تتذكري ...يوم جيت من سفر ... دافرني شوق ... منتظره في الخاطر كلام ... ورشحتي حضنك يسجن الفرح المسافر في غيوم الشوق سنين ... كانت رسائلك مرهم الغربة البمسح بيها صبرا كان بقيف علي فد رجل مستعجلك ... كان رديفي الهم وخوف علي فد سرج ... الغربة فينا ابو القدح مولوده في عز الصهيل ... مولوده والموسم حصاد كل السطور من واطه فيك ... ما تلومي محراتي المصدي اذا حرن في حته من جسدك ورم ... يا لابسه احساسي وغريزتك (فوق ركبتك) لي حاسه في فصل الشتا ... دفيني لمممن تسيح حروفي علي المسام خطأ منطقي ... أعد المحاوله من جديد ... ختيت حلاوتك في الحروف نقطة عسل ... خطأ مطبعي ... ذوبتي من جسدي الجليد ... وفتحتي طاقتين من فعل نشوة وعوالم تنتفض جرة ألم ... يا أعد!! يا قلم ... خليني في الواقع غيور وانا بردفك أباجوره والليل انقسم ... نص في السرير والتاني حالف يبقي حلما صاحي يلفاك يا صباح ...ما كان في داعي!! تظبط منبهك آخر الليل للكلام ... يا انت يا المليان كلام ...ما بوعدك والذكريات غيبوبة في واقع تعيس ... يا ترعة من نيل للجداول والمساحات والسراب ... يا واقفه في بور الخطاوي الصادة في مشهد حزين ... راجعة خديك لون غروب ... مكسوفه والخاطر مكسر في قفاك ... خميتو للزمن البجيبك صدفه في الكبري البتعبر منو دقاقة هواك ... عبيني للفقرا المساكين قوت وحب ... قرقري القصب النشف زمبارة للصوت النشاز.. مقطوعة للطير البنقد في الأمل آخر العصاري ... وارمي شوال للبجيك عابر سبيل أو الذين يسألون عني (إجحافا) عربون مودة استعصت علي لم كنت مشغول بيك وبس .
يا بت ... حبك مر عليه الحول ،
طلعي لي زكاتو ...
|