|
ديوان شعر/النيل نخيل وبنيه...حسين محمد يوسف//
اخوتي بمنتديات الحصاحيصا اقدم لكم بعض القصائد والتي جمعتها في هذه المجموعة باسم النيل نخيل وبنيه متمنيا ان تنال ولو بعض الرضي والتوجيه ان شاء الله وارجو منكم ان تتحملوا غيابي وفترة تقطعي عن المنتدي نسبة لظروف العمل وكل التحية لكم والاحترام......
للبتسأل عني.. للبتسأل عني قولوا ليها راجيك ومستني بس شن أسوي في الزمن المحني يا موج البحر علي قيف عيونه وصلني ويا ظروف هدّي شويه عليّ حنّي ويا قطار الغربه وقف وفي محطات خدوده نزلني أصلي زولاً تايه في البلاد والشوق ليها كاتلني زادي الرسايل وكليماته الحنينه تطمني يا زمن أرجوك من شوفته لا تحرمني ولو سألوك عني ياني منها وهي مني وحروف الريد فيها أكتب وليها بغني ومن خصل جبينه ضفاير شعري وانغام لحني وأوصف وايه اوصف أقول بانه وفريعه متني دسّت بي رموشه عيوناً حيرني خصراً يميل شحتف قصايد روحي حروف جنّي فيها الجمال حد الطرب والنشوه كاس فني يا بنيه لا تسألي عني أصلي منك وانت مني |
يا بنيه لا تسألى اصلى منك وانت منى ,,,,,,,,,,,,,,, يا ه ياعم حسونه تسلم ولاعدمنا
هده الحلاوه ,,,,,,,,,,,,,,, ربنا يديك العافيه ,,,,,,,,,,,,,,,, بس الغربه بتحنن القليب لما تتوهط فينه تلك البنيه ,,,,,,,,,,,,,,,,,,,,,,,,,,,,,, وتسلم ................. |
لك التحية اخي الطالبابي علي مرورك الدافئ وحرفك الانيق وكما قلت تجعلنا الغربة اكثر حنية ورهافة.........
|
حروف للبت النيل
حروف للبت النيل للخير المطرو يشيل لي قمراً في سماه يضوي الليل للسمحه وكتين شباله يميل وخديده النادي ضل همس مقيل وحروفنا الركزت علي عينيك أبقيله دليل يا حرقة حشانا النارك تهرد فينا قبيل يا شتلة روحنا نسمه تشوفنا بسمة ثغر جميل أروينا الريد فينا الشوق واديه يسيل ما تبقي مطمورة أحلامنا تدفني فينا الزين وعديل أبقي في ليلنا هولبلب وانشري في شارعنا شليل زغردي لينا هدهدي طفل الحب سفرنا درب الريد طويل يالبت النيل شارع الحله الهم تقيل يا مرق البيت شعبة شوقنا مابيه تشيل أرضنا البور اليابسه وأيامنا الساقيه فينا تلف تلف وتدور وريقنا النشّف حلق الماعون لقّاينا سبيل ونحن الرحنا نغني الكان ونقول حليل يا حليل يالبت النيل فتشناك بكيناك سواقي جروف ونخيل والعشم نلقاك نعزف وتر اللقيا حنين وربابه ترابله عمال شدر الغابه نغني مواويل يلا تعالي وحالك حالي رغم شتاتنا نشد الحيل يالبت النيل شعبة شوقنا مابيه تشيل |
خاطره للبنيه...
يا رحيحنا علي بيوت الحله فريق فريق يا بنيه مشتوله نص الطريق القلب وراك في الليل اشواق حريق يا قمره سحاب الهم شرب من عينيك ضي البريق وعوينات أمونه تكوس في عمق الموج والبحر عميق ومشلعيب الريد معلق بين شراع مكسور وتيار مضيق يا حروفنا عدي هدي نكوس في الشوق والريد غريق |
غربة عيونك...
عديت بحر الشوق لي عيونك عبرته شديت حبل الود وتر علي قليبك عزفته وكل القصايد في شان ريدك بيها بحته غنيتك يا بت احساس وبرغم غناي عليك هنته طالت سكتي وعدت سفاينك بحر هواي وفي أساي مته وانا في القيف كنته راجيك بقي القيف همي فيه غرقته وبعد المسافات الفيها عشان خاطر عيونك هاجرته سبت النيل بلادي أفتش في الاحلام لا لقيته ولا رجعته والايام بتخون ما بترحم قلبي الشايلك وخلاص يا غاليه تعبته وهبتك ريدي قلته قلبك أمان فيه سكنته ومن غيم عيونك رويت شوق وسراب طيفك منو شربته وعلي ضل رموشك قعدته وفيها ضعته اشتهيت نسيم نداك في شفايفك عليه فتشته وآه يا بنيه لا لقيت مراسيك ولا سفاينك الليها انتظرته وقلته يا بنيه سكتك بمشيها حتي لو في دربك تهته أصلي لسه الوعد فيني ألاقيك ولو في عيونك عترته .............. .............................................!!! ما بفوتن تاني ماني فايت تاني وكيف اسيبك مالغربه ليها عرفته الا غربة عيونك ما بقدر عليها وان مته برموشه تلقيني اتكفنته.. |
خاطره للبنيه...
