التميز خلال 24 ساعة
 العضو الأكثر نشاطاً هذا اليوم   الموضوع النشط هذا اليوم   المشرف المميزلهذا اليوم 
قريبا

بقلم :
قريبا
آخر 10 مواضيع
الفقرا العزمو القطر (الكاتـب : - مشاركات : 0 - المشاهدات : 192 - الوقت: 06:16 AM - التاريخ: 01-18-2024)           »          إلى وطني .. لن تأتي العصافيرُ[ (الكاتـب : - مشاركات : 0 - المشاهدات : 615 - الوقت: 06:16 PM - التاريخ: 10-03-2023)           »          كل المواسم يا بلد إطاقَشَن (الكاتـب : - مشاركات : 0 - المشاهدات : 362 - الوقت: 06:11 PM - التاريخ: 10-03-2023)           »          الشوق غلب (الكاتـب : - مشاركات : 0 - المشاهدات : 838 - الوقت: 04:36 AM - التاريخ: 05-29-2023)           »          سلام ومحبة (الكاتـب : - مشاركات : 0 - المشاهدات : 7700 - الوقت: 08:04 AM - التاريخ: 10-03-2022)           »          «الفقرا» شوق وحنين (الكاتـب : - مشاركات : 0 - المشاهدات : 10309 - الوقت: 01:25 PM - التاريخ: 08-13-2022)           »          جمعية الصفوة السودانية تحتفي بتدشين كتاب ذكرياتي مع الشيخ الوالد محمد أحمد حسن بقاعة (الكاتـب : - مشاركات : 0 - المشاهدات : 10244 - الوقت: 03:00 PM - التاريخ: 07-16-2022)           »          يوم الرحول.. (الكاتـب : - مشاركات : 0 - المشاهدات : 6033 - الوقت: 03:36 PM - التاريخ: 07-14-2022)           »          سلام ومحبة (الكاتـب : - مشاركات : 1 - المشاهدات : 6842 - الوقت: 07:16 PM - التاريخ: 05-08-2022)           »          مبروووك (الكاتـب : - آخر مشاركة : - مشاركات : 1 - المشاهدات : 7252 - الوقت: 04:33 AM - التاريخ: 08-15-2021)


الإهداءات


العودة   منتديات الحصاحيصا نت alhasahisa > «۩۞۩-المنتديات العامه-۩۞۩» > «۩۞۩-منتدى الادب والثقافة-۩۞۩»

«۩۞۩-منتدى الادب والثقافة-۩۞۩» يهتم بالأدب و المواضيع الثقافية و الفنية

إنشاء موضوع جديد  إضافة رد
المنتدى المشاركات الجديدة ردود اليوم شاهدة المشاركات المشاركة التالية
 
أدوات الموضوع انواع عرض الموضوع
#1  
قديم 09-17-2006, 06:57 PM
محمد ابوعاقلة غير متواجد حالياً
لوني المفضل Brown
 رقم العضوية : 150
 تاريخ التسجيل : Sep 2006
 فترة الأقامة : 6409 يوم
 أخر زيارة : 10-09-2014 (04:57 PM)
 المشاركات : 138 [ + ]
 معدل التقييم : محمد ابوعاقلة
بيانات اضافيه [ + ]
افتراضي سطــــــــــــور الواطــــــــــــــــة



كتابه بالسلوكة ... السلوكه ذلك المعول الذي يضع النقاط فوق سطور الواطه .. عشان الفكرة تفرهد والرؤيا تقوم... تقوم شاده حلة عدس وفول خارج المشروع .. مشروع الوهم الخضاري.. والقمرية الركت في طرف الجدول ورسمت دواير في وش الموية.. دواير مجداف الموجه .. ودفرت حتي الشفع ... غير مرغوب لو ما لابس باتا قديمة .. والهمباتي الشايل لالوب مربوط أول عصفورة انزار عند الرابعة عصرا كما العنب ... في خيط ... مدروع في رقبة ... بقيت في رقبتي ... وفكره طارت مع في كرتونه .. جوه كيس .. تحت شدره .. وضل راكوبه والسايق فلاتي بخاف من هبشة واحده ... خسارة .. ... ما كلمتك عن طوف اخضر أطول من حيطه ... مدرع ومطعم بالشفع قدام الموكب ... وجوه المركب سن تمساح ... وقدين من خطه ... بتتدفق في اول قيفه ... ودم للركب ... والهيكوبتر طفشت للكتف المليان ومايل يمين ... وشحدت الله .. تميل ...اكثر من ميه وتمنين مره ... وركت عصفوره طافشه من الميادين ذات مره ... علي وحم البلد ... نقدت رحم البلد ... شالت حبتين الخير وشرقت فالوب من موية طمله ... وغاغ ... سكت باقي الليل وخت يديه في وش الصباح وفتح عين ... وين موية التفل للشوف ... بالأوامر ... ضرب شقيش ما تقولو حس الصباح نعسان ... الصفارة باعت حسها ... الخشيم قرش السنينات من غيظ مغتغط النعيلات للتراب .. قتل باقي الخصوبه والخدار الجاي في موسم تبع شفع لسه مولودين جديد في شكل حب ... بين جنوبية وفدائي ... كان بقتلوك في يومك النحس المبشتن الف مره .. بالمواعيد ... وقفة الكركول ومفتاح القضية .. يا بسجنوك .. يا ذلك شفناه حالفين اعدموه .. او قروشك لو بقيت زول بدل ... وسمسونايت ... عاد وحصاد ورق بعتقوك ..من غير هوية... المغفل لكي يشتري الحرية من شباك ناس في الفطور ... ساعتين وشاي وقرقريبه ... وزمن بفوت .. شايل ملامح طله ما شايفانا كيف ... ما فارقنا صيف الا والدمعة بتودر في الحلم علي كيف وكيف .. كيف بتتدسه الملامح وانت شايل روح مواطن في ورق تحت الغلاف ... حايم في بلاد الدنيا والطقس الغريب .. او غريب ايه يعني ما الدنيا بتسيح والموت فسيح وامل كسيح .. بطرد رشاش الواطه لو كترت طوابير المشي ... لو زعلت عليك الوالده والخيات ومجبور ... شن تسو ... ما هناك بعيد .. وتكتب تلولح الراس لو نمت جواك كرب .. دنقر علي نفسك اذا ساحت ركب .. او تركب الموج البودي هناك خطابات ... تسرق الشوق الببيعك وانت ني .. ولسه ما نجضت حكاية زول مكتف في جناح.





