بيت الجالوص


معتوقة ومعتقة ومنعتقة
نوافير إنتشى وحشمة
وحمار العين
تضحك كلما وقعت مصيبة
تمشى على العجين و تلخبطو
ترطن إذا جاها الحنين
يا بت بيوت الهجعة كيف
غبار شوارعك ماشى وين
زقاق يعيش في زقاق
كتمة وظلمة وإنعتاق
أنا فيك لامونى المساجين
سكاتك منازل حلال الحرام
سكاتك على حين أهش الحمام
سكاتك عليك لما تصحى المسام
سكاتك عليهم سكوت و السلام
صوتك وقت قطع البحر قبال مراكب العمدة
ضهر النيل عرف
و الشمس فوق حبل الغيوم
شرت جلاليب النعاس
ناشف غرب مبلول شرق
و المطرة زي شفع العيد
تدخل غرف كل البيوت
كلمة الجوع الشرح للأرض
كيف تقرأ المرق وقبال يقع
فوقك سقف
إتنحنح الجالوص
أمرق على مهلك
مروق الحنة من ضفر العروس
واصعد على مهلك
صعود البذرة والروح والشموس
مبنية مدن الخوف
من طينة آخر الليل
وأنا في سقالة الشوف
قدح البصيرة تقيل
فاتح زريبة الجوف
تمرق تخش الخيل
على كيفك كيف معلوف
ضهر المظنة يشيل
وأنا ظني ظنيتو للنيل
غريق في النيل
و الليل ولافي بالو بيت
ساكت يغنوا على القمر
واجعني في البحر السكات
سكتني في الوجع البحر
يا بت صباح الطير
وين البلد ركت
ما عاد هواك يفتح في الكتمة
شباك النزيف
وين تكيتك في الغيمة شطيف النجوم
ريف الجسد صدرك سبلوقة اللبن الخريف
داسينى فيك نضر
والأنبياء فاتوا
قاعدين في ضل النار
داسيني فيك نضر
في غفلة جو الكفار
وطارت حمامة الغار
لاقوني ناشف ومر
ماذنب جاد الطار
لو غنوا بيهو شتر
ما تخافي الله معاك
وكل الملائكة سمر


علي بابك



نهارات الصبر واقفات
بداية الدنيا هن واقفات
وكم ولهان وكم طائر
بعد نتف جناحو وراك
لملم حر ندامتوا وفات
قطع شامة هواك من قلبوا
إلا هواك نبت تاني
وعلى بابك وقف تاني
الغمائم شآكىغبن الليل
مسافر فيها وحداني ..
وبدون جنحين ..
يغنيك الهناء المافي
يغنيك رهافة حسو
يفنى على جليد امالو
يحلم بالشتاء الدافي
وقدر ما يمشى في سور الزمن خطوات
يلاقى خطى السنين واقفات على بابك
يلاقى هواك ..
نبت تاني وملا الساحــات