المشاركة الأصلية كتبت بواسطة اركمانيه ومن الشمس المارقه صباح غزلنا نسيج الحلم العاتي وقلنا نشيل الهم يوماتي انو وريدك منية ذاتي أنا خبأتك فى همسة بكره انو شروقك نابتة فكره لو نرجع نعيد الفات وحدة جسد وثبات ولو نرجع يا أوطان لو لو......؟؟؟؟

بتفتحي بى (لو) شيطان شعري ؟؟؟
وتدخلي زي الضو في عتمة سهري
ألقاهو صباحك بدّد ليل الوجعة
واتمغييييييت .. لامن طقطق ضهري
شقشق عصفور الشوق في غصن البال
وحسيتك عافية تكوكو في باب صدري

بمناسبة (لو) بتاعتك دي وعمل الشيطان أهديك الكلام التحت دا مرفق معه تسجيل صوتي لنفس الكلام

تصدّق ياخي شيطاني ..
دخل لى حتة مافيني ...
أفتش يومي ما لقيتو ..
ولا ظنيتو يلقاني ...
داخل من مروق الروح ..
ومارق ليهو من تاني ...
نقول نتلاقى في حتة ..
كعادتو الكعبة شرّاني ...
أرسّل ليهو أشواقي ..
معنونة بى معاناتي ...
وطفش ...
لا غادي خلّاني !!!
وحرن !!!
أسوي شنو ؟!!!
فتحتَ على الصبر بابين ...
وشباكاً قصاد الروح ...
مرقنا على السجية عصُر ...
مشواراً مشينا كُدر ...
نلقّط حِسّنا المقروش وماليانا المسافة فقُر !!!
أفتش ليهو لو يسمح ..
نتم باقي المسافة نذُر ...
وعصلج ياخي في الحتة البتروي الشوق !!!
حرن في لحظة بتحاول حروف الكلمة تتشعبط تنط لى فوق ...
تقع في ورقة خرمانة .. ومن شمّة حبر بتفوق ...
وكيف الراي ؟؟ !!
براك قصيت درب زولك ... وزولك قصّ ضهرو وراك ...
أمش مااا حِردت السكة .. ولا الدرب المشيتو براك ...
ولا الشوق الدخل بيتنا .. يحنّس نفسو يوم إبراك ...
العن لينا ميتينك ...
والعن لي كمان ..........
والعن زفرة الأشواق إذا خشّت ميادينك ...

أمش ... مااااااااااا بتنقُّص حروف شعري ...
ولا السنوات بتسرق ياخي ضي عمري ...
ولا العمر القضيتو معاك سرق عشم الصباح بدري ...
أتاري نقوووووول !!!! اخخخخخ !!!!
دا صوت إحساسي ما الشيطان ...
دي آهاتي البعيشا على الضفاف عطشان ...
دا ما الشيطان !!!
ولا الشيطان عملو بيوت وشباكين بتفتح ياخي في شطآن ...
ولا الشيطان مرق من حسي آهة شوق بتطلع من قفا القفطان ...
دا ما الشيطان !!!
حلفتً وياخي صدّقني !!!
عشان ما يبقى الكلام ممجوج ...
ولا الحرف الكتبناهو .. بنكتبو في الورق معوووووج ...
ولا شوقنا .. شوق ساكت ... مسّرِب من حلق محلوج ...
ولا الحب ... حب مراكبية ... نتم باقي المسافة نخوج ...
ولا كان الحلم بالبر .. حلم رويان ...
ولا كانت بذور الشر بتنبت في قلب عطشان ...
ولا الشيطان ... وقف بيناتنا يوم اديتا في لحظة شبق ضهري ...
ولا الشيطان ختف قلمي وكتب حرفين يعبّر عن وجع سهري ...
ولا الشيطان صبر لو لحظة ضاق البي ومُر صبري !!!
ولا الشيطان عزف وتر الكمانة حزين واتجرستا يوم سفري !!!
ولا الشيطان درع سيفو ونتف في الفرحة يوم وتري ...
تقول لي للحرف شيطان !!!؟؟؟
و اسلّفو بى بساطة كمان !!!
ياخي تخ !!!!!!

خش براااااااااااااحة في جواك بدون مركوب ...
إتحسس شنو الناقص إذا صبح النفس منكوب ...
بدون ما تحك جبين الحيرة لو عندك كلام مكتوب ...
بدون ما تحسس الجواك دخيل جواها ما محسوب ...
وتتعرف على روحك بدون ارقام نجاح ورسوب...
فتّش تلقى فيك إنسان ...
استغفر
تعيش إنسان بدون شيطان ...




شكراً أركمانية على المعلومة واخوك لامن يكون ما ناقش بسأل طوالي ولا بخجل
هو ذاتو نعرف شنو ونخلي شنو مع الثورة المعلوماتية دي