قبّلي جاي واديني أضانك
(****) بس .
ما تضحكي ... أنا بتكلم جد في موضوع ممتد ... جزرو التربيعي وأسك واحد ... وانا أصلا فاصله وفاصل مرة مداري ومرة بضاري وما كضبت علي روحي ... ولا خليتك تدمي جروحي ... لمن كان الشاش غالي ... ما عارفين التكلفه كم ... كم حُمتي معايا أماكن ... دروب ومساكن ... ساحات ومدائن ... ونرجع بي وقّف يا عم ... كنت بأشر لأي حديدة في شارع النيل ... ومرة وقف لينا البوكس الشائل شوالين وكراتين صابون اللوكس ... السواق كان واحد وسخان بره وجوه علي ما يبدو ... إتوقع إننا نركب قدام ... نطينا ورا ... طفرنا سوا ... قعدت في شوال سكر ... وأنا أتململ في طرف البوكس ومجهجهني هوا ... والزول السائق شماني شديد ... أنا شايفو بلف في مرايتو شمال وشرق ... ومحمر لي لو وقعت عينو علي عيني ... كان بتأسف علي إنو وقف رفع إتنين بحبو بعض ... طبعا كان بتأمل تركب جنبو وانا ستالين في الباب ... تكالة وداير أوصل بأي طريقة ... لكني طلعت شفت وقريت أفكارو من أول لمحة سريعة ... ودقة سريعة ركبنا ورا ... إتناقشنا عن النقل البري ... الشايلين السكر مع صابون ... وسوبر ريد مع المعجون ... ومرة الجاز مع الليمون ... عن تجار الجملة وقطاعي ... نظام اقطاعي ... وعن الزول البمسك ويقطع من طرف الفكرة وزي ما يحصل يحصل ...
إتكلمنا عن البوكس المليان والراس الفاضي ...
عن جلاد الشارع والقاضي ...
والناس الما خلونا قعدنا في شاطئ النيل نسترجع ماضي
بالجد بتأسف وما راضي ... نظامنا العام وقعادك لازم فرادي ... يا تفتح رادي أو تتخارج بي غادي ... ما تملانا فقُر .... ما فارقه معاهم ... أو تكسح لأي مكان تتعاطي وراهم ... أفيون الصبر .
ومتين نجي راجعين متماسكين في نص الشارع عينك يا تاجر ... يا الزول الفاجر ... نسرح متقاودين ... زي أي اتنين ماشين كداري علي الواطة وأسفلت مشقق ... مبسوط ومجرتق ... والضحكة لغاية إضني ... كانت سرحه طويلة وكنت بعاين للشعر الفالت من طرحه ... ولم تشاغل فيها هبوب الشارع العام ... تتلفت منشرحه ... ما شالت هم السكة ... وشكل المسكه ... ولم يصادف لستك حفرة ... عمك زاد عدّاد السرعة ... عايز إكشحنا بأي طريقة ... أديترو سخّن زي شوقي وانا راكب جمبها سارح في عينيها وخصلة بتلعب في خد ... وعمنا قام فرمل فجأة وكبس البوري ... دخل في لوري ... وكبانا كأننا شوالين ... إندفق السكر من البت ... وانا
يا بت يا عصفورة
انا واقع في مطمورة
أربطي جردل ...
أرمي حبالك تدلدل
وختي معاك في الجردل صورة ...
لو أبقي معاك بس في الصـورة ...
كان مشكلة البير إتحلت ...
وقرينا الفاتحة وجزء من سورة .
|