاته فوق رؤوس التيم
و من بينهم شال زينة النوار و رجال سمحين
و رغم فداحة المأساة و وضاعة الحال
و من وسط الدموع و الحزن الشديد و مهين
جات الرحمة لى ديارنا و جونا رجال
يهزوا و يرزوا ما بياكلوا الخبوب و الطين
شباب في صفحة التاريخ و بمداد نور
سطروا الأمجاد بى براعه نثروهم شمال و يمين
جمال الوالي و أخوانه الشموخ بالذات يخضر ربي
ضرعاتهم و يزيدهم قولوا بس آمين
بقوا غنوة للمريخ و بشارة جمال الفال
و كانوا رجال و أسود فوق الأسود زايدين
شمروا للسواعد و ما خافوا ولا عافوا
برزت صدورهم الشابة و دقوها بالإيدين
بنوك يا عظمة الإستاد بى دقة في يومين
كمان لي بناية تيماً جديد و رهيب عازمين
عملوا النفرة للمريخي الكريم و جواد
اتجلت عظمة المريخ و رجاله البيملوا العين
كبَّ مطر الجود انهمر والله و بسم الله
و ظهر في سمانا أملا كان شحيح و ضنين
المريخاب البخوضوا الحاره و ضاقوا المرة
نسوا الأحزان و الأضغان اتصافوا متسامحين
بى روعة فوارس تراهم بانوا و اتجلوا بهلوا
الشي الكتير و شالوا الشيلة متسابقين
شعارهم فداك جميعنا يا مريخ. نحقق لي هدف
ميمون حلمنابه و رجيناه سنين و سنين
حنبني النادي و توابعه و نكمل الإستاد
و نخليك والله مريخا رفيعا يذهل الشامتين
رجليك في ساس الوطن راسيه و فوق
السحاب هامتك يشع نوره و يضوي جبين
تقع أقزام تتطاول تحاول بس تأشر ليك
يطولوك كيف حلم جيعان و قول جاهلين
أظنه خلاص الخرف صابهم و نساهم
و يمين الحق شماتك قريب يوم حسابهم شين
أهلنا زمان ما قالوا العرجه لي مراحه
نجومك في صفار الموت و تيمك للكبار تنين
يكون البأس و يوم الحاره سيف و نحاس يدق
يهوس و يشق صفوف العدى الخايرين
يدوي و يصم صوته سمع الرعد ذاته
و يدخل الخوف لي قلوب الصخور راجفين

النجـمة

سرالختم تاج السر علي

يا الـنجمة الآســر جمــالك وحبُـك لـى قلـوبنا مـالك
بره و جوه نخـوض المعـارك و يا أمدرمان كيف حال هلالك
يا النجـمة كؤوسـك حلالك بالعرق والدم شـامخات قبالك
تقــول للعــالم فِعــالك و تقـول لأم دُر ليه نام هــلالك
شـمال و جنوب معروف قتالك شرقاً و غرباً فاتكات نبالك
نورك ضـوى المسـالك و هلال أم دُر في ظلامو حالك
يا النجمـة المعـدوم مثـالك و العـالم شَـاهَِد نضـالك
صدى السودان معروف خِلالك و يا أمدرمان كيف حال هلالك

يا النجــمة ولادك فــوارس وللكاسـات فاتحين مدارس
بره و جـوه نَدُكُ الـمنافس و هلال أم دُر في العرضة جالس
يا النجـمة رياحك قواصـف و تيمك في هجومو عاصـف
ضـِّوك في الدنيا لاصـف و(هلال العظمة ) محلي واقف

يا النجـمة ولادك فـواتك وفي النازلات هُـم حُمــاتك
تيمـك لى عـدوك هـاتك والســودان يهتف بى حياتك
يا النجـمة فعـالك خصـالك و في السـاحات كاسيك جلالك
أكـيد من لاقـاك هـالك و هـلال أم درطـايع مشــالك

يا النجـمة هـواك فينا سرمد و تيمـك في السـاحـة غـرد
لى صـياغة كـورتنا جـدد و للـجمهـور بى فـنو أسـعد

يا النجـمة غـرامك كفاية وحـبك يا النـجمة غـاية
ذِكـرك فـي الـدنيا آيــة و في القـرآن مـذكور هـداية

يا النجـمة هـواك فينا ثابت لأنك .......خـير المـنابت
يا النجـمة مـبادئك ثوابت وهـلال أم در خليتى صامت

يا النجـمة كؤوسك مواكب وتيمـك لى فـنو سـاكب
آيــة و زينة الكـواكـب ويا (أبو الهل ) لمتين تواكب

أصبح النقد بعيدا عن معايير الأدب

الزبير عوض الكريم


لا شـــئ يدعـــو للتـــزمر والغـــــرابة والعـــــجب
قــدر المــنافس أن يســـاء ويستهـــان ويستـــسب
مادام كــل مهنــدم قــد عــد رمــزا في الــــخب
سيــان أن يعــلو الهـتاف ويملؤ الكون الصـخب
لا فــرق عــند القــوم أختــل النــظام أو أستـتب
فالنصر يحلو طالما اختلط الضجيج مع الشغب
ونـــال كـــل مــــنازل قــزفا وتجريحا وســـــب
عندمــا وجــــد انتــماءا كــل مــن هــــــب ودب
فالعــذر مقــبول إذا طـــفح الغـــثاء ومانـــــضب
لــو صــار للتــجريح طــرحا مستــساغا مستــحب
أو أصــبح النــقد بعــــيدا عــن معـــــــــايير الأدب

أنا المريخ أنا التاريخ
الأستاذ/فرح عوض

أنا المريخ أنا التاريخ
أنا البعرف اجيب الكاس
وانا العرفوني كل الناس
انا السواى ما حداث
وكلو كلامي بى مقياس
انا المريخ
انا القدمت اعمالي
وكاس الدوري في بالي
بيجبوا اشرف اجيالي
ولو لعبت اشبالي
وحتى منير وودالياس
انا المريخ
انا الدائما بشد الحيل
وانا الماشى في طريق عديل
وانا الفى هجومى زي السيل
وللشبكات بسوي الويل
بهدف بالقدم والراس
انا المريخ
انا الدائماً لهيب سارى
شعاري الأحمر الناري
بدمي افدى لشعاري
وانا البعرف اجيب تاري
ولازم اقطع الانفاس
انا المريخ
انا العاتي انا الصاروخ
انا الدايماً سنان مجلوخ
انا الفى وسطي مافي شروخ
وانا البلعب معاي يدوخ
تصيبو الدوشة والوسواس
انا المريخ
انا الفي وسطي ابراهام
وسكسك فارساً مقدام
انا الدايماً خطر قدام
واسالوا عنى الأيام
ببهدل اعظم الحراس
انا المريخ
انا القوة انا الركاز
وانا الدائماً بجيب اعجاز
وانا الى خطتي نفاذ
وانا الدائماً عظيم ممتاز
وعندي شعور شديد واحساس
انا المريخ
انا المركب انا المجداف
وانا الغير الله قط ما خاف
انا العندي الفنون اصناف
وانا التوجيه وانا الاشراف
بهدف ضربة الاجراس
انا المريخ
انا الجامعة وانا المعهد
بربى اولادي تربية جد
عبادة الواحد الاوحد
وحب نبيه الآمجد
وسورة البقرة والأخلاص
انا المريخ

جمال الوالي في الرد كاسل