|
بدل تحتفلوا بيهم ياريت لو تجلدوهم وترجعوهم في نفس الطيارة !!!
ليهو 27 سنه مهاجر خارج السودان مافكر يرجع زيارة سريعة ولو بعد العشرة سنه الاولي !!
مافكر يتصل تلفون ولو بعد الـ15 سنه الاولي بي امو وابوهو يقول ليهم انو كويس !! مات ابوهو ما اتصل ولا فكر يجي !! ماتت امو ما اتصل ولا فكر يجي !! امو كانت بتلاهي بيهو لحد ما ماتت !! ابوهو كان بيبكي عليهو لحد ما عمي !! عملو معاهو لقاء في المطار يومو الرجع من غربتو لاكان مسجون ولا كان معتقل ولا كان في غيبوبة ولا كان مريض ولا كان مجنون زول واعي وفي كامل قواه العقلية !! اتخيلوا زي ده يجو في برنامج الو مرحبا في النيل الازرق او في البرنامج التاني بتاع القناة السودانية بتاع المغتربين ويحتفوا بي عودتوا والكاميرا تصورو من لحظة نزولو من سلم الطيارة لحد ما يدخل الصالة دخول الفاتحين والزغاريد ماتديك الدرب والاحضان والبكا والنواح ....ياخ .. الا يوجد في السودان رجل راشد؟؟؟ مافي واحد قلبو محدثو يشيل ليهو سوط عنج كارب كدة ويمسك ناس برنامج الو مرحبا والبرنامج التاني بتاع القناة السودانية ويلم فيهم جلد من طرف لحدي ما يشوفو ليهم شغلة بدل الاحتفاء بامثال هؤلاء وبعد ما ينتهي من جلد ناس البرنامج يلم لينا في الاهل المنتظرين الزول ده ويدي اي واحد فيهم 50 جلدة كااااربة وبعدهم يلم في امثال الراجع من غربة السنوات البحتفو لينا بيهم ديل ويدي لينا اي واحد فيهم مائة جلدة وينزع منهم جوازاتهم ويرجعهم في الطيارة الجو بيها !! |
في حاجة واحدة يا همباتي ما اتاكدت لينا منها ظروفه كانت كيف
طبعآ اكيد ما ظروفه المادية يعني كان مسجون ولا حر أتاكد لينا من دي وكان لقيته ما كان عنده مشكلة جهز لي معـــــاك صوت وادهنو لينــــا قطران وخلينا النقع فيه جلد لأمن ارجع من محل جاء اها قصرنا معاك.شكلك يازول زهجان وفارقه معاك والشهر ماظابط |
تحياتى يا همبتة وشنو يا حبيب انتو مصر على الجلد دة مالك ؟؟؟؟ هههههههههه
بالنسبة للاخ العائد من الغربة اخ الهمباتى فامثاله كثر ولكن كما ذكر الاخ محمد المنصورى ان الظروف ربما لم تساعدهم للعودة لارض الوطن غانمين واعرف الكثيرين لا يملكون حتى ثمن تذكرة الطائرة التى تقلهم لأرض الوطن, عموماً الموضوع قد يكون متعلق بالظروف ولكن ان لم يكن ذلك السبب فانا والمنصورى اخوى معاك بالسيطان ,,,, |
الاخ الهمباتي تمام همباتي شنو يااخي داير تقع في الناس جلد هو انت شفت شيء والله كما قال الاخوان هنالك الاف مؤلفة هائمة في بلاد الغربة ويحكي لي احد الاشخاص وهو يعمل بحارا ورست سفينتهم في احد الجزر الاوربية ونزلوا وتجولوا داخل هذه الجزيرة ولم يكن يتوقع ان يجد اي عربي او افريقي بهذه الجزيرة النائية واثناء تجوالهم لمح شخص ذي بشرة سمراء يجلس امام احد المحال التجارية ويرتدي قميص ورداء وساقه فضوله الي الذهاب اليه والسؤال من اي الاقطار انت ومجرد ماسمع الرجل صوت البحار عرفه انه من السودان
وقام بحضنه وبكي بكاء جعل كل اصحاب المحال التجارية الاوربيين ومن جنسيات اخري يتجمعون ويستفسرون عن الحاصل وقال السوداني انه لم يري السودان منذ اكثر من اربعيين عاما هذه حالة واحدة في اوربا وفي جزيرة ربما لاتخطر علي بال احد منا ان يذهب اليها او ان يسمع عن سيرتها شيئا اخي الهمباتي نعود الي الدول القريبة من السودان ليبيا مصر السعودية ووالله هنالك اشخاص كانوا معي في ليبيا احدهم من مدني لايعرف اي شيء عن السودان ولايريد ذكر اسم السودان واهله وهو عمره تعدي ال55 عاما ولم يتزوج ولايفكر في الزواج اما عن السعودية فالامر لايختلف وكما قال بعض الاخوان ان هنالك اشخاص ربما تمنعهم الظروف المادية من السفر ولهم عشرات السنين عوائل وعزاب ووالله هنالك حالات تجعلك تبكي وتتحسر علي ماوصلنا اليه في بلاد الغربة والمآسي التي يعيشها هولاء كثيرة ومحزنة وهنالك مشكلة كبيرة جدا عندما يتوفي عائل هذه الاسرة تصر اغلب الاسر علي البقاء في الغربة وعدم الرجوع الي السودان والحالات كثيرة ومؤلمة ومنهم من يقبع ابنائهم بالسجون لجرائم مختلفة ونتمني ياهمباتي ان يعرف الناس انك شكلت لجنة للجلد ربما يخافون ويعودون الي السودان |