بمسي علي العيون الحلوه
ومنايا ست ريدي والسلوي مين غيرك يطفي نار الشوق البتحرق في القلب جوه يا روعة الزمن الجميل وضحكة الفرح النبيل انا ريدي ليك عدي المستحيل والشوق وحاتك كايس عليك تايه في الدروب بلا دليل |
النيل نخيل وبنيه....
لبست النيل توب والنخيل واقف شلوخ علي خدودك وتر رباب والريد عزف لحن الطرب مرق علي الضفه يروي جروف الجوف يبل ريق الخوف وبعد يبس القلب اتوشح توب الجدب من تاني البت فريع الحنه شال محنه وفرهد وشرّق فينا هواك وغرّب يا لون الليل الشعر يا فاقعه متل الضي فاتح باب الحب أدخلي الروح الباب مفتوح ولا متاكا ولا بعتّر ليك هم الدرب أدخلي بيوتنا الشارع مجروح أسكني رواكيبنا عرش النال بيك يفوح واتكي علي ضهر البيت اشتكي لي طين الحيط واتحكري حرف البوح يا مشتهيه نشوفك مدي كفوفك قدرك نحن ظروفك وعدك بكره نلاقي حروفك ومطرك راجي الريح تسوقو يسقي جروفك يا نيل لما يفيض لا ضفه توقف سيل الا عيونك ولا دمعه تشيل ولا نجمه تضوي حزن ليل الا حدودك أصلو طريق حدودك يا طالعه من قلب يا زارعه في درب ورودك يا شارعه ليه شراعك واديه بلاد شوارعك اصلك نيل يا بت ونخيل شوقك شدّسرج الخيل شحتف طول فينا الليل والباب مفتوح ولا متاكا لا بعتر ليك هم الدرب أدخلي الباب مفتوح يالبت النيل شوق ونخيل... |
حرف الغني..
يالفتي حد الارتجال الحرف وقف غناه كيف يصف فيك المحال ووانت العلمتي الحرف كيف يغني الجمال ومعني الريد لما يجرح القلب الترحال يا حلوه نحن شعرنا قلنا فيك يصل حد الكمال يا هيبة النغم البيقدل في جلال وروضة الحسن آيات الدلال أنا فيك غرقني الحرف يالغيمك رموش نسمة ظلال يالطيفك لو مرّ افرح الوتر يرقص الخيال أنا باكر بجيك باكر بحكي ليك عن الهوي وقلبي الداب عذاب في عينيك وليك مال باكر بجيك قاصد الفرح والحرف مسكون بالسؤال كيف أواصل مشيك وأفوت حد الارتجال وكيف حرف الغني من تاني في عيونك يغني وعلي رموشه يختال يالفتي حد الارتجال مالحرف وقف غناه كيف يصف فيك المحال؟؟ |
عيونه...
لما عيوني تلاقي عيونه يعربد نيل الشوق يقيف علي مرافيء جفونه يقدل نخيله يعرض يغني لحونه وتنسي عيوني دموعه لحظات شجونه وتحلم بالحريه جوه سجونه اصلو الروح بيها مفتونه يا حروفي للبنيه لما ترسم لوحة العاشقين تلون ليل سكونه تبقي تشهد علي حبي ومشاعري الحنونه يا حنونه ورقة الانسام دونه اصلها نمة الغني نقرشة عود أوتارُ محزونه صفقة صغار عيون في البراءة معطونه نشوة فرح زهور ترقص علي غصونه ويا عيونه الضحكه حالفه ما تطلع تخاف تفارق سنونه تبقي حبيسة شفايفه مسجونه ويا عيونه مالهوي ليها وانا كيف اقول مشتاق وبهوي عيونه |
الجميل حسين محمد يوسف
جميل ما سطرته هنا الصور جميل في النص خالص لكن ما تراهن علي القافية حتي لا تضر بالنص مزيد من الكتابة ,,,,,,,,,و مزيد من الصبر والنقد ,,,, وانت باذن الله شاعر لا يشق له غبار ارجو تقبل مداخلاتي بصدر رحب ساقتفيك يا جميل |
التحية لك اخي المحارب علي الاشادة والملاحظات التي ابديتها اكيد ح تكون محل اهتمام واشكرك علي مشاركتك حروفي ...............
|
لكم التحيه احبابي بمنتدي الحصاحيصا طالت غيبتي لكن مصيرو الحي يلاقي والغريب عن وطن مهما طال غيابو لابد يرجع تاني لي اهلو وصحابو...
الغريب لقيت واحد لاطش كل ما كتبته هنا حتي عنوان الديوان بمنتدي آخر طبعا امر عجيب سرقه في وضح النهار ...كلماتي ليست بتلك الاهميه فما خطته اناملي هنا يحتاج الي الكثير والكثير من ناحية الوزن وبحور الشعر فمن سرق ديواني هذا لا اظنه يعلم بالاخطاء وما حوته كلماتي علي الاقل يمشي يسرق ليه حاجه قيمه مش يسرق مبتدئ لسه بقول يا هادي... |
| الساعة الآن 09:09 PM. |
Powered by vBulletin Version 3.8.7
Copyright ©2000 - 2024, Jelsoft Enterprises Ltd
HêĽм √ 3.1 BY: ! ωαнαм ! © 2010