العزيز ابوحراز تحياتي
قالو الشقة في البلد علم اهو علي الاقل عرفتة المحلات اللي خدماتهم سيئة المرة الجاية اتصل علينا واذا قاعدين في جدة حرم غداك وفطورك وعشاك عندنا واذا خارج جدة بنوصف ليك المحلات الممتازة وصدقني في محلات اذا وريناك ليها امكن تجي تاني من محلك الانت فيهو قاصدة عدييل .. بالنسبة لكيلو تمانية ما انصح زول يمشي ليهو لانو بقى مشبوه جدا والممارسات اللي بتتم فيهو في الخفاء امكن توديك في ستين داهية من دون ما تشعر يعني عادي ممكن تكون قاعد جمب ست شاي وعلى يمينك بتاع مخدرات وعلى يسارك جرار او قواد وما بعيد ست الشاي ذاتة تكون قوادة او بياعة حبوب لانو غالب زباين الكبري ده من سواقين الدينات والشاحنات وهناك بتتم صفقات لنقل بضائع تطير فيها رقاب وغالب نزلاء سجن بريمان كانو زباين مداومين على الكبري ده .. اما الكرنتينة فهي اقل وطأة مع انها موطن العطالة وعديمي الشغلة نفس الوشوش اللي بتشوفة في قهاوي الكرنتينة الليلة حا تشوفة بكرة قاعدين في القهاوي من سنين لا شغل ولا مشغلة والواحد فيهم فقرتو قدر الضربة بالمئات ان لم يكونو بالالاف وبالتالي الميزة الايجابية الوحيدة اللي بيقدموها انهم بيجبرو المطاعم والقهاوي في الكرنتينة انها تقدم خدمات ممتازة لانهم زباين دايمين على عكس كيلو تمانية اللي حتى زباينو الدايمين فيهو استمراريتهم متقطعة ,,
|