سلامات همباتي
تعرف ذي ده تسيبوا لي رب العباد يعاقبه لانه سبحانه و تعالي اوصي بصلة الرحم و مهما كانت ظروفه كان ممكن يتصل تلفون مرة في السنه علي الاقل بوالدينه الا اذا كان مجنون طول السنين دي او في غيبوبه ذي ماتفضلت اما اذا انتفت الاسباب دي كلها انتو اجلدوا وانا بزغرد ليكم ..... |
معليش أعزائي القراء وأرجو أن تتحملوا حدتي في هذا الموضوع اذا كان هناك شخص مغترب وشديد ونجيض وسمين 00 لايستطيع أن يجدد اقامته ولايستطيع أن يجدد جواز سفره 00 بالله ما الفائدة من قعاده في الغربة ؟؟ قبل فترة أعرف أحدهم له دكان ملابس يخصه والغريب أنه لم يسافر لأكثر من ستة سنوات ولديه جلابية واحدة يمشي بها للعمل وصلاة الجمعة وصلاة العيد وصلاة الاستسقاء المهم ابوه مات وكانوا يحاولون كثيراً حضور هذا الأخ ولكن لاحياة لمن تنادي برود يغلب برودة الثلج 10 صفر بالله قابلكم ناس لمن يسمعوا زول مات يقولوا الحمد لله فالعزابة الذين يسكنون معه حمدوا الله على هذه الوفاة من أجل أن يسافر صاحبنا ليرى زوجته وكالعادة جابوا كراس الكشف والحمد لله الجماعة طبعاً في حالة حزن فلم يتردد أي أحد منهم ودفعوا له ستة آلاف ريال اها قلنا بكرة خلاص الراجل حايركب اول طائرة للسودان اتضح أن جوازه غير مجدد الاقامة غير مجددة قام باجراء نقل كفالة قبل سنة ولم يسدد رسوم نقل الكفالة لصاحب المكتب والدكان ماشاء الله اتضح أن عليه ديون أكثر من 12 الف ريال وفي النهاية ولاسافر ولايحزنون والأدهى والأمر أنهم لم يرجعوا لينا قروش الكشف اذا في مغترب ومعه زوجته وتوقف عن العمل فأول شيء يحاول أن يقوم بارجاع هذه المسكينة لبيت ابوها يعني ماممكن تتعذب الأسرة كلها وتتابع أخونا وفي النهاية تضطر الزوجة لأن تعمل صراحة استغرب لبعض المغتربين مامعقول عشرين سنة بليبيا والمشكلة هنا الأهل يبكوا وصاحبنا ماشغال بيهم الشغلة اضم { سوطي } اليكم ودون اي تردد قلت لي 55 سنة ورداء وقميص وحايم في اوربا !!!! زي دا لو رجع سوط عنج مابينفع معاه لازم عكاز مضبب |
الاعزاء منصوري وعارف ومحمد وحبوبه وابو حراز مش يخيل لي لا انا متأكد انو بخلاف الغيبوبة او غوانتانامو تاني مافي سبب بيمنع انسان من انو يواصل ويبر امو وابوهو ولو بالتلفون مافي مانع في الدنيا دي خلاف المانعين الزكرتهم ديل بيخلو انسان يترك امو قلبها ينهرد بي سببو ولا ابوهو يتهز وينوح بي سببو مافي عذر يا شباب نهائي مافي وبعد ده يجوك ناس قناة النيل الازرق وناس برنامج مراسي الشوق ينقلو لينا برنامج عالمي في نقل مشوه من دون انهم يقيفوا ويفندو المعايير حقت البرنامج الاصلي ويقيسوها مع برنامجهم ده لانو همهم النهائي لحظات البكاء والتلاقي اللي بتدر عطف المشاهدين وتبتز مشاعرنا في لحظة جوفاء خالية من اي مضمون بل بالعكس انا بعتبرو انو برنامج هدام جدا وبيؤكد اننا شعب طيب اكتر من اللازم وما بنقول للمخطئ انت مخطئ حتي وان كان خطاو ده بحجم خطأ قاتلي امهاتهم هؤلاء والنمازج التي زكرها الاخوين ابو حراز ومحمد جبو كثيره واياها نعني ولكن لا تستغربو ان وجدتم ذات النمازج غدا يحتفوا بها في احدي قنواتنا .