آخر تعديل ود الحصاحيصا يوم 12-24-2013 في 09:42 AM.
رد مع اقتباس
قديم 11-19-2006, 10:34 AM   #2


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي hoy



وانا ما كنت عارف ...
انو الغياب لون من أسية ... وقلب نازف
وكل ما تعتر خطاوي الليل ... بجازف
حاجه من البنيه المن شغف
او حاجه بتسوقك تناتل وانت واقف
في كل شارع ... وسكة لينه
ضد مسار ... في الوش عواصف
وكنت واقف ... اشتريك بالبال وحس
حس من عواطف


 

رد مع اقتباس
قديم 11-19-2006, 10:43 AM   #3


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



موسم هجرة الي الصعيد ... والزمن يشير الي تمام الزوبعة ووافر الرحيل ... الي من تغطيهم سحابات جات عن طريق صلاة استسقاء ... او دعاء واطه نشفت ... اليباس فقر ... والرحمة نعمة ... بتتكل نفسها بالشكر ... شكر الله في بلد الله قناعه ... والراجفات بجن من اول قشه خدرا ... والراجفين بجو .. من اول لفه خدرا ... وبخبخ دخاخينك تفوت فوق ... من اجل الفقراء وناس عايشين بالبركة ... بركة جدي وحصيرة ...


 

رد مع اقتباس
قديم 11-19-2006, 04:18 PM   #4


أبو رائد غير متواجد حالياً

بيانات اضافيه [ + ]
 رقم العضوية : 158
 تاريخ التسجيل :  Sep 2006
 أخر زيارة : 08-18-2010 (08:48 AM)
 المشاركات : 745 [ + ]
لوني المفضل : Brown
افتراضي



اخونا محمد ...

الكلام والشعر بقيف بحي المنظومة الرائعة ...

لك الود والتحية ...

وحليل زمن الواطة ... حليل عم عبد الرحيم ... حليل الكان بغني ليهم وإنتفض بطالب بحقهم ...

أبو رائد


 

رد مع اقتباس
قديم 11-20-2006, 04:05 AM   #5


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



اقتباس:
المشاركة الأصلية كتبت بواسطة أبو رائد
اخونا محمد ...
الكلام والشعر بقيف بحي المنظومة الرائعة ...
لك الود والتحية ...
وحليل زمن الواطة ... حليل عم عبد الرحيم ... حليل الكان بغني ليهم وإنتفض بطالب بحقهم ...
أبو رائد

للواسوق بنات أفكار بتخجل لو أرض بارت ...
كالمجبور علي بت عم ...
أو طورية تتلفت إذا رفضت أرض تتشم ...
كما تحلم بإنك أب ...
تحش باقي الضلام بي ضو
تخش من ضو
وتخرت من دواخلك شوف
طفيلي الخوف...
بتشعب اذا عرف الحقيقة الصوف
ولف وشك ...
اذا الواسوق بزق في وش الطواري الشك



 

رد مع اقتباس
قديم 11-26-2006, 08:20 AM   #6


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



يا زول الهوا كاسح زي الزئبق في يوم مسخن ... ينطط بدون أوامر ...يغير رايو فجأه ... ويرجع منهزم ... في أقرب ضل ... وسايح كالذبدة في فرن غاز اكسجين ... والبجيب سيرة الفخار ... بنضرب بالنار ... جاهزين مويه ونور ... وشرز ... ادلات فلنكات ... مطاوي وجبخانه ... بتحوم بره الزنكي ... وبين السخانه ... لو نحن كنا قله ...
أقلو فتحنا اجزخانه ...
نبيع التسالي ...
نزيّت البلالي باي برتكانه ...
اذا فرضنا انك حاوي في اسبتاليه ....
وسكتك بتسرح لألف بيت وغايه ....
وفركتك حرير ....
تصحّي في الضمير ....
في أي يوم سمايه ....
و ك ت ب ن ا في روشته قديمه ... وصفه طبيه ... استارموجيا كل تلاته حبات في دقيقه ... والحبه ما بتسوي شي ... غير يطفح السمك ... وتسرح الضفادع ... وتطرش بحرك في ماعون منسي ... أو في اي كيس طوارئ .... ما تعاين لي ... انا بتكلم جد ... تستغرب ليه ... ياود يا جك ... جد الكوز .
الفتيل بشيل كتير ...
وفتيل الازمة جوه الجك ...
اذا فترت ... عليك جايه...
اذا طشت تباشير حك...
بتبرك بيك في أي محك...
بدون عنوان وكرش البيت...
ولو شرقت بقوم أضحك...
خالي من الكحول الجك...
وكان بسكر بأي جمال...
شنو الوداك تهترش في بيوت الضو عن الأزمة...
وضيق الدار ... وشكل النار ... في كل نهار...
ولون الواطه فيها عرق...
بجيب التار ... يدق الطار ... في شكل هظار...
وكل شيتا بتاكلو النار...
وحتي بحرنا فيها غرق...
ويوم نرجع من الأزمة ... اذا فرض الزمن نفسو...
بنلقي الدم ... اذا جات الركب ماشات ...
اذا مرقن قِرب طاشات ...
وناشفات ريق ...
ونتأسف ....
علي انو العمر رحمه ...
والماسكات جمر ايدك ... بتحلم في طرق زحمة ....
براح الرؤية لو تم ّ...
بتبقي الدنيا في عينيك مدن فخمـة ....
بتتزين كأي عروس ...
تجيك ماشه الهويني ... تقيف ... بدون لخمه...


