عرض مشاركة واحدة
قديم 06-12-2007, 06:54 PM   #86


محمد ابوعاقلة غير متواجد حالياً

بيانات اضافيه [ + ]
 رقم العضوية : 150
 تاريخ التسجيل :  Sep 2006
 أخر زيارة : 10-09-2014 (04:57 PM)
 المشاركات : 138 [ + ]
لوني المفضل : Brown
افتراضي



ياخ شارعك من زحمتو فجّاني علي ... كجّاني أحاول أدخل بي شارع فرعي من عِرقين الطقو في آخر مرة دخلت علي ... دفر النفاج الختيتو اسبير لم تعصلج جواي الفكرة ... تسليك الراس بالزيت الراجع بُكرة ... منها تتفك طلاسم صدت ... البَكرة اللّفت باقي الأيام من كترها عضّت ... عضّت طرف الجلابية ونطّت جوه الروح تُلّب ... وقعت في جب دقيت الدلجة ... شحمّت الواطة عشان ما تعضي الخطوة المارق بيها علي روحي ... انا قرطت الخطوة عليك ... قربت الخطوة ... قررت أشيل للورطة المطوة ... أجنة وشاكوش ... للداخل تووش ... ستالين للدنيا الدقت فينا وفكت في الضلعة لحام ... لحام النفس الطالع ونازل منشار رئتين ... مشوار ليلتين والسكة ضلام ... أمرق قوام .. إنت بتفتح فيها وانا بقفل في شارع كلو زحام ... دفرت المتوكل قدامي وانا زاتي رميت قدام ... خلينا ورانا الناس تتلفّت ... السيّح مكنة وخفّت ... الفوّت طارة عمرو وواقف لسه مشلهت ... ساكت ضيّع عمرو يتش في الزاوية القاعد فيها ملخبت ... تتخيل !! لقيت الكلمة الحتّت مرة بلالي الصوت !! مليانة كلام ... نفس الكلمة الكسرت ركبه في حلق احلام ... بلعتَ سكوتي ... كم فرشة ولون رسمت جواي لوحة وعنوان ... لوحة إنسان ... نفس الإنسان الكاسر ركبة ... نفس الزول الشاف بي عينو النكبة ... بعدها صنفّرتَ جفون الخوف من شوف ... وشديتا حبال الصوت الطالع طوف ... لملمت بواقي السيخ الما معروف ... شيدت كباري ... فتحت مجاري ... يدخل بيها الدم سدّاري ... وما حاولت أجيك كدّاري ... راكب راس الغربة عِناد ... سلّكت وريد السم الهاري وزيتي الراجع دمو خفيف ... للناس العرفت كيف بتجاري ... كيف بتباري الكلمة لغاية توصل جووووه الجوه ... وتسكن فيك ... ما رجعتْ بالحسرة تضاري النقطة الركزت فيها العين وانطبعت صورة ... مفتاح العين للشوف ماسورة ... ماسورة تنقط في الشبكية ضرورة ... عفريتة بترفع ضغط الالفة الدخلت في حيص بيص ... في فرقة ومرحلة دايش فيها الراس ... صنقرت امام جوايا مرايا بتعكس نفس الاحساس ...
احساسك بي
خلاني أبل الريق بالدهشة
خلاني أخش جواك أتمشي
يا سكة وممشي
مراحل أغرف فيها الشوق بالكُمشه
أملاها لغااااااية تضايق
أو تتدشه ...
والماسورة الحلجت جوايا وفيك خليها تكُب ...
في باقي الورشة ...
ناوليني المفتاح البدخل بيهو أفتش عنك جواي ... ناسيهو معاي ... يا طاريكي ورافعك تبحثي عن حبك في راسي ...في راس الزول الفوّت شنبر وبستمو بستف راس المكنة ... فتشي ما تخلي مكان ... تحت انفاسك أو في اي سطر من كرّاسي ... فوق الحته الطارت وركت مع إحساسي ... انا دسيتو مخافة عليك ... من الناس القاعدة تعاين وراصه كراسي ... عينم حارة ... بخاف النظرة الفي عينيهم تبدانا مآسي .


 

رد مع اقتباس