|
والله ياالهمباتي انا معاك مافي اي سبب يمنع
ان يتصل بأهله والناس سافرت في البداية لتحسين الوضع فإذا كان الوضع بالنسبة له كما في السودان فاالافضل له الرجوع لبلده بدل البشتنه والاشياء الغريبه البنسمع بيها ده ياخي انت حق التلفون ماعندك غربة شنو ده الانت طلعت ليها. انا شخصياً بجهز ليكم اكثر من 50 سوط |
مشكور والله دا بعد الجلد لوفى خيار
تانى اجلد وديل كتار والله المستعان |
حالة أخرى استغرب لها كثيراً أحدهم تزوج في عام 1998م ترك الزوجة حامل واتى هنا باقامة 00 عمل حراً في سوبر ماركت راتبه لايقل عن الفين ريال ومنذ دخوله المملكة وهو يعمل في بداية 1999 ولدت زوجته ابناً ومشينا الى سمايته التي عمل نسخة منها بالغربة والراجل فرحان وينطط من الفرح قلنا خلاص بعد الفرحة دي حايسافر يشوف الوليد الجديد لكن ناس التنظير ماشاء الله قالوا الراجل اتزوج وأكمل إجراءات السفر والمدام كانت حامل محتاجة لمصاريف وكذلك مصاريف السماية واخونا نام على هذه المسرحية السيئة الإخراج ومنذ 1998 لم يسافر إلا في عام 2011 عارفين سافر ليه ؟؟؟؟؟؟؟؟؟؟؟؟؟؟؟؟؟؟؟ جاهو خبر وفاة زوجته !!!!!!!!!!!!!!!!!!!!!!!!!!!!!!!!!!!!!!!!!!!!! قال شنو ؟؟ ماشي يعزي قال !!! |
كان هناك قرار صدر من السلطات السعودية يتعلق بعدم تجديد الاقامة لمن بلغ 65 عاماً لا أدري هل هذا القرار ساري المفعول أم تم تجميده ولكن على كل حال في العام الماضي تقدم احدهم للتجديد كان عمره 66 عاماً هذا في الجواز وإن تفرست جيداً في ملامحه لأدركت أنه فوق الثمانين له 32 سنة لم يسافر السودان أتى للمملكة بعمر 34 سنة غير متزوج طيلة هذه الفترة مات ابوه وأمه وبعضا من أخواته وإخوانه وكالعادة القروش مشت وين غير معروف فهو يعمل في رعي الغنم طيلة هذه المدة المهم كفيله بعد ان قدم الجواز والاقامة لتجديد الاقامة أخطروه بأن المذكور تجاوز السن القانونية ولابد من عمل خروج نهائي وبالفعل تم عمل ذلك وأخبره الكفيل بما حدث وأتى الكفيل الينا وأخبرنا بقرار الجوازات وأنه علينا كسودانيين أن نساعد الرجل من أجل أن يسافر وقال لنا أنه لايريد أن يذهب به { للترحيل } حيث يتم ترحيل الناس عن طريق السلطات وبعد ان نقوم بالواجب تجاهه سيأتي ويقوم هو بتسفيره شخصيا وكلنا حمدنا الله على هذا القرار والذي سيجمع المذكور باهله ومن ثم يقضي بقية عمره بالسودان وسط أهله وعشيرته وقبيلته عارفين الحصل شنو ؟؟؟ شــــــرد وحتى اللحظة مازال جوازه متواجد هنا يتصل بين الفينة والأخرى ولكن مكانه غير معروف !!!! |
تحياتى للاستاذ الهمباتى وللجميع طالعت هذا البوست بالامس ولم اتداخل ورجعت البيت وحكيت عن ما جاء فيه ... قام واحد ذكر لى حكاية واحد يسكن قريب مننا انه اتزوج وخلى زوجته حامل ومشىليبيا طبعاً لا تلفون لا تلكس الان بنته دكتورة ... (الاسناد من الداخل معكم حتى أخر سوط)... |
الاعزاء ابوعمر وسامي وتمساح ده كلام صاح والصاح الاكبر انو قنواتنا تتعامل باخلاق وضمير ومهنية مع مثل هذه الاوضاع يفترض تعكس اوضاع المنتظرين الام والابو والزوجة والاخوة والاخوات والابناء يفترض انها تركز عليهم وتوضح مدي الضرر اللي لحق بيهم جراء لامبالاة امثال هؤلاء توري كيف الام بتعاني صباح مسا وكيف الابناء بيقيسوا نفسهم باصحابهم في المدرسة وفي البيت وكيف انهم نشأو في ظل هذا الوضع وهم كالايتام بل اظن الايتام افضل منهم وبعد ده تترك المحاسبة للمشاهدين مش تقودنا القنوات بي عمانا لي وضع فارغ ومرسوم باخراج وحبكة موقف لا فائدة ترجي من بعدها .