 

رد مع اقتباس
قديم 11-30-2006, 10:47 AM   #7


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



أمرق امشي وين؟ ما عارف ... امرق من روحي ... امشي هناك ... مصير وسخف ... وتكتب في دفتر الأحوال عن الهروب البنخر في حيطان وحده ... وكمين أف بتطلع بعفويه لأبعد حد ... كل الحصل كان مكتف ... ليه ما يكون ... لازم يحصل كده عشان القلب يبكي ... والمعاناة تستمر غصباً عن أي حاجه تافهة بنشوفا في اليوم الف مره ... اذا كان حايمه في دواخل زول أو بتترك أثر في اي حدقة اتعلمت تشوف الغلط كل يوم ومافي شي بمنعا الا العمي او عندما تغيب شمس العصرية ... كل التوهان والجري ورا سراب ... من أجل متعه زايفه أو حقيقية ... امكن الموضوع عبارة عن خدعة بني آدم ... مجرد ما يعيش في سعادة ... بنسي أي إبداع أو إحساس بطعم الحياة. للأسف ..ما شغالين بزئبق الجوانا ... في كل الظروف هياكل بتمشي ... وين .. أي سكه .. أو أي سرير فاضي في يوم من الأيام كان شائل وسخنا .. وشاف كل أحلامنا ونحن مفتحين .. المسألة ما كانت يقظه والسلام .. ولا العين كانت بتتمني تشوف صعاب .. بس الحياة كانت كده .. ليل طويل ... ونهار ملخبط .. زحمة وناس وكواريك .. ومواصلات ممله .. ما بتستمع فيها حتي بقراية عمود واحد بحبر باهت وفكره سياسية وسخانه ... او واحد كضاب كان بكتب عن الثورة .. نفس شباك الحافلة اليومي ... مناظر كشريط فيديو ... بتتعاد كل يوم ... عزاي انو الهوا بغير شكل الشدر كم سنتميتر او ينفض جلاليب الناس الواقفه ومنتظرا قدر... كل الحاجات كانت بتوحي برتابه، بتسرق كل يوم امنية ... وتجهض في اي لحظه بداية حلم ... ما كان المصير معروف .. ولا النهايات كانت مرتبه مسبقا .. سخف اننا نسند ضهرنا في الماضي ... نلوك في مجد ما حنشوفو الا في كتاب تاريخ ... ولا احساسنا كان مجرد انك تعايش وضع ... او تبصق علي وش هزيمة .. وكل رموز الطيبه بدت تتلاشي .. مجرد ما ظهرت القروش مكتوبه في ورق وتستلما من أي شباك معتمد ... ونص العمر بضيع في انتظارك لموعد او قعدة سكر عشان النص التاني من العمر يتنسف ... وفي آخر يوم من حياتك .. لو قعدت مع الزول الجواك وسألتو .. طلعت بشنو؟ مع منو؟ لي منو ... مع اننا كنا عارفين ما كل حاجه بتحقق بجرة قلم .. ولا كل أمل يساوي تحقيق ... تطلعات لو كانت اكتر من اللازم مشكله ... ولو كانت مافي، مشكلة اكبر ... وانك تتعايش مع متغيرات كتيره ضغط نفسي ... اذا كان زئبق الروح جامد مدي الحياة ... وفي كتير من الأحيان بتطلع توقعاتنا ردة فعل في وكت غير مناسب ... او الوكت غير مناسب لردة الفعل ... ونكتم غيظنا البتكون في جوانا مشروع غدة او تذكرة مجانية لمصحة نفسية. وين الحاجات الكانت بتتفجر ...

وين الزول الممكن يبكي معاك من جووووووووه لمن تحس إنو دموعك طالعه منو ...


 

رد مع اقتباس
قديم 12-04-2006, 05:08 AM   #8


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




لملم خواطرك في طرف لهفه وامش ...
ما تقيف اذا فترت رُكب بين نزيف أو نزوه عابره علي رصيفك وانتظر ...
تقطع طيوفك قبل شوفك ومن بعيد ...
سلم علي الوجه البياخد من ملامحك ومشتهيك ...
يا قشه في تيار ممدد من غرق ...
انا ظني فيك ... انك تنوم في شاطئ بِستناك تجي ...
جاي والشوق المطفح مال إليك ...
وبكت نهايات موج مكسر في ايديك
بين اصابع وضل ممحن .... خائف عليك
وتعالي في الوقت الفلاني ...
بالجد بعاني من المسافة ... من نسيت عيني فيك


 

رد مع اقتباس
قديم 12-04-2006, 05:16 AM   #9


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




نحلم متين وانت مربوطة في رجل الزمن غيمه ... مشيك سريع
والباقي من ســـــــــــــــــنوات عمر ... رمضاء ونهار وبدون ربيع
ما تنسي انو الشــــــــــــــوف مهم ... قبل العمر يمشي ويضيع
لو عندي خاطر ...


 

رد مع اقتباس
قديم 12-04-2006, 05:17 AM   #10


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




لمن شمعتك تطفي ... بجيك شائل أواخر الليل في شكل وميض
ونقعد بين شديره وقيف ...
نتساءل عن الشوق البزيد ما بقيف
ونرجع تاني بالأيام ... يوم ما كان قليبنا نضيف
ونتأمل مشي الموجه ... نشوف الموجه وين بتقيف
اذا ممكن


 

رد مع اقتباس
قديم 12-10-2006, 04:25 AM   #11


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



وعندما لم يكتمل نصاب الشوق ... ادركت أن حس اللغة بدأ في العد التنازلي ... احتياجنا لكمة تصحيك من أي غيبوبة عرضية في غاية الأهمية وجزء من البهدلة التي تحصل دائما ... كان سجن الهاجس بلا نوافذ أو طعم في حلق السكوت ... المرارة التي توهمنا بأن لا فكاك سوف يأتي حاملا بعض أمنية .. أو جزء من شك قد يستمر طويلا وليس في متناول أيدينا فعل أي شئ في هذا الغياب الذي يسكنني وأنا في أواخر موسم الصهيل ... فالكبوة بت كلب ... واستمرارية التواصل حل لمشكلة الفراق ... ربما حل مؤقت ريثما تسكت حناجرنا التي ابتلت بدمعة قديمة لا زال أثر البلل يسكن في نفس المنطقة وبوتيرة تتزايد كلما داهمني الشعور.


