يا زهره نكرت زاتا وفاحت عطر
عوافي معاكـ سلامة
قبال دخلة المطره عليها
كانت شاخت وما ندمانه
كان عشمانه ترتق جرح العالم بي اوزانا
ولم اغيب محموم تهمس
راسكـ كان واجعني
وتخب حفيانه
كايس ملامح الزمن الدس الفرح الفات خلانا
وتقول فرحانه لو اطفال الدنيا امتصو رحيقا وفاتو
ولا خجلانه تدي الوطن القبله الاولى
وإن قالو وضاعه
وتفوت قنعانة
إلا بتسأل عن الوطن الكان منفانا
وبين ضرعاتو ومن غيماتو
مطراً فارق زاتو ولا بغشانا
وتقول زعلانه من الحال الخلا الجوع امانا
وبرضو توزع قوتا وهي العدمانه
فاطنة الزهره النكرت زاتا
ولمت كل اريجا وفاتت
رحلت مع الاسرار
بلون الطيبه وطعم النار
وقبل رحيلا دست تحت العفه بزورا
وراجيه زفاف المطر الجاي بدون تأشيره
يمحي احزانا
وكان حلمانه انو النيل حيلم امواجو
ويرحل تاااااااااال الضفه التالتة الجاي اوانا