|
اقتباس:
|
غايتو ياجماعة جلدتو الناس دي جلد لكن الله المستعان علي ماتصفون
دقيقة ياجماعة ماتقعوا لوم في الناس ساي والله في ظروف لايمكن تتخيلوها اي الزول سمين وواعي وماناقصاهو شي لكن في حاجات أكبر من السفر وماتقدر تسوي حاجة وهذه عن تجربة وعن رفيق درب بالغربة سكنت معه سنتان كاملتان ونعم الرجل ونعم الأهل أهله صديق تجده في الملمات ولكنه رقم كل ذلك لايستطيع ان يسافر وهذه سنته السابعة يتمني السفر اليوم قبل بكره وكل يومين يتصل علي أهله ويواصلهم بالتلفون وبالصور سجن ولم يخبر اهله بسجنه وكان يدفع مائة ريال من داخل السجن مقابل خمس دقايق للسودان لانه عود اهله علي الاتصال دائما قلت اتصالاته من واقع الحال ولكنه لم يقطعها لم ينقطع عنه الجميع ولايبخلون عليه بشي لانه كان سمحا قبل ان يسجن وزرت أهله اكثر من مرة ولكن لايستطيع ان يسافر وإليكم القصة بالكامل . الأخ (ع) صديق لا أذكيه أمامكم ولكنه نعم الرجل حضر الي السعودية واشتغل بالتحديد في حفر الباطن. كبير البيت له أخوان واخوات يدرسون عمل مع كفيله لمدة سنتين وحصل بينه وبين كفيله خلاف فإطر الي ان ينقل كفالته وتم ذلك ونقل كفالته علي كبري شركات الزيوت وبالتحديد شركة بترومين وتم توزيعه في المنطقة الشمالية مندوب مبيعات وانتم تعرفون طبيعة العمل يقوم بتوزيع الزيوت والشحوم بكل مسمياتها لكن كان شرط الشركة ان لايطالبهم بإجازة قبل سنتين ووافق علي الشرط تعرفت عليه وسكنا مع بعض أخلاق وادب وكل الوقت لعمله .المدير المسؤل عنه(ن) كان شكله نصابا ومن اول يوم رايته فيه وصيت صاحبه ان يعمل حسابه من هذا الشخص فقد يورطه لطيبته الزائدة مرة الايام المهم بعد مايقارب السنتين قام (ن) بنهب 300000 ثلاثمائة الف ريال من الشركة وفر هاربا وتم اتهام المندوبين الثلاثة بعملية دراماتيكية بما فيهم صديقي واستمرت جلسات القضاء مايقارب السنة وبرأهم القاضي بعدم وجود دليل ضدهم وبعد ذلك بدأ مسلسل الشركة عدم التجديد او التخريج او نقل الكفالة يعني تقعد كدا بس والرجال له مايقارب السنة ايضا من محكمة الي محكمة ومن مكتب عمل الي مكتب عمل ومن وزارة الي وزارة لم يترك شيء دفع في كل الاتجاهات لاستخراج جواز بديل والسفر ولم ينجح الامر سلم نفسه للجوازات بان اقامته منتهية ويريد السفر حتي الجوازات اخرجوه في ساعة وقالوا ليهو يازول مابنسجنك ولا حاجة امشي مسامحنك في الله بس اختانة كدا ولا كدا وحتي تاريخ كتابة هذا المقال اصبح عدد السنوات سبعة سنين وماذال يبحث عن مخرج والمسلسل ماذال مستمرا اليست هذه ظروف وقد تصل الي 10 او20 سنة من يدري وهو في صحة وعافية يجيك الهمباتي يقول ليك اديهو صوت عنج بالله مثل هذه الحالة الا تبكي من اجله الا تحزن من ما أصابه والله انه لامر يقشعر منه البدن ياهمباتي انت موجود في جدة وتعرف مثل هذه الحالات جيدا وهناك اناس اصعب من هذا بكثير نسأل الله ان يفرج كرب عباده ويردهم الي اهلهم سالمين غانمين ياجماعة ادوني زيت سمسم امسح علي ظهور من اتتهم صياتكم وانتم لاتعلمون ما اصابهم انما قركم المنظر ولو جدت مثله لإستقبلته من ضمن المستقبلين مبشرا ومهللا فرحا لقدومه لبلده بعد طول غياب ولما سألته لما طال غيابه فليس كل ما اصاب انسان مصاب يحكي .رسالة الي من غاب 27 سنة ومات أبوه وأمه حمد الله علي سلامتك وبركة الجيت وجبر الله كسركم ولله ما أعطي وله ماأخذ والحي ابقي من الميت وهللت اهلا ونزلت سهلا بين اهلك واحبابك . ورد الله غربة الجميع ودمتم تخريمة باللون الأحمر عديل كدا الغريب في الامر كل المتداخلين هنا لصيقين بالغربة طيب ليه كدا صياتكم كانت قاسية انا طالع من محل الجلد دا وياريت اجي القي الجلد وقف |