 

رد مع اقتباس
قديم 12-18-2006, 11:16 AM   #12


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



اسخف حاجه انك ما تترك اي أثر في أي مسام حايم ... اذا قاصد يتلفت او لا
وعندما طفش ... كان شائل في يدو اليمين مطوة وجرح ... وشاش غشاش ... طز في اي حاجه بتجي ماشه بالليل علي طرف اصابع ... وشهوة بايته ... ماكان ويحيح الروح طلع في شكل هوا حار ...


 

رد مع اقتباس
قديم 12-19-2006, 05:33 AM   #13


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




جمبلق ... من غير ما اعاين في اعماق شرقت من بقة حنان ... حنان كان فايض ... بنز مع العرق ... وكان منديل الشوق مساح ... بلي شوقك واديني اقش باقي التعب الطلع زيتي ... كانت الاعماق بتنده عن ولف غائب ... بالأحري كان مستور وبتدسدس في شوية غربة ... وبخجل من وسيلة اتصال مناسبة ... حسيت بالرمشة البتطلع وتنزل في خمسه يوم ... اجتياح شتوي لروح غمرت من زمهرير ساكن في شريانك ... ومبلول ... عصب مشدود وبترتح ... قسمة ما بتقبل اضربا في نفسي ... وحاصل الطرح مجرد امنية ما لقت حظها من يوم عرفت الأماني ... ودقشت ذات مره خيال محبب ... كل مرة بفاجئني بقحه او خروج عن المألوف اذا كان الكلام عن الصحة مجرد (ما عندنا عوجة) كلنا بنحلم بعدم العوجه ... والمشكلة في الهيكل الحايم بينا لأي محطة ... أو وقوف في الممنوع بتصريح مسبق ... الشمس كل مرة تلكز فيني (يا زول هاي .. صلّح ضلك) وانا اتلفت عندما احس إني اخطبوط وعندي تمانية ضلله ... كلهم بتوقيت زوالي وماشين في ضريسه ... منهم من قضي نحبه .. ومنهم من ينتظر ضريسه جديدة ... ربما بعد هذا الخريف مباشرة ...


 

رد مع اقتباس
قديم 12-26-2006, 03:40 PM   #14


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




اجتياح ذكري ... كانت في اواخر القلب الماضي ... دست سم الرحيل في جوف مسافة ... وبلت الأسفلت من عرق جبين الضو الساطع من دواخل احتكرت دفء الشتاء ... لونت كل الشوارع بالصدق ... وامتهنت حرفة التواجد في أي عرق كان بنط ومشدود ... تديك احساس انك ميت في جواك ... او شعورك بالشلل عندما أساءت الحواس التعامل مع من يسكنون فيها ... زخم من الدوافع المرئية والمحسوسة يجعلك تخت يديك في راسك وتقعد من هول الفجيعة ... كل حاجه بتذكرني كمية الحاجات كنت بفقد معاها حاسه جديدة ... وانا اساسا كنت بكره حربوية الحواس ... عندما تضحك في موكب جنازة ...او تبكي في بيت عرس ... او تسكت عندما يتكلم الجميع ... يضجون ويلعنون ويسبون غيرهم من اصحاب القرارات وصدر تحت توقيعي ... اجتياح مدمر عندما لا تجد من يشعل فتيل ازمة او في كلامه كثير من الحشو الغير مرغوب ... او هي في وادي وأنا جدادة وادي غير ذي زرع ... لم تكن تأبه بما يدور في محيطها العام ... لأنها تملك قرار السكوت وقرار الصراخ في آن واحد ... تلك هي التي قتلت في دواخلي أنا ... لتعيش هي في الدواخل ... بكل الضجيج والهدوء والعاصفة التي تسبق دائما صوتي ... حيث يضيع كل الصراخ ... ويموت أي نداء استغاثة ... سادية الحب فرضت نفسها بكل قوة ... وهي .. خير من استأجرت ... القوي الأمين علي الحب ... ولا وجود لأي فرصة للقبض بلجامي علي رصيف الحياة الآخذ في الاتساع ... فخميت وصريت عندما جاءتني ليلة الفتر في شهر الحب الجارف ... اصبحت لا اقوي علي حملك وحدي ... يا حب كالإعصار ... يا أجمل قلب في الدنيا ... هل يجدي التذكار ... لا
لا
لا
لا ... لم أمت ... فمن حقي العيش بسلام



 

رد مع اقتباس
قديم 05-24-2007, 09:11 AM   #15


أبو رائد غير متواجد حالياً

بيانات اضافيه [ + ]
 رقم العضوية : 158
 تاريخ التسجيل :  Sep 2006
 أخر زيارة : 08-18-2010 (08:48 AM)
 المشاركات : 745 [ + ]
لوني المفضل : Brown
افتراضي



ود الواطة يا حبيب قساي

إشتقت لكتاباتك ... لكن نعمل شنو لمشاغل الدنيا ....

لكن جيتك راجع واليوم نبدأ أول كلام ...

لك التحية والود ...

وربنا يوفقك ...


أبو رائد


 
 توقيع : أبو رائد



رد مع اقتباس
قديم 05-24-2007, 10:50 AM   #16


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



اقتباس:
المشاركة الأصلية كتبت بواسطة أبو رائد مشاهدة المشاركة
ود الواطة يا حبيب قساي

إشتقت لكتاباتك ... لكن نعمل شنو لمشاغل الدنيا ....

لكن جيتك راجع واليوم نبدأ أول كلام ...

لك التحية والود ...

وربنا يوفقك ...

