قد سألت اللمبة يوما ليه يا لمبة نورك طافى
ومالك انت ما بتحنى وابقى شعاعك ديمة صافى
وليه فواتيرك رهيبة وكل تقديرك جزافى
وهل صحيح ما رووهو زى عنادك انت مافى
قطع نورا ولى قالت[نوم خلاص تصبحلى عافى]
@@ب
وقلت اسأل الماسورة ليه يا انت مخاصمة الزير
وما بتجودى بقطرة واحدة تحفظ ماء وجهو الجميل
وليه يا انت مابهمك ولو ندينك بى دليل
وهل يا انت ما سمعتى..نحن جهزنا البديل
ومنك اتن خلاص زهجنا وقلنا نسيبك بس عديل
وين يا[ماسو]بكرة بتمشى من غضب اهل السبيل؟
زاد شخيرا ولى قالت[شكرا ياسيدى الوزير]
@@
وكم سألت التلفزيون مرارا ليه موادك جد رتيبة
ومالو جمهورك مخاصمك عشان برامجك بس كئيبة؟
وهل حقيقة ما بثوهو انك انت بقيت مصيبة ؟
وبقبت حاجة ما مهمة وهم رموك جوة الزريبة؟
[نملت] شاشتو وقالت[اسوأ مواد رايحين نجيبا]
@@
ومشيت اسال الوظيفة ليه يا انت ما بتغطى
ومالو اجرك بس شوية وبالفلس انت ارتبطى
وهل نصدق لحديثن انك انت خلاص فشلتى؟
ونحن معاكى ضاع عمرنا وحسبتى ضدنا كم بلنتى
وهل معاكى بس بنحلم مرة واحدة نفطر ببلطى!؟
ضحكت منى ولى قالت[إلا تكون حاوى وقمرتى]
@@
وسألت الكورة سؤال مباشر ليه يا انت اداءك فاتر
ومالو جمهورك متعصب واعلامك شغلو بس إهاتر
وليه يا انت ما بتجيبى ادارى ناجح وكوتش شاطر
ومالو تحكيمك مشاتر وكل قرار بتخذو باطل
وليه تيمك ديمة راجع إما مهزوم إما خاسر
زعلت منى ولى قالت[رايحين نزيد سعر التذاكر]
@@
وفى النهاية قلت امشى اشوف السوق
ما اصلى عائز ربع لحمة وكمان طايوق
وقررت اسأل بكل طيبة وكل ذوق
ليه يا انت اسعاركم طالعة ما بتنزل وديمة فوق
ضحك زولى ولى قال[الا اكون التور مسروق]