العزيز البرنس اولاً صاحبك ده بكل تأكيد ليس من النمازج التي عنيتها وعناها الاخوه هنا فالرجل بالعكس اثبت صحة ما ذهبنا اليه في امكانية التواصل في احلك الظروف واتصاله باهله من داخل السجن بواقع 100 ريال في الاتصال الواحد خير دليل علي ذلك فبالتالي صاحبك ده من النمازج الأحق بانو برنامج الو مرحبا وبرنامج مراسي الشوق يستضيفهم ويشرح مشاكلهم ويتابعة البرنامج مع السفارات والقنصليات ويقوم البرنامج بدعم اسر امثالو ويتابع المشكلة الي ان تنتهي وعندما تنتهي يقوم البرنامج وقتها بنقل مظاهر فرح هذا الشخص وفرحة اهلة بانتهاء مشكلته وعندها يكون البرنامج فعلاً برنامج محترم جداً ولكن ان يستضيف لي البرنامج احد السودانيين في الرياض بالسعودية هو واسرتة التي تحولت الي مسخ لا هي اسرة سعودية ولا سودانية يستضيفهم البرنامج وحولهم مظاهر الابهه والثراء ومن ثم يسألوا الابناء : بتتزكرو شنو عن السودان فيجيب الابناء : والله ما ندري عن السودان شئ وابوهم جالس كالابله فهذا استفزاز لنا ولسودانيتنا ان تسعي اجهزتنا الاعلامية وراء من ينكرو حتي اصلهم علي ابناءهم .؟. او ان يقوم البرنامج بمتابعة احدي النمازج التي زكرناها في الاعلي عن انسان له 30 سنه لم يتصل باهله او زوي رحمة وكما زكرت انت في مداخلتك اسوأ الظروف لم تمنع صديقك من ان يبر اهله ولو بالجوال فيا برنس شيل سوطك وتعال معانا احسن ليك ساي ..
|
نعم أخي الهمباتي ولكنك ابدرت حديثك عن شخص غاب 27 سنة ولكن لانعلم ظروفه وحتي من تحدثت انا عنه حتي اقرب المقربين معه لم يعلم روايته لولا اني عايشتها لماعرف عنها احد ولن يحكيها لاحد لمعرفتي به شخصيا ومثل هذا اذا رجع بعد 20 سنة سيتهم مثل سابقيه بانه ليس له قلب او كذا وكذا ولكم رايت امه تبكي بالتلفون واخوته بان يحضر فيقول لهم انشاء الله شهر ستة ويجي شهر سته يقول ليهم بجي شهر 12 هو يعلم محنتهم ولكن لايريدهم ان يعيشوا في محنة وخوف في آن واحد فلذلك يعتصر قلبه . حتي إن تم استضافته اليوم في برنامج تأكد انه لن يحكي مشاكله للإعلام فله أهل يرون ذلك فلماذا يدخلهم في رعب الا يكفي مايعيش هو فيه وأكيد كل الناس سيتهمونه بأنه مجرد من الانسانية ولكن هو الانسانية تمشي علي رجلين ولكن واقع الحال يختلف عن منظر الحال العام . ما اردت إيصاله ان كل من في الغربة يتمني الرجوع ولا احد يكره تراب بلده مهما كان ولكن يقيني ان هناك مشاكل وصعاب تواجههم أكبر من ضحكاتهم خلف كامرات التلفزيون ياهمباتي الحياة بها صعاب لايمكن ان نراها خلف بسمات الاوجه او الهيئة او المنظر او الكلام ليس كل شيء يقال وليس كل شيء يحكي ومابين الضلوع يصعب كشفه هناك قلوب تنزف والوجوه تتبسم ياهمباتي تأكد انني لن احمل سوطا لهؤلاء بل اتمني ان اكون مداويا فمثلك ياهمباتي من عايش الغربة لايمكن ان يقول هذا الا تتفق معي ولنحمل لهم زهورا ولنقل لهم انتم إخوتنا فرج الله كربكم وردكم الي بلدكم آمنين مطمئنين مودتي .