أبو رائد
ياااااااااااااااا
أطلع من ديني كتبت سطرين عنك في صيغة سؤال في ردي للغريب
ومسحتهم ... خجلت من نفسي .. لأنو تلفونك معاي
طولت الغيبة ... وينك ومشتاقين مدها لما لا نهاية
تحياتي للجماعة الفي توقيعك (تربل شفّع) ماشاء الله

وافرض انا صنيت او حصلت لي اي حاجة .. أسأل (دي في الأنكل) يا أنكل
واتكل علي الله اذا لقيتنا مايلين ... ما تشتغل بينا كتير
خايفين علي حجرك .. حجرنا غطس من زماااان
جاو


 

رد مع اقتباس
قديم 05-25-2007, 09:40 PM   #17


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



سميتك البت التي تسرقني مني في وضح انبهار ... إنزار اذا عز المزار ... مقتولك الزول المدشدش في ودار ... لميني عارفك حاجة مني ... حاجه بتحلي المسار ... حاجه بتخلي الحواس تتشابى ليك ... وانا زي مكتفني الهوي ... حرية تكتب في الشبابيك البراح ... وكان الصباح الببدا من عينيك وشاح ... غطاني ما حسيت بخوف ... رجعني للحتة البتمرقي منها جايه لي ... وانا كنت ماشي عليكي فاجأني المطر ... رحمة للناس البترفع يدها ودقو ناقوس الخطر ... وانا كنت عطشانك براك ... وحلان في انسانك ... ساكن في قيعانك ... وحايمه بي ما قلت شي ... ما نقنق الحس البحوم جواكي لحظة وانفتح باب للضجيج ... رجي روحك لو غفيت او داهم الشوق المبيت ... أو حتل بالمرة مخنوق من ظروف الغربة والشارع زحام ... وانتي عارفه صعوبة اللقمة الحلال ... خلتني أخرت السؤال والمشاعر واقفه صف .


 

رد مع اقتباس
قديم 06-05-2007, 05:46 PM   #18


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي





نادي حنينك يدخل في ضفر الشوف خجلان ... يبلع فكرة لقيا علي أطراف إنسانك ... يا أكتر زوله بتدخل زي ما عايزه الفكرة تكون بي طعم مميز ... سكة بتكتب للخطوات عنوان ... في أي مكان بتلاقيني هواجسك فتحت قوس ( بتفتش عن إنسان ) في أي مكان جواك تلقيني محكر كلوريد صوديوم وفي جواي أكسيد الهم في الدم ... ومرة بتطلعي من تفكير وسخان بي كربون الحوجة (طبعا في وكت عصيب) زي كمساري البص لمن اركب وانا ما عندي قروش التذكرة وفي جيبي بطاقة طالب يدك والحظ واقف جنب الكمساري وسارح بالشباك ... نزل الحظ في أول لفة وانا سارح بالشباك التاني أبزق ومحتاج كلينكس ... مبلول بي عرق الساعة اتنين والراس كابس ... ما تطلعي هسي بتتزلقي ... خلي الهوا في نص الكبري يضرب روحي ويقسمني عليك ... امكن ننزل في أول قيفه يمين ... نزرع فيتامين القدرة ونحصد شوق في اول ضحكة سوا ... الشوق عنوان النص ... الخوف البرجف من حق البص والباقي تسالي ... نسرح طوالي ... نرجع كداري ومالو ... الوضع سخيف ... والمستقبل برضو مخيف ... لكن حنقيف قدام الخوف الواقف في نقطة تفتيش والدنيا تهنضب فينا تكورك ... ارفعو يديكم عن مشروع الحب وشوفو قرايتكم !!! ... دنقرنا الاتنين وانا متأكد كان إحساسنا سوا ... في الزمن الأصبح بي وشين ... متوتر وشين ... وسرحنا كأنو الأمر مجرد نكتة ورحنا نغطغط في الشوق خجلان ... احساس تعبان يتكلم عن فرصة متاحة لو ضحك الحظ ... أو لاحظ إننا مندمجين بي شكل غريب ... يا سخف اللحظة الوقفت قدامنا ونحن بنبحث عن كيفية نلقي طريق ... أو نطفي حريق ...
وانا بتحسس فيك ... لاحظت دواخلك دابت فيني وانا سائل فيك ... تفاعل إنساني ما عندو قضية بأي مصالح ... زول متصالح ... فلتت من يدو القدرة وخلت خشمو مشقق ومالح ... وفي الوقفة أمكانية قعاد... وحنكون بُعاد ما تشفقي ... انا ماشي أتلقى العلم ... بداية حلم ... لم المتاريس تختفي
الحظ يزورنا ونبقى في
أنا جاي ليك لمممم العوينات تكتفي
أنا ما أظن يوم أختفي ... أو نبقى في الواقع خيال
علي وشي أقعد منكفي

عايز أشوفك ...
ملامحك جميلة ... جميلة جدا
ولبسك أنيق ...
مداخلك طويلة ... ونفسك عميق



خبر عاجل
قبضو علي بتهمة الشروع في الشوق...
فتحو محضر إختلاء بأنثى ...
هم شمو ريحتك فيني ...
دي كل الحكاية


 

رد مع اقتباس
قديم 06-11-2007, 11:54 AM   #19


أبو رائد غير متواجد حالياً

بيانات اضافيه [ + ]
 رقم العضوية : 158
 تاريخ التسجيل :  Sep 2006
 أخر زيارة : 08-18-2010 (08:48 AM)
 المشاركات : 745 [ + ]
لوني المفضل : Brown
افتراضي



عزيزي ود والواطة ......................
ما عندي شئ أقوله غير رائع وجميل زي كلماتك وعباراتك النابعة من واقع أليم بنعيشه يوم بعد يوم ولا ندري متي الخلاص .
لكن عشمنا أنه بكرة قد يكون أجمل وأروع مما نحن فيه اليوم والوحل الماشين فيه دا يبقي يباس عشان نجري وننطلق نشوف الدنيا ماشة وين وجاية من وين .........
ناسنا البقوا عايشين بالهم والنكد و الدموع وأحلامهم البتموت قبل تولد بكره يكون يكون لزيز وأطيب

