نادي حنينك يدخل في ضفر الشوف خجلان ... يبلع فكرة لقيا علي أطراف إنسانك ... يا أكتر زوله بتدخل زي ما عايزه الفكرة تكون بي طعم مميز ... سكة بتكتب للخطوات عنوان ... في أي مكان بتلاقيني هواجسك فتحت قوس ( بتفتش عن إنسان ) في أي مكان جواك تلقيني محكر كلوريد صوديوم وفي جواي أكسيد الهم في الدم ... ومرة بتطلعي من تفكير وسخان بي كربون الحوجة (طبعا في وكت عصيب) زي كمساري البص لمن اركب وانا ما عندي قروش التذكرة وفي جيبي بطاقة طالب يدك والحظ واقف جنب الكمساري وسارح بالشباك ... نزل الحظ في أول لفة وانا سارح بالشباك التاني أبزق ومحتاج كلينكس ... مبلول بي عرق الساعة اتنين والراس كابس ... ما تطلعي هسي بتتزلقي ... خلي الهوا في نص الكبري يضرب روحي ويقسمني عليك ... امكن ننزل في أول قيفه يمين ... نزرع فيتامين القدرة ونحصد شوق في اول ضحكة سوا ... الشوق عنوان النص ... الخوف البرجف من حق البص والباقي تسالي ... نسرح طوالي ... نرجع كداري ومالو ... الوضع سخيف ... والمستقبل برضو مخيف ... لكن حنقيف قدام الخوف الواقف في نقطة تفتيش والدنيا تهنضب فينا تكورك ... ارفعو يديكم عن مشروع الحب وشوفو قرايتكم !!! ... دنقرنا الاتنين وانا متأكد كان إحساسنا سوا ... في الزمن الأصبح بي وشين ... متوتر وشين ... وسرحنا كأنو الأمر مجرد نكتة ورحنا نغطغط في الشوق خجلان ... احساس تعبان يتكلم عن فرصة متاحة لو ضحك الحظ ... أو لاحظ إننا مندمجين بي شكل غريب ... يا سخف اللحظة الوقفت قدامنا ونحن بنبحث عن كيفية نلقي طريق ... أو نطفي حريق ...
وانا بتحسس فيك ... لاحظت دواخلك دابت فيني وانا سائل فيك ... تفاعل إنساني ما عندو قضية بأي مصالح ... زول متصالح ... فلتت من يدو القدرة وخلت خشمو مشقق ومالح ... وفي الوقفة أمكانية قعاد... وحنكون بُعاد ما تشفقي ... انا ماشي أتلقى العلم ... بداية حلم ... لم المتاريس تختفي
الحظ يزورنا ونبقى في
أنا جاي ليك لمممم العوينات تكتفي
أنا ما أظن يوم أختفي ... أو نبقى في الواقع خيال
علي وشي أقعد منكفي
عايز أشوفك ...
ملامحك جميلة ... جميلة جدا
ولبسك أنيق ...
مداخلك طويلة ... ونفسك عميق
خبر عاجل
قبضو علي بتهمة الشروع في الشوق...
فتحو محضر إختلاء بأنثى ...
هم شمو ريحتك فيني ...
دي كل الحكاية
|