|
العزيز البرنس عشان اعيشك في الصورة اوضح ليك الاتي بمشهد من تاليف واخراج الهمباتي :
المشهد الاول : المذيعة شايلة المايك وعاملة لقاء مع احدي النساء المذيعة : كيفك يا حاجة بتول حاجة بتول : الحمدلله يا بتي المذيعة : ولدك ليك منو كم سنه حاجة بتول : لي منو يا بتي 15 سنه المذيعة : ما اتصل عليكم حاجة بتول : والله يا بتي اخر جواب جانا منو قبل 14 سنه المذيعة : وماعارفين عنو شئ حاجة بتول : والله يا بتي ما خلينا زول لا سفارات ولا معارفنا ولا زول عارف عنو شئ المذيعة : طيب يا حاجة شكرا ليك ومع السلامة الحلقة التانية : نفس المذيعة : اعزائي المشاهدين تابعتو في الحلقة الفاتت حاجة بتول وهي بتطلق نداء عن ابنها يؤسفنا نبلغكم انو حاجة بتول ماتت امس لكن لقينا ولده الليله وهو معانا اسع في التلفون المذيعة : الو الزول الرايح : مرحب مرحب منو معاي المذيعة : معاك برنامج الو مرحبا من السودان الزول الرايح : كيفكم بالله واخباركم المذيعة : نحن كويسين لكن امك ماتت امبارح الزول الرايح : بالله يا الله الله يرحمها (وهو بيتكلم مع المذيعة بينهر في ولدو يا ولد روق ساي ) اها قلتي لي شنو كيفكم بالله والزولة دي ماتت بالله المذيعة : آي ماتت لكن انت ما بالغت يا اسمك انت كنت مسجون الزول الرايح : لا والله المذيعة : كنت في غيبوبة الزول الرايح : لا والله المذيعة : كنت ضهبان ولا عاملين ليك عمل الزول الرايح : لا والله المذيعة : حيرتني يا اخوي طيب مالك انقطعتة قدر ده من اهلك الزول الرايح : والله يا بت عمي الظروف جبارة وكدة المذيعة : اسع التلفون الدقينا ليك فيهو ده حق منو الزول الرايح : حقي المذيعة: والولية ماعندها تلفون الزول الرايح : عندها والاولاد اي واحد عندو جوالو ليه السؤال المذيعة : لا ساي بس عشان ننسق معاك كيف نجمع الفضلو من اهلك ونقابلك بيهم في المطار باااااااي الزول الرايح : باااااي |
اقتباس:
الاخ البرنس خللى الراجل صاحبك يتصل على الهاتف 00966566666154 وسنسهل عودته للخرطوم خلال 72 ساعة مع كل المساعدة اللازمة. وبالمناسبة يا اخوان هناك جهد طوعي للمساهمة في العودة الطوعية للاخوة السودانيين بالسعودية فاذا كان هنالك من يعرف احد يريد العودة فإننا بمشيئة الله وفضله وعونه قد نتمكن من تسهيل بعض اموره. نأمل تعميم هاتفي اعلاه لمن يواجه مشكلة في العودة، والشرط الأساسي في الموضوع أن يكون الشخص راغبا في العودة فعلا. ولكم الشكروتحية لك يا ابوحميد على طروحاتك المتوهجة دوما. |
البرنس ذي ماقال ليك احمد انت بتحكي ليك في ظروف استثنائة وزولك ده اصلآ ما أنقطع من اهله
عشان كده معفي من جلدنا لكن المستغرب لايه كيف ما قـــــــادر اسافر وانا عندي قريبي جاء عمره وكاسر في جده 3 سنوات بدون اقامة وفي النهاية زبط كل امورة وسافر والان عامل لايه شغـــل في السودان وفي امانة الله . علي اي حال جاك الفرج في تلفون الدكتور ونحن كان اتعصرنا برضو بنضربه - سلام . |