لك الود والتحية ..... والشوق

أبو رائد


 
 توقيع : أبو رائد



رد مع اقتباس
قديم 06-12-2007, 06:34 PM   #20


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



اقتباس:
المشاركة الأصلية كتبت بواسطة أبو رائد مشاهدة المشاركة
عزيزي ود والواطة ......................
ما عندي شئ أقوله غير رائع وجميل زي كلماتك وعباراتك النابعة من واقع أليم بنعيشه يوم بعد يوم ولا ندري متي الخلاص .
لكن عشمنا أنه بكرة قد يكون أجمل وأروع مما نحن فيه اليوم والوحل الماشين فيه دا يبقي يباس عشان نجري وننطلق نشوف الدنيا ماشة وين وجاية من وين .........
ناسنا البقوا عايشين بالهم والنكد و الدموع وأحلامهم البتموت قبل تولد بكره يكون يكون لزيز وأطيب
لك الود والتحية ..... والشوق
أبو رائد

ود عم ود الواطة ...
ما تكتّر من العشم ... بضرك ... آثارو الجانبية اكبر منو
بنخاف عليك من الصدمة ... او يدقشك واقع يجيبك واقع علي وشك
وتتحسر ... فخليك مسردب حاليا وشوف بتوديك وين ؟؟
تحياتي ليك وللشفّع


 

رد مع اقتباس
قديم 12-28-2006, 06:18 AM   #21


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



ستفت كل الشوق ...في قليبين وحيلة ... ولفتين شارع ... وحتي الملايات نفضتها ... ما وقع منها إلا باقي حلم ... حلم من قعر الواطة ما قام ... يقوم كيف والسماد فرقة ... والمويه من عرق التوتر وماشه لي مصبات النزيف ... فما نخرت سبلوقتك الواطه ولا فرح الطريق يوم ما جيت بعند بيتكم ... الشوق كان بزيدني طول ... يزيد الشوق ... يقل مدماك من الحيطة ... يزيد الطول ... يشق عمق النظر طوبه ... دخلتك وانت بتفلي المشط ... وقدامك مرايا... وفي وشك شكل مطبوع علي وشك ... شوق وشين .. في قلبين .. ولفتين شارع ... خفت من المرايا تبوس عويناتك ... خفت من المشط يسرق ضفيرة ونص ... وكانت تنيت الرقبه بتنز بالانوثة ... كنت واقف ... وكنت خايف تدركيني ... لو كورك الرقراق ... او إتفتح نفاج دواخلي علي وريد اللهفة فيك ..يا سكت كل الغنا ... يا نبح كلب الشوارع فيني يوم ما لمست فخدك بالغلط ... كداري والشوارع هم ... البال لغم ... اتفجري ... يا ساكنه في حس يومي والخطوة البتحسب كم مشيت والباقي كم ... يا كل كم ... اعذريني اذا سرقتك وكنت ناوي ... اعذريني اذا كتبتك في الغناوي ... اشتليني علي عيونك لو تفرهد بالأماني...

حاولت ابقي ولد حريف
كيف!!! ...
كيف تسكت السبلوقه والموسم خريف


 

رد مع اقتباس
قديم 01-01-2007, 09:32 PM   #22


ود الصداقة غير متواجد حالياً

بيانات اضافيه [ + ]
 رقم العضوية : 155
 تاريخ التسجيل :  Sep 2006
 أخر زيارة : 06-03-2017 (01:33 PM)
 المشاركات : 18 [ + ]
لوني المفضل : Brown
افتراضي



اقتباس:
المشاركة الأصلية كتبت بواسطة محمد ابوعاقلة

لمن شمعتك تطفي ... بجيك شائل أواخر الليل في شكل وميض
ونقعد بين شديره وقيف ...
نتساءل عن الشوق البزيد ما بقيف
ونرجع تاني بالأيام ... يوم ما كان قليبنا نضيف
ونتأمل مشي الموجه ... نشوف الموجه وين بتقيف
اذا ممكن
الاخ/ محمد ابوعاقلة
ماقادر ابوح ماقادر اصرح
امكن قول افوح امكن قول اجرح
امكن شيء اروح والناس ما بتريح
لك التحية ان كنت محمد ابو عاقلة الذي اعرف ولك السلام ان كنت غير ذلك كلماتك تدخل القلب دون استئذان كاني بها مغسولة بالرحيق معسولة بالندى اتمنى ان تواصل الكتابة في هذا الزمن الرديء حتى نأخذ من كلماتك الامل
وكل حبي


 
 توقيع : ود الصداقة

معناك شرحو اطول والله يا انسان


رد مع اقتباس
قديم 01-04-2007, 10:20 PM   #23


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي





اضحك يا ليل
اضحك بالليل
هديت الـحيل
او انك ناسي ...
طوالي بتنسي ... إننا في آخرك ... في آخر مدار ... وصوت الذاكرة ضعيف ... وكنت بنادي ليك .. من اول خطوة ... وفي نص الدرب ولآخر العمر ...
تتذكري لم فتشت عنك في دواخلك
يوم فتر حيلي ومرقت
يوم لقيتك في محمد وكان محمد في دواخلك
كنت زي عصفور مزرزر في محطة
والمحطة ... وريد وريد
يا عيونك لم تسرح في شرايين المحطة
كنت بشرح ليك حكايتك
انو جواك أي شريان فيني نطه
يا المسوره في فراغ قلبي ومداخلك
حسي بي ... لو حصل فاتك مسارك
واعتمدتك لمبه والشارع ضلام
وفي سيرتك ...
ضحك ليلي



ود الصداقة ... شكرا لاحساسك الحلو ... يا زول يا صافي


 

