الشاعر (ابرهيم عباس) قصيدة (الــزواج كـيـــف) من ديوانـــه (هترشــة مذبــوح):
سألنى صديقي الدكتور المغترب عن ارتفاع تكلفة الزواج فقلت له:
فى المدن تكلفة الزواج بقت حاجة رهيبة
وما برفع رأسو للزواج الا زول ترطيبة
المهر بالريال واضح يا الحبيب حاجة غريبة
وكان للشيلة ديك اسكت ساكت سيبا
يا حليل زمان زمن عرس الكورة
تكلفة العرس محددة من اهل الرأى والشورة
الهم ستر العروض والحالة تكون مستورة
ازوجوا الشباب وحاربوا نهائى البورة
وفى ريفنا الحبيب العرس يا خوى ما غالى
ما بنعرف صالات مجتمعنا لسه مثالى
عندنا ناس ام بخوت ما ناس رميساء وسالى
ذوق وادب وبالقليل نسلمك عروس طوالى
الدكتور اخوى لو عندك رغبة اكيدة
وعائز تودع العزوبية وتبدأ صفحة جديدة
وعائز بت حلال وحياتك معاها تبقى سعيدة
ارجع لديارك تحقق مرادك وتشبع انت عصيدة