ياخي السودانيين طيبين لدرجة العوارة أذكر أول مرة أتينا فيها من السعودية بعد رحلة اغتراب استمرت عامين بالتمام والكمال والله استقبلونا استقبال الأبطال والفاتحين تهليل تكبير { وكانت في تلك الأيام جديدة لنج وفي اوج عظمتها } وكل أحد رجلاً كان أم إمراة كان يضمنا بعمق ومن ثم يبكي بحرارة والغريب كنا ثلاثة اصدقاء واقارب جميعهم كانوا يبكون معنا ثلاثتنا تحولت القرية كلها الى صياح وعويل وبيت بكاء بكاء مختلط بالفرح وفرح مختلط بالبكاء ياخي والله نحن اليوم داك اصبحت لدينا ازمة دموع بكينا ابتداءا مع شيخ الحلة مروراً بسيد اللبن وحتى حاج ابكر الفلاتي الذي بكى بحرارة شديدة جداً بعد ان التقانا وكان الجميع يتفرس في وجوهنا وينظرون الينا نظرة أخرى كنا كالملائكة وجوهنا صبوحة جداً اضافة الى بياض الغربة المؤقت وكذلك السمنة المؤقته الكاذبة وهي تذكرني تماماً بالخروف الذي يسقيه صاحبه موية الملح حينما يريد بيعه ثلاثة ايام ورجع كل شيء لطبيعته ظهرت التجاعيد والوجوه على حقيقتها والكرش محل مشت ماعرفناها المهم لمن حضرنا من السعودية في المرة الثانية لم يبك علينا اي أحد !!!! ولم يواسينا اي أحد عارفين ليييييييييييييييييييييييييييييييييه ؟؟ لأنهم إكتشفوا المرة الفاتت أننا رجعنا من الغربة بدون قروووووووووووووش !!!! آآآآآآآآآآآآآآي والله كانت نفخة بلا معنى وزغاريد لم تكن في محلها على الإطلاق !!!! |
سلامات ابن عمتي احمد عثمان الهمباتي وكل المتداخلين
وطبعا لقد استحضرتني قصة وانا كنت طالب بجمهورية مصر العربيةفي سنه1986م وبينما يوما كنت استغل المترو بداخل الاسكندية فاذا باحد ابناء مدينتي الحصاحيصا في المترو وهو لم يكن طالبا بمصر ولكنه كان ياتي للقاهرة بغرض التجارة وبعد السلام والترحيب باخونا سالته عن سبب حضوره للاسكندية فقال لي انه عنده ابن خاله جاء للاسكندية قبل خمسة سنوات لمواصلة دراسته ولكنه لم يدرس ولم يرجع السودان جاء للبحث عنه وكان يحمل في يده عنوان سكن هذا الشخص وعطاني اياه وبحكم معرفتي بالاسكندية اخذت منه العنوان وذهبت معه للبحث عن ابن خالته وعندما وصلت للعمارة التي يقيم فيها صاحبنا حسب الوصف والله كانت عمارة ايلة للسقوط قديمة متهالكة فقلت لصاحبنا حسب الوصف ان قريبك يقيم هنا ولكن لا اعتقد ان يكون بني ادم يقيم هنا والعمارة لاتصلح لسكن القططة ناهيك عن سكن انسان وكان الوقت حوالي الساعة 8 مساء وكانت العمارة مظلمة تماما وحسب العنوان ان المذكور يقيم في الطابق الرابع وتوكنا ان وصديقي للطلوع للعمارة عبر السلم والله كان الخوف يتملكنا وكان ظلاما دامس في السلم وتحس في اي لحظة ان تاتيك مصيبة عبر السلم وعندما وصلنا للطابق الرابع شاهدت نور ينبعث من احدي الشقق انها الشقة الوحدة في العمارة المنارة فطرقنا الباب فاذا بصوت حركة داخل الشقة وقام من بالداخل بفتح باب الشقة انسان كثيف الشعر ويرتدي بنطلون وقميص باليات ومتسخات بالاسمنت وشاهدت صديقي يحضن الرجل وسلام بالدموع ورحب بنا الرجل وادخلنا الي شقته التي كل شيئا فيها بالي حتي سريره الذي ينام فيه وكل ملابسه في سريره فقال صاحبنا الي ابن خالته اين تعمل ؟ وما الذي يجبرك علي هذا الوضع؟ فكانت اجابته اعمل طلبة بالبناء والجبرني علي هذا الوضع انت تعرف كراهيتي للسودان وقال له صاحبنا يا اخوي والدتك واخواتك يبكبن عليك وهن يطلبن حضورك لهن لانك انت الكبير وهن في حوجة لك فقال له انا لم اقصر في حقهن وارسل لهن ملابس مع المسافرين للسودان وفي نهاية الكلام انه لم يرجع للسودان0 وانا قلت لصديقي نذهب الي شقتي ولكن صديقي رفض وقال انه سينوم اليوم مع ابن خاله ووعدني بزيارتي صباح اليوم التالي واستودعتهم وخرجت وبالفعل حضر لي صديق في اليوم التالي مع ابن خالته في شقتي وكان بحالة مغايرة لحالته بالامس ونظيفا ومهندما وجلسنا مع بعض وكنا نحاول اقناعة بالسفر للسودان وكل محاولتنا ذهبت ادراج الرياح وطلبت منه ان يقيم معنا في شقتنا واننا لا نريد منه فلسا ولكنه رفض بحجة انه لايقيم مع طلبه وبعدها سافر صديقي وفي ذلك الوقت تمنيت ان يكون معي كراج ابن عمتي الهمباتي ولكن اكرمت عين صديقي ابن الاسرة العريقة في الحصاحيصا الذي قطع المسافات من اجل ابن خالته ولكنه فشل مع شخص نزعت الرحمة من قبله كل الود |