رد مع اقتباس
قديم 01-06-2007, 06:24 PM   #24


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




السماء عطشان ... والسحابات تشبه الريق المدسدس في ناصية من ساحة حلق ... كوركنا كواريك ناشفة وكان الاحساس لسه لين ... وحكينا عن الولف ... ويييييين لم كان الولف قتال ... والدمعة بتسبق سلامنا الحار ... وقدر ما كتمنا كمية الشوق ... لقينا السحاب فاتح للشمس الف شارع وساحة كبيرة مجهزة بالفضيحة وحاجه بتشبه ضل وهمي كان واقف وبس ... من غير اي تطلعات او خطوتين تقينا من رماضا بتشوشو كل الخطوة ومساحة لا بأس بها اذا افترضنا انو تحقيق احلامك بتم في خطوة ونص او تكون وريث غير مناسب في وقت شال الزمن اغلي ما نملك ... كم كانت المساحات همباته وفي يدنا حلم ... مشروع حلم بغيمه نضيفة ونسمه تمسح من الجبين عرق التوتر والسخف زي تلتوار ما فيهو أي موقف مؤقت او قارب نجاة .
انا ما بعرف حكاية الاسماء المستعارة ... مستعارة يعني ما حقتك .. ولا اسمك ... امكن كلمة ملخبطة او مستلفة من اي قاموس ... علي كل حال امكن تصل كلمتك او ما تصل ... تصل كيف واي حاجة بقت كسيحة او فيها حاجه زي كدا ... ابو القدح هد فينا ونحن ما جايبين خبر ... واهي الحياة ماشه ... مرات تقيف بيك في حته تافهة ومرات تعدي بيك من أحلي حته ... تفوتك ابتسامتين كان مفروض تعيش فيهم ولو ابتسامة واحدة ... وتعدي زي الأيام وعمرك محسوب ... اي لحظة تمر بتقربنا من الموت ... واي لحظة تطش منك كأنك ماسك علي جمر الزمن واقف ... واقف تعمل شنو .. ياخي اتحرك لو بقي في الحيل حبة تقومك ... او حبة تموت بيها وانت عزيز ...



 

رد مع اقتباس
قديم 01-09-2007, 07:25 PM   #25


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




الأف ... بتحتاج لحلق واسع ومش مهم في أي بال ... لحظات الضيق لم تفرض نفسها بتحس بضغطك ارتفع ... وآمبير الفرح وصل لأعماق سحيقة بدون اي اسباب ... خسارة انك تكون تاكل ضهرك في شدرة دليب وضلها غرقان في حته تانية ... ونتململ ... فكانت امكانية شوفك من أصعب الحاجات ... وسماع صوتك لسة اصداهو بترن ... فما جاتني ريحة منك عشان أفوق ... ولا كان الطريق ساهل عشان القاك ... أو عشان أقراك ... والشوف طشاش والبصيرة عمياء ... اذا حاولت اتحرفن بلقي نفسي مشتت بين هناك وهنا ... او تهاجر في دواخلك مجبور ... تفتش ليها في العصب المشدود او الصبح تالف من قلة الحيلة وضياع الوسيلة ... وكنت حاسس اني مرات زي دليبة بترمي ضلها وتحني قدام خيال ... او حتي طيف الخيال ... هنا بتأكد تماما من نفسي اني أصدق زول عرفتو بدون مجاملة... او مجرد كلمة قدامي ... الانفتاح علي ذاتك برغم قربك من نفسك أو بعدك عنها ... بحتاج لدواخل مسفلته ودروب من الإلفه اللذيذة ... وتعب ... لم تكون دواخلك مليانة لدرجة ما بتستحمل اي جرعة زيادة تفقدك الوعي أو تدخلك في غيبوبة لا يحمد عقباها ... برغم ذلك بلقاك بتطلعي مع العرق والبول ... وفي ريحة الأنفاس عبير بجذب كل الهواء الحائم ... والهوي الجواي ... وحاجة منك بتلعن في المسافة البتسرق خطاي وتسجن خطاك ... سكة السفر التطول ...
فيا موسم الريد الهطول، نقّط علي حرف الكتابة الاشتهاء ...
واسكن علي حساب الظروف البتجبد فينا لم الدنيا تاخدك لو تعيش ...
هامش حدودك وسقفك العالي وتراتيلك ...
يا مؤدب في مشيك ...
يا المجنزرني وأسيرك وكنت راضي ...
مالو لو جابك كلام
مالو لو فتحت عيني فجأة وألقاك في المسام
ما لو .... لو تفتح عمل الأحلام
وتلقي شيطانك مكتف
وامنياتك مارقه منك في زحام



 

رد مع اقتباس
قديم 01-15-2007, 09:43 AM   #26


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




غير الشوق البدفرنا شنو ... احلي حاجه انو باب التوبة لسه فاتح ... فاتح علي مصرعيه ... ومنتظرين قرار الافراج المؤقت ... حتي ولو كانت الأحلام معتقلة ... او التمني مرتاد سجون ... والشوق ذو سوابق لا تعد ولا تحصي ...
وعندما تتفوه طواحين الفراغ بكلام دراش ... بشمئز
ما كانت الحال بتعجب ... ولا سطرين النزيف سحبت كمية القلق الموجود في ذاكرة يبست من كتر الشر والوقوف في حتات مجهولة ... وفي كل مرة بشك فيني التمني ... وقوفي كان غلط ... في حته عالية ما بتمسك اي موية مطر ... ولا بتقوم فيها شتلات أمل ... ما عارف المويه ليه بتخاف من الاماكن المرتفعة ... مع انها كانت بتقبل في السحاب ... ودايما الحتات الواطيه بتمسك في طرف المويه وتحلف ما تمشي تاني ... لغاية ما تبقي ملاريا ... النفوس الواطية بتمرض ... والنفسو أبيه بكون جيبو مقدود ... معادلة صعبة ونفس أمارة بالسؤ الا من رحم ربي ...
كان الشارع المضلم معرص ... لم غطا اتنين مشبعين بالشهوة ... وابليس غطا ... افتكرو نفسهم شفوت ... فما كانت بطانية الضلام سوي لون ... وابليس شخص تالت مطلوب القبض علية بآية كرسي ... فنسوا أداة القبض ... فجاء يمشي علي استيحاء ... لآدميين بلا استحياء ... فكانت النتيجة ... ابن شارع وفضحية آدمية ليزداد عدد الذين يرتادون السينما بدون اذن من ولي أمر .


