مطارحة الاغاني السودانية

مني السلام يا يمه ليك
ينبض نَبِض موية البحر..
الجارية جنب حِلَّتنا نيل

مني السلام يا يابا ليك
قيمة الأرض..
شجر الأرض..
جاوز سحابات السما
باقي الدليل..
إنو اللي غايب منكم
لابد يعود..
كان في نهار..
أو يوم في ليل
والطائر الشَّرَّق بِعِد
في غفلة مرة من الزمن
لابد يعود لي عشو تاني..
ويزغرد العمر الجميل
# # #
مسكين الشِّعِر..
عاجز يوصف لحظة من شوقن عنيف..
عاصف عصِف
عاجز يوصِّف لحظة قاسية على الشعور
تغشانا ساعة الوحدة ديك..
ما الشوق جنون ما بتوصف
لو مرة طيفكم في الخيال..
زاوَر وِقِف
تصحى المشاعر في السطور ..
وتولول الأبيات حرِف
# # #
والشوق شديد ..
يا يمه ليكي ولي بيوتنا الجاورن..
صخب المدارس والفصول
عمرن مديد.. طوَّل .. خِرِف

والشوق شديد..
يا يابا ليكا وللجداول..
حاضنة مويات الترع..
والبحر.. زي حكمتك..
المنَّها بنغرف غَرِف
........
جافانا بس زمنن صعيب
ما برحم الكاتلو الوِلِف
خلانا نبعد من أهلنا ودمَّنا
شيَّلنا أحمال همَّنا
يا حليلا أيام سعدنا الكانت حداكم يا أهل..
يوماتي نبكيها ب نحيب
ونرجا بس وقتا قريب..
من تاني يرجع يضمنا .. بيتنا الحبيب
......
ونودع الغربة ونعود..
نسترجع أيام فرْحَنا
والبهجة تاني تعمَّنا
وننسى أزمان الشَّقا..
زمن المتاعب والضَّنا
....
لمتين يا الله تلمنا؟
لمتين يا الله تلمنا؟