اقتباس:
اها ده ياكمال زولنا تب وده العايز جلد من الساس للرأس وياهو ده الزول الماعنده رحمة ومابستــــــــاهل الرحمة |
اقتباس:
تحياتى البرنس انت حكيت عن صاحبك (ع) اقوم احكى ليك عن شخص كنا تحت سقف واحد لمدة ثلاث سنوات ونصف (جمهورية تنزانيا - زنجبار) فتح الله عليه وكان يمتلك تجارة برأس مال اكثر من 100 الف دولار (صدق او لا تصدق) عندما حضر الى الجزيرة وجدنا امامه جزيرة مساحتها 80 ميل مربع والمدينة ترقد على طرف الجزيرة (تخيل مساحتها) كان يمتلك سيارتين واحدة الصباح واحدة المساء ... صاحبنا متزوج وله اثنان من الابناء وكل المتزوجون ينتظرون الاجازات فى السودان بفارغ الصبر ليحضروا ابناءهم لان المعيشة فى زنجبار كانت اكثر رخاء من المعيشة فى بنكى هاوس ... اصبح صاحبنا من ديسكو لى ديسكو نصحوا لصلات الفجر فيصحو اثر حركتنا ليتناول علبة (.......) وهكذا ... التقى باحدى بنات جزر القمر (ملونة) متزوجة فاصبح يمتعض من ذكر ابناءه جاهدنا معه بكل ما نملك من ادوات ولكنه كما هو ... لا يتصل لا يابه لحالهم ... فى يوم وصل خطاب من زوجته عن طريق اخى رحمه الله (كان يقوم بالواجب سراً تجاه ابنائه) و اذكر اننا قدرنا ان نطلع على الرسالة حتى لا يدس عنا ما بها وكان هذا بعد ثلاث سنوات او يزيد فاتفقنا على ذلك وكنا اربع من السودانين احدنا مدير منظمة واخى والثالث تاجر بالسوق يسكن معنا ... صدق حدثنا فقد كان الخطاب يحمل خبر اصابة ابنه بالسرطان تركنا المهمة لاخى فهو الاقرب اليه واذكر عندما احضره وجلس معه بمكتبه وكنا نجلس خارجا ننتظر ان يخرج لنواسئه فاذا به يخرج وهو مبتسم (قال شنو عشان دايرنى اجى) ... تركت زنجبار بعد فترة وجيزة وبمتابعتى لاخباره عرفت انه حضر الى السودان لمدة خمسة اشهر وهاجر مع (.....) الكومورية الى امريكا ... ولا تعليق .... والله اخى البرنس النمازج الموجعة كثيرة جدا ... ونمازج صديقك (ع) ايضاً موجودة ونعتز بها وبسودانيتهم ... اعتزازى استاذ الهمباتى عليك بالعنج الما غنج |
اقتباس:
|
اقتباس:
|
اقتباس:
التلفون اعلاه يرن ولا أحد يجيب مودتي |
اقتباس:
|
اقتباس:
|
الاخ العزيز الهمباتي
سلام اخضر مآسي الغربة وبالتحديد موضوع البوست جديرة بالنقاش , لكن دعني اركز على عصب الفكرة المتمثل في فرد برامج التلفاز الباحثة في شئون المغتربين لمساحات لمن ولوا الادبار عن اهلهم اب وام وزوجة وابن واخ واخت سنوات وسنوات تقبل القسمة على الرقم (9) , اتفق معك اخي همباتي بان البرنامج نسخة مشوهة , هو بعض من كل واضح الفكرة والاهداف . استثناءات قليلة جداً تمنع التواصل مع الاهل دونها موات في الهمة والانتماء ومؤشر لخلل في التربيةوالنضج الفكري والعاطفي0 تحياتي همباتي |
| الساعة الآن 07:39 PM. |
Powered by vBulletin Version 3.8.7
Copyright ©2000 - 2024, Jelsoft Enterprises Ltd
HêĽм √ 3.1 BY: ! ωαнαм ! © 2010