 

رد مع اقتباس
قديم 01-16-2007, 09:06 AM   #27


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي




التوارد شق صمت الليل وجاك ... شق صدر الهمسة وانجرح السكون ... دم في مسارب الروح وشكل الالفة والجو المريح ... جيتي والضو في خفوت ... شايله في يدك ملامة ... وفي قليبك حاجة زي تكوين مجوف من زعل ... وين كتابتك ... وموعد الشوق المشتت في سطورك ... برغم الحنين الجابني ليك ... ورغم المسافة الاشتكت آثاري للرمل الدقاق ... انا صادق ومشتهيك خمة نفس ... ابلعك والريق سوا ... ابلعك وانت حول الروح هوا ... وجوه حبل الروح مكتفني الشهد ... او شهقتك يوم تعتريني مظنه في الزمن الجميل ... ورجعت اهضم انك الزاد المميز والطعم ... يا بت .. كيف تكوني الغيمه والداخل سماي ... كيف بتترجي الهطول يضرب علي عصبي الطبول ... وتبقي أياً من زوابعك كلمة (أحبك) ... صاعقة في وتر الدماغ ... واقعة في عصب الحواس ... وكنت من عجائب الحواس الخمسة والماضي الشهيد ... وفي غينيس الجسد أكبر من كريات الدم الملونه بالمساحيق يوم غشانا الليل سوا ... عابرين سبيل اللهفه والحس ... يوم شربتيني وبلعتك ...
تتذكري ...





خلو الضمير حكم ساحة
في نهاية كل يوم ... لمن تكون ما قادر تنوم
في بداية كل يوم ... لمن تكون ما قادر تقوم



 

رد مع اقتباس
قديم 01-21-2007, 08:46 AM   #28


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي





الزلط كان واقف غلط ...
لذا جاءوا يرسمون القبانات والعبور ... في مكان غلط .
في حته زي كشك النقط ...
كم عسكري ودبشك وصرة وش ... اذا كان البك أب ما عندو وش ... أو ندمان وسافي التراب
سف التراب يا ندم ...
علي الوقفة الغلط وتعديل زاوية الرؤية الحادة ...
جل القوانين كانت غلط ...
من بداية الايفط
لغااااااااااية قطع الرحط ...


 

رد مع اقتباس
قديم 01-27-2007, 09:58 AM   #29


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي





دقيت علي وتر الزمن رنه ... لقيتك نغمة في حس الوجع بترن ... وكان وترك بِرك في فرع الوريد ذكري ... تصحّي الماضي في زحمة سفر طافش ... وطريق بسالمك إذا غابت محطة شوق عن الأنظار .. وانا كنت في عرض الطريق رملا مشتت في خطاك ميعاد .. خطاك في المشيه زي أعياد... فيا رمل الطريق أفتح ضراعاتك لما تشتهيك حلوه ... لتعتق بعض أحزاني اذا صبح الفتر ميزه .. تقاوم في الورم حفيان وفي بالك شديره وضل .. بتشطب عنفوان مرخي لمن تصحي في جواك إرادة شوق .. مش مهم لو رمالك تبقي شوك .. وانت بالقدح المعلي بتبني خطوة ومسطريمتك كل مره تبوس زوايا الخيط الجاي من ضل زاوية قايمه قصاد عيونك ... يا عيونك لم تشويني اللمحة بالبعد الفلاني ... وانا كنت في الواقع مسخّن وفايرة في دمي الأماني ... يا الحكاية الهزت الوجدان وفرّت نبضي في عيونك سباته ... والتداخل بلّ شريان السعف ... وعطنت حنقوقك بباقي الريق وكانت شافيه إيدك والأصابع فيها باقي اللون وبيتين من شعر ... كنت ناسيهم يوم طراك الحظ وجيتك ... ويوم كفتني الحظ وفتك غادي بتحسر مجيك ... بدخل معاك في دورة الدم البتنشط شوف وخوف ... جلد الشعور الهش اذا هبشك مسام ... فتفت غناك .. ورماكي في حضني المليس بالأسي .. خائف عليك ... تتفرتق الضحكة وينكسر الحنين ... والله في اللحظة ديك ... كانت مواعيدك أنين ... بتجيني قبّال أمشي ليك ... وبمشي ليك بتفوتي والزمن انجرح خاطرو وبكيت يا يمه والتوقيت غلط ...
ارجع اذا كتب الطريق روشتة للرجعه البتمرق دمعة والخدين ممر..
ارجع ... بدون تعصر مع الانزيم بقايا الهم ..
دِرِب ما بمشي فيهو الدم..
امش بتجيك عناية الله..
وحات الله البنرجع ليهو وقت الهم..
ونتندم ...
علي .........



 

رد مع اقتباس
قديم 01-27-2007, 11:13 AM   #30


أبو رائد غير متواجد حالياً

بيانات اضافيه [ + ]
 رقم العضوية : 158
 تاريخ التسجيل :  Sep 2006
 أخر زيارة : 08-18-2010 (08:48 AM)
 المشاركات : 745 [ + ]
لوني المفضل : Brown
افتراضي



رائع ....

ربنا يحفظك ...

ولا تحرمنا من كتاباتك الرائعة ...

أبو رائد


 

رد مع اقتباس
إضافة رد


الذين يشاهدون محتوى الموضوع الآن : 3 ( الأعضاء 0 والزوار 3)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 06:22 AM.


Powered by vBulletin Version 3.8.7
Copyright ©2000 - 2024, Jelsoft Enterprises Ltd
HêĽм √ 3.1 BY: ! ωαнαм ! © 2010
vEhdaa 1.1 